Deg - 1990 Edition (Non-Drama - NT)

Yeesu yerɛ o habɔteŋra fi dɛ banɛ la ba cheme o sie, dɛ tɛɛ ba kpeɡri ne ŋwɛnɛ ŋɔ bá doŋi kwaa nɛra nɛ, dɛ́ chah weela ɡe, dɛ tom ba ŋɔ bá ka bol Korowii Kora la wa, dɛ́ chah weela tena. Waa dɛ tom ba la, o ŋɔ ba be ŋɔ, “He bɛ komɛlbwa kpɔ kpoŋe he ŋwɛnɛ nɔ kaala ta. He bɛ daŋɡbale kpɔ, he bɛ pure kpɔ, he bɛ kondikwaa kpɔ, dɛ bɛ suuɡa kɛɛ batakaare bele anɛnɛ kpɔ. Bwɛɛ bɛlbwa haa la o ta la, dem haa ka jo o ta la, hé so bela ka tel kɛŋɔ haa le bwɛɛ la ta. Dɛ bwɛɛ la tena ta heyaa lɛɛ silɛɛ ne naa, hé pee he napaala teera ta bela dɛ́ le bela, ásɛ a baɡle kɛŋɔ he kpɔ Korowii Waa ba ba be ba vɛah.” Asɛ ba le kaa, dɛ kaa bol Amanesoma la bela bwɛɛre la ta, dɛɛ chah weela tena bobɛlbwa.
Kooro Hɛrɔd waa dɛ nyiŋi Galilia harɛ ta aa no waa Yeesu aa dɛ ɛ la bwa la, o liire ɛo sakaa ken, dɛkalkɛŋɔ dɛ nɛra bane dɛ bol ŋɔ Jɔn o fa aa dɛ sɔ nɛra Korowii nee la ir seo ta. Bane ŋɔ Korowii keame Elaejaa ir seo ta, asɛ bane ɡe ŋɔ Korowii keamebena la bɛlee weera. Anee Kooro Hɛrɔd ŋɔ, “Jɔn te, n ɡelɔ ba teŋe o nyu, aah nɛn besoo ɡe waa mɛɛ no ken nɔɔ?” Asɛ dɛ swɛɛ siwi kɛŋɔ wɛɛ na Yeesuu.


Yeesu toroma la balɔ dɛ ba bol waa baa kaa ɛ o be, asɛ o kpɔ ba le nɛnlaa la bini ba kaa bwɛɛ bɛl baa dɛ yerɔ Bɛtsaeda la ta. Nɛra aa no o waa la, ba tiu bela, asɛ o lɛɛ ba silɛɛ ne dɛ bol Korowii Kora la waa baɡ ba, dɛ chah ba bini banɔ la ba bwara aa dɛ wee ba la.
Wee aa dɛ jo la, o habɔteŋra fi dɛ banɛ la la o be dɛ ka ŋɔ o be ŋɔ, “Tɛ nɛnlaa nɔ ŋwɛnɛ bá kaa bwɛɛre aa bar bonɔ nɔ dɛ́ ka nyin kondikwaa ne chɔɔbɔra, dɛkalkɛ bonɔ ɛ kpɔɡ baah.”
Anee Yeesu ŋɔ o habɔteŋra la be ŋɔ, “Hé tɛɛ ba kwaa bá di.”
Waa ŋɔ ɡɛ la, ba chaŋo ŋɔ, “Paanoo anue ne pɛŋa anɛɛ ya dɔ. Nemenɛ ya la dɛ́ ka yawɛ kondikwaa ba tɛ nɛra nɔ bwa.” Dɛ nɛra baa lɔ bela la, ba baala ɛɛ ɛ nɛra kaɡboŋa banuee.
Asɛ Yeesu ŋɔ o habɔteŋra la be ŋɔ, “Hé ŋɔ ba be ŋɔ bá pɛɛɡe so fifraanunue.” Anee o habɔteŋra la ɡel nɛra la pɛɛɡe dɛ so ɡɛ. Asɛ Yeesu kpɔ paanoo anue la ne pɛŋa anɛ la, dɛ ha sie dɛ nyiŋi nyundua dɛ jam Korowii, dɛ mɔne do o habɔteŋra la nɔɔra ta ŋɔ bá bɔne tɛ nɛra la. Baa bɔne paanoo la tɛ nɛra la, ba bwa diu dɛ vaɡre, ane ka. O habɔteŋra la tɔɔ a puɡrere la baa dia ka la pɛ, asɛ a su wɛɡrɛjena fi dɛ anɛ.


Awola bɛl, dɛ Yeesu ɡbo lɔ bobɛl dɛɛ soŋe Korowii, asɛ o habɔteŋra la la o be. Anee o bɔɔ ba ŋɔ, “Nɛn besoo nɛra ɛɛ lii mɛ nɔ?”
Anee ba ŋɔ, “Bane ŋɔ Jɔn o fa aa dɛ sɔ nɛra Korowii nee laanee hen. Bane ŋɔ Elaejaa hen, asɛ bane ɡe ŋɔ Korowii keamebena la bɛlee weera.”
Asɛ o bɔɔ ba ɡe ŋɔ, “Nɛn besoo he ɡee lii mɛ nɔ?”
Anee Pita chaŋo ŋɔ, “Henee Kristo la Korowii aa ŋɔa wɛɛ tomɔɔ ó ba lɛ yaa la.”


Belaa Yeesu kah ba kohona ŋɔ ba bɛ ɡɛ bol nomɛlbwa be. Asɛ o berɛ ŋɔ, “Men Nɛn Bie la chɛ kɛŋɔ ń na waa nomonome ne Sɔfonomonome ne Tɔnjerema nɔn ta, ásɛ ba vɛɛh mɛ, dɛ́ kpo mɛ, ásɛ a tɔpetooro wee la, ń ir seo ta.”
O berɔ ŋɔ ba bwa be ŋɔ, “Dɛ nomɛlbwa dɛ nyin kɛ ó teŋɛ n nɛ aa, ó ɡel o tetookwaa nyina, dɛ́ kpɔ o te tɛ tɔpere bɛlbwa kɛ wɛɛ sɛh wahala nae ne seo bwaa, dɛ́ ba teŋɛ n nɛɛ kɛŋɔ nɛn waa kpɔ daɡaɡre che bá ka kpaaro pɛl o ta la, dɛkalkɛ nomɛlbwa o sie aa swɛɛ harɛ nɔ ta kwaa ta la, wɛɛ paŋɛ o nyuu. Ásɛ nomɛlbwa ɡe o sie aa wola harɛ nɔ ta silɛɛ kwaa ta lɛ la, wɛɛ dɔ o nyuu. Dɛ nɛn dɔ harɛ nɔ ta kwaa bwa dɛ nyoɡre o nyu aa, bɔkwa tɔnɔɔ wɛɛ ba dɔe yɔ? Nomɛlbwa sihiih aa dɛ kpoo n ne n webaɡla nɔ ta la, awola Men Nɛn Bie ne nyundua toromedɛɛɡa aa ba n Mɛɛ jirima ne la, maa naatee heeh awola tɔpere. Kasinteŋ, Korowii ɛɛ ba di o Kora harɛ nɔ taa, dɛ he bini bane ta soɡe le dɛ nao.”


Yeesu aa bol a ɡɛ waa nɔ la, a yawanyoa la, o kpɔ Pita ne Jɔn ne Jems, o ne ba teeh bwe bɛl dɛ kaa o doa, dɛ ka soŋe Korowii. A ɡɛ saŋ Yeesu aa dɛ soŋe Korowii la, o siebɔr beɡrɔ, asɛ o laala waa doa la to dɛɛ nyɛɡle al-al ken. Ba ne ŋɔ ba nyiŋi, dɛ o ne nɛra banɛ dɛ bol wa. Dɛ Korowii keamebena Mosis ne Elaejaa. Baa bala dɛ Korowii jirima lɔ ba nɛ, baa bol ɡɛ Yeesu aa dɛ ba sewa Jerusalam ásɛ Korowii waa la ɛ kpela. Dɛ Pita ne o bala la dɛ chɔ doromi. Ba iro dɛ na Yeesu kɛŋɔ o laala aa toa dɛɛ nyɛɡle al-al ken. Ba na nɛra banɛ la baa ja Yeesu nɛɛ la ɡe. Nɛra banɛ la aa le Yeesu be dɛɛ kaa la, Pita ŋɔ o be ŋɔ, “N Dɔɔ, a wer kɛŋɔ yaa lɔ bonɔ nɔ. Gel ya do kukure atoro, ásɛ he kpɔ bɛl, Mosis kpɔ bɛl, ásɛ Elaeja ɡe kpɔ bɛl.” Dɛ waa jemɛ waa waa dɛ bol.
Pita ta aa dɛ bol waa nɔ la, bam bɛl denɔ ba tɔ ba nɛ, asɛ ɔmee laɡ ba kɛŋɔ bam la chunchule aa baa tɔ ba nɛɛ la. Belaa taa bɛl le bam la bini ŋɔ, “N Bie maa leo laanee la. Hé no o be!” Wobol la aa chiɡa la, dɛ a ka Yeesu ɡbo, asɛ o habɔteŋra la hel jeiih ken ɡɛ waa nɔ ta, ba ta nomɛlbwa be waa baa naa la bolɛ ɡɛ saŋ.


Tɔ aa pera la, Yeesu ne o habɔteŋra batoro la le bwe la doa tu harɛ, asɛ nɛnlaa bane ba chemo. Belaa baa bɛl kpɔ takpeɡ bol waa nɛra la bini ŋɔ, “Nomoa! N dɛ soŋe, nyiŋi n bie nɔ nɛɛ tɛ mɛ. O ɡboo n bie. Kwaa dɛ ir o nɛ. A ir o nɛ aa, ɡɛɛ o piɡri do lɔŋɔ, asɛ a yon kpɔɔ ɡo harɛ o beŋri chɔ, asɛ fufuɡ ɛɛ le o nyoa. A dɛ ɛo hɔhɔrɔwa mɔɔ dɛ́ le o nɛ. N soŋe he habɔteŋra la ŋɔ bá doŋa o nɛɛ tɛ mɛ, kɛ ba ta wone.”
Anee Yeesu chaŋe ŋɔ, “Oo! Fini nɔ nɛra wechɔɡa aa lɔ he nɛɛ nɔ, he ta yarada dɔe! Tɔpera aŋwɛnɛɛ hɛɛ nyin kɛ ń lawɛ bambile dɛ́ so he be mɔɔ he yarada Korowii ɔ? Maa tɔpere bɛl dii ba he be kpa oo! Kpɔ he bie la ba bonɔ.”
Bie la aa dɛ ba la, kwaa la ɡoo harɛ dɛ ɡel o beŋri. Yeesu kɔr kwaa la, dɛ chah bie la, dɛ kpɔɔ tɛ o mɛɛ. Nɛra la bwa nyoa kpo Korowii kpeɡri la nɛ.


Ba nyoa aa kpoa ba taa kooɡa la, Yeesu ŋɔ o habɔteŋra la be ŋɔ, “Hé cheɡ deŋne dɛ́ no waa nɔ maa dɛ ba he be bola nɔ, ásɛ dɛ bɛ soh! Ba dɛ ba Men Nɛn Bie lee do nɛra nɔn ta.” O habɔteŋra la ta waa la mun noɛ, dɛkalkɛŋɔ Korowii kpɔɔ sɔɔh ba. Dɛ ba ɡe dɛ ɔmɛ, anomanta, ba bɔɔro waa la mun kahonɛ.


