जोहा 17
17
जिसु आच्रेन चेलाको ला़गित्ए कोयेत्कान
1नोवाको जिसुइ रोड़केदा आर सेरमा सेच् बेङगेत् राकाप्कातेये मेनकेदा, ए बाबा, ओकते दो सेटेराकाना, आमरेन होपोन ठोनोक ओचोयेम, जेमोन होपोने ठोनोक ओचोमे, 2एनते आम दो आमरेन होपोन सानाम होड़को चेतानरे एकतिया़रियेम एमआकावादे, जेमोन तिना़क्एम एमआकावादे ओनको जोतो जायजुग जियोने एमाको। 3आर जायजुग जियोन दो नोक्ओंय, आमगे एसकार सा़रि इसोरको बाडायमे आर आमेम कोलआकादे जिसु मा़सि हों। 4इञ दो धा़रतिरेञ ठोनोक ओचोवाकात्मेया, का़मि ला़गित् ओकाटाक्एम एमआकावादिञ का़मिञ सा़तआकात्ते 5आर नितोक् दो ए बाबा, आम सामाङारे बाड़े ठोनोक ओचोञमे ओना ठोनोकतेगे, ओकाटाक् धा़रति आ़उरिरे आम सामाङरे ताहेंकानतिञ।
चेलाको ला़गित् जिसुवाक् कोयजोङ
6धा़रतिरेनको मोद खोनेम एम आकावादिञ होड़ ठेन आमाक् ञुतुम इञ सोदोराकादा, आमरेनको ताहेंकाना, आर ओनकोम एमादिञा, आर आमाक् काथाको दोहोआकादा। 7नितोक् दोको बाडाया, ओकाकोम एमआकावादिञा, ओनाको सानामाक् दो आम सेच् खोनाक्काना मेनते, 8एनते ओकाको काथाम एमआकावादिञ, ओनाको ओनकोञ एम आकावात्कोवा आरको आताङकेदा आर सा़रिगेको बाडायकेदा आम ठेन खोन इञ ओडोक हेच् आकाना, आरको पा़तिया़उ आकाना आमेम कोलआकादिञा मेनते। 9इञ दो ओनको ला़गित् इञ कोयेदा, धा़रतिरेनको ला़गित् दो बा़ञ कोकोयकाना, मेनखान आमेम एम आकावादिञको ला़गित्गे, एनते आमरेन कानाको। 10इञाक् सानामाक्को दो आमाक्काना, आर आमाक्को दो इञाक्गे, आर ओनकोरेञ ठोनोक ओचोआकाना।
11“इञ दो धा़रतिरे बा़ञ ताहेनकाना, मेनखान ओनको दो धा़रतिरेको ताहेनकाना, आर इञ दो आम ठेनिञ चालाक्काना। ए सोनोत बाबा, ओकोयको इञेम एम आकावादिञ आमाक् ञुतुमते दोहोकोम जेमोन मित्को ताहेन, आलाङ लेकागे। 12ओनको तुलुच् इञ ताहेंकानरे इञ दो ओकोयकोम एमआकावादिञ आमाक् ञुतुमतेञ बाञचाव दोहोकेत्कोवा, आर इञ होरहो आकात्कोवा, आर ओनको मोद खोन ओकोय हों बाको नोसटोलेना, नोसटोक्रेन होपोन छाडा, जेमोन सोसतोर काथा पुरा़उक्।”
13मेनखान नितोक् दो आम ठेनिञ चालाक्काना, आर धा़रतिरे ताहेंकानरे नोवाकोञ रोड़ेदा, जेमोन इञाक् रा़सका़ ओनकोवाक् मोनरे पुरा़पुरि पेरेजोक्। 14इञ दो आमाक् काथाञ एम आकावात्कोवा, आर धा़रतिरेनको दोको कुरुदआकावात्कोवा, धा़रतिरेनको बाङकानते, चेत्लेका इञ हों धा़रतिरेन इञ बाङ कान। 15धा़रति खोनेम इदिकोवा मेनते दो बा़ञ कोकोयकाना, बिचकोम जेमोन बा़ड़िच् खोनेम रुखिया़ दोहोको। 16धा़रतिरेन दोको बाङ काना, चेत्लेका इञ हों धा़रतिरेन दोञ बाङकान। 17सा़रियाक् ओजोक्ते सोनोतकोम, आमाक् काथागे सा़रियाक् दो। 18चेत्लेका धा़रतिते इञेम कोलआकादिञा, ओनकागे इञ हों धा़रतिते नोकोञ कोलआकात्कोवा। 19आर ओनको ला़गित् इञ सोनोतोक्काना, जेमोन ओनको हों सा़रियाक् ओजोक्ते सोनोत आकानको ताहेन।
20नोको एसकार ला़गित् दो बा़ञ कोकोयकाना, मेनखान नोकोवाक् काथाते इञरे पा़तिया़उक्को ला़गित् हों, 21जेमोन सानामको मित्को ताहेन, चेत्लेका आम ए बाबा, इञरे आर इञ दो आमरे, जेमोन ओनको हों आलाङरेको ताहेन, जेमोन धा़रतिरेनकोको पा़तिया़उक् आमगे इञेम कोलआकादिञा मेनते। 22आर इञ दो आमेम एम आकावादिञ ठोनोक ओनकोञ एम आकावात्कोवा, जेमोन मित्को ताहेन, चेत्लेका आलाङ हों मित्गे। 23इञ दो ओनकोरे, आर आम दो इञरे, जेमोन मित् उता़रआकानको ताहेन, जेमोन धा़रतिरेनकोको बाडाय आमेम कोलआकादिञा आर इञेम दुला़ड़ आकादिञ लेका ओनकोम दुला़ड़ आकात्कोवा, मेनते।
24“ए बाबा, मेनजोङकानाञ, आमेम एम आकावादिञको, ओकारे इञिञ ताहेन, ओनको हों इञ साँवतेको ताहेन, जेमोन इञाक् ठोनोकको ञेल, ओकाटाक्एम एमआकावादिञ, एनते धा़रति रेहेद आ़उरि खोनेम दुला़ड़ाकादिञा। 25ए भा़क्ला़यिच् बाबा, धा़रतिरेनको दो बाको बाडायाकात्मेया, मेनखान इञ दोञ बाडायाकात्मेया, आर ओनकोको बाडायाकादा आम इञेम कोलआकादिञा मेनते। 26आमाक् ञुतुम इञ बाडाय ओचोवाकात्कोवा आर इञ बाडायओचोकोवा, जेमोन आमेम दुला़ड़ आकादिञ दुला़ड़ दो ओनकोरे ताहेन आर इञ दो ओनकोरे।”
Àwon tá yàn lọ́wọ́lọ́wọ́ báyìí:
जोहा 17: NTSPt25
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The New Testament Books in Santhali Language © The Word for the World International and Santhali Translation Project, Nepal, 2025
