If you would like a copy of this version please contact info@davaraudiobibles.org

Lhomi New Testament

हुनी ङीन् च्‍यीक् गनेसरेत्‍की छो़ छीगदु को़न्‍ज्‍योक्‍की केच्‍च्‍य नेन्‍दु मी छेत्‍मीत् येशु च्‍याल युङ बेत्। ॱनी हुदु युङे मी घयेत् दीबे खोङ्‌ल कोदुम् ज्‍यब बेत्। ॱनी उन नबागी ढु तोङ्‌ब ॱङी यो़प्‍प खोङ्‌गी थोङ बेत्। हुगी नबा दीब फच्‍चो़त्‍न जाली टी़क्‍कीन् यो़प्‍प बेत्। हुगी ढु दी च्‍यीक् शीमोन्‍गी हीङ्‌गो़प्‍प बेत्। ॱनी येशु हुगी ढु दील स्‍युन खोङ्‌गी शीमोन्‍ल ढु दी छो़ थोक्‍ल फच्‍चो़त्‍ल ॱसोर्तु ची़प्‍प बेत्। हुनी खोङ्‌गी ढु दीगी नङ्‌नी मी घयेत्‍ल ॱलोप्‍स ज्‍यप्‍न टेप्‍प बेत्।
हुनी खोङ्‌गी शीमोन्‍ल खीत्‍रङ्‌गी न सीन्‍ज्‍येमे जाली दी फच्‍चो़त्‍ल फीन्‍न छ्‌यु तीङ्‌रीङ्‌सल टम्‍न स्‍योक् सीन्‍न ॱङाब बेत्। ॱनी शीमोन्‍गी लेल्‍ल चयेलम दङ् ङीक्‍की छेङ्‌गङ् टेत् च्‍येत्‍न आक्, ङीत्‍ल न ॱस्‍युली थीप्‍मोङ्। ॱनी हीन्‍न अक्, नीज्‍यरङ्‌गी हुन्‍दुक् ॱसुङ्‌नी, ङ टम्‍न स्‍योक्‍केन् झ्‍यीब बेत्। हुनी हुब फीन्‍न जाली दी टम्‍नी, न छेत्‍मीत् सीम्‍ब बेत्। ॱनी जाली दी म दीरङ् छ्‌येच्‍च्‍येम ॱयेङ बेत्। हुनी ॱअल ॱमत् छयल ढु ॱयोङ्‌ल यो़प्‍पे दगु दीबल ॱस्‍योक् सीन्‍न लाद ज्‍युर बेत्। हुनी हुब दगुल युङ्‌न, ढु ॱङीबु दी ने टेक् घेङ्‌न ढु दीरङ् भीङ्‌ज्‍येम ॱयेङ बेत्।
ॱनी हीगो थोङ्‌नी शीमोन् पत्रुस्‍की छो़ छीग दीदु येशुल छ्‌यक् छेन ङ ॱनी दीक्‍च्‍येन् हीन्। चोव ज्‍यीन्‍दक् नीज्‍यरङ् ङ च्‍यानी भीन ॱयोङ्‌ल झ्‍यो़र्रो झ्‍यी झ्‍यीब बेत्। नुक्‍मे न मङ सीम्‍ब थोङ्‌नी शीमोन् धङ् शीमोन्‍गी दगु दीब धङ् रोरङ्‌गी ले च्‍यीक्‍की छ्‌यीट्‌टो जब्‍दीगी भु याकुब् धङ् युहन्‍ना हुब कुरीक् ॱह लेब बेत्। ॱनी येशुगी शीमोन्‍ल रङ् ज्‍यीब छीर मत् झ्‍यीत्। हुन्‍दो रङ् न सीङ्‌गेन् हीगो डस्‍सी हीनी झ्‍यीब दी ह रङ् मी घयेत् थरे लम्‍ल सीन्‍न ठीक्‍केल्‍ल युङ्‌गेन् बेत् सीन्‍न ॱसुङ बेत्। हुनी शीमोन् धङ् रोरङ्‌गी दगु छ्‌यीट्‌टो दीबे रोरङ्‌सो़ ढु दी हुदु छो़ छीगदु ढी़त्‍न कुरीक् स्‍यक्‍नी हुनी रोरङ्‌सो येशुगी ॱलोप्‍टुक्‍ल खोङ्‌दङ् दल टप्‍नर बेत्।

