Markə 9
9
1Jezu kwâtə̂ye ə pâ kə əndje ə pa: «Djatra əpʉ, mə pa kə e, alabə̈ azü bale bale lə takpa tə̂ azü ə̂në əndje ka kotəye kɔ, əndje sə sə kə tshu nə ne ʉrrr ə wu Əgɔngerə nə̂ Ndjapä ə̂në ə sə kə na gu nə də awlra kɔ gâ ye kane.»
Piarə də Zake gâ ndə Zââ wû Jezu lə ə̂yî Ndjapä
(Matiɔ 17.1-13; Luki 9.28-36)
2Əlo mindû amanə bale mandânə, Jezu kô a-Piarə də Zake gâ ndə Zââ gâ ngotə̂ ye ə nâ də əndje mâ pâ ə̈bə̈ əgerə kaga â əndje sə̂ kʉtə̂ əndje mâ je. Tshitshi ye dô tə̂ ye kpî lə ala əndje. 3Aləba nə̂ ye tshê rô pâ nə â dô tə̂ əndje tə ə̂mbînə. Ə̈bə̈ əzü pâ ashɔ səye lï lï ndə kə pa tshə mbrə ə̈bə̈ ləba gru rəke ne. 4Eli gâ ndə Mayïzə wûtu gâ tə̂ əndje â sə̂ kə pa əpʉ kə Jezu. 5Piarə nə zâ əpʉ ə pâ kə Jezu ə pa: «Awoyisə̂ ərə, ə sə tə ə̂rɔ̂nə ndə kə pa a sə pə kotəye. Ä mbrə agbanda vəta, bale mbrə əbə, bale mbrə Mayïzə, bale mbrə Eli.»
6Tshə wûsə̂ əpʉ ə̂në tshə yîndə kə pa nə kɔ wû ne. Mbrə ə̂në awa rô pâ əndje gâ ye. 7Andra nâ ə zâ əndje. Lə andra nə, ə̈bə̈ tshema pâ əpʉ ə pa: «Ətshə tshə səye, tshə sə tə Ɨrɨ əmə ə̂në mə yində ye ngbatshe. E djï ətshə!» 8Kʉ pə kôto, atrawaya nə lîshi dji əndje nɔ̂, bale əndje wû ə̈bə̈ əzü wû bale ne, kʉtə̂ Jezu nə tshî kə sə̂ pə gâ ngotə̂ əndje.
9Ə̂në əndje tô pâ kaga nə ə sə̂ kə jerə nə kɔ, Jezu zâ ama kə əndje ndə kə pa əndje pa əpʉ ərə nə ə̂në əndje wû kɔ pa kə ə̈bə̈ əzü bale ne, ʉrrr Əgblə nə̂ Əzü she lə takpa tə̂ akuzu gâ ye kane. 10Əndje bâta əpʉ səkɔ gâ tə̂ lɔsu əndje â sə̂ kə yu tə̂ əndje lə takpa tə̂ əndje ə pa: «Kə she nə lə takpa tə̂ akuzu yində kə pa atâ a?» 11Atrawaya nə yû Jezu nə də əpʉ səye ə pa: «Mbrə yekɔ də̂ aawoyisə̂ âgbɔ̂ əpʉ nə̂ Mayïzə pâ Eli lï ndə kə na angbʉlînə gâ ye kane kɔ?» 12Tshə kîrə əpʉ kə əndje ə pa: «Eli ə na angbʉlînə ə gamba aərə nɔ̂ də äwänə gâ ye kane. Bale, mbrə yekɔ də̂ Əpʉ Ndjapä pâ ndje ə pa Əgblə nə̂ Əzü lï ndə kə wu əyo tə bandanə, azü sə kə wəra tə̂ əndje tə̂ ye kɔ? 13Bale, mə pa kə e, Eli nâ gâ ye â azü mbrə̂ ərə tshelə əndje gâ tə̂ ye mata ə̂në Əpʉ Ndjapä pâ əpʉ nə gâ pâ əpʉ nə̂ ye gâ ye kɔ.»
