Nnwẹr s'Osenga 19
19
K'okpecho kw'Sinai
1K'ophye kw'ottong attaan, s'anạng p'Israẹl kk'abina k'Ijip, abẹ akpir k'ibyi s'owor kha Sinai ma iwu njọ jạnẹ. 2Masẹ abẹ abin k'Rẹphidim, abẹ asengi akpira k'ibyi s'owor kha Sinai. Wa anạng p'Israẹl abhingi ma, k'ititikha s'okpecho nwọ.
3Ma wọ, Mosẹs uvura ọta okhebha Ọvaar Ubinọkpaabyi, Ọvaar Ubinọkpaabyi ukwu oyer-ẹ k'okpecho oben bẹ́, “Keri udik kw'm'akpaak iva p'iva p'Jekọb, ọttạra anạng p'Israẹl: 4‘Abạngama oyeni kk'idik asia s'nsi anạng p'Ijip, ọttạra oche kw'ndir bạnga mkpẹ kakhaam k'ifor, masẹ itingi idir iva pẹ k'abạbaang, ntima nkwu k'ibyi saam oyeni. 5Ma wọ, de abạnga asạk echo k'ettem ibunguchẹ, abạnga abạra achok echekha chaam, abạnga m'ade anạng p'amma nchokhu ettem k'ikhaana s'idifhon phyibh, ọbạra ode bẹ́, ọyagbin phyibh ọkhaam amma. 6Abạnga m'ade-m idifhon s'afọhn-nja ọttạra ofhon kw'awurada. Ẹkkaabha ch'm'akpaak anạng p'Israẹl jọ ma.”
7Ma wọ Mosẹs ọkpa nnạm ukwu otobha adennạng p'anạng mbọ, ọtạkha idik s'Ọvaar Ubinọkpaabyi kẹ-ẹ ọtọhna bẹ́ ọkpaak, ọkpaak bẹ bẹ phyibh. 8Anạng mbọ phyibh n'abhin k'okpe gwạnọ bẹ́, “M'ansi udik kwidede usi k'oche kw'Ọvaar Ubinọkpaabyi kk'ọkpaakha.” Ma wọ, Mosẹs ọkpa nnạm ọta ọkpaak Ọvaar Ubinọkpaabyi ẹpọhna chabẹ.
9Ọvaar Ubinọkpaabyi obeni Mosẹs bẹ́, “Amma m'nsạkha ntor-ọ k'ebona ch'ipyi bẹ́ kkạạng, ọfha anạng mbọ abhaang-m s'm'mkpaak abọ idik, ọfha abẹ n'achera udik kwọ k'okpe kwidede.” Ma wọ, Mosẹs n'ọkpaakhẹ Ọvaar Ubinọkpaabyi ẹpọhna ch'anạng p'Israẹl kk'anạnga.
10Ọvaar Ubinọkpaabyi obeni Mosẹs bẹ́, “Kpa nnạm ata akhebha anạng mbọ, m'asi abẹ achok ifor sabẹ iwur chemma ọttạra uphyini. Tte abẹ akpobhu ekpo igiapẹ pyabẹ, 11abẹ ado ifor sabẹ atik iwu ch'ettong ittaan, ukwuru bẹ́, ma iwu njọ ch'ettong ittaan jọ ch'Ọvaar Ubinọkpaabyi m'ọsạkha k'okpecho kw'Sinai, k'ukhubha kw'anạng phyibh m'ase-ẹ. 12Ọma ge erem baabha okpecho nwọ, abạra akpaak bẹ bẹ́, ‘Atik ifor sabạnga, ọnạng wạnọ-wạnọ nạngẹ okpecho nwọ uvur o, brasẹ n'ukpir kw'm'utwu ammakpa pẹ ọbọhk. K'udik ọkka, ọnạng kwidede kw'utwu ọbọhk ma okpecho nwọ, abẹ m'afhẹ-ẹ ọfhọ. 13Abẹ m'atọhbh-ẹ ata, oyongu ma abẹ akhum-ẹ akhọhn, tte abẹ nạngẹ ọbọhk avunu. Ode oyokhanạng o, ọbạra ode eten o, abẹ nạ́ng-ẹ ọbọhk atte uruk akpen.’ Okpe kw'abẹ age inyisa tạrr eden ibhir, ma wọ abẹ m'asenga afora okpecho nwọ.”
