If you have would like a copy of this version please contact info@davarpartners.org

Text: Otuho New Testament 2003, Bible Society in South Sudan Audio: Otuho New Testament Audio Bible 2023, Davar Partners International

Otuho New Testament

Iloŋu nyia Yesu lejifak hula 'tomon harrihai amaji abotie ette isio jihosi aduaran iko agolon ifuhari aminiaŋa buo fe itaŋidariere eŋuati. Attati inyi ifahina isi ittiyeniere Olobie ono Hollum buo fe itaŋidariere aŋuak. Iramak nyia inyi isi jiojio, “Hèyatti obo ariŋ ta adaha hatai ania; kuyya atelek, edee hemimojok, aŋiyo, arobiyaa, ara duadi bu agamis etarrihi. Buo elle ijiŋana itai jio obo aaji, itoŋoti diya many ifuati itai addi jio abore gala nyia. Buo alla abeŋi aati ifuotuni itai, idiahati abore gala nyia, ipipuahara attuduha to hejek hatai oŋida ara esarit jihosi.”
Tania, ofuoi nyia lejifak hulia atua misihi 'daŋ, buo ittittoye Asayyo Ayijok buo fe itaŋidarie aati imasik 'daŋ.


Ninyia itaniŋu Erode, elettok olo Galilea, erre 'daŋ hunyia ihanie, ette egigilo honyi iŋala, nyio, ojiori nyia omuk aati jio ibuhu Yoane etifuotoni batisimo toye. Buo omuk ojiori jio aleyo Elija, buo fe omuk ojiori ibuhu obo olo ekianak Hollum hinyia berien. Attati Erode jiaran, “Aŋotu nyia ni ahou Yoane addi; ŋai buo fe elle inyiak ni olo itayirio eram honyi?” Attati inyi ihum iwahan igonyuna Yesu.


Ocohunie nyia lefahat ette iramana Yesu erre 'daŋ hunyia ihanie isi. Attati inyi iyaru isi hama jio abore anna anya Besseyida. Ninyia itaniŋuni eluluŋi waati eram ania, ette isi ijifaru inyi. Buo inyi ette irraŋuna isi, ette ikiana jihosi eram ono Olobie Hollum buo fe itaŋida hia hunyia awahi 'to aŋidari.
Ninyia iddorro oloŋ, ette lejifak hula 'tomon harrihai ifuanna jihonyi ette jiaran, “Itatturok eluluŋ waati ana, ijiara ofuoi itua misihi iko itua matta hunia irumaniere aŋiyo iko amasik ijotiti hosi, nyio ewon jio amaji onno oyur 'to.” Ati ojio nyia Yesu jihosi, “Itai ta ahuattek hatai isiatta jihosi obo aŋiyo.” Itarraŋi nyia isi jiojio, “Ewon hohoi iko emunio miyet buo aham arrihai. Iwak atiye hohoi efuo inyiaŋuno aŋiyo jio eluluŋ waati ana 'daŋ?” (Oremehini nyia aati hulia ihuo alif miyet (5000)). Attati Yesu jiaran jio lejifak honyi jio, “Ititoŋonia aati eluluŋi, eluluŋi, ihuo atomuana miyet iluluŋ abotie.” Ninyia ititoŋoni lejifak aati 'daŋ ifau, otto Yesu iduhuna emunio hoduo miyet iko aham arrihai, ette ibonno ahide dou, ette isio ahumo jio Hollum tesi, ette beny isi, ette isiarana jio lejifak oŋida ihiharani jio aati. Anyai nyia isi 'daŋ many ifuaŋarik, ette lejifak iddudduhuna ofitot afeehien 'tomon harrihai.


To obo oloŋ ninyia omojori Yesu inyi hama, ofuonni nyia lejifak jihonyi buo inyi ette ifiyo isi jiojio, “Ojiori aati aniŋai?”
Itarraŋi isi jiojio, “Ojiori omuk iyye Yoane Etifuotoni Batisimo, buo omuk ojiori iyye Elija, buo fe omuk ojiori iyye obo olo ekianak Hollum hunyia berien elle ibuhu 'to.”
Attati inyi inyiak ifiyo isi ojio, “Buo itai ijiatta ani ŋai?”
Buo Petro ette itarraŋ ojio, “Iyye Olonyimoto olo Hollum.”


