मत्ती 10
10
येशुले आपरिङन्या बारं प्रेरितयाङ
मर्कुस ३:१३-१९; ६:७-१३; १३:९-१३; लूका ६:१२-१६; ९:१-६; १२:२-९; २१:१२-१७
1येशुले बारं गोटा सिइयाङजन खुल्स्यु अशुद्दआत्माङ पलिईन्या सनर सोगलै किसिमला नाएबोर सनर दुर्बलताजन सबेलन्या अढिकार आयोवाङ। 2बारं प्रेरितयाङल मिन आकाई ज्या, पैला पत्रुस ऐढासिन्या सिमोन सनर नकाल भाई अन्द्रियास, जब्दियाल ज़ा याकूब सनर नकाल भाई यहुन्ना, 3फिलिप सनर बारथोलोमाइ, थोमा सनर तिरो उठाइन्या मत्ती, अल्फयसलं ज़ा याकूब ओटन थेदियस, 4सिमोन कनानी सनर यहूदा इस्करियोत, जोले येशुजन कोलोकौ आपरिङौ।
बारं सिइयाङल सेवाकाई
मर्कुस ६:७-१३; लूका ९:१-६
5येशुले नका बारं गोटा सिइयाङजन आदेस यांस्यु आपरिङवाङ, “गैरयहूदीयाङल खार्ल ताहिनच्यो, अथाबा सामरीयाङल सहरल तापसिच्यो।”#यर्मिया ५०:६ 6तर इस्राएल जातिला मांन्या भेडाङ ल्योङ हिन्चिते। 7स्वर्गलं राज्य नेराकै ताप्रा:स्यु लेया, ऐलेस्यु प्रचार ढोचिते।#लूका १०:४-१२ 8नाएबोरन्याङजन सबेल्चिरते, सिन्याङजन जिङदा जाएचिरते, कोर लागिन्याङजन चोखा जाएचिरते, भूतयाङ पलिइचिरते। जे डाङज जेडोएचिऊ, डाङजै योंचिरते। 9जे झेलील सुन, चान्दी सनर ताम्बाल पैसा तावुरच्यो, 10जेबाऔक झ्योला, नें जोर दौरा, जुता, झुई तालाङच्यो। दानाङभन्या कामदारले आज्यान्या डोटौज परिया।#१कोरिन्थी ९:१४; १तिमोथी ५:१८
11“जो सहर या नङ्गरल जे पसिच्यो, नल काङ्का लायकला लेऊ ऐलेस्यु रोअचिते, ओटन नलन बिदा जेमाताहौ समन नलै चुङज्याचिते।” 12नका झिम भितरलं जेपसिऊक जडौ ढोचिरते। 13यदि नका झिमला रुयाङै जेजन स्वागत ढाचिरकन नका झिमल शान्ति ग्यारांत्या। तर नला रुयाङै जे जडौ माहोलरकन, शान्ति जेल्यौदेए वलस्यु ग्यारांत्या। 14यदि काङ्काङै जेजन स्वागत माढाचिरकन या जे छेन माथएदुरा भन्या, ना झिमलन अथाबा सहरलन जेपलिहौक जेखङला धुलो हरस्योचिरते।#प्रेरित १३:५१ 15ङा जेजन, मछ्यु ऐढाच्या, नियाल दिनक ना सहरल दशातन बरु सदोम सनर गमोराल दशा भ्याई मासहिदुन्या ताहा।#मत्ती ११:२४; उत्पत्ति १९:२४-२८
रांङालेन्या दुख
मर्कुस १३:९-१३; लूका २१:१२-१७
16“ब्याएचिते, ङा जेजन फ्याऊयाङ खार्ल भेडाङमन परिङज्याच्या, नैताइस्यु जे डाङमन चलाक सनर कचिकुरमन सोझा ताइचिते।#लूका १०:३ 17तर रुयाङतन होसियार ताइचिते, दानाङभन्या नकाङै जेजन अदालतल सुम्पिचिरा, ओटन यहूदीयाङल आराधना झिमजिऊल जेजन कोर्ला राइस्याचिरा।”#मर्कुस १३:९-११; लूका १२:११; १२; २१:१२-१५ 18ङागर्दाले जेजन हाकिमयाङ सनर रययाङै सामन्दी सच्यानन्यालेरा, ओटन नकाङ सनर गैरयहूदीयाङल नाल्ट साची ताइन्यालेच्या। 19तर जब नकाङै जेजन कोलोकौपरिङचिर, तब जे नै छ्योङै ऐलेस्यु ताआतिच्यो। दानाङभन्या जे नै छ्योङौ परिन्या, नवाए बेला जेजन पानस्यासिया। 20दानाङभन्या जे जेईज छ्योङन्या माताइचिदी, तर जे बौल आत्मा जेल्योङन छ्योङन्या लेया। 21“दाज्यूभाईले दाज्यूभाईजन सटौ नाल्ट जिम्मालाइरा, बौले ज़ायाङजन, ओटन ज़ायाङ बौ आमाङल बिरोदत च्याङन्या लेरा ओटन नकाङजन सटौ परिङन्या लेरा।”#मर्कुस १३:१२; लूका २१:१६ 22ङा मिनले गर्दा जे सोगलैङन सज्युस्युनीच्या। तर जो छिन्ट समन तनस्यु लिज्या, नकाईल उद्दार ताहा।#मत्ती २४:९; मर्कुस १३:१३; लूका २१:१७; मत्ती २४:१३; मर्कुस १३:१३ 23जब नकाङै जेजन तोलोअ सहरल सटाइचिर तब छुट्टै सहरल ढोङचिते। दानाङभन्या मछ्यु ङा जेजन ऐढाच्या, रु ल ज़ा आमाराऔ हादेए जे इस्राएल सहरला जे डुलिस्यु खेमन्या माल्चिदी।
