Matiyu 12
12
Yeisu zhni Dagayi Sibyiwyi nya nu
1N əsayii Yeisu wa duya dnalo n alikamazhni n Sibyiwyii. Myikwnu kwoi kwu əwo amwutuyi gwnu, ɓa ya alikama tukwo bma ɓai gyi. 2She Afarisiyi ɓə gye nlonu, ɓa gna wo, “Shiawye! Əho amwutuyi zhni əɓo lo n kwo zhni owa gnanaznu nu n Sibyiwyii.”
3Wa dnaɓəgbe, “Fye too ba ənya n Dawuda n əwo anugwnudoi ɓə zhni əsa ń myikwnu ɓə gwnu ɓa nyi m? 4Wo ɓə lodna ń Shekwoyi pwuwa, əwo n əwo anugwnudoi ɓa gyi biledi pmyapmyayi ń kwo zhni owa gnanaznu nu n əɓa aba nyi m; ntuge kwo ɓə ɓwasnu ntu apirisiti ɓo nu. 5Kwo fye too ba dna ń Owa nge, apirisiti fyi ń əɓa tnutnuzhni n Sibyiwyii, dna ń Dagayipwuwa ɓa kwu Sibyiwyi tucegye, ama dudulonu, to a tu ɓa ɓo m? 6Mi gna fye nge ənya ń kwo du Dagayipwuwa, kwo gnyilo ń ya. 7Fye ɓəə gna fye kpe ɓədagbma ye gənyi lo, ‘Mi ye snusnugye nu toge nyagbmi m,’ fye to ɓəə ɓa znu tnaɓətuyi əknyi m. 8Ntuge Əza Nugwnu nu zhni Dagayi Sibyiwyi nya.”
9She wo ɓə laka ń abaayi, wa lodna ń Ayahudiyibwokwnu, 10əzaho ɓə dna ń ɓo n əɓwai sháshái. Ɓai zna əɓo shni n ɓa ɓá tu Yeisu, ɓa nya wo əɓo, “Owa ncei ye lo nge a əza ye wo gwo kágna n Sibyiwyii?”
11Wa gna ɓa, “Ndəi n əzaho n əfye n əknyii lo, kwaa kaya dna n ɓwokwnu n Sibyiwyii, wo taa taɓwa shi kwo, wa gbmi kwo ya m? 12Əza apma du əknyi nyalo shaasha! Ntucenu, owa ncei ye lo nge a zhni əɓo manai n Sibyiwyi.”
13Nlonu wa gna əza yi, “Ta əho əɓwa ya.” Ntulonu wa ta kwo ya, kwaa zhishni vnyanya, kwaa kalá ɓwa ngye baayi. 14Ama Afarisiyi ɓa kwnuya lo, ɓəə pyì she ɓa ɓá myi ɓá wu Yeisu.
Shekwoyi tnutnuyi knyiknyiyi
15Shi Yeisu ɓə kwu əɓəye kpeye, waa wyiya n abaayi. Deeji yaakwo kwa vyi wo, wa ga aza vnyanya kágna n ɓa ɓə n anyasnai. 16Wa kwnù ɓa nge ɓa to gna azaje əwo əɓo m. 17Dəye ɓə ye kwa nu ɓəda nu ń kwo ɓə gbmi n sheɓəgwognayi Ishaya əgbe nyi:
18“Əmi tnutnuyi nu gnyi nyi əza ń mi la knyi,
əza n mi ye, ń a da mi agbma n woi;
Mi ɓa kwu əmi Zafnu pwu wo,
jesnu wo ɓa da abye owa gaiciya nya.
19Wo to ɓə wuanya kwo wa ɓəwyi m;
əzaho to ɓə wo əwo bəgye tu n dnadna m.
20Wo taa bma nuwnaaje citui ya m,
jesnu wo taa wnu əná tna-kaláda m,
sai əsa n wo ɓə la ɓe n owada gaiciya nyai kwa gyi nasalagyi.
21N əwo əye nu n abye ɓə ɓwa awyetu.”
Yeisu n Belzebwuyii
22Nlonu ɓa ɓe wo n əzai n wo ɓə n asei fyi, n awye ɓə n woi bwabwai jesnu takpeɓəda; Yeisu wa ka wo gna, ntulonu wa myi woi daɓo jesnu woi gyewyeba. 23Ca wo aza vnyanya ɓa gna, “Kwo a ɓa gna Dawuda Nugwnu nu gnyi nyii?”
24Ama she Afarisiyi ɓə wo ce, ɓa gna, “N ɓwasnu n Byelzebwului nu, azafnu nukwoi tukwoda, ń wo kwnu azafnu nukwoi ya.”
