Toma 28
28
Pɔɔl Naŋ Ta Malta Teŋɛ
1Te naŋ da wa zo do a dondoli baare, lɛ la ka te da woŋ ka a mandoba#28:1 Mandoba: Mandoba waa la teŋɛ naŋ be mane sogɔŋ. na yuori la Malta. 2#2 Kor 11:27 A teŋɛ deme da taa la nimibaaloŋ yaga ne te. Saa naŋ da piili miire kyɛ ka ɔɔre da erɛ zuiŋ, ba da de te la saanoŋ velaa a da mare vũũ a vɛŋ ka te zaa wa zeŋ gyili. 3Pɔɔl da tuuri la dabilii lantaa a eŋnɛ a vũũ poɔ, kyɛ a vũũ toloŋ da eɛɛ la ka dompane kaŋ da vare yi a wa do mele o nu. 4A teŋɛ deme naŋ da nyɛ ka a waabo mele a o nu, ba da yeli ko la taa, “A dɔɔ ŋa waa la neŋkoorɔ, aneazaa ka o yi la a mane poɔ, kyɛ yelmennoŋ naŋ ba sage ka o voorɔ.” 5#Mak 16:18 Kyɛ a Pɔɔl da mere la a waabo lɔɔ eŋ a vũũ poɔ, kyɛ ka yeli zaa ba e o. 6#Tom 14:11 Ba da teɛrɛ la ka o na mɔre la bee a deɛ le kpi, kyɛ ba naŋ da kyɛlle ka a kɔɔre kyɛ ka ba da ba nyɛ yelfaa zaa ka o e a Pɔɔl, ba teɛroŋ da leɛɛ la ka ba yeli ka o waa la ŋmen.
7Wɛre mine da peɛle la a teŋɛ ŋa, a da waa dɔɔ kaŋ naŋ taa yuori a teŋɛ ŋa poɔ ka o yuori di Pubeleyo soobo. O da de te la saanoŋ velaa zaa bebie ata. 8A Pubeleyo saa da beɛrɛ la a gaŋ ane entoloŋ kyɛ zoro bin-zẽẽ. A Pɔɔl da gaa te nyɛ o la, a da puori eŋ o kyɛ da pare o nuuri o zu ka o da nyɛ sammo. 9A yeli ŋa puoriŋ, a noba banaŋ naŋ da be a teŋɛ poɔ a taa baaloŋ meŋ da waɛ la, a da wa nyɛ sammo. 10Ba da ko te la gyeremɛ yaga zaa, kyɛ te naŋ da wa kpɛ a gbori a na gaa, ba da ko te la bonzaa te naŋ boɔrɔ.
Pɔɔl Naŋ Ta Rom
11Kyuuri ata puoriŋ, te da kpɛ la gbori kaŋ naŋ da are a be a ɔɔkpoŋ zuiŋ. A gbori ŋa da yi la Alɛzandereya teŋɛ ka ba da boɔlɔ o Yeere. 12Te da are la Sirakus poɔ beri ata; 13a yi be a mɔŋ gɔlle a da te ta Rɛgyiyom. Bebi-gbuli naŋ da wa tɔle, a sapare nudoloŋ saseɛ da fuuro la kyɛ a beri ayi daare te da ta la Puteoli. 14Te da nyɛ la a yelderebɛ a be, ka ba da boɔle te ka te wa zeŋ ba zie bebie ayopoĩ. A lɛ la ka te da ta a Rom. 15A yelderebɛ naŋ yi a be naŋ da wa woŋ a te yɛlɛ, ba da yi la Apeyos Daa Poɔ ane Teree Taavens#28:15 Teree Taavens: O da waa la sokyɛnemɛ pɛnnoozie. ka ba tuori te. A Pɔɔl naŋ da wa nyɛ ba, o da puori la Naaŋmen ameseɛrɛ kyɛ da nyɛ faŋ-paalaa.
16 #
Tom 27:3
Te naŋ da wa te kpɛ a Rom poɔ, ba da ko la a Pɔɔl sori ka o na kpeɛrɛ o yoŋ ane a sogyɛ na naŋ da guuro o.