14Ma wọ, masẹ Mosẹs ọsạk k'okpecho nwọ, ukwu usi anạng mbọ awur, abẹ abạra akpobhu ekpo igiapẹ py'abẹ. 15N'obeni bẹ bẹ́, “Abạnga ado ifor atik iwu njọ ch'ettong ittaan. Abạnga nạ́ngẹ ayok abẹ ayim o.”
16K'ekpebha ch'iwu ch'ettong ittaan, ẹbhaangkpon ẹtta, ẹbạra ẹmạnẹ, ebona ch'ipyi bẹ kkạạng ibubh okpecho k'erạng-ẹrạng, inyisa ege k'erạng-k'ẹrạng bẹ́ popopoobh, ojora ọvạkha ọnạng kwidede kw'uning ma ibyibhingasẹ. 17Ma wọ, Mosẹs utim anạng mbọ ubina k'ibyibhingasẹ, abẹ ata akhebha Ubinọkpaabyi, abẹ abe k'ekpecho isekhisek. 18Isusong ibubha okpecho kw'Sinai, ukwuru s'Ọvaar Ubinọkpaabyi ọsạk ma okpecho nwọ masẹ ekpon. Isusong nnọ ivura masẹ akpondaak okpecho nwọ kubungu n'onyengi ipyibh-iphyibha. 19Ẹmạng ch'inyisa ẹkhaangkẹ ẹt-ọta. Ma wọ, Mosẹs ọkpaakhẹ udik, Ubinọkpaabyi utima ẹbhaangkpon ọpọhn-ẹ.
20Ọvaar Ubinọkpaabyi ọsạkha k'okpecho kw'Sinai k'ẹrạng-ẹrạng, oyeri Mosẹs bẹ́ uvura okhebh-ẹ kha. Ma o, Mosẹs uvura. 21Ọvaar Ubinọkpaabyi oben Mosẹs bẹ́, “Sạkha ata atwạr anạng mbọ itọhng, ọfha abẹ nạngẹ erem ajek, bẹ́, abẹ akwu ase Ọvaar Ubinọkpaabyi, ọfha anạng saabhada nạ́ngẹ ape. 22Ọbạra afọhnẹja p'n'afora Ọvaar Ubinọkpaabyi bọ, abẹ m'agba achok ifor sabẹ iwur-uwur, deja Ọvaar Ubinọkpaabyi m'ọnạng bẹ irem.”
23Mosẹs obeni Ọvaar Ubinọkpaabyi bẹ́, “Anạng mbọ okpecho kw'Sinai máfora e, ukwuru bẹ́ ọmoyeni wọ atwạr mạna itọhng bẹ́, ‘Ge erem baabha okpecho nwọ, achok wẹ uwur-uwur.’ ”
24Ọvaar Ubinọkpaabyi ubhin-ẹ bẹ́, “Sạkha ata atima Aarọn akwu. Okhenka, afọhnẹja ọttạra anạng mbọkha, abẹ nạ́ngẹ yuyom ayom bẹ́, abẹ avur akhebha Ọvaar Ubinọkpaabyi, deja m'ọnạngẹ bẹ irem.”
25Ma wọ Mosẹs ọsạk okhebha anạng mbọ, otek bẹ oche kw'Ọvaar Ubinọkpaabyi obeni.
Àwon tá yàn lọ́wọ́lọ́wọ́ báyìí:
Nnwẹr s'Osenga 19: mfn-x-os
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2025 West Africa Christian Mission