Ichedendik 1
1
Ẹtạma ch'ọyagbin
1K'ẹtạma, Ubinọkpaabyi usi ẹrạng ọttạra isek. 2Ma okpe ngwọ, ọttọhk vạnọ-vạnọ kòde, ọyagbin uning idwukhu, ibyi sidede ipyi irungu bẹ́ kkạng, ibạra ide asi-asi. Iguguma s'Ubinọkpaabyi wa n'isenga ibaabha ma k'asi mbọ.
3Ma wọ Ubinọkpaabyi obeni bẹ́, “Tte ọyaanttaana uninga.” Ọyaanttaana uninga. 4Ubinọkpaabyi ukwu ose bẹ́, ọyaanttaana kk'ujibha, Ubinọkpaabyi ọbhaangẹ ọyaanttaana k'urungubạnga. 5Ma wọ Ubinọkpaabyi oyeri ọyaanttaana nwọ, ẹya, ọbạra oyeri urungubạnga, irungu. Wa ekpebha ọttạra ẹchọhkha bọ asi echedenwu.
6Ubinọkpaabyi oben bẹ́, “Tte ẹkpẹkpa iyin k'ottemkwẹ kw'asi. Tte ẹbhaangẹ asi p'ẹrạng ọttạra asi p'isekh-isek.” 7Ma wọ Ubinọkpaabyi usi ẹkpẹkpa ẹbhaangẹ asi. Asi bạnọ aning k'akpaang k'ẹrạng, mbọkha aninga k'isekh-isek. Akwẹ ode oche ngwọ. 8Ubinọkpaabyi oyeri ẹrạng, akpaang. Wa ekpebha ọttạra ẹchọhkha bọ asi ottonga iwu ifa.
9Ubinọkpaabyi ọbạra oben bẹ́, “Tte asi p'aning k'akpaang isekhisek atobha ibyi rạnẹ, ọfha igbin iyin.” Akwẹ ode oche ngwọ. 10Ubinọkpaabyi oyeri isek, igbin, ọbạra oyeri asi p'atobh ibyi rạnẹ, araanga-diden. Ubinọkpaabyi ose bẹ́, kk'ujibha.
11Ubinọkpaabyi oben bẹ́, “Tte isek imen ekpo k'akhira k'akhira: asạsaarẹ p'n'ayạm amạma p'm'amen k'ukhira kwabẹ, ọttạra nchi s'n'iyạm adwuk p'akhaam amạma pabẹ, k'oche kw'ukhira kwabẹ ode.” Akwẹ ode oche ngwọ. 12Isisek imen asạsaarẹ k'akhira-k'akhira: asạsaarẹ p'n'ayạm amạma p'abin k'amạma pabẹ oyeni, ọttạra nchi s'n'iyạm adwuk p'abin k'amạma p'achidwuk pabẹ oyeni. Ubinọkpaabyi ose bẹ́, kk'ujibha. 13Wa ekpebha ọttạra ẹchọhkha bọ asi ittonga iwu ittaan.
14Ubinọkpaabyi oben bẹ́, “Tte mkpon ininga k'akpaang s'm'ibhaangẹ ẹya ọttạra irungu, tte asẹ ide ẹkhọhkha ch'okpe kw'erobha, ọttạra iwu, ọttạra icho. 15Tte mkpon nnọ imaanẹ k'akpaang, ọfha asẹ inạng ọyaanttaana k'ọyagbin.” Akwẹ ode oche ngwọ. 16Ubinọkpaabyi usi mkpon mfa sididen. Wa usi ch'ẹbạr-ọbạr bẹ́, ekkeri ẹya, ọttạra ch'ẹsạkh-ọsạkha bẹ́, ekkeri irungu. Wa ọbạra usi ndudoru. 17Ubinọkpaabyi ochokhu sẹ bẹ́, asẹ ininga k'ọrạngkpaang n'inạng ọyaanttaana k'ọyagbin, 18ọttạra bẹ́, asẹ n'ikkeri ẹya ọttạra urungubạnga, ọttạra bẹ́, asẹ n'ibhaangẹ ọyantaana k'urungubạnga. Ubinọkpaabyi ose bẹ́, kk'ujibha. 19Ẹchọhkha ọttạra ekpebha bọ asi ottonga iwu innebung.