Attati Yesu ihum iramana isi jio hèlaha iramani eram ania jio obo atulo. Buo fe ette jiaran jihosi jio, “Obolo adi ettigemio jio Lonyi Tulo, ihari adi inyi lahou iko ehumak elettaha buo ettiyanak ifahita. Ottohori adi inyi, ati ihalu oŋitek hunihoi, itubuhuni adi inyi.”
Ette inyi jiaran jihosi 'daŋ, “Alla awak obo atulo ijifatio ani, ijiara inyi oguoro ahuan honyi, hotolorotie akruce honyi oŋitek 'daŋ, buo fe hétejifatie ani. Nyio alla awak obo atulo italuahuna esu honyi, italitohi adi inyi. Buo atulo elle italitohi 'to esu honyi te eram hoŋ, italuahu adi inyi. Anyio yiji 'tadi inyi, alla anyurak obo atulo erre 'daŋ hutta fau buo italitohi kuyya ittarroho ahuan honyi? Obeŋ obo! Elle iloriri obo atulo toni, iloriri adi buo fe Lonyi Tulo tenyi alla attu inyi iko akuatan honyi buo ono Monye iko ono ajilohien hullo olibori 'to. Eramak ni itai ahode hode, owoni omuk dini hullo obeŋi adi igonyuni naye many igonyunierek isi Olobie ono Hollum.”


Ninyia allaŋi oŋitek ihuo esabit abotie, ihalu ekenita huna, iyaru Yesu Petro, Yoane, iko Yakobo ihide doŋe imojori. Ninyia homojo inyi, ette omom honyi iloito onno olufa, so so aboŋojin honyi ipipiahi biny biny aboŋi. Teya teya, oleyehinie nyia aati arrihai, ette ikiana ikonyi; isi Mose iko Elija. Oleyehinie nyia isi ta akuatan, ette ikiana iko Yesu ta aleten honyi ye Yerusalem ituhoniere egiama ninyia ifahunierek inyi. Ihuania, ojotoroi nyia Petro iko mottiarak honyi, buo ninyia lahenyuni isi, igonyuni nyia isi akuatan Yesu buo aati hulo arrihai hinyia owotiai 'to ikonyi. Ninyia ajiori Aati hia efuo addi, ette Petro jiaran jio Yesu, “Lettok, oyyu jihohoi iwanari dini! Eduhok adi hohoi aticio hunihoi; abotie jihoi; abotie jio Mose, buo fe abotie jio Elija.” (Ati obeŋ nyia Petro omijak anyio enne ikiana inyi.)
Ninyia hekiana Petro, ofuonni edohuo, ette imuluhana isi te nedis hosi; ette ejifak ibaŋi ninyia imuluhani edohuo Elija iko Mose. Buo ekiana itayiruno totua idohuo onno ojio, “Lonyi hoŋ alia alla anyimu ni. Itayiriete jihonyi!”
Ninyia latuho ekiana ania, arasaru nyia Yesu inyi hama. Oduai nyia lejifak to oŋitek hua buo fe obeŋi iramani obo atulo erre hunyia igonyuni isi.


Jio ebotie holoŋ, olluni nyia Yesu iko ejifak honyi hula hunihoi to doŋe, ette eluluŋ waati iruaŋanio ikonyi. Attati obo atulo tehiji iluluŋ iwuwoŋita jiojio, “Hettiyanani! Attana ni iyye, imija lonyi hoŋ, lonyi hoŋ olobotie! Iniafatio aminiaŋati inyi, ette ibuarana inyi ifau, teya ette inyi iyyoo buo iddidiaŋa; ette obulal ittuna totto hutuk. Iriafutta aminiaŋati ania inyi buo fe obeŋ obusak inyi. Attana duo ni lejifak hoi hétefuhahi aminiaŋati ania addi, ati ittallihi isi ifuhara.”
Itarraŋ nyia Yesu ojio, “Itai aati hullo obeŋ eruk buo fe ipalata! Etoŋo adi ni ikatai many baya? Many baya adi adik ni itai? Iyaŋunie lonyi hoi dini.”
Ninyia hottu leto alia, ette aminiaŋati ania inef inyi, ette ibuarana inyi ifau, ette inyi iddidiaŋa. Attati Yesu iŋerejanio jio aminiaŋati ania, ette itaŋida leto alia, ette inyiahina inyi jio monyonyi. Illillihai nyia aati 'daŋ ta abolori duaran ono Hollum.