Jezu grɔ̂ afrɔ yîrə̂ tə̂ ə̈bə̈ əgblə
(Matiɔ 17.14-21; Luki 9.37-43)
14Alɔ ə̂në əndje gû trö də ə̂dû atrawaya nə gâ ye kɔ, əndje wû ə̈bə̈ əgerə ə̂kpû azü ə̂në əndje sə̂ dji atrawaya nə gâ ndə aawoyisə̂ âgbɔ̂ əpʉ nə̂ Mayïzə ə̂në əndje sə̂ kə pa ashera də aəndje kɔ. 15Pa nə ə̂në ə̂kpû azü nə wû Jezu nə kɔ, kumu əndje kpê pâ əndu əndje â əndje kpê ärɔ̈ ə nâ ndə kə bla ətshə. 16Jezu yû atrawaya nə̂ ye nə ə pa: «E sə kə pa ashera də azü nə gâ pâ əpʉ yekɔ?»
17Ə̈bə̈ koshe lə ə̂kpû azü nə kîrə əpʉ kə ətshə ə pa: «Awoyisə̂ ərə, mə nâ də ɨrɨ əmə ə̂në ə̈bə̈ afrɔ yîrə̂ sə lə ye â mbrə ətshə tə əndɨ kɔ kə əbə. 18Tə̂ ətshe nɔ̂ ə̂në afrɔ yîrə̂ nə za ətshə, tshə wli ətshə gâ tə̂ ashɔ, frʉtshɔ wutu ndʉ ama ye, tshə zɨ tshelə əji ye də âgbɔ̂, tshə gbətɔ ətshə. Mə kɨ̂ ə̂sə̂ əyo tə̂ əmə kə atrawaya nə̂ zə ndə kə pa əndje grɔ afrɔ yîrə̂ nə, əndje grɔ̂ ətshə tro gâ ye.» 19Jezu pâ kə əndje ə pa: «E-e, azü tshe kpəsəye ə̂në e sə sə də lɔsu ne kɔ! Mə sə kə sə pə ngotə̂ e ʉrrr gorɔ? Mə sə kə ru tshelə əmə tə̂ e ʉrrr gorɔ? E nä də əgblə nə kə əmə.»
20Əndje nâ də əgblə nə kə ətshə. Alɔ ə̂në afrɔ yîrə̂ nə wû Jezu nə kɔ, tshə vɔ̂tə̂ kə gbətɔ əgblə nə də awlra. Əgblə nə tê gâ tə̂ ashɔ â vɔ̂tə̂ kə wuru tə̂ ye lə ashɔ nə. Frʉtshɔ wûtu ndʉ ama ye. 21Jezu yû abä nə ə pa: «Ərə nə vɔ̂tə̂ kə mbrə tə̂ ye gorɔ?» Abä nə kîrə əpʉ ə pa: «Pə lə əgblə tə̂ ye. 22Alɔnɔ̂, afrɔ yîrə̂ nə wli ətshə gâ ala əwo wala gâ ala ə̂ngû ndə kə pa tshə tshu. Bale, kədə bə lï ndə kə mbrə ə̈bə̈ ərə, wü əyo ä ə yï kəna zə kə ä.» 23Jezu pâ kə ətshə ə pa: «Bə pa: “Kədə bə lï…”? Ərə nɔ̂ lï ndə kə mbrə nə mbrə əzü ə̂në tshə za lɔsu ye kə Ndjapä!» 24Trale, abä əgblə nə tâ râwâ ə pa: «Mə za lɔsu əmə kə Ndjapä! Yï kəna zə kə əmə mbrə ə̂në mə sə sə də lɔsu ne!»
25Jezu wû ə̂kpû azü nə ə̂në əndje sə̂ kə kpe ärɔ̈ nə na nə gâ ngotə̂ əndje kɔ, tshə ngâ kə afrɔ yîrə̂ nə ə pâ kə ətshə ə pa: «Əbə, afrɔ yîrə̂ ə̂në bə mbrə azü tə alayïbitû kɔ, wütu lə əgblə koshe səye ə dö tə̂ zə dö ə gü kwatəndje bale ne!» 26Afrɔ yîrə̂ nə tâ râwâ ə gbə̂tɔ əgblə nə də awlra ə wûtu lə ye. Əgblə nə sə̂ mata kuzu â ə̂kpû azü nə ə̂në əndje sə̂ gâ ngotə̂ ye kɔ pa: «Tshə tshû gâ ye.» 27Bale, Jezu têgbɔ kəna ye ə zâ ətshə gâ lafɔ â tshə kâ gâ lafɔ.