Pɔɔl Ane A Gyuumine Wederebɛ Yɛlɛ A Rom Poɔ
17 #
Tom 23:1
Bebie ata puoriŋ, a Pɔɔl da boɔle la a Gyuumine nembɛrɛ naŋ da be a be lantaa. Ba naŋ da wa lantaa, o da yeli ko ba la, “N yɔɔmine, aneazaa ka N ba e yelfaa zaa a sãã a te noba bee sãã a te sããkommine yeltuuri, kyɛ ba da nyɔge ma la a Gyeruzɛlɛm poɔ a de ko a Rom noba. 18Ba naŋ da wa kaa n yɛlɛ nyɛ, a Rom noba da boɔrɔ la ka ba bare ma, bonso, ba da ba nyɛ n saanaa zaa naŋ seŋ ne kũũ. 19#Tom 25:11 Kyɛ a Gyuumine naŋ da ba sage, a da fere ma la ka N yeli ka ba taa ma wa ne a nakpoŋ zie, aneazaa ka N da ba taa yelzaa ane a n noba. 20#Tom 26:6-7 A yɛlɛ ama zuiŋ la so ka N e ka N nyɛ yɛ a yeli yɛlɛ ko yɛ, bonso, a Izerayɛl teɛretɔroo zuiŋ la ka ba leŋ ma ne a banzɔlɔ ama.” 21Ba da leɛ yeli sɔgɛɛ la, “Te ba nyɛ gane zaa naŋ yi Gyudiya ka o yeli fo yɛlɛ ko te, ka a yɔɔmine kanzaa naŋ waana a kyɛ meŋ ba manne fo yeli zaa bee yeli fo yelfaa. 22#Tom 24:14; Luk 2:34 Kyɛ te boɔrɔ la ka fo manne a fo poteɛrɛ ka te woŋ, bonso, te baŋ ka a puoruu ŋa eŋ, ba yele zɔɔrɔ ne la o yɛlɛ zie zaa.”
Pɔɔl Naŋ Moɔle A Yelnoore A Rom Poɔ
23Ba naŋ da wa biŋ bebiri ko o, ba da laŋ la taa a o kpeɛbozie yaga zaa. O da manne la a yɛlɛ ko ba a yi bebie a te ta zimaane, a dire a Naaŋmen naaloŋ danseɛ, a da tu a Mooziz wuluu ane a Ŋmen-yelmanneba yɛlɛ zie a erɛ aneɛ ka o e ka ba baŋ a Yeezu yɛlɛ. 24Ba mine da sage de la a yɛlɛ o naŋ da yeli kyɛ ka ba mine da ba sage de. 25#Aza 6:9-10 A yɛlɛ ŋa zuiŋ, yelbawontaa da kpɛ la ba sogɔŋ, kyɛ ba naŋ da wa yaara, a Pɔɔl da la yeli la yel-yenaa kaŋ poɔ, “A Vooroŋ Soŋ da yele la yelmeŋɛ, o naŋ da tu a Ŋmen-yelmanna Azaaya zie a yele korɔ a yɛ sããkommine:
26‘Gaa a noba ŋa zie a te yeli,
Yɛ sereŋ na kyɛlle la, kyɛ yɛ koŋ baŋ a tɛgɛ,
ka yɛ sereŋ kaa, kyɛ yɛ koŋ nyɛ.
27Bonso, a noba ŋa taa la sukyiri kpagloo,
ka a ba tobo e kpeɛne, a ba wono,
kyɛ ka ba ũũ ba nimie;
ka ka ba na ta wa toɔ̃ kaa ne ba nimie,
a kyɛlle ne ba tobo,
a baŋ a tɛgɛ ne ba poɔ zaa a leɛ wa N zie
ka N na saŋ ba.’
28 #
Tom 13:46
Yɛ pãã baŋ ka ba taa la a Naaŋmen faabo ŋa a gaa ne a Nemboore-yobo zie; ba na kyɛlle la.” 29[A Pɔɔl naŋ da wa yeli a yeli ŋa baare, a Gyuumine da iri gɛrɛ la a kyɛ ŋmeɛrɛ nɔkpeɛne ne taa yaga zaa.]
30O da kpɛ la be yuon-gbulo ayi a da kaara o meŋɛ zu, a da derɛ banaŋ zaa naŋ da wa o zie saanoŋ, 31#Tom 28:23 a moɔlɔ a Naaŋmen naaloŋ yɛlɛ a kyɛ kanna a Daana Yeezu Kirista yɛlɛ a ba zoro dabeɛ̃ kyɛ ka bonzaa da ba pigi o sori.
Àwon tá yàn lọ́wọ́lọ́wọ́ báyìí:
Toma 28: DGA
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dagaare First Bible © The Bible Society of Ghana, 2025.