25Yeisu ɓə kpé əɓa ɓənubwozhni əye, wa gna ɓa, “Əbemi dəhodəhoi n kwo la əkwohni gnaje, kwo ɓa kwu zhniagbma, jesnu əzhiyaakwo kwo pwuwa dəhodəhoi ń kwo la əkwohni gnaje kwo taa myignyi m. 26N Shetam ɓa nya Shetam ya, wo la əwohni gnajeya nuu. Kwo ɓa kpezhni n wunanu əwo əbemi kwa gnyiagnyi a? 27Ngye mi nyá ase ya n Byelzebwulu kalái nu, n nyikai nu n əfye aza kwnu ɓa ya ncei a? Ntulonu əɓa nu ɓə kwu zè əfye awadayi. 28Ama ngye n Zafnu Shekwoyi nyai nu n mi kwnu ase ya ncei, a gye Shekwoyi əbemi kwo la ɓe əfye aba.
29“Njesnu kwo ɓa yezhni n wunanu əza wa lodna n kaláda pwuwa, wa kwu əwo akaya, akpəge, n kpmisnu, wo lá əza kaláda pashi nu kpa. Nlonu n wo ɓa myi wa kwu akaya n əwo pwuwa.
30“Zahozahoyi n wo to kwnusnu lo n mii m, wo gnyiapaapa nu n mii, jesnu zahozahoyi n wo ta yezhi lo n kwnusnu n mii m, wo gná anya myi nu. 31Ntucenu, mi gna fye ge, a ɓa zo əza aleifyi dəhodəhoi pya n əyewnuya tu n əzado, ama əza ń wa da atukwopmi ɓəda tu n Zafnu Gyigyiyi a taa zo əwo leifyi m. 32Zahozahoyi ń wa da ɓəda nukwoi tu n Əza Nugwnu tukwo, a ɓa zo wo leifyi, ama zahozahoyi ń wa da ɓəda nukwoi tu n Zafnu Gyigyiyi tukwo a taa zo əwo leifyi m; kwo dna n anyì ye kwo dna n anyìdo n ɓa ɓe lo nyi.
33“La shnuwna zè manai, əkwo gyigyii ɓaa zè manai, kwo la shnuwna zè nukwoi əkwo gyigyii ɓaa zè nukwoi; ntuge a kpe shnuwna dəhodəhoi əye ń əkwo gyigyii nu. 34Əfye agbezhi aɓyi, kwo ɓa zè n wunanu əfye aɓənukwoizhniyi fya da əɓo ho manai a? Ntuge əgbe da ənya nu n kwo nu fyilo n ədu. 35Əza manai kwnu anya amanai ɓe ncei ń anya manai nu ń wo ncei sofyi ń əwohni nyi, əza nukwoi kwnu anya anukwoi ɓe ncei ń anya nukwoi nu n wo ncei sofyi n əwohni nyi. 36Ama mi gna fye nge zahozahoyi ɓə ga nyadokwu n owadawyii ntu n ɓədagbma gbəloi dəhodəhoi ɓo n wo kwu da. 37Ntuge n əho aɓədagbmai nu n ho ɓə pwo, jesnu n əho aɓədagbmai nu n a ɓə znu ho əknyi.”
Yunana əznù
38Nsayi Afarisiyi ho n owa anyawuyii ɓa gna wo, “Nyawuyi, yi ye ha wu yi əznù.”
39Wa dnaɓəgbe, “Cala akpí nya n anagbáizhni nyai nyá əznù ɓo lo! Ama a taa ga kwo dəho m, akpəge əznù sheɓəgwognayi Yunana nya. 40Ngye shi Yunana ɓə dna anyipyei ngwnu-ata jesnu asukwo ngwnu-ata n əbmya yaakwo nubwo nyi, ntulonu n Əza Nugwnu ɓə ɓwa anyipyei ngwnu-ata jesnu asukwo ngwnu-ata dna n əknyi nubwo. 41Aninivayi ɓə kwukazhi n owadawyii n cala yei, jesnu ɓai znu kwo knyi; ntuge ɓa ɓə kwu yeabwi ntu Yunana waazi ɓo, jesnu nsaiye ənya n kwo du Yunana kwo gnyilo n ya. 42Əsu nyikwozada Snutakwo nya, ɓə laka gnyi n owadawyii n cala yei, woi znu kwo knyi; ntuge wo ɓə gbmi n anyiceshiba wa ɓe wa wo Sulemanu wyemwa; ama nsaiye ənya n kwo du Sulemanu gnyilo n ya.
