Markə 7
7
Mandʉ ərə nə̂ alätä
(Matiɔ 15.1-9)
1 Afariza də alabə̈ aawoyisə̂ âgbɔ̂ əpʉ nə̂ Mayïzə ə̂në əndje tô mâ Jeruzalamə ə nâ kɔ, əndje ngbô tə̂ əndje gâ ngotə̂ Jezu nə. 2Əndje wû ə pa alabə̈ atrawaya nə̂ Jezu nə zɨ̂ rəgo də kəna əndje ə̂në ə sə̂ sə̂ mvo ne kɔ, mbrə ə̂në əndje yûtu kəna əndje nə yûtu ne.
3Kandää, Afariza nə də Ajuwufu nɔ̂ sə̂ kə bata mandʉ ərə nə̂ alätä əndje. Əndje â yində kə zɨ rəgo, əndje yutu kəna əndje angbʉlînə tə ə̂rɔ̂nə gâ ye kane â zɨ rəgo nə. 4Alɔ ə̂në əndje â tô mâ lə suku â gû, angbʉlînə ndə kə pa əndje zɨ rəgo, əndje sə kə yɔ tə̂ əndje ə sə mvo gâ ye kane. Əndje bata alabə̈ amandʉ aərə nə ngbatshe mata kə yutu akopo ə̂ngû, aləsû, də asambe gâ ndə aklʉngbʉ.
5Afariza nə də aawoyisə̂ âgbɔ̂ əpʉ nə yû Jezu nə ə pa: «Mbrə yekɔ də̂ atrawaya nə̂ zə lʉ mandʉ ərə nə̂ alätä lʉ ne â sə kə zɨ ərə də kəna əndje ə̂në ə sə sə mvo ne kɔ?» 6Jezu kîrə əpʉ kə əndje ə pa: «E-e, alayïama bishi. Ndəma Ndjapä ə̂në Ezayi pâ gâ pâ e kɔ, ə sə də äwänə. Əpʉ nə pâ:
“Azü səye sə kə vrɔ əmə kʉ lə ama əndje tə ambanə.
Bale, əndje gî əmə ngrʉ̂ gashe tə̂ lɔsu əndje gâ ye.
7Əndje vrɔ əmə kʉ tə ambanə,
mbrə ə̂në əndje sə kə yisə̂ kʉtə̂ aâgbɔ̂ aəpʉ ə̂në azü kə wûtu də nə kɔ.”»#7.7 Wu Eza 29.13.
8Jezu pâ kə əndje ə pa: «E tshi âgbɔ̂ əpʉ nə̂ Ndjapä tʉ â sə kə bata kʉtə̂ amandʉ aərə nə̂ azü.» 9Tshə pâ kwatə̂ye kə əndje ə pa: «E wə̂ra tə̂ e ngâ tə̂ âgbɔ̂ əpʉ nə̂ Ndjapä gâ ye â sə kə bata mandʉ ərə nə̂ e. 10Mbrə ə̂në Mayïzə pâ: “Lʉ̈ abä zə də əyï zə.” Tshə pâ kwatə̂ye ə pa: “Əzü ə̂në tshə gu abä nə wala əyï nə, əndje sə kə wa ngbanga kuzu gâ lə kumu ye.” 11Bale, e-e, e pa: “Kədə əzü â pa kə abä nə wala əyï nə ə pa: Ərə ə̂në mə lï kəmə ndə kə za kə əbə kɔ sə tə korba, âdâ nə kə də̂ ərə nə sə mbrə Ndjapä,” 12e za äwä kə ətshə ndə kə pa tshə za ərə za kə abä nə wala əyï nə ne. 13Rəkɔ, e sə kə ndɨ Əpʉ Ndjapä tə̂ äwä mandʉ ərə ə̂në e sə kə yisə̂ nə lə takpa tə̂ e kɔ. E sə kə mbrə marä tə̂ alabə̈ aata aərə ngbatshe rə.»
