Rɔmɛ̀n-anmàn-bɔ̀ 8 的热门经文

分享

Bɔ́ nyri ɔmu le ɛci hɔ̀n lɔ fɛn dú anvrɛn tán anwrɔn hɔ̀n léyi Ɔwɔ kɛ cüɛ̀n nɔn, mán anwrɔn hɔ̀n léyi nɛ̀n bi kè dú n'ankɔnda kɔ̀hɔ̀n lɔ mɛ̀n nɔn.

Hɛ̀ɛ̀, mɛ̀n ẅɛn esɛ́ le eci zriɛmɛ́n ke sɩ̀ ẅɛn bɔ̀ kɛ̀ sɔhɔ́ n'ɛcüɛ̀n lɔ mɛ̀n: owù mán, ɛwúvà mán, Ɔwɔ-kùyüre-bɔ̀ hɔ̀n mán, ɛkɔrɛ̀levri-bɔ̀ nyàntɛn hɔ̀n mán, anhobɩ́ kɔrɛ̀srɔn hɔ̀n lɔ mán, ɛnvra léyi bɔ̀ dú ɛmɛ̀n nɔn mán, ɛnvra léyi dú ezì kɛ và nɔn mán, ɛwú-cüì-hɔ̀n lɔ mán, ɛnhi tɛn hɔ̀n lɔ mán, eci nyàntɛn léyi Ɔwɔ hán nɔn mán, eci-ẅì zriɛmɛ́n ke sɩ̀ ẅɛn bɔ̀ mrìmrì kɛ̀ sɔhɔ́ ɛcüɛ̀n léyi Ɔwɔ ẅɛn bɔ́ ɛwú, Zhezü Krisì, bɔ́ Ɛẅɛnwrɔn kruhú nɔn.

Ɔmu zri lɔ, Ɛnhɛ́n Prɔnprɔn mán kɛ wá bɔ̀ ɛkɔrɛ̀, ɔmuhi bɔ̀ dú ɛjɛ́-bɔ̀ nɔn. Annanwɔrɛ mɛ̀n lɔ, bɔ́ sɩ́ nyri sɛ́n Ɔwɔ kɛ hán ɔmu le ke ji nɔn; tɛ́n Ɛnhɛ́n Prɔnprɔn dùku kɛ sɛ́n Ɔwɔ kɛ tán bɔ̀ kɩ kɛ ẅɛn ɛnhyɔ̀bɔ̀-dì léyi ankà-dɔ̀ zriɛmɛ́n ke sɩ̀ cɔ́ ɛwú rɔ́ nɔn.

Ankà tán de bɔ́ lɛ dɔ̀ kè fɛ́ ɛwú nɛ́n? Ke dú kɛ Ɔwɔ ke dú bɔ́ tɛn hô, antɔnwrɔn de kɛ lɛ kɛ́n bɔ̀ ezì nɛ́n?

Zɛtɛn zɛtɛ̀ lɔ, nwùbɔ̀ ke sɩ̀ vru dù kɛ̀ tán anwrɔn hɔ̀n léyi dú Zhezü Krisì bɔ̀sɔ̀ lɔ mɛ̀n nɔn.

Ke dú kɛ bɔ́ hán bɔ́ ɛnbɔrɛmɛ̀n ci hɔ̀n léyi bɔ́ ji nɔn hô, bɔ́ hɔ́n owúemɛ̀n; tɛ́n ke dú kɛ bɔ́ hán Ɛnhɛ́n Prɔnprɔn ci hɔ̀n léyi ke ji nɔn hô, bɔ́ hɔ́n ɛwúvà-kɔrɛ̀ mɛ̀n mán anwɔwɔ mɛ̀n.

Tɛ́n eci ndɔ lɔ fɛn mɛ̀n, b'ɔkɔ̀nkà lɔ sá nmù, ɔwrɔn léyi cüɛn bɔ̀ nɔn, n'ebɩmɛ̀n.

Me tro le bɔ́ ejüe-dì hɔ̀n léyi dú ɛnvra ndɔ lɔ mɛ̀n nɔn, ke sɩ̀ krɔn eci-zrɔ léyi Ɔwɔ kɛ lɛ hán bɔ̀ bɔ̀ kàn nɔn.