43“She zafnu nukwoi gbmiya n əza, kwo zna laɓa ń zhabwikawu nu, kwoi zna ashnita aba shní, ama n kwo to ɓwa m; 44nlonu kwa gna, ‘Mi ɓa jezelo pwuwa ń mi ɓə gbmi nyi.’ She kwo ɓə si, kwa gye pwuwa to n əzai dna lo m, n fnyifnyiiya shi ń anyai wnakna. 45Nlonu kwa lo kwa kwu azafnu anukwoi aje ɓe ncei ngwnu-tnaaba n ɓa du əkwohni lo n əkpí, ɓa lofyi ɓa kwu fyi n ɓo. Əza yi anyìgyi kwaa gna kpmisnui wnuya. Nlai nu n cala əkpizhniyi ɓə la wu.”
Yeisu əya n əwo amajei
46Yeisu woi ye gnyi woi daɓo n deejii, əwo əya n əwo amajei ɓa kwu zhi n əbmyi, ɓai pmi wo ɓa daɓo n woi. 47Əzaho wa gna wo, “Əho əya n əho amajei zhi lo ń əbmyi, ɓa ncei pmalo ɓa daɓo n hoi.”
48Wa dna wo ɓəgbe, “Nyika nu zhni əmi əya, jesnu anyika nu zhni əmi azaje a?”
49Wa wu əwo amwutuyi əɓwa, wa gna, “Əmi əya n əmi azajei nu zhi nyi. 50Ntuge zahozahoyi ń wo zhni əmi Dada ɓəmwi ń wo dna n əshemi nyi, əwo nu zhni əmido n əmi mapwii jesnu əmi əyai.”
Àwon tá yàn lọ́wọ́lọ́wọ́ báyìí:
Matiyu 12: OGNB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
Matiyu 12
12
Yeisu zhni Dagayi Sibyiwyi nya nu
1N əsayii Yeisu wa duya dnalo n alikamazhni n Sibyiwyii. Myikwnu kwoi kwu əwo amwutuyi gwnu, ɓa ya alikama tukwo bma ɓai gyi. 2She Afarisiyi ɓə gye nlonu, ɓa gna wo, “Shiawye! Əho amwutuyi zhni əɓo lo n kwo zhni owa gnanaznu nu n Sibyiwyii.”
3Wa dnaɓəgbe, “Fye too ba ənya n Dawuda n əwo anugwnudoi ɓə zhni əsa ń myikwnu ɓə gwnu ɓa nyi m? 4Wo ɓə lodna ń Shekwoyi pwuwa, əwo n əwo anugwnudoi ɓa gyi biledi pmyapmyayi ń kwo zhni owa gnanaznu nu n əɓa aba nyi m; ntuge kwo ɓə ɓwasnu ntu apirisiti ɓo nu. 5Kwo fye too ba dna ń Owa nge, apirisiti fyi ń əɓa tnutnuzhni n Sibyiwyii, dna ń Dagayipwuwa ɓa kwu Sibyiwyi tucegye, ama dudulonu, to a tu ɓa ɓo m? 6Mi gna fye nge ənya ń kwo du Dagayipwuwa, kwo gnyilo ń ya. 7Fye ɓəə gna fye kpe ɓədagbma ye gənyi lo, ‘Mi ye snusnugye nu toge nyagbmi m,’ fye to ɓəə ɓa znu tnaɓətuyi əknyi m. 8Ntuge Əza Nugwnu nu zhni Dagayi Sibyiwyi nya.”
9She wo ɓə laka ń abaayi, wa lodna ń Ayahudiyibwokwnu, 10əzaho ɓə dna ń ɓo n əɓwai sháshái. Ɓai zna əɓo shni n ɓa ɓá tu Yeisu, ɓa nya wo əɓo, “Owa ncei ye lo nge a əza ye wo gwo kágna n Sibyiwyii?”
11Wa gna ɓa, “Ndəi n əzaho n əfye n əknyii lo, kwaa kaya dna n ɓwokwnu n Sibyiwyii, wo taa taɓwa shi kwo, wa gbmi kwo ya m? 12Əza apma du əknyi nyalo shaasha! Ntucenu, owa ncei ye lo nge a zhni əɓo manai n Sibyiwyi.”
13Nlonu wa gna əza yi, “Ta əho əɓwa ya.” Ntulonu wa ta kwo ya, kwaa zhishni vnyanya, kwaa kalá ɓwa ngye baayi. 14Ama Afarisiyi ɓa kwnuya lo, ɓəə pyì she ɓa ɓá myi ɓá wu Yeisu.
Shekwoyi tnutnuyi knyiknyiyi
15Shi Yeisu ɓə kwu əɓəye kpeye, waa wyiya n abaayi. Deeji yaakwo kwa vyi wo, wa ga aza vnyanya kágna n ɓa ɓə n anyasnai. 16Wa kwnù ɓa nge ɓa to gna azaje əwo əɓo m. 17Dəye ɓə ye kwa nu ɓəda nu ń kwo ɓə gbmi n sheɓəgwognayi Ishaya əgbe nyi:
18“Əmi tnutnuyi nu gnyi nyi əza ń mi la knyi,
əza n mi ye, ń a da mi agbma n woi;
Mi ɓa kwu əmi Zafnu pwu wo,
jesnu wo ɓa da abye owa gaiciya nya.
19Wo to ɓə wuanya kwo wa ɓəwyi m;
əzaho to ɓə wo əwo bəgye tu n dnadna m.
20Wo taa bma nuwnaaje citui ya m,
jesnu wo taa wnu əná tna-kaláda m,
sai əsa n wo ɓə la ɓe n owada gaiciya nyai kwa gyi nasalagyi.
21N əwo əye nu n abye ɓə ɓwa awyetu.”
Yeisu n Belzebwuyii
22Nlonu ɓa ɓe wo n əzai n wo ɓə n asei fyi, n awye ɓə n woi bwabwai jesnu takpeɓəda; Yeisu wa ka wo gna, ntulonu wa myi woi daɓo jesnu woi gyewyeba. 23Ca wo aza vnyanya ɓa gna, “Kwo a ɓa gna Dawuda Nugwnu nu gnyi nyii?”
24Ama she Afarisiyi ɓə wo ce, ɓa gna, “N ɓwasnu n Byelzebwului nu, azafnu nukwoi tukwoda, ń wo kwnu azafnu nukwoi ya.”
25Yeisu ɓə kpé əɓa ɓənubwozhni əye, wa gna ɓa, “Əbemi dəhodəhoi n kwo la əkwohni gnaje, kwo ɓa kwu zhniagbma, jesnu əzhiyaakwo kwo pwuwa dəhodəhoi ń kwo la əkwohni gnaje kwo taa myignyi m. 26N Shetam ɓa nya Shetam ya, wo la əwohni gnajeya nuu. Kwo ɓa kpezhni n wunanu əwo əbemi kwa gnyiagnyi a? 27Ngye mi nyá ase ya n Byelzebwulu kalái nu, n nyikai nu n əfye aza kwnu ɓa ya ncei a? Ntulonu əɓa nu ɓə kwu zè əfye awadayi. 28Ama ngye n Zafnu Shekwoyi nyai nu n mi kwnu ase ya ncei, a gye Shekwoyi əbemi kwo la ɓe əfye aba.
29“Njesnu kwo ɓa yezhni n wunanu əza wa lodna n kaláda pwuwa, wa kwu əwo akaya, akpəge, n kpmisnu, wo lá əza kaláda pashi nu kpa. Nlonu n wo ɓa myi wa kwu akaya n əwo pwuwa.
30“Zahozahoyi n wo to kwnusnu lo n mii m, wo gnyiapaapa nu n mii, jesnu zahozahoyi n wo ta yezhi lo n kwnusnu n mii m, wo gná anya myi nu. 31Ntucenu, mi gna fye ge, a ɓa zo əza aleifyi dəhodəhoi pya n əyewnuya tu n əzado, ama əza ń wa da atukwopmi ɓəda tu n Zafnu Gyigyiyi a taa zo əwo leifyi m. 32Zahozahoyi ń wa da ɓəda nukwoi tu n Əza Nugwnu tukwo, a ɓa zo wo leifyi, ama zahozahoyi ń wa da ɓəda nukwoi tu n Zafnu Gyigyiyi tukwo a taa zo əwo leifyi m; kwo dna n anyì ye kwo dna n anyìdo n ɓa ɓe lo nyi.
33“La shnuwna zè manai, əkwo gyigyii ɓaa zè manai, kwo la shnuwna zè nukwoi əkwo gyigyii ɓaa zè nukwoi; ntuge a kpe shnuwna dəhodəhoi əye ń əkwo gyigyii nu. 34Əfye agbezhi aɓyi, kwo ɓa zè n wunanu əfye aɓənukwoizhniyi fya da əɓo ho manai a? Ntuge əgbe da ənya nu n kwo nu fyilo n ədu. 35Əza manai kwnu anya amanai ɓe ncei ń anya manai nu ń wo ncei sofyi ń əwohni nyi, əza nukwoi kwnu anya anukwoi ɓe ncei ń anya nukwoi nu n wo ncei sofyi n əwohni nyi. 36Ama mi gna fye nge zahozahoyi ɓə ga nyadokwu n owadawyii ntu n ɓədagbma gbəloi dəhodəhoi ɓo n wo kwu da. 37Ntuge n əho aɓədagbmai nu n ho ɓə pwo, jesnu n əho aɓədagