Nǫ̀htsı̨ Nı̨htł'è Tlicho Genesis and New Testament  Canadian Bible Society 

Tlicho Genesis and New Testament text: © Canadian Bible Society 2003, 2008; audio: © Dogrib Translation Committee & Canadian Bible Society, 2003.

Nǫ̀htsı̨ Nı̨htł'è

Zezì godı t'à edecheekeè hoghàgoehtǫ, hadı, “T'aats'ǫǫ̀ yaahtı ghǫ naaht'è-le.
“Kǫ̀ta ı̨łè dǫ-sınìyaehtıı-dǫǫ̀ nàdè. Eyı dǫ sìı Nǫ̀htsı̨ ts'àejı̨-le, eyıts'ǫ dǫ sı ts'ǫ̀ nıɂà-le. Ts'èko ı̨łè wegà dǫzhìı whìle, ededı̨ sı eyı kǫ̀ta nàdè. Eyı ts'èko t'aats'ǫǫ̀ dǫ-sınìyaehtıı-dǫǫ̀ ts'ǫ̀ eghàedà xè hayèhdı yeghǫnàdaetì, ‘Dǫ segha hoìla hòèhtsı̨ı̨ sìı segha ehkw'ı wesınìyaąhtı,’ yèhdıì yeghǫnàdaetì.
“Edlaı̨wa ts'ǫ̀ eyı ts'èko k'èhoı̨ɂǫ-le. Nǫǫdea dǫ-sınìyaehtıı-dǫǫ̀ dıı hanıwǫ, ‘Nǫ̀htsı̨ ts'àehjı̨ nıìle, eyıts'ǫ dǫ sı gıts'ǫnıhɂà nıìle, hanìkò dıı ts'èko t'aats'ǫǫ̀ sek'adaawo ghǫ nat'è ha dehwhǫ t'à wegha ehkw'ı eghàlaehda ha. Hawèhłà-le nı̨dè sets'ǫ̀ eghàedà t'à weghànìıhtsǫǫ̀ ahde ha,’ hanıwǫ,” Zezì hadıì goxè godo.
Eyı godı weghàà Zezì edecheekeè gots'ǫ̀ hadı, “Dǫ-sınìyaehtıı-dǫǫ̀ wejıı dàdıı sìı wedaànıahdè. Dǫ-sınìyaehtıı-dǫǫ̀ wejıı sìı hanì ehkw'ı eghàlaeda nı̨dè Nǫ̀htsı̨ dǫ edegha nàwhehtsı̨ı̨ sìı asį̀į̀ gogha denahk'e ehkw'ı eghàlaeda ha dahwhǫ? Dzęę̀, toò Nǫ̀htsı̨ ts'ǫ̀ nàdageetì nı̨dè whaà nageèhɂı̨į̀ agǫ̀ǫ̀hwhǫ ha nì? Ehkw'ı anaxèehsı̨, ekòet'ıì gogha ehkw'ı sıìnagodle ha hǫt'e. Hanìkò Dǫ-wet'àaɂàa-deè nììtła nı̨dè asį̀į̀ wegha dıı nèk'e dǫ Nǫ̀htsı̨ ghǫ gınì nàtso ha sǫnı?” Zezì gòhdı.