20Ubinọkpaabyi ọbạra oben bẹ́, “Tte asi afu ọttạra nten k'akhira-k'akhira s'ikhaangkẹ isaabh-ọsaabh, s'ining akpen, tte ọnọhn f'ẹrạng ukwur k'iyokhu s'akpaang.” 21Mạnna wọ Ubinọkpaabyi oyokhu nten sididen s'asi, ọttạra ọttọhk fidede f'urukhu akpen, f'n'ọbạra osenga k'asi, ọttạra ọnọhn k'ukhira-k'ukhira. Ubinọkpaabyi ose bẹ́, kk'ujibha. 22Ubinọkpaabyi odo nten nnọ s'kk'usia bẹ́ phyibh, oben bẹ́, “Amaan ayok k'ọsaabh, abạra afu abaabha asi p'araanga-diden. Tte ọnọhn ọsaabh k'ọyagbin.” 23Ẹkpebha ọttạra ẹchọhkha bọ asi ottonga iwu isen.
24Ubinọkpaabyi ọbạra oben bẹ́, “Tte isisek itima nten k'abẹ k'ukhira iyin: nten s'oter, ọttạra nten s'n'isenga k'isisek, ọttạra mkpaten, k'ukhira kwabẹ.” Akwẹ ode oche ngwọ. 25Mạnna wọ Ubinọkpaabyi usi mkpaten, ọttạra nten s'oter otor k'ukhira kwabẹ, ọttạra nten s'n'isenga k'isisek phyi-phyibh k'ukhira kwabẹ. Ubinọkpaabyi ose bẹ́, kk'ujibha.
26Ma o, Ubinọkpaabyi oben bẹ́, “Tte amạna ansi ayokhanạng p'm'ade masẹ amạna mba, p'akheri amạna mba oyeni. Tte abẹ akhaama ẹfa ch'm'akkeri nten s'asi, ọttạra ọnọhn f'ẹrạng, ọttạra nten s'oter, ọttạra mkpaten, ọttạra ekpo phyi-phyibh py'n'esenga k'isisek.”
27Mạnna wọ wa Ubinọkpaabyi oyokhu ayokhanạng akhera ẹma oyeni,
oyokhu bẹ akhera Ubinọkpaabyi.
Wa oyokhu bẹ ujunung ọttạra ikwanạng.
28Ubinọkpaabyi odo bẹ, oben bẹ bẹ́, “Abạnga amaan ayok k'ọsaabh, tte iva pabạnga afu abaabha ọyagbin ọttạra nten s'asi, ọttạra ọnọhn f'ẹrạng, ọttạra ọttọhk fidede f'urukhu akpen, f'n'ọbạra osenga k'isisek.”
29Ma wọ Ubinọkpaabyi obeni bẹ bẹ́, “Akkeri, kk'bạnga achidwuk ọttạra achimạma py'idede p'aning k'isisek nnạnga, ọttạra nchi phyi-phyibh s'n'iyạm adwuk p'amạma aning k'ẹtaanga bẹ́, asẹ ide uchiattọhk fabạnga. 30Oseng nten phyibh s'irukhu akpen k'isek, ọttạra ọnọhn phyibh, ọttạra ọttọhk fidede f'n'osenga k'isisek, f'ọbạra urukhu akpen, kk'bẹ akwongutọhng p'ẹkpa nnạnga bẹ́, abẹ achi masẹ uchiattọhk fabẹ.” Akwẹ ode oche ngwọ.
31Wa Ubinọkpaabyi ose bẹ́, ọttọhk fidede f'kk'usia ujibhi oseng eden. Wa ekpebha ọttạra ẹchọhkha bọ asi ottonga iwu isajạnẹ.
Àwon tá yàn lọ́wọ́lọ́wọ́ báyìí:
Ichedendik 1: mfn-x-os
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2025 West Africa Christian Mission