Ərə ə̂në ə mbrə ndə kə pa əzü sə tə əmbrʉ nə
(Matiɔ 15.10-20)
14Jezu ê kwatə̂ye ə̂kpû azü nə ə pâ kə əndje ə pa: «E-e nɔ̂, e djï əmə tə ə̂rɔ̂nə ə djï tshelə âdâ əpʉ nə. 15Ərə ə̂në ə to mashu ə li gâ lə əzü kɔ, ə lï lï ndə kə mbrə ndə kə pa tshə sə tə əmbrʉ əzü ne. Bale, ərə ə̂në ə sə kə wutu tə̂ lɔsu əzü nə kɔ kə mbrə ndə kə pa tshə sə tə əmbrʉ əzü nə. [16Əzü ə̂në tshə sə də ətu kə dji də əpʉ, tshə djï!]#7.16 Əpʉ səke sə sə lə alabə̈ aangbrɔ afraka Ndjapä də ama grakə ne.»
17Alɔ ə̂në Jezu kâtə̂ ə̂kpû azü nə tʉ ə dô tə̂ ye ə gû gâ lə manda gâ ye kɔ, atrawaya nə̂ ye nə yû ətshə tə̂ tshelə âdâ əpʉ kəwû səkɔ. 18Tshə pâ kə əndje ə pa: «E-e ndje, e lï lï ndə kə wusə̂ âdâ ərə ne a? E wusə̂ nə wu ə pa ərə ə̂në ə to mashu ə li gâ lə əzü kɔ ə lï lï ndə kə mbrə ndə kə pa tshə sə tə əmbrʉ əzü lə ala Ndjapä ne a? 19Mbrə ə̂në ərə nə li li gâ tə̂ lɔsu ye ne, bale, ə li gâ lə ye â mandânə ə sə kə wutu gashu.» Jezu pâ əpʉ səkɔ ndə kə yisə̂ nə ə pa arəgo nɔ̂ sə mvo lə ala Ndjapä.
20Tshə pâ kwatə̂ye ə pa: «Ərə ə̂në ə wutu lə əzü, tə nə kə sə̂ â mbrə ndə kə pa tshə sə tə əmbrʉ əzü. 21Mbrə ə̂në lə əzü, tə̂ lɔsu ye, də̂ aəmbrʉ aərə sə kə wutu gashu mata kə ma ə̂trû, kə zɨ angba, kə wo əzü, 22kə pra əwɔ əzü wala äkɔ̈ əzü, kə ma əgo aərə ro pâ nə, kə sə də əmbrʉ lɔsu, kə frɔ azü, kə mbrə aərə mbrə də äwänə ne, kə ma əgo aərə nə̂ angâ zə, kə pa əmbrʉ əpʉ gâ lə kumu ngâ zə, kə yisə̂ tə̂ əzü gâ ndə kə sə tə əndɨ. 23Aəmbrʉ aərə səkɔ nɔ̂ wutu tə̂ lɔsu əzü â mbrə ndə kə pa tshə sə tə əmbrʉ əzü lə ala Ndjapä.»