Wetɔŋla chole o habɔteŋra la baah ta, asɛ baa nyin ba jemɛ ba bini onɔ la wáa ɛ ba bwa nomoa. Baa wola a ne baŋ leɛ mɔɔ la, dɛ Yeesu jemɛ waa baa dɛ lii. Belaa o lawɛ bechala bɛl ir che o jwɛh, dɛ ŋɔ ba be ŋɔ, “Nomɛlbwa waa koh n waa dɛ nyiŋi bie nɔ nɛɛ la, dɛ menee o nyiŋi la. Nomɛlbwa ɡe waa nyiŋi n nɛɛ la, dɛ naate waa tom mɛ laanee o nyiŋi la. Naate waa ɛ o te bechala he bini la, onee nomoa.”
Belaa Jɔn ŋɔ, “N Dɔɔ, ya na baa bɛl waa kpɔ he sɔn dɛɛ doŋi kwaa nɛra nɛ, asɛ ya kaoh ŋɔ ó ɡel, dɛkalkɛŋɔ o ta ya bini bɛl ɛɛ.” Belaa Yeesu ŋɔ Jɔn ne o bala la be ŋɔ, “He bɛ on kah ŋɔ ó ɡel. Nomɛlbwa waa wola he nɛɛ cheɡɛ la, he somee on.”

Tɔpere aa dɛ tel kɛ Korowii kpɔ Yeesu kaa o be nyundua la, Yeesu kpɔ o te, dɛ den chiɡ ŋwɛnɛ ta dɛ pa sie dɛɛ kaa Jerusalam. O tomɛ nɛra bane ŋɔ bá tɔ o sie dɛ́ la Samaria harɛ bwɛɛ bɛl ta dɛ́ ka nyin bɔr tɛo ó choɡ. O sie aa chaɡɛ Jerusalam la nomanta, bela tena ta on lɛɛ. Yeesu habɔteŋra Jems ne Jɔn aa na ɡɛ waa nɔ la, ba ŋɔ o be ŋɔ, “N Dɔɔ, he dɛ nyin kɛ ya ɡel nii le nyundua ba dɛ́ ba fuuh ba kɛɛ?” O habɔteŋra la aa ŋɔ ɡɛ la, o ta ban ɡelɛ. O laa o te berɛ dɛ do ba nee ba samɛ. Asɛ o ne o habɔteŋra la kaa ba sie bwɛɛ bɛl ta.


Baa vala dɛɛ kaa la, baa bɛl ŋɔ Yeesu be ŋɔ, “Bobɛlbwa haa dɛ la la, mɛɛ teŋɛ he nɛɛ kaa.”
Anee Yeesu ŋɔ o be ŋɔ, “Manyajeɡre kwaraa dɔ bɔɔne dɛɛ chɔ a bini, asɛ jumbii aa dɛ ɡah nyundua ɡe dɔ a kɔne, kɛ Men Nɛn Bie la te ta bobɛlbwa dɔe ń chɔ dɛ́ onɛ.”
Asɛ o berɛ ŋɔ baa bɛl ɡe be ŋɔ, “Teŋɛ n nɛ.”
Anee baa la ŋɔ, “N Dɔɔ, ɡel n la, ásɛ n mɛɛ baa sewaa, ń huɡo mɔɔ dɛ́ ba.”
Asɛ Yeesu chaŋo ŋɔ, “Gel nɛra baa wola Korowii mkpa dɔe la huɡe ba dɔŋa, ásɛ he ka bol Korowii Kora la bini waa baɡle nɛra.”
Asɛ baa bɛl ɡe ŋɔ o be ja ŋɔ, “N Dɔɔ, mɛɛ teŋɛ he nɛɛ, kɛ ɡel n ka kal n haah ne bii mɔɔ dɛ́ ba.”
Anee Yeesu ŋɔ o ɡe be ŋɔ, “Nomɛlbwa waa pa mun dɛɛ ba para dɛ ka kpɔ par, o nyu bini berɛ dɛɛ ɛo anɛnɛ la aa won parɛ a maɡre. Gɛɛ a do kɛŋɔ nomɛlbwa waa kpɔ o te kɛŋɔ wɛɛ ja Korowii Kora la taa la bɛ berɛ dɔ liire anɛ kpa.”

聆听 Luk 9