24“सिइ गुरतन सनर नोक्कर साहूतन घिन्या माताइदी।”#लूका ६:४०; यहुन्ना १३:१६; १५:२० 25सिइ आगुरमन सनर नोक्कर साहूमनताइन्या पक्काई ज्या। यदि नकाङै झिमला साहूझन्ज बालजिबुल ऐढोरकन, आजाहानयाङजन ख्वाए भ्याई रांढोव होला?#मत्ती ९:३४; १२:२४; मर्कुस ३:२२; लूका ११:१५
26“नैताइस्यु नकाङ रङस्यु ताछ्याएच्यो। दानाङभन्या कप्स्यु मारंनन्या सनर मोअस्यु थाह माताइन्या नैज माल्दी।”#मर्कुस ४:२२; लूका ८:१७ 27ङा जेजन चिऊन्याल जो पानस्याच्यो, ना जे रंनन्याल पानस्योचिरते, ओटन जे गोप्यल जेथएन्या, झिमल धूरीतन प्रचार ढोचिते। 28नकाङसं ताछ्याएच्यो, जोले बुलजन सएर, तर आत्माजन सटौ माढुदुरदी। बरु आत्मा सनर बुल नेंलोअजन नरगल नास जाएन्या परमेस्वरजन रङस्यु छ्याएचिते। 29नैति त पैसालं नेंलोअ भिङ्गुऱ्या मायहौने? नकाने मध्य तोलोअ बै जे बौल इच्छ्याबिना नामल तेइन्यामाल्नेदी। 30जे ङएला स्वाट्टै चेमसऱ्या बै गनिस्यु नाएसिया।#लूका १२:७ 31नैताइस्यु ताछ्याएच्यो, जे तबर भिङ्गुऱ्याङतन भ्याई करन्या लेच्या।
ख्रीस्टजन मानिन्या सनर मामानिन्या
लूका १२:८-९
32“नैताइस्यु जोले रुयाङ हार्मै ङाजन निज्याङु, ङा बै नकाजन स्वर्गल लिज्यान्या ङा बौल लेऊक मानिन्यालेङा। 33तर जो-जोले ङाजन रुयाङल हार्मै मामानिङु, ङा बै नकाजन स्वर्गल लिज्यान्या ङा बौल लेऊक मामानिङदी।”#२तिमोथी २:१२
शान्ति माङडी तरवाल
लूका १२:५१-५३; १४:२४-२७
34“ङा पिरथ्बील शान्ति होनन्या ङारांङु, ऐलेस्यु तायिङच्यो। शान्ति होनन्या माङडी, तर तरवाल चलाइन्या ङारांङु हो। 35दानाङभन्या ङा रुजन आबौल बिरोदत, सनर मेएमाज़ाजन आअमाल बिरोदत, ओटन ब्वाहारीजन फुबुल बिरोदत ङाजाएराङु हो।”#मीका ७:६ 36रुल शत्तुर नकाल आझिमलाइज ताइन्यालेरा। 37“जोले ङातन भ्याई आबौ या आअमाजन प्रेम ढोव, ना ङा सिइ ताइन्या लायकला माताइदी। जोले ङा भन्या भ्याई ल्हेपाज़ा या मेएमाज़ाजन प्रेम ढोव, ना ङा सिइ ताइन्या लायकला माताइदी।” 38जो आक्रूस वुरस्यु ङाछिन्ट मालागि, ना ङा लायकला माताइदी।#मत्ती १६:१७; मर्कुस ८:३४; लूका ९:२३ 39जोले आपरान जोगाहौ, नाले आत्मा गवाइवा, ओटन ङा नाल्ट आपरान गवाइन्याले जिबन डोएवा।#मत्ती १६:२५; मर्कुस ८:३५; लूका ९:२४; १७:३३; यहुन्ना १२:२५
इनाम
मर्कुस ९:४१
40“जेजन ग्रहन ढान्याले ङाजन ग्रहन ढाङवा, ओटन ङाजन ग्रहन ढान्याले ङाजन परिङन्याजन बै ग्रहन ढोवा।#लूका १०:१६; यहुन्ना १३:२०; मर्कुस ९:३७; लूका ९:४८ 41जोले अगमबक्ताजन अगमबक्ता लेस्यु स्वागत ढोव नकाले इनाम डोएवा, ओटन जोले धर्मि रुजन धर्मि लेस्यु स्वागत ढोव, नकाले इनाम डोएन्यालेया। 42जोले आका इङन्याङ मध्य तोलोअजन ङा सिइ यिङस्यु त खुरी चिसो री ओव योंव, ङा मछ्यु जेजन ऐढाच्या, कि नकाले आइनाम ऐजै गवाइन्यामाल्दी।”
Àwon tá yàn lọ́wọ́lọ́wọ́ báyìí:
मत्ती 10: NTSKm25
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The New Testament Books in Sheshi Kham Language ©The Word for the World International and Sheshi Kham Translation Project, Nepal, 2025
