Vagla - 1977 Edition (Drama - NT)

Paanuu La N Waa Yiisi Dɔɔwɛ Hɔpizizenaa la banna yir Gillikaali la jaa ra dugli. Kɔraawiizi Kizeehina Nabɔnzi ni Kɔraawiizi Hɔnzunna faa ra nyiŋŋi gunla ban niŋ suahzi kpu Yeesu, dikuubɛɛwiai, ba ra ɔm nɛra labuu.


Denii Sitaani zuu Judas Iskariɔt la ni. U faa ɛɛ Yeesu hiŋra fidibanɛɛ la bɛllɛ. U izi la Kɔraawiizi Kizeehina Nabɔnzi ni Kɔraawiizi Dia balaa nabɔnzi la be, u ni baa ra ta jina gunla un niŋ ɛɛ Yeesu sɔsɔgɔ bá wer lawuu. Ba bɔra sɔɔni. Ba tɛu nua lugɔ ba daŋ turguu kebee. Judas sɛɛ, di jaa ra nyiŋŋi gunla un niŋ ɛɛ kpau ga du ba nonee biini, saŋa la nɛkpila n wàá du de.


Denii Hɔpizizenaa hɔl la baŋ ɔɔ ra hee Paanuu La N Waa Yiisi Dɔɔwɛ, ka ɔɔ kpu pebii ra lizi mbusu la wa hel. Yeesu hum Pitta ni Jɔɔn di ŋɔ, “Ií la ga ɛɛ sirya ya wa di Gillikaali diwee la.”
Ba pɛɛzuu, “Lee i ŋɔ ya la ga ɛɛ u siryai?”
U ŋɔ ba be, “Ií ga zuu bol biini. Di ii wa zuuwɔ, ii daŋ huuzi baal bɛl n chigɛ vii ni nii. Ií hiŋuu ra la ga zuu dia la maa un niŋ zuu di ga ŋɔ a diahiŋ be, ‘Yaa Nabɔma ŋɔ ya wa pɛɛzii, dí, lee i hɔɔhra dia la u ni u hiŋra n niŋ wa di ba Gillikaali diwee la duɛi?’ U daŋ bagli ia diizeŋ bɛl baŋ kuarɛɛ nɛnnɛ, u du chiŋ. Ií ɛɛ sirya de ya ra ba.”
Ba la ga na gunla himmaa Yeesu n bagli baa la, di ɛɛ a Gillikaali diwee sirya de.


A diwee dii saŋa n wa helle, Yeesu ni u hiŋra la ba wa so di ra di. U ŋɔ ba be, “N ni ia Gillikaali diwee naa dii du n bampiriire werge maa, n na nyiŋŋi n ni ia wer kpau diu mɔɔ, ka ń ga di n tɔɔrɔɔ. Ií gil n ŋɔ ii be. Màá ka di diwee naa, di a hɔl la yaa n niŋ kaa wa chaali di ra dia Kɔraawiizi Kora biini la lɛi.”
Yeesu kpa libee ni siŋ kpogli, di suŋŋi wiizi du a ni ka ŋɔ, “Ií lɛɛ nyɔɔ ka tɛɛ dɔŋa. Ií gil n ŋɔ ii be. Màá ka nyɔɔ siŋ naa maa, di saŋa la Kɔraawiizi n niŋ wa di u Kora lɛi.”
U kpa paanuu bɛl ge kpogli di suŋŋi wiizi du u ge ni, ka lawuu mɔnni mɔnni di kpa tɛɛ baa, di ŋɔ, “N bɔrahɔnnɛ keŋ. Ii wiarɛ ń kuu chɔguu la. Ií ɔɔ ra ɛɛ keŋ di ra liizi n wia.”
Gunnɛ baŋ wa diwee tuŋ, u kpa libee ni siŋ, di ŋɔ, “Siŋ naa ɛɛ n challɛ un niŋ kuu ii wia lii, di kuari ii ni Kɔraawiizi nuukpaŋfalii dɔɔi. Ka nɛr la n niŋ ɛɛŋ sɔsɔgɔ la du n be diiribɔr naabuu. Mìŋ́ Newee Biibaal daŋ kaali n bɔr gunla Kɔraawiizi n dawiŋ la. Ka wiarɛ niŋ wa huuzi nɛr la n niŋ ɛɛŋ sɔsɔgɔ la.”
U hiŋra jaa ra pɛɛzi dɔŋa unla n niŋ ɛɛ guŋ.

Ba kaa ra bil dɔŋa alugɔ ba biini unla n ɛɛ nɛzeŋ. Yeesu ŋɔ ba be, “Nɛra la n waa Jus hina ɛɛwɛ, ba koora ɔɔ ra bagli baabuu fɔŋŋa. Ba nabɔnzi ge ɔɔ gil nɛra ra yir baa ba nyuu hina. Ka ií gilɛɛ ra hiŋ guŋ. Unla n ɛɛ nabɔma di ɛɛ sitɔɔri ii biini, ú kpa u hiŋ birgi bichala, di hum ra tɛɛ ia.
Nɛr la n soge diiribɔr ani nɛr la n na humuu a bɔr, u bɛliirɛ ɛɛ nabɔmai? Nɛr la n soge diiribɔr la, waa lɛi nabɔmaa? Ka miŋwaa du ii benii alugɔ unla n na humuu la.
Ii ɛɛ banla n hiiniŋ ra di n tɔɔrɔɔ labuu. Gunla n mɛɛ n kpa kora bɛl tɛŋ ń di, gunnɛ ń ge tɛɛ ia kossi ií di. Denii ií wer du n be yaa maa kpau, di ra di n diiribɔr n kora la biini, di ge wer so koorikassi ni ra di Izrɛl hina dizi fidaanɛɛ la seriyazi.


Saimɔn, Saimɔn, Sitaani suŋŋi ŋmɛnɛɛrɛ ú wer ɛɛi di na alugɔ banna je sau bá na la. Ka n suŋŋi Kɔraawiizii tɛi í gilɛɛ wa yarduu ra huhzi. Di i kaa wa bir wa ba n be, hiini i dɔŋahina bá wer chi, di du baa bɔkpega.”
Pitta ŋɔ u be, “N Dɔɔri, haali di a ɛɛwɔ lugɔ n nii maanii bá tɔ dia di kpu gba, ka n niibuu.”
Yeesu ŋɔ, “Pitta, gil n ŋɔ i be. I daŋ hɔɔ n wia buhoro lugɔ n nii lɛi zinaa, ka zabal haa wii.”
Yeesu pɛɛzi baa, “Miŋ hum ia ŋɔ ií gilɛɛ waa kpogli hure, bunni ani gawa ra la naa, ii nyaa kunaa gɛɛ?”
Ba ŋɔ, “Yaa waa kummaa nyaawɛ.”
U ŋɔ ba be, “Ka filaŋkeŋ, nɛr la maa n dɔɔ u hur, ú kpau ra la ani u bunni maa. Nɛr la n waa kandaa dɔɔwɛ ge, ú kpa u wɛjɛ yoo di kpa a kebee yau bɛl, dikuubɛɛwiai, gunla baŋ sɛbi n wia Kɔraawiizi Hɔŋ biini la daŋ wa ɛɛ. Ba sɛbɔɔrɛ, ‘U du wichɔgɛɛra biinii, ba ra yir u ge wichɔgɛɛri.’ Gunla baŋ sɛbi n wia la daŋ ɛɛ.”
Ba ŋɔ, “Yaa Dɔɔri, kandaazi anɛɛrɛ keŋ.”
U ŋɔ, “A kukkɔɔrɛ.”


U lii ra la Ɔlivizi Bizeŋ la nyuu gunla uŋ ɔɔ ra ɛɛ la. U hiŋra hiŋuu ra la. Uŋ wa ba bɔr, u ŋɔ ba be, “Ií ra suŋŋi wiizi, Sítaani gilɛɛ wa wer dar ia ii sɛɛ u nua.” Ka la see tama di giŋŋi hɛri ra suŋŋi wiizi di ŋɔ, “N Mɛ, di a parii, lizi tɔɔrɔɔ nii naa n be, ń gilɛɛ waa nyɔɔu. Ama gunla maa hiŋwaa n niŋ dau i kipar, dawuu guŋ ka gil miŋwaa kipar.”
Denii Kɔraawiizi mɛlika bɛl lii Kɔraawiizi be ba u be wa duu bɔkpega. Biinichɔg n lawuu werge maa ra jaa la, u kaa ra suŋŋi wiizi siaahmu ni, wenna pizi di ra toŋzi hɛri, a ɛɛ lugɔ chal.
Uŋ wa suŋŋɛɛ tuŋ di izi, u la u hiŋra be, di biinichɔg lauri baa werge ba ra chɔɔgi dɔzi. U ŋɔ ba be, “Bɛɛ wiarɛ ii ra chɔɔgi dɔzɛi? Ií izi ra du tau di ra suŋŋi wiizi Sítaani gilɛɛ wa wer dar ia ii sɛɛ u nua.”