Antɔnwrɔn de kɛ lɛ mrɛ́n bɔ̀ Krisì cüɛ̀n lɔ mɛ̀n kɛ̀ sɔhɔ́ nɛ́n? Ejüedì kɛ lɛ hán tɛ̀, kale ankà-tro, kale owú-gbànkàn, ɔmùanwù, ɛmìan, muzhie, owùɛ?

Kɩ Ɔwɔ léyi kɛ kán ɛnbɔrɛ hɔ̀n lɔ mɛ̀n nɔn, ke nyri eci léyi Ɛnhɛ́n Prɔnprɔn ke ji kɛ̀ sán, ɔmuhi Ɛnhɛ́n Prɔnprɔn kɛ sɛ́n tán ankaẅì-bùtan-ẅɛn-bɔ̀ hán ɔmu le Ɔwɔ kɛ cüɛ̀n nɔn.

Anwrɔn lɔ fɛn léyi Ɔwɔ Hɛ́n kɛ nyrɔn nɔn dú Ɔwɔ-ẅì hɔ̀n.

Annanwɔrɛ mɛ̀n lɔ, anwrɔn hɔ̀n léyi y'ɛwúvà kɛ crɛ nyan yɔ nɔn, yɔ hán y'ɛnbɔrɛmɛ̀n ci hɔ̀n lɔ; tɛ́n anwrɔn hɔ̀n léyi y'ewúvà lɔ dú Ɛnhɛ́n Prɔnprɔn mɛ̀n nɔn, yɔ wá Ɛnhɛ́n Prɔnprɔn ci hɔ̀n lɔ esùva.

Ɔwɔ kè sɩ̀ ẅɛ̀n n'ɛnẅì kɛ̀ sɔhɔ́, tɛ́n nɛ̀n bɩ́ yi nɛ̀n tán ye wrì, bɔ́ lɛ fɛn bɔ́ ɛkruhú: anhɔntan kɛ́ nɛ́n sɩ̀ tán bɔ̀ eci lɔ fɛn mán n'ɛnẅì mɛhiɛ?

Ɔwɔ Hɛ́n dùku kɛ dɔ́ bɔ́ ɛnhɛ́n lɔ le, bɔ̀ dú Ɔwɔ-ẅì hɔ̀n. Bɔ̀ dú n'ɛẅì hɔ̀n, ke dú ɔmu lɔ hô, bɔ́ mán bɔ́ lɛ cɔ́ anvrɛn léyi Ɔwɔ wá nɛ́n fɛcüè ɔmùan, bɔ́ mán Krisì mɛhi bɔ́ le dú n'anvrɛn lɔ mɛ̀n; ɔmuhi ke dú kɛ bɔ́ mán Krisì mɛhi bɔ́ kán ɛgbàn hô, bɔ́ mán nɛ́n mɛhi bɔ́ le dú n'eci-zrɔ lɔ mɛ̀n.

Anwrɔn hɔ̀n léyi y'ɛnbɔrɛmɛ̀n ci hɔ̀n lɔ ẅɛn yɔ sɔhɔ́ Ɔwɔ kɔhɔ̀n-hán mɛ̀n nɔn, yɔ dú Ɔwɔ gbri-bɔ̀; yɔ sɩ́ sɩ́ y'edomɛ̀n ɛnhi Ɔwɔ nyànmàn tɛ̀sɛ̀n, kɩ yɔ sɩ̀ hán rɔ́ mán.

Ɔwɔ kɔrɛ̀-ci mumù lɔ fɛn kɛ vrá edù cüìcüìemɛ̀n nbì léyi Ɔwɔ kɛ lɛ hán n'ɛẅì hɔ̀n kɛ kán n'eci-zrɔ lɔ nɔn.

Annanwɔrɛ mɛ̀n lɔ, bɔ́ vru bɔ́ nyri zɛtɛ̀ lɔ le, Ɔwɔ kɔrɛ̀-ci mumù lɔ fɛn dú nwàn srɔ́n mɛ̀n mán ɛgbànkan mɛ̀n, hán ɛnnyɔnwrɔn léyi dú ɛnẅìbîemɛ̀n nɔn hɔ́.