Dǫ mǫ̀hdaa ehkw'ı geeda edegeewǫ xè dǫ nahk'e gı̨ı̨lı̨ı̨ edegeewǫ t'à Zezì goxè godo, hadı, “Dǫ nàke Nǫ̀htsı̨kǫ̀-gocho yagehtı ha goyageède. Dǫ ı̨łè Pharısee hǫt'e, ı̨łè t'aa sǫǫ̀mba-nàhtsį̀ı̨-dǫǫ̀ hǫt'e. Pharısee ı̨daà nàwo, edeghàhodì xè yahtı, hadı, ‘Senǫ̀htsı̨, dǫ hazǫǫ̀ gıxèht'eè ehda-le t'à, masì neehwhǫ. Egeeɂį̀ı̨-dǫǫ̀, hołı̨ı̨-hogehtsı̨ı̨-dǫǫ̀, ts'èko-k'alagedèe-dǫǫ̀, dıı sǫǫ̀mba-nàhtsį̀ı̨-dǫǫ̀ kò eyı laht'e-le. Įłè dzęahta nàakeè edehgǫ, eyıts'ǫ t'asìı sets'ǫ̀ at'ı̨ı̨ sìı wets'ǫ hoònǫ ı̨łè Nǫ̀htsı̨ ghàehɂà,’ hadıì yahtı.
“Ekò sǫǫ̀mba-nàhtsį̀ı̨-dǫǫ̀ ı̨dè nàwo, ı̨dòo k'eet'į̀ ha kò dìì. Edezhį̀į̀ ts'aht'ı xè hadı, ‘Senǫ̀htsı̨ etesenèeɂı̨, hołı̨ı̨-hohtsı̨ı̨-dǫǫ̀ aht'e,’ hadıì yahtı.
“Ehkw'ı anaxèehsı̨, eyı sǫǫ̀mba-nàhtsį̀ı̨-dǫǫ̀ edekǫ̀ ts'ǫ̀ naèhtła kwe Nǫ̀htsı̨ nadąą̀ ehkw'ı awììdlà hǫt'e. Ekò Pharısee wexè hagòjà-le. Dǫ wet'àaɂàa edeewǫǫ sìı į̀į̀zhaelı̨į̀ awedle ha, eyıts'ǫ dǫ k'èeweèt'ı̨ lanì edaa sìı wet'àaɂà awedle ha,” Zezì gòhdı.

Įłàà chekoa nechà-lea Zezì ts'ǫ̀ gogeèwa, edılà gok'e ayele ha gı̨ı̨wǫ t'à. Hanìkò wecheekeè gogıaɂı̨ ekò haaht'ı̨-le gògedı t'à nàgogeeɂǫ. Hanìkò Zezì chekoa gots'ǫ̀ gode, “Jǫ aahde,” gòhdı. “Chekoa sets'àgııdeè agıahłe,” edecheekeè gòhdı, “Chekoa sets'agıahɂǫ-le. Amìı dıı chekoa lagı̨ı̨t'ee sìı Nǫ̀htsı̨ Wenàowoò k'ę̀ę̀ hòɂǫǫ gıts'ǫ hǫt'e. Ehkw'ı anaxèehsı̨, amìı chekoa lanì Nǫ̀htsı̨ Wenàowoò k'ę̀ę̀ hòɂǫǫ edegha yį̀į̀hchì lenǫsıı, ekǫ goyaetła ha nıìle,” Zezì gòhdı.

K'àowo ı̨łè Zezì daehke, “K'àowo nezı̨ı̨, ayìı dàhłà nı̨dè welǫ whìle ts'ǫ̀ ehdaà asedle ha?” yèhdı.
Zezì yets'ǫ̀ hadı, “Ayìıha k'àowo nezı̨ı̨ sį̀ı̨dı? Dǫ nezı̨ı̨ gǫ̀hłı̨ nıìle; Nǫ̀htsı̨ zǫ nezı̨ hǫt'e. Moses wenàowoò deè wek'èı̨zǫ ne: ‘Ełexè hołı̨ı̨ hoahtsı̨-le, dǫ ełaahwhı-le, aahɂį̀-le, dǫ ghǫ hoahts'ì-le, naxıtà eyıts'ǫ naxımǫ gıts'ǫ̀ nezı̨į̀ aahda,’ ” Zezì yèhdı.
Eyıt'à dǫ hadı, “Chekoa ehłı̨ gots'ǫ eyı nàowo hazǫǫ̀ wek'èɂaeht'è hǫt'e,” hadı.
Zezì dǫ hadıì yıìkw'o ekò hayèhdı, “Įłaà t'asìı ı̨łè zǫ hanelà-le. T'asìı hazǫǫ̀ nets'ǫ sìı neghǫ nàedì gà eyı sǫǫ̀mba sìı hǫt'ıì dǫ-teèt'ı̨ı̨ ghàı̨le. Hanì-ı̨dè yak'e t'asìı nechàa nedawheɂǫ ha hǫt'e. Eyı tł'axǫǫ̀-ı̨dè sek'èè k'èętło,” Zezì yèhdı.
Eyı dǫ Zezì hadıì ıìkw'o ekò ts'ǫǫ̀nıwǫ lajà, dǫ ahxee-deè elı̨ t'à. Zezì hotıì yeghàı̨dà xè hadı, “Dǫ ahxee sìı Nǫ̀htsı̨ Wenàowoò k'ę̀ę̀ hòɂǫǫ goyaetła ha wegha wèhoedı-le hǫt'e! Dǫ ahxee sìı Nǫ̀htsı̨ Wenàowoò k'ę̀ę̀ hòɂǫǫ goyaetła ha wegha dìì hǫt'e. Eyı nahk'e tıts'aàdìıcho datı̨htł'à-k'è deghaetła gha sìı denahk'e dìì-le hǫt'e,” gòhdı.
Dǫ Zezì hadıì egıìkw'oo sìı hagedı, “Hanì-ı̨dè amìı edaxàweètı̨ lì?” gedı.
Zezì gots'ǫ̀ hadı, “Ayìı dǫ gıgha dìì sìı Nǫ̀htsı̨ wegha dìì-le hǫt'e,” gòhdı.
Peter, Zezì ts'ǫ̀ hadı, “Goxı̨ nek'èè k'ets'edè ha ts'ı̨ı̨wǫ t'à t'asìı hazǫǫ̀ wedę ats'ı̨ı̨là ı̨lè!” yèhdı.
Zezì edecheekeè gots'ǫ̀ hadı, “Ehkw'ı anaxèehsı̨, amìı Nǫ̀htsı̨ Wenàowoò ts'ıhɂǫ̀ edekǫ̀, edets'èkeè, edechı, edetà, edemǫ, eyıts'ǫ edeza gots'ǫǫ̀ naèhtła k'èxa dıì edaa sìı t'asìı weɂǫ̀atłǫ weghǫ̀zhe ha, eyıts'ǫ ı̨daà welǫ whìle ts'ǫ̀ edaa eyı sı weghǫ̀t'à ha,” Zezì gòhdı.