हुनी सार् च्‍यीक्‍न जी लोप् सीन्‍नरे मी च्‍यीक् यो़प्‍प बेत्। ॱनी हुगी जीस्‍सो़ दीगी येशु थोङ्‌नी हुगी खोङ्‌ल छ्‌यक् छेन हीन्‍दुक् झ्‍यीब बेत्। चोव ज्‍यीन्‍दक् नीज्‍यरङ्‌गी थुल यो़त्‍न, ङे नज हीगो ढक्‍न चङ्‌मल सो छुगेन् बेत् सीन्‍न स्‍यी़ब बेत्। हीनी येशुगी खोङ् रोरङ्‌गी लक्‍प दी च्‍यङ्‌न हुगी जीस्‍सो़ दील रेक्‍न रङ् ढक्‍तु ची़च्‍च्‍ये ॱनो़ब यो़त्। रङ् हीगी नज हीनी ढक्‍न चङ्‌मल ज्‍युक्‍च्‍यीत् सीन्‍न ॱसुङ बेत्। हीनी ॱस्‍यर्च्‍यक् हुगी जी नज दी जेङ् ढक्‍नर बेत्। हुनी येशुगी हुल रङ् ढक्‍पे केच्‍च्‍य हीगो ॱसुल आक् ॱमत् ॱस्‍यो़प्‍प, स्‍युङ्‌ज्‍योङ् छ्‌यो़प्‍पो़न् च्‍याल ज्‍युक्‍ल रङ् दीम्‍बरङ् ढक्‍प दी मी कुरीक्‍की ॱह घोज्‍ये यो़प्‍पल रङ्‌गी सी़बु दी छ्‌यो़प्‍पो़ल्‍ल तो़ल्‍लेत्। हुनी मोशागी कल यो़प्‍पल रङ्‌गी नज ढक्‍न चङ्‌मल ॱसोङे ढीक्‍ल को़न्‍ज्‍योक्‍ल छ्‌यो़प्‍प पुलेत् सीन्‍न ॱङान तङ बेत्। ॱनी हीन्‍न अक्, येशुगी ढीक्‍की केच्‍च्‍य हरुङ् ज्‍यीक्‍तु धर्नर बेत्। हुनी हुदु खोङ् च्‍याल तम् नेङ्‌गेन् धङ् नज ढक्‍तु ची़त्‍तु मी छेत्‍मीत् जोम्‍न युङ्‌गो़प्‍प बेत्। ॱनी येशु यरी हुगी मी दीबदङ् भीन मी मीस्‍स पक्‍क झ्‍यङ्‌दङ्‌ल रोरङ् च्‍यीक्‍पु ॱसुव तोप्‍तु डोगो़प्‍प बेत्।

हुनी ङीन् च्‍यीक् खीम् च्‍यीक्‍तु येशुगी ॱलोप्‍स ज्‍यप्‍न टो़प्‍पे यङ्‌ल हुदु फरीसी धङ् छ्‌यो़डीम्‍गी चयेलम घयेत् युङ्‌न नेङ्‌गो़प्‍प बेत्। ॱनी हुब घयेत् गालीलागी युगङ् घयेत्‍नी, यहुदीयागी यु घयेत्‍नी धङ् यरुशलेम्‍नी युङे मी हीङ्‌गो़प्‍प बेत्। हुगी यङ्‌ल येशुल नेप्‍प ढक्‍तु ची़त् छुगेङ्‌गी ॱस्‍यीक् चोव ज्‍यीन्‍दक् च्‍यानी थोप्‍न यो़प्‍प बेत्।
ॱनी हुदु मी घोङ्‌रीय च्‍यीक् तेन्‍दङ् डक्‍च्‍यक् खुर्न युङ बेत्। हुगो ढक्‍च्‍येल येशुगी ढुङ्‌दु युङ् छुब झ्‍यीब बेत्। ॱनी मी मङ् ढानी, नङ्‌ल स्‍युक् दीरङ् ॱमत् छुब बेत्। हुनी खङ्‌दोक्‍ल जेन खङ्‌दोक्‍की इट्‌ट दी ॱलोक्‍न हुनी मल्‍ल घोङ्‌रीय दी तेन् दीदङ् डक्‍च्‍यक् ज्‍यो़न् ज्‍यो़ल्‍ल मी घयेत् यो़स्‍स येशुगी ढुङ्‌दु तङ बेत्। ॱनी हुबे छ्‌य स्‍यक्‍न हुन्‍दुक् झ्‍यीप्‍प दी येशुगी ॱह घोनी हुगी घोङ्‌रीय दील खोङ्‌गी ॱवे दगु, रङ्‌गी दीक्‍प घयेत् ह धक्‍सोङ् सीन्‍न ॱसुङ बेत्। ॱनी हीगो हुगी चयेलम धङ् फरीसी दीबे घोनी हुबे ॱसीम्‍ल हीगी मी हीगी रोरङ् घन्‍ड हीन् ॱनो़ब ॱसम्‍गो़प्‍प ब अक्? हीगी केच्‍च्‍य हीगो को़न्‍ज्‍योक्‍ल ॱमो़म्‍बी़त् तोङ्‌गेङ्‌गी केच्‍च्‍यल डोगेन् बेत्। दीक्‍प धक्‍तु ची़त् छुगेन् को़न्‍ज्‍योक् मेन्‍द, ॱयोङ् ॱसु दी यो़प्‍प बेक्‍क? ॱनो़बे ॱसम्‍ल खुर बेत्। ॱनी हुबे ॱसम्‍ल ॱनो़बे केच्‍च्‍य दी येशुगी जेङ् ॱह घोनी खोङ्‌गी हुबल खीक्‍की घन्‍डल नुक्‍मे ॱनोक्‍सम् तोङ्‌गेन्। रङ्‌गी दीक्‍प धक्‍सोङ् सीर धङ् घोङ्‌रीयल लोङ्‌ल छ्‌यम् सीर हीगो घङ्‌गो ले ॱल्‍हा बेक्‍क? कोलीमीगी ॱरेबुल जम्‍बुलीङ्‌दु दीक्‍प धक्‍तु ची़च्‍च्‍येमे ॱवङ् खुङ् यो़प्‍प खीत्‍रङ्‌गी ॱह घोज्‍ये यो़प्‍पल ङे तो़ङ्‌गी सीन्‍न घोङ्‌रीय दील रङ्‌ल ङ हीगो सीक्‍केन्। रङ् लोङ्‌ल रङ्‌गी तेन् दी इक् खुर्ल खीम्‍ल लोक्‍ल ज्‍युक् सीन्‍न ॱसुङ बेत्। हुनी ॱस्‍यर्च्‍यक् हुगी घोङ्‌रीय दी कुरीक्‍की थोङल ॱहोक् लोङ्‌न रोरङ्‌गी तेन् दी खुर्न को़न्‍ज्‍योक्‍ल तो़प्‍प पुगील्‍ल खीम्‍ल लोक्‍नर बेत्। हीनी हुगी मी घयेत् दी गन्‍दीक्‍म ॱह लेन ज्‍यीक्‍टक् लङ्‌न को़न्‍ज्‍योक्‍ल तो़प्‍प पुब बेत्। हुब रोरङ्‌सो नङ्‌दु हरीङ् न हज्‍यरङ्‌गी यीक् छ्‌यीम्‍मी़ ले च्‍यीक् थोङ्‌ज्‍युङ् झ्‍यीब बेत्।