Ə̈bə̈ yashe ə̂në tshə sə̂ sə̂ tə Juwufu ne kɔ zâ lɔsu ye kə Jezu
(Matiɔ 15.21-28)
24Mandânə, Jezu kâtə̂ ətshe nə səkɔ tʉ ə nâ na ye mâ lə ashɔ əgɔ Tirə. Tshə lî gâ lə ə̈bə̈ anda â yîndə nə yî ə pa ə̈bə̈ əzü wusə̂ ətshe ə̂në əne sə̂ tə̂ nə kɔ bale ne. Bale, tshə zâ tə̂ ye wû tro gâ ye. 25Mbrə ə̂në ə̈bə̈ yashe ə̂në əgblə yashe nə̂ ye sə̂ də ə̈bə̈ afrɔ yîrə̂ lə ye kɔ, djî ndə Jezu nə ə nâ ə tê gâ tshekudu ye. 26Kandää, yashe səkɔ sə̂ sə̂ tə Juwufu ne, əndje zû ətshə lə əgɔ Siri mâ Fenesi. Tshə kɨ̂ ə̂sə̂ əyo tə̂ ye kə Jezu ndə kə pa tshə grɔ afrɔ yîrə̂ nə lə əgblə yashe nə̂ əne nə. 27Jezu pâ kə ətshə ə pa: «Kätə̂ aneshe, əndje zɨ ərə tshelə su angbʉlînə gâ ye kane. Mbrə ə̂në ə sə sə də äwänə ndə kə ko rəgo nə̂ aneshe ə ko wli kə aaya ayavrɔ ne.» 28Yashe nə kîrə əpʉ kə ətshə ə pa: «Djatra əpʉ, Âgbɔ̂ Əyïngerə! Bale, aaya ayavrɔ sə kə zɨ akutru rəgo nə̂ aneshe nə ə̂në ə sə kə yɔ gâ tʉ gâ tshekudu ərə ə̂në əndje ko rəgo nə gâ pâ nə kɔ.» 29Bale, Jezu pâ kə ətshə ə pa: «Mbrə əpʉ səye, gü na ye, afrɔ yîrə̂ nə wûtu lə əgblə nə̂ zə nə gâ ye.» 30Alɔ ə̂në tshə dô tə̂ ye ə gû na ye gâ lə manda nə̂ ye nə kɔ, tshə wû əgblə nə ə̂në tshə shô gâ tʉ gâ pâ klekpa. Afrɔ yîrə̂ nə wûtu lə ye gâ ye.
Jezu grɔ̂ rəka tə̂ ə̈bə̈ əndɨ
31Jezu kâtə̂ ashɔ əgɔ Tirə tʉ ə rô sɔ lə ashɔ əgɔ Sidɔ də Əgɔ-agala morofo ə gû djoko tə̂ dala ə̂ngû əgɔ Galile. 32Əndje nâ də ə̈bə̈ koshe ə̂në tshə sə̂ tə əyïbitû, ə̂në ə pâ tshema ye pâ də äwänə ne kɔ kə ətshə, əndje kɨ̂ ə̂sə̂ əyo tə̂ əndje kə ətshə ndə kə pa tshə za kəna gâ pâ koshe nə. 33Jezu zâ koshe nə kʉtə̂ ye bale ə gî tə̂ ye ngrʉ̂ də ətshə tə̂ ə̂kpû azü nə gashe. Tshə yî ayana kəna ye gâ lə ətu koshe nə ə gôro tima ye də ngrusu ama ye də ə̂tə̂ ye. 34Mandânə, tshə lîshi gâ lafɔ ə tɔ̂ foo ə pâ kə koshe nə ə pa: «Efata!» ə̂në ə yində kə pa nə ə pa: «Krɔ̈ də ə̂tə̂ zə!»
35Trale ətu ye krɔ̂, tshema ye sɔ̂ â tshə vɔ̂tə̂ kə pa əpʉ də äwänə. 36Jezu zâ ama kə əndje ndə kə pa əndje pa ndə əpʉ nə pa kə ə̈bə̈ əzü bale ne. Bale, ə̂në Jezu zâ ama kə əndje ndə kə pa əndje pa ndə əpʉ nə pa kə ə̈bə̈ əzü bale ne kɔ, əndje mʉ̂ əpʉ nə kwatəndje rô pâ nə. 37Azü nɔ̂ ə̂në əndje djî ndə əpʉ nə kɔ, kumu əndje kpê pâ əndu əndje rô pâ nə â əndje pâ: «Aərə nɔ̂ ə̂në tshə sə kə mbrə nə kɔ, ə sə tə ə̂rɔ̂nə wââ. Tshə mbrə̂ â alayïbitû dji əpʉ â aəndɨ pâ tshema əndje.»
Àwon tá yàn lọ́wọ́lọ́wọ́ báyìí:
Markə 7: liy
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
2025 Association Centrafricaine pour la Traduction de la Bible et l'Alphabétisation