28Alɔ ə̂në Jezu dô tə̂ ye gu na ye gâ lə manda â sə̂ kʉtə̂ ye də atrawaya nə̂ ye nə kɔ, əndje yû ətshə ə pa: «Mbrə yekɔ də̂ ä grɔ̂ afrɔ yîrə̂ səkɔ tro kɔ?» 29Jezu kîrə əpʉ kə əndje ə pa: «Marä tə̂ afrɔ yîrə̂ səkɔ lï ndə kə wutu nə kʉ tə̂ äwä kə yu Ndjapä.»
Tə̂ äwä bishi nə, Jezu pâ əne sə kə tshu â she
(Matiɔ 17.22-23; Luki 9.43-45)
30Əndje âfɔ tə̂ ətshe nə kôto ə rô tɔ lə əgɔ Galile. Jezu yîndə nə yî ə pa azü wusə̂ ətshe ə̂në əne sə̂ tə̂ nə kɔ ne. 31Mbrə ə̂në tshə sə̂ kə yisə̂ ərə kə atrawaya nə̂ ye nə ə pâ kə əndje ə pa: «Əndje sə kə za Əgblə nə̂ Əzü gâ lə kəna azü, əndje sə kə wo ətshə. Bale, əlo vəta mandânə, tshə sə kə she nə.» 32Bale, atrawaya nə djî tshelə âdâ əpʉ sə̂ djî ne â awa ndə kə pa əndje yu ətshə mbrə̂ əndje.
Əde kə sə tə âgbɔ̂ əzü lə takpa tə̂ atrawaya?
(Matiɔ 18.1-5; Luki 9.46-48)
33Jezu də atrawaya nə̂ ye nə yî kumu əndje mâ Kaprənayɔmə. Alɔ ə̂në Jezu sə̂ gâ lə anda kɔ, tshə yû atrawaya nə̂ ye ə pa: «Ərə yekɔ də̂ e sə̂ kə pa ashera gâ pâ nə lə äwä kɔ?» 34Bale, əndje sə̂ kʉ ngboo, mbrə ə̂në lə äwä, əndje sə̂ kə pa ashera lə takpa tə̂ əndje ndə kə wu əzü ə̂në tshə sə tə âgbɔ̂ əzü ə rô angâ nə kɔ. 35Bale, Jezu sə̂ gâ tʉ ə ê atrawaya nə̂ ye nə morofo amanə bishi ə pâ kə əndje ə pa: «Kədə əzü kə yində kə sə tə əzü tshitshi nə, ə sə tə ə̂rɔ̂nə ndə kə pa tshə sə tə əzü tshe mandânə nɔ̂ ə sə tə əyïkosəra nə̂ ə̂dû angâ nə nɔ̂.»
36Mandânə, tshə zâ ə̈bə̈ aya əgblə ə zâ ətshə tɔ gâ lə ə̂grû tə̂ əndje ə zâ ətshə gâ ala əkro ye ə pâ kə əndje ə pa: 37«Əzü nɔ̂ ə̂në tshə wəra ə̈bə̈ aya əgblə mata ətshə ənə̂ səye tə ə̂rɔ̂nə də əɨrɨ əmə, kandää, əmə də ə̂tə̂ əmə də̂ tshə wəra əmə tə ə̂rɔ̂nə kɔ. Əzü ə̂në tshə wəra əmə tə ə̂rɔ̂nə, ə də̂ əmə kʉtə̂ əmə də̂ ə̂tə̂ əmə də̂ tshə wəra əmə kɔ ne, bale, tshə wəra ndje əzü ə̂në tshə wlâ əmə kɔ tə ə̂rɔ̂nə.»