Ninyia hèllillihai aati te erre 'daŋ hunyia ihanio Yesu, ette inyi ikiana jio lejifak honyi jio, “Ijiara ekenita huna ihumi ijiŋana iyyaha hatai! Nyio, isiori adi Lonyi Tulo ihas waati.” Ati obeŋi nyia lejifak omijani ojio ekiana ania anyio. Nyio, idimani nyia awoyo hiram ekiana ania jihosi jio oŋida isi obeŋi omijani inyi, ati abaŋi nyia isi ifiyere ojio ekiana ania anyio.


Itterie nyia lejifak etarisa ta ahuattek hosi jiojio, alali tehiji hosi alla agalik 'to 'daŋ. Ati omijak nyia Yesu egigilita hosi, ette inyi iduhuna eto ette itawojihina iger honyi, ette jiaran jihosi, “Lia, elle ifuotu 'to eto ollo odiha 'to olo ta afure hoŋ, ifuotu inyi ani. Buo fe lia, elle ifuotu 'to ani, ifuotu inyi lia elle ifahu 'to ani. Nyio, lia, ollo omuta 'to bebe tehiji hatai 'daŋ, inyi alla agalik 'to 'daŋ.”


Itarraŋ nyia Yoane inyi jiojio, “Lettok, egonyu duo hohoi lobo atulo ifuhatio aminiaŋa ta afure hoi, attati hohoi itik inyi nyio obeŋ inyi ara te eluluŋ hohoi.”
Ojio nyia Yesu jihonyi, “Hètihoto inyi, nyio, lia ollo obeŋ 'to oliwari itai ara inyi ahalatai.”

Ninyia iliahai oŋitek hunne iyarik Yesu idou, odioto nyia to hou honyi, ette inyi leten Yerusalem. Ette inyi ifahina leyak sayyo to osiere honyi, hinyia ofuoi 'to jio obo amiji ono Samaria ihuhumaniere erre 'daŋ jihonyi. Ati obeŋi nyia aati amiji nyia ifuotuni inyi, nyio, oleyo nyia jio icul inyi Yerusalem. Ninyia igonyuni lejifak, hulla anyai 'to Yakobo iko Yoane eram ana, ette isi jiaran, “Lamonye, iwak ti iyye hohoi eloŋu eema tedou oŋida ottu isuahina isi?”
Ati oyito nyia Yesu, ette iriŋ isi. Attati isi 'daŋ ifuatan jio nobo amiji hama.


Ninyia Hadahai isi ihiji ikoi, ojio nyia obo atulo jio Yesu, “Ejifaru adi ni iyye jio amasik 'daŋ hunne ilari iyye.”
Buo Yesu ette jiaraŋ jihonyi, “Owoni obeyohi iko ewurio hosi, buo fe aheny owoni iko asik hosi, ati obeŋ obo amaji onno oferiere Lonyi Tulo iyiriari.”
Ette inyi jiaran jio atulo ollobo, “Ijifunie ani.” Buo lia ette itarraŋ inyi ojio, “Lamonye ijiara do nani alo inuhana monyoŋ.” Ati ojio nyia Yesu jihonyi, “Ijiara aati ayaak onuhani ayaak hosi, buo jihoye, iriramaru Olobie ono Hollum.”
Buo fe lobo ette jiaran, “Lamonye ejifaru adi ni iyye, ati ijiara do ani alo ifonyuno aati hutta haŋ hohoi.” Buo Yesu ojio jihonyi, “Elle inef obo atulo ahebu iromori buo inyiak ifiala ehalu, obeŋ inyi osiru Ilobie ono Hollum.”

聆听 Luka 9