Matiyu 4

A mwi Yeisu n zhabwikawu

1Nlonu Zafnu wa lo n Yeisui n zhabwikawu, ntuge Shetam wo mwu wo. 2Ń əgbewna avnu anyipyei shiinyi n asukwoi shiinyi nya, myikwnu kwaa wo gwnu. 3Əzamwuyi wa ɓe da əwo wa gna, “Ngye ho zhni Shekwoyi Nugwnu nu, gna akwuta ye ɓa kwu zè biledi.”

4Yeisu wa dnaɓəgbe, “Kwo kafyilo: ‘Zanyikwoci taa gyianyì n nyagyii nu gbmanyi m, ama n ɓədagbma dəhodəhoi ń kwo gbmi n Shekwoyi əgbe.’ ”

5Nlonu Shetam wa la wo lo ncei n əzhiyaakwo gyigyiyi, waa wo gnyiagnyi tu n Dagayipwuwa àsna duduyi shé.

6Wa gna wo, “Ngye ho zhni Shekwoyi Nugwnu nù, she əhohni yashi ń əknyi. Ntuge a ncei kafyilo:

“ ‘Wo ɓa ga əwo amaləka ɓəgbetu tu ń əho tukwo,

jesnu ɓa ɓá kna ho n əɓa aɓwadai,

nabai to ha znu əho pita n kwuta m.’ ”

7Yeisu wa dna wo ɓəgbe, “A kafyilo ce ge: To dna Dagayi əho Shekwoyi n mwumwu m”

8Njesnu Shetam wa la wo lo ncei ń əpe àsnada, wa wu wo abemi vnyanya anyì nya n əɓa bmyabmyai. 9Wa gna, “Anya ye vnyanya mi ɓa kwu ɓa ga ho, ngye ho ɓa yashi, ha ga mi mwamwa.”

10Yeisu wa gna wo, “Laka ń əmi aba, Shetam! Ntuge a cei kafyilo: ‘Mwa Dagayi əho Shekwoyi, jesnu əwo nu ɓwasnu n ho ɓa zhni wo tnutnu.’ ”

11Nlonu Shetam wa fa wo, amaləka ɓa ɓe ɓa bma wo zhni.

Yeisu ya waazizhni

12She Yeisu ɓə wo nge a la Yohana gwudna n zhalu, wa gbmiya lo Gəlili. 13Wa gbmi n Nazereti, wa lo waa dna n Kapanam, ń kwo ɓə ma ń Zebwulum nuwna-znudna gbe n Naftali nyai nyi, 14nabai kwa nu ənya ń a ɓə kwu da n sheɓəgwognayi Ishaya əgbe:

15“Zebwulum əknyi ɓədo n Naftali nyai,

Zokwo shikwo nya, n Urudu əkpmai,

Gəlili Abyedo nya,

16aza n ɓa sase fyi n wyegbma

ɓa kwu bwuznagna yaakwo gyewye;

aza yi n ɓa sase fyi ń əfyi jejelukwo nyi, bwuznagna kwo la yakpe ɓa.”

17Ənya n kwo laka n əsa yii, Yeisu wa ya waazizhni, “Fye yeabwi, ntuge əshebemi kwo la wo vyivyiwyi.”

Yeisu yi amwutuyi kpmisnuyi

18Shi Yeisu ɓə lo woi znazna ma ń Gəlili shikwo əgbe, wa gye əza n əwodoi, Sima ń a yi Byitusu nyi n əwodoi Anduru. Ɓa ɓə fyi ɓai she əsa nu n nuwna-znudna, ntuge ɓa ɓə zhni abmyawnayi nu. 19Yeisu wa gna, “Fye ɓe, fya vyi mi, jesnu mi ɓə tnu n fyei, fya wna aza ngye abmya.” 20N əsagbmanyii ɓa ya əɓa asa zhi, jesnu ɓa vyi wo.

21Wa laka ń abaayi lo abye, wa gye əza ń əwodoi, Jemyis Zebədi nugwnu n kwnusnu n əwodoi Yohana. Ɓa ɓə fyi n əya nuwnanya nu ɓədo n əɓa dadai Zebədi, ɓai zhni əɓa asa aba. Yeisu wa yì ɓa, 22jesnu nsayisayii, ɓa fa əya nuwnanya n əɓa dadai ɓa vyi wo.

Yeisu ká anyasnai gna

23Yeisu wa zna laɓa n Gəlili vnyanya, woi wunya n əɓa Ayahudiyibwokwnu, woi zhni waazi nabagyi manai əbemi nya jesnu woi ká anyasnayi dəhodəhoi gna n agwnumai. 24Əwo nabagyi kwaa gnamyi fyi n Siriya vnyanya, a ɓe wo n azai vnyanya ń ɓa ɓə n anyasnai gbowogbowo, aza yi n ɓa ɓə n anyasna anapyei, ase nyasnada, aza yi ń ɓa ɓə anyasna fyipyiipyii, ɓədo anayi fyifyiyi dai, wa ka ɓa gna vnyanya. 25Deeji yaakwo kwoi kwnu n Gəlili, Dekapolis, Urishelima, Yahuda ɓədo ń səpai n Urudu piyatu, ɓa vyi wo.

Àwon tá yàn lọ́wọ́lọ́wọ́ báyìí:

Matiyu 4: OGNB

Ìsàmì-sí

Pín

Daako

Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀

Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi

Biblica® Open Gbagyi Contemporary Bible™, New Testament

‌

“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.

“Biblica” is a trademark registered in the United States Patent and Trademark Office by Biblica, Inc. Used with permission.

‌

See promoVersionInfo in metadata.xml for Creative Commons license.

Mọ̀ Sí Nípa Biblica® Open Gbagyi Nyizeyenya Baibwulu: Shekwoyi Ɓədagbma