Əzü ə̂në tshə wəra tə̂ ye wəra tə̂ Jezu ne, tshə sə tə əzü nə̂ ye
(Luki 9.49-50)
38Zââ pâ kə Jezu ə pa: «Awoyisə̂ ərə, ä wû ə̈bə̈ koshe ə̂në tshə sə̂ kə grɔ aafrɔ ayirə̂ də əɨrɨ zə, ä shêra ətshə tə̂ nə mbrə ə̂në tshə za äwä əzə̂ zâ ne.» 39Bale, Jezu kîrə əpʉ kə ətshə ə pa: «E shä shëra ətshə tə̂ nə ne. Mbrə ə̂në əzü â ma ə̈bə̈ ərə ə̈lü də əɨrɨ əmə, trale mandânə, tshə lï lï ndə kə pa əmbrʉ əpʉ də əɨrɨ əmə ne. 40Əzü ə̂në tshə sə sə də əpʉ də əzə̂ ne, tshə sə djoko ndə əzə̂. 41Əzü nɔ̂ ə̂në tshə sə kə to ə̂ngû də aya kopo kə e mbrə ə̂në e sə tə azü nə̂ Kristə kɔ, djatra əpʉ, mə pa kə e, âkrâ sə sə kə tshɔ ətshə mandânə ne.»
Ala e në ka e te te lə nyaka ne
(Matiɔ 18.6-9; Luki 17.1-2)
42«Bale, kədə ə̈bə̈ əzü kə mbrə â ə̈bə̈ aya əgblə bale lə aneshe səye ə̂në əndje za lɔsu əndje kə əmə kɔ kə te gâ lə nyaka, ə sə tə ə̂rɔ̂nə mbrə ətshə ndə kə pa əndje i ə̈bə̈ əgerə əkpʉ gâ tə̂ əgʉ ye ə wli ətshə də nə gâ lə ə̂ngû əngbrʉ. 43Kədə kəna zə kə yində kə frɔ əbə ndə kə pa bə te gâ lə nyaka, dë gâ ye. Ə sə tə ə̂rɔ̂nə ndə kə pa bə li gâ ə̂sə̂ sorô də kəna zə bale, ə rô ndə kə pa bə bata akəna zə nə bishi əndje wli əbə də nə gâ ə̂sə̂ əyo, gâ ala əwo ə̂në ə rɨ rɨ tə̂ ərə ne kɔ, [44tə̂ ətshe ə̂në anguzu kə zɨ tshekotə̂ azü tshu tshu tə̂ ərə ne kɔ â ala əwo nə rɨ rɨ tə̂ ərə ne kɔ].#9.44 Əpʉ səke sə sə lə alabə̈ aangbrɔ afraka Ndjapä də ama grakə ne. 45Kədə ə̈nü zə kə yində kə frɔ əbə ndə kə pa bə te gâ lə nyaka, dë gâ ye. Ə sə tə ə̂rɔ̂nə ndə kə pa bə li gâ ə̂sə̂ sorô də ə̈nü zə bale, ə rô ndə kə pa bə bata aə̈nü zə nə bishi, əndje wli əbə də nə gâ ə̂sə̂ əyo, [46tə̂ ətshe ə̂në anguzu kə zɨ tshekotə̂ azü tshu tshu tə̂ ərə ne kɔ â ala əwo nə rɨ rɨ tə̂ ərə ne kɔ].#9.46 Əpʉ səke sə sə lə alabə̈ aangbrɔ afraka Ndjapä də ama grakə ne. 47Kədə ala zə bale kə yində kə frɔ əbə ndə kə pa bə te gâ lə nyaka, tshäkəwla gâ ye. Ə sə tə ə̂rɔ̂nə ndə kə pa bə li gâ lə Əgɔngerə nə̂ Ndjapä də ala zə bale, ə rô ndə kə pa bə bata ala zə nə bishi əndje wli əbə də nə gâ ə̂sə̂ əyo, 48tə̂ ətshe ə̂në anguzu kə zɨ tshekotə̂ azü tshu tshu tə̂ ərə ne kɔ â ala əwo nə rɨ rɨ tə̂ ərə ne kɔ. 49Mbrə ə̂në əwo sə kə tshe tə̂ əzü bale bale mata ə̂në əndje tshe əngbrʉ gâ tə̂ ərə kɔ. 50Əngbrʉ sə tə ə̂rɔ̂ ərə. Bale, kədə atshɔ əngbrʉ nə kə nglɔ̂ lə nə gâ ye, e sə kə mbrə atâ ndə kə kirə də nə gâ mandânə? E sə̈ də atshɔ əngbrʉ lə e də ə̂tə̂ e ə sə̈ də blatshe lə takpa tə̂ e də angâ e.»
Àwon tá yàn lọ́wọ́lọ́wọ́ báyìí:
Markə 9: liy
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
2025 Association Centrafricaine pour la Traduction de la Bible et l'Alphabétisation
