خُروج 11
11
مُوسَى حجّى بمَوْت أوْلاد البِكِر
1وَ اللّٰهْ قَالْ لِمُوسَى: «أَنَا نِنَزِّلْ الْوَبَاءْ الْأَخِيرْ فِي الْمَلِكْ وَ فِي الْمَصْرِيِّينْ. وَ بَعَدْ دَا، هُو يِخَلِّيكُو تَمُرْقُوا مِنْ هِنِي. مَا بَسْ هُو يِخَلِّيكُو تَمُرْقُوا لَاكِنْ يَطْرُدْكُو مَرَّةْ وَاحِدْ مِنْ بَلَدَهْ! 2وَ هَسَّعْ، قُولْ لِبَنِي إِسْرَائِيلْ وَاجِبْ أَيِّ رَاجِلْ يَطْلُبْ مِنْ جَارَهْ وَ أَيِّ مَرَةْ تَطْلُبْ مِنْ جَارِتْهَا أَشْيَاءْ هَنَا فُضَّةْ وَ دَهَبْ.» 3وَ اللّٰهْ سَوَّى بَنِي إِسْرَائِيلْ لِقَوْا رِضَى الْمَصْرِيِّينْ. وَ مُوسَى كُلَ نَادُمْ مُهِمّ فِي مَصِرْ وَ فِي عُيُونْ خَدَّامِينْ الْمَلِكْ. وَ كُلَّ النَّاسْ قَاعِدِينْ يِكَرُّمُوهْ.
4وَ مُوسَى قَالْ لِلْمَلِكْ: «دَاهُو اللّٰهْ قَالْ: ‹فِي أُسْط اللَّيْل أَنَا نُشُقّ بَلَدْ مَصِرْ. 5وَ أَيِّ وَلْد بِكِرْ الْفِي مَصِرْ يُمُوتْ مِنْ وَلْد الْبِكِرْ هَنَا فِرْعَوْن الْقَاعِدْ فِي كُرْسِي الْمُلُكْ لَحَدِّي وَلْد الْبِكِرْ هَنَا الْخَادِمْ التَّرْحَكْ الْقَمَحْ. وَ كُلَّ أَوْلَادْ الْبِكِرْ هَنَا الْبَهَايِمْ كُلَ يُمُوتُوا. 6وَ فِي مَصِرْ يَبْقَى بَكِي شَدِيدْ الْمَا بِقِي يَوْم وَاحِدْ وَ بَتَّانْ مَا يَبْقَى. 7لَاكِنْ فِي بَكَانْ بَنِي إِسْرَائِيلْ، كَلِبْ وَاحِدْ كُلَ مَا يَنْبَحْ فَوْق نَادُمْ وَلَّا فَوْق بَهِيمَةْ. وَ بَيْدَا، تَعَرْفُوا كَدَرْ أَنَا اللّٰهْ نِفَنِّدْ بَيْن بَنِي إِسْرَائِيلْ وَ الْمَصْرِيِّينْ.›» 8وَ مُوسَى قَالْ بَتَّانْ: «كُلَّ خَدَّامِينَكْ يَجُوا يَسْجُدُوا قِدَّامِي وَ يَشْحَدَوْنِي وَ يُقُولُوا: ‹أَمْشِي إِنْتَ وَ كُلَّ شَعَبَكْ!› وَ إِلَّا بَعَدْ دَا بَسْ، أَنَا نَمْشِي.» وَ مُوسَى مَرَقْ مِنْ بَكَانْ الْمَلِكْ زَعْلَانْ بِلْحَيْن.
9وَ أَوَّلْ، اللّٰهْ قَالْ لِمُوسَى: «الْمَلِكْ مَا يَسْمَعْكُو! وَ فِي شَانْ دَا، نِزِيدْ عَجَايْبِي فِي مَصِرْ.» 10خَلَاصْ، مُوسَى وَ هَارُونْ سَوَّوْا الْعَجَايِبْ الْكَتِيرِينْ دَوْل قِدَّامْ الْمَلِكْ لَاكِنْ اللّٰهْ قَوَّى رَاسَهْ وَ الْمَلِكْ أَبَى مَا خَلَّى بَنِي إِسْرَائِيلْ يَمُرْقُوا مِنْ مَصِرْ.
Àwon tá yàn lọ́wọ́lọ́wọ́ báyìí:
خُروج 11: ع.د.ت19
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
La Bible en arabe tchadien © Alliance biblique du Tchad, 2019