Uŋ haa ra ŋɔ wia la, di nɛkpila ra ba. Judas, u hiŋra fidibanɛɛ la bɛl, tɔ ba see kpogli baa ra ba wa hel Yeesu be, di suuzuu alugɔ dammuzi n na jaami dɔŋa la. Yeesu pɛɛzuu, “Judas, hinna nyiŋŋi i ɛɛ Mìŋ́ Newee Biibaal sɔsɔgɔ tɛɛ n dɔma, ka ra suuziŋ?”
Denii banla n du Yeesu be la n wa na wia la n niŋ ɛɛ la, ba pɛɛzuu, “Yaa Dɔɔri, yá yagzi baa kandaazi gɛɛ?” Bɛl ŋmɛŋ Kɔraawiizi Kizeehina Maa Nabɔma balii bɛl nodig digni kpɛlli.
Ka Yeesu ŋɔ, “Ií gilɛɛ kaa ɛɛ guŋ.” Uŋ wa ŋɔ guŋ, u kpa u nonii gbɔgzi a balii digni la di chaau.
Denii Yeesu pɛɛzi Kɔraawiizi Kizeehina Nabɔnzi, Kɔraawiizi Dia balaa nabɔnzi ani bol nabɔnzi la n liwɛɛ bá lawuu la, “Ŋmɛɛnnɛ miŋ ii kpa tokobizi ni kapɛrɛzi ba ií wa lawiŋŋ? Miŋ faa ɔɔ du ii be Kɔraawiizi Dia diŋŋizi biine hɔpizibii maa la, ii wan lauwɛ de. Ka filaŋkennaa bɔbiri n ɔɔ jaa lɛɛ kora ra di naabuu jaa ɛɛ ii saŋa.”


Denii ba ba wa lawuu, di kpau kaali ga zuu Kɔraawiizi Kizeehina Maa Nabɔma dia. Pitta suahzi hiŋ baa wa zuu. Ba chem niŋ a diŋŋee baambaaŋ di chaali so. Pitta ge so ba be. Biihambie bɛl du de di ɛɛ a dia balii bɛl. Niŋ la n chaani Pitta siwee la, u binnuu tiiih ka ŋɔ, “Baal naa gba faa du u benii.”
Pitta hɔɔ di ŋɔ, “Mɔɔ zummɛ.”
Aŋ kaa wa ɛɛ tama, baal bɛl kaa nau di ŋɔ u be, “I gba ɛɛ ba bɛllɛ.”
Pitta ŋɔ, “Akai! Maa ba bɛl ɛɛwɛ.”
A kaa ɛɛ tama, bɛl kaa ŋɔ werge maa, “Baal naa faa du u benii, wibii maa. Ii waa na uŋ ɛɛ Galilii hinuuwaa?” Pitta pɛɛzi, “Beedee wiŋɔzii i ra ŋɔ gunnɛi?” Uŋ haa ra ŋɔ a wia, di zabal wiiwo. Yeesu bir binni Pitta. Pitta liizi u Dɔɔri wiŋɔzi la uŋ faa ŋɔ u be la lugɔ u daŋ hɔɔ nua buhoro lugɔ u nuu lɛi, ka zabal haa wa wii zinaa la. Uŋ wa liizi u wiŋɔzi la, u biini chɔgi, u lii bossee wii werge maa.


Ka Yeesu haa du banla n lawuu la be. Ba jaa ra ɛɛu chɛɛtɛ di ra lɔɔzuu, di kpa kuŋ fɔɔ u siwee ka ra lɔɔzuu di ra ŋɔ u be, “Kɔraawiizi dɔgtɛɛrɛ hiŋ. Awia, bagli yaa nɛr la n lɔi.” Ba ŋɔ wikpila ra du u ni di ra chagzuu.


Hɔɔŋ pizɛɛ Kɔraawiizi Kizeehina Nabɔnzi, Kɔraawiizi Hɔnzunna ani nabɔnzi la maa chaali. Ba kpogli Yeesu zuu ba be, di ŋɔ u be, “Di hinuu Kristo la, bagli yaa ya zum.”
Ka u ŋɔ ba be, “Di n ŋɔ ii be, ka ii wàá sɛɛ tɛŋ. Di n kaa pɛɛzi ia ge, ii wàá ŋɔ. Ama Mìŋ́ Newee Biibaal daŋ ga so Kɔraawiizi Fɔŋŋa Maa Hiŋ la nabɔmbɔr di haŋ lii zinaa a la.”
Ba maa pɛɛzuu, “Amɔ, hinuu Kɔraawiizi Biibaal laa?” U ŋɔ, “Gunla iiŋ ŋɔwɛɛ gunnɛ.”
Ba ŋɔ, “Bɛɛ wiarɛ yaa kaa ra nyiŋŋi daansɛɛ hina naanɛi? Yaa nuu gunla u himmaa n ŋɔwɛɛnɛ.”

聆听 Luuk 22