येशु हुनी फीन्‍नी तीङ्‌ला लेवी सीक्‍केन् गोलदर् च्‍यीक् गोलदु दो़प्‍प ठेप्‍प बेत्। ॱनी हुल येशुगी ङे ॱलोप्‍टुक्‍ल ॱस्‍योक् सीन्‍न भो़ब बेत्। हुनी हुगी कुरीक् हुदु च्‍यम् स्‍यक् झ्‍यीच्‍च्‍ये रोरङ् येशुदङ् दल टप्‍नर बेत्।
हीनी लेवी दीगी रोरङ्‌गी खीम्‍दु येशु डेन्‍डी़ स्‍यी़न डो़न्‍से छ्‌यीम्‍मु तङ बेत्। ॱनी हुदु गोलदर् धङ् डोम्‍बु ॱयोङ्‌म आक् गज्‍येन् स्‍यालक्‍ल भो़न सगीन् यो़प्‍प बेत्। ॱनी फरीसी धङ् फरीसी छ्‌योगी छ्‌यो़डीम्‍गी चयेलम घयेक्‍की हुगो थोङ्‌नी हुबे येशुगी ॱलोप्‍टुक् दीबल खीत् घन्‍डल गोलदर् धङ् दीक्‍च्‍येन् ॱयोङ्‌म घयेत्‍तङ् कङ्‌ज्‍यीक्‍ल से थुङ् झ्‍यीक्‍केन्? सीन्‍न कोल्‍लोक् ॱलङ बेत्। ॱनी येशुगी हुबल नेप्‍प घयेत्‍ल मेन्‍द, मी ज्‍याबोक्‍मल ॱमेम्‍बा मीत् गो़गेन् बेत्। ङ ॱनी छ्‌यो़डीम्‍ल चीगेन् मी ढङ्‌बु घयेत्‍ल मेम्‍ब, दीक्‍च्‍येन् घयेत् ॱसीम् ज्‍युर्न युङ्‌ज्‍ये यो़प्‍पल भो़त्‍तु युङ हीन् सीन्‍न ॱसुङ बेत्।

ॱनी यङ् हुबे येशुल युहन्‍नागी ॱलोप्‍टुक् धङ् फरीसीगी ॱलोप्‍टुक् घयेक्‍की छम् छम् ॱनुक्‍नेल स्‍युन ॱसुव तोप्‍कुक्। ॱनी नीज्‍यरङ्‌गी ॱलोप्‍टुक् हीब घन्‍डल हुबे लेक्‍मु डस्‍सी मीत् झ्‍यीप्‍प, से थुङ् च्‍यङ्‌ज्‍यङ् झ्‍यीक्‍केन् बेक्‍क? सीन्‍न झ्‍यीब बेत्। ॱनी हीगी लेम्‍बुल येशुगी भालीङ्‌गी यङ्‌ल मक्‍पे छ्‌यीट्‌टो घयेत् ॱनुक्‍नेल स्‍युक् गोगेन् बेत् सीगो़प्‍प? मेम्‍बेत्। नेम्‍बेत् ॱनाङ् मक्‍प हुबदङ् ढेबे धी़ दी ॱलीत्‍नी क, हुबल नङेन् फोक्‍न हुगी ङीङ्‌गी यङ्‌ल ॱनुक्‍नेल स्‍युक्‍केन् बेत्।
ॱनी खोङ्‌गी हरुङ्‌द हुबल ॱलीङ् कोर्न हीन्‍दुक् ॱसुङ बेत्। मी ॱसी़ इक् घो़ घोक्‍पुल घो़ ॱसम्‍बनी च्‍येत्‍न ॱल्‍हेम्‍ब मीत् ज्‍यक्‍केन् बेत्। हुगो घो़ घोक्‍पुल मीत् डीक्‍केन् बेत्। ॱनी घो़ ॱसम्‍ब दी इक् घो ॱमीत् छ्‌यो़त्‍ल डोगेन् बेत्।
मी ॱसी़ इक् पाबोक्‍की भेक्‍क घोक्‍पुल गोङ्‌ज्‍यङ् ॱसम्‍ब ॱमीत् ॱलुक्‍केन् बेत्। ॱलुक्‍न ॱनी, हुगो खो़न भेक्‍क दी भोङ् डोगेन् बेत्। हुनी गोङ्‌ज्‍यङ् दी इक् भो़त् डोगेन् बेत्। हुनी भेक्‍क दी इक् मीत्‍तल डोगेन् बेत्। गोङ्‌ज्‍यङ् ॱसम्‍ब भेक्‍क ॱसम्‍बल ॱलुक् गोगेन् बेत्। गोङ्‌ज्‍यङ् ॱङीङ्‌ब ॱसी़ थुङ्‌गुक्‍क हुगी ॱसम्‍ब ॱमीत् थुङ्। ॱङीङ्‌ब दीरङ् स्‍यीम्‍बा दुक् सीन्‍न सीक्‍केन् बेत् सीन्‍न ॱसुङ बेत्।

聆听 लुका 5