Zezì edecheekeè whatsǫǫ̀ gots'ǫ̀ hadı, “Kǫ̀ta Jerusalem ts'ǫ̀ ts'eedè ha. Nakwenàoɂǫǫ t'asìı hazǫǫ̀ Dǫ-wet'àaɂàa-deè ghǫ egı̨ı̨tł'èe sìı hazǫǫ̀ wek'ę̀ę̀ agode ha. Eładı̨ı̨ dǫǫ̀ tł'aàgıhtè ha. Gık'adaedè xè gıghàedlò ha, gık'e geezè ha, nàgeehkwa ha eyıts'ǫ ełaàgıìhwhı ha, hanìkò taı dzęę̀ nı̨dè naìdà ha,” Zezì gòhdı.
Hanìkò wecheekeè eyı hazǫǫ̀ yeghǫ goı̨dee sìı gınıedì-le, dàdıì-adıı sìı gıgha deɂı̨į̀ wheɂǫ t'à.

Zezì kǫ̀ta Jerıcho ts'ǫ̀ gǫǫwà-lea nììtła ekò dǫ wedaà goìlee tı̨lıbàa wheda xè t'asìı gha nàdaetì. Dǫ łǫ k'egohwho goìkw'o t'à dagoehke, “Ayìı dàgot'ı̨?” gòhdı. Dǫ gıts'ǫ̀ hadı, “Nazareth got'ı̨į̀ Zezì dııdęę̀ naetłe,” gıìhdı.
Eyıt'à dǫ wedaà goìlee naìdzeh xè hadı, “Zezì, k'àowocho Davıd Weza, etesenèeɂı̨!” hadıì naìdzeh.
Dǫ Zezì nakweè gıadèe sìı “Ts'èwhı̨į̀ aąt'e,” gıìhdı, hanìkò k'èdaà hòtł'ò naìdzeh, “K'àowocho Davıd Weza, etesenèeɂı̨!” hadı.
Zezì nììtła, dǫ gots'ǫ̀ hadı, “Jǫ sets'ǫ̀ weahchı,” gòhdı. Dǫ yets'ǫ̀ nıwà-le nììtła ekò, Zezì dayeehke, “Ayìı negha dàhłe ha seneehwhǫ?” yèhdı.
“Sets'ǫ̀ K'àowo, segha xègaat'ı̨ ha dehwhǫ,” dǫ yèhdı.
Zezì yets'ǫ̀ hadı, “K'eı̨t'į̀ anede! Negha ehkw'ı-ahodı t'à k'aàt'ıì anejà,” yèhdı. Ekòet'ıì k'eet'į̀ ajà. Zezì k'èè naèhtła xè Nǫ̀htsı̨ ghàsǫedı. Dǫ hazǫǫ̀ gıaɂı̨ t'à ededı̨ sı Nǫ̀htsı̨ ghàsǫgeedı.

聆听 Luke 18