If you would like a copy of this version please contact info@davaraudiobibles.org

Kinandi (DRC) Bible

Kinandi - 2012 Edition (NT)

Bible in Kinandi © Bible Society of the Democratic Republic of Congo, and Bible Society of Uganda, 1980.

Uku Teofilo mubuya!
Abandu bangi babirirenga ndeke erisaka emyatsi eyakolawa omo katĩkatĩ ketu. Abandu abo mobatubwira emyatsi eyo, ibabiribya balangĩrĩ nʼabatũlĩ bʼekĩnywa ekyo erĩtsũka erĩmbere. Neryo uwe, Teofilo, kyamabya kibuya erikusakira ndeke eritondeka lyʼemyatsi eyo nabĩrĩbũlĩrĩrya ndeke erĩtsũka erĩmbere. Iwatoka eriminya ndeke ekwenene yʼemyatsi eyo wabĩrĩkangĩrĩrĩbwa.

Omo biro bya Herode, omwami wʼeYũdea, habya omũhererĩ oyukahulawa mo Zakarĩa wʼekihanda kya Abĩya. Erĩna lya mũkalĩwe abya iyo Elĩzabetĩ. Naye abya wʼekĩtũnga kya Harũnĩ. Kandi ababiri bosĩ babya batunganene embere sya Nyamuhanga, ibakakwama ndeke ebihano byosĩ nʼebilayiro byʼomukama. Kandi isibawite bana, kusangwa Elĩzabetĩ abya mugumba, nʼababiri bosĩ ibabirikekeluha.
Neryo ekiro kiguma Zakarĩa abya akakola omũbĩrĩ wʼobũhererĩ embere sya Nyamuhanga omo kĩtũlĩ kiwe. Neryo ngoko abahererĩ babya bakakola, Zakarĩa mwayisogwa omo bukanga eriingira omo Hekalũ yʼomukama nʼerĩhĩsya obukwa. Nʼendeko yosĩ yʼabandu babya ibakasabira eyĩhya oko ndambĩ yʼerihera obukwa. Neryo omũlaĩka wʼomukama mwabutukira uku Zakarĩa iniahangene oko luhande lwʼamali lwʼekiherero kyʼobukwa. Omugulu Zakarĩa alangira omũlaĩka mwahangya-hangya, kandi mubaha. Nĩkwa omũlaĩka mwamubwira ati, Zakarĩa, Sigubahe. Nyamuhanga abĩrĩowa erisaba lyawe, nʼomũkalĩ wawe asyakubutira omũlwana. Wasyahula erĩna liwe mo Yoane. Wasyatsema nʼeritsanga, kandi abandu bangi basyatsemera eributwa liwe. Kusangwa asyabya mundu mukulu omo meso wʼomukama. Syasyepũlaya bĩnyũ kutse obwabũ bwʼomuliro; kandi asyũsũlĩbwa nʼOmũlĩmũ Abũyĩrĩre isialiabutwa. Kandi abandu bangi ba Ĩsraelĩ asyasũbyabo oko Mukama Nyamuhanga wabo. Kandi asyagenda ngʼomukwenda wa Nyamuhanga, omo kĩrĩmũ nʼobũtokĩ bwa Elĩa. Kandi asyasanganĩa abotata nʼabana; nĩkwa asyasũbya abatĩowa oko menge wʼabatunganene; asyategekanĩa abandu basĩke busana nʼomukama.
Neryo Zakarĩa mwabwira omũlaĩka ati, Nasyaminya ebĩ byo ndeke nyiti kwehĩ? Kusangwa indi mũsyakulu, nʼomũkalĩ wage ni mukekulu nibya. Nʼomũlaĩka mwamũsũbĩrya ati, Ĩngye indi Gabrĩelĩ. Oyukahangana embere sya Nyamuhanga, kandi nabiritumwa erikubwira, nʼerikuletera Engulu Yowene eyĩ. Nĩkwa kusangwa sũlĩtĩkĩrĩrya ebĩnywa byage ebikandisyabererera oko mugulu atolere, Ukandibya mũmũ, isiwendisyatoka erĩbũga erĩhĩka oko kiro omwatsi oyũ asyahĩka.
Nĩkwa abandu ababya bakalindirira Zakarĩa mobasweka busana nʼeriamala ndambĩ riwe omo Hekalũ. Neryo omugulu ahuluka, mwatatoka erĩbũga nabo. Neryo abandu abo mobaminya ngoko Zakarĩa abere omo bũlĩme omo Hekalũ. Neryo mwakoheryabo omo byala biwe, kusangwa mwabya mũmũ.
Neryo omugulu ekĩtũlĩ kiwe kyahwa omo Hekalũ, Zakarĩa mwasuba eka wuwe. Nʼenyũma wʼebiro ebĩ mũkalĩwe ye Elĩzabetĩ mwaheka obukule; neryo mwasĩgala omo nyũmba yiwe mo mikera ĩtanu ati, Lino Omukama abĩrĩnyĩwatĩkya atya omo biro ebyo anyiganyira. Abĩrĩnyĩlũsya kwʼesĩsonĩ emuliro syʼabandu.

Oko mukera wʼendatu wʼobukule bwa Elĩzabetĩ, Nyamuhanga mwatuma omũlaĩka ye Gabrĩelĩ oko mũyĩ wʼeGalĩlaya owakahulawa mo Nazaretĩ Omũlaĩka oyo mwaleta erilayira lya Nyamuhanga oko mumbesa oyo wasĩmolĩbawa nʼomundu oyukahulawa mo Yosefũ, wʼekihanda kya Dawĩdĩ. Erĩna lyʼomumbesa oyo abya iyo Marĩa. Omũlaĩka oyo mwahĩka uku Marĩa mwamubwira ati, Wabũkĩre, uwe mutsumulwa. Omukama ali haguma nawe. Neryo Marĩa mwahanga-hangya omutima busana nʼekĩnywa ekyo, neryo mwayĩbũlya erĩkerya eryo nga nĩ ʼkerya lya mũsĩndo wahi. Neryo omũlaĩka mwamubwira ati, Sigubahe, Marĩa, kusangwa wabiribana olukogo ewa Nyamuhanga. Kandi lebaya, wasyaheka obukule nʼeributa omũlwana, neryo wasyamwahula mo Yesu. Asyabya mukulu, kandi asyahulwa mo Mugala wa Nyamuhanga Wʼendata Kutsibu. Omukama Nyamuhanga asyamuha ekĩtũmbĩ kyʼobwami kya tata-kulu wuwe Dawĩdĩ. Kandi asyatabalira ekihanda kya Yakobo kera na kera, nʼobwami buwe sibwendisyahwa.
Marĩa mwabwira omũlaĩka ati, Ĩngye ndawite mulume, kʼomwatsi oyũ angabya ati kwehĩ? Nʼomũlaĩka mwamũsũbĩrya ati, Omũlĩmũ Abũyĩrĩre asyakũhĩkako, nʼobũtokĩ bʼOwendata Kutsibu bwasyakũsũkũlĩrya; busana nʼomwatsi oyo, omwana abũyĩrĩre oyo wasyabuta asyahulwa mo Mugala wa Nyamuhanga. Neryo, lebaya mwali wenyu, ye Elĩzabetĩ omo bukekulu buwe abiriheka obukule bwʼomwana wʼobulume. Nʼoyo wahulawa mo mugumba ali nʼobukule bwʼemikera ndatu. Kusangwa uku Nyamuhanga sihali ekitetokekana. Neryo Marĩa mwabũga ati, Ĩngye indi mugombe wʼomukama, kinyibyeko ngoko wabĩrĩbũga. Neryo omũlaĩka oyo mwamũsĩganĩa mwagenda.

Neryo oko biro ebyo Marĩa mwahangana, mwanguha eriya omo kihugo kyʼebitwa, oko mũyĩ wʼeYũdea. Neryo mwingira omo nyũmba ya Zakarĩa, neryo mwabũkya Elĩzabetĩ. Omugulu Elĩzabetĩ owa erĩkerya lya Marĩa, omwana mwayisumba omo nda yiwe; neryo Elĩzabetĩ mũsũlĩbwa nʼOmũlĩmũ Abũyĩrĩre. Neryo mwabirikira nʼomulenge munene ati, Uli mutsumulwa omo katĩkatĩ kʼabakalĩ! Nʼomwana wasyabuta ni mutsumulwa! Omwatsi munene oyũ akambĩkako ati kwehĩ? Uti koyo wʼomukama wage akasa erinyibana kwehĩ?
Kusangwa omugulu ĩndĩowa omulenge wʼerĩkerya lyawe, omwana mwakayisumba omo nda yage nʼobutseme. Nʼobutseme buli ukʼuwe ũkĩkĩrĩraya uti ekĩnywa ekyo Mukama akubwira kikandisyabererera. Neryo Marĩa mwabũga ati,
Omutima wage akahamaya Omukama,
Ekĩrĩmũ kyage kikatsemera Nyamuhanga Omũlamya wage.
Kusangwa abirinyibuka ĩngye omugombe wuwe muke;
Lebaya, erĩtsũka lino abandu bosĩ basyanyahula mo gʼomũyĩsa.
Kusangwa Nyamuhanga wʼobũtokĩ abirinyikolera emyatsi minene,
Nʼerĩna liwe lĩbũyĩrĩre.
Eriganyira liwe liri oko bosĩ abakamu­baha,
Erĩtsũka oko lulengo luguma nʼerĩhĩka oko Sindi.
Abirikola emĩbĩrĩ ĩkalĩre omo kuboko kuwe;
Abiripanza-panza abakayiheka omo malengekanĩa wʼemitima yabo.
Abĩrĩkĩmya abatabalĩ erĩlũa oko bĩtũmbĩ byabo byʼobwami,
Abĩrĩhamya abakayĩkehaya.
Abĩrĩũgũtya abali nʼenzala omo bindu bibuya;
Nʼabʼebindu abĩrĩsũbũlyabo byala bisa.
Abĩrĩwatĩkya omugombe wuwe Ĩsraelĩ,
Iniakibuka eriganyira liwe.
Ngoko anabwira abotata wetu,
Na Abrahamũ nʼabana buwe kera na kera.
Neryo Marĩa mwĩkala na Elĩzabetĩ nga mikera ĩsatu, neryo mwasuba eka wuwe.

Neryo omugulu wʼeributa lya Elĩzabetĩ mwahĩka, neryo mwabuta omũlwana. Neryo abalĩkyabo nʼabʼekĩtũnga kiwe mobowa ngoko Mukama abirimuganyira, neryo abosĩ mobatsema haguma naye.
Neryo nʼoko kiro kyʼomunani mobasa erĩbanĩa omwana oyo; neryo mobasonda erimwahula mo Zakarĩa ngʼerĩna lyʼĨse wuwe. Nĩkwa nyĩnya wuwe mwasũbĩryabo ati, Iyihi, asyahulwa mo Yoane. Mobamubwira bati, Sihali oyukahulawa omo lĩna erĩ omo kĩtũnga kyawe. Neryo mobakoherya ĩse wuwe, erĩmũbũlya ngʼakasonda erimwahula mondi. Zakarĩa mwabũlya ekyʼerisakako, neryo mwasaka ati, Erĩna liwe yo Yoane. Neryo abosĩ mobasweka. Neryo-neryo Zakarĩa mwatoka erĩswabũga, nʼolulimi luwe molwagobokala, neryo mwatsũka eripipa Nyamuhanga. Nʼeriubaha molyahamba abosĩ ababya bĩkere hakũhĩ nabo; nʼengulu yʼemyatsi eyĩ moyalaba omo kihugo kyosĩ kyʼebitwa byʼeYũdea. Nʼabosĩ abowa omwatsi oyũ mobabikago omo mitima yabo, bati, Omwana oyũ asyabya ati kwehĩ? Kusangwa obũtokĩ bwʼomukama bwabya haguma naye.

Ĩse wuwe ye Zakarĩa mũsũlĩbwa nʼOmũlĩmũ Abũyĩrĩre, mwaminyerera ati,
Tupipe Omukama Nyamuhanga wa Ĩsraelĩ!
Kusangwa abĩrĩhĩka erĩwatĩkya abandu buwe, nʼerihabo obwĩranda
Abĩrĩtũhanganĩrya Omũlamya wʼamaka,
Omo kĩtũnga kyʼomugombe wuwe Dawĩdĩ.
Abũga ebĩ byo kera omo buno bwʼabamĩnyererĩ buwe babũyĩrĩre.
Tũlamĩbawe oko nzĩgũ syetu,
Nʼomo byala byʼabosĩ abakatũkwa obusu.
Erĩkangya eriganyira liwe oko botata wetu,
Nʼeribuka endagane yiwe ĩbũyĩrĩre.
Erĩlahĩrya eryo alahĩrĩraya tata wetu Abrahamũ.
Atuhe erĩtongolĩbwa omo byala byʼeyonzĩgũ syetu,
Itwamukolera butsira buba,
Tubye babũyĩrĩre nʼabatunganene
Embere siwe Omo biro byetu byosĩ.
Nawe, mwana wage, wasyahulwa mo
Mũmĩnyererĩ wʼOwendata Kutsibu.
Kusangwa wasyatangirira embere syʼOmukama erĩowanĩa esyonzira siwe.
Eriha abandu buwe eriminya lyʼerĩlamĩbwa
Omo nzira yʼeribuyira ebibi byabo.
Kusangwa Nyamuhanga wetu ni wʼomutima wʼeriganyira,
Lyasyaleka omusakala wʼerilama akalũa endata ĩnĩahĩka erĩtũkolerya.
Erĩkolerya oko bandu abĩkere omo mwĩrĩmya nʼomo kyũtũtũ kyʼoluholo,
Erisondola ebisando byetu omo nzira yʼobuholo.
Nʼomwana mwakula omo mubiri nʼeribya nʼamaka omo kĩrĩmũ kiwe; neryo mwasiba omo mbwarara erĩhĩka oko kiro ahuluka embere sya Ĩsraelĩ.

聆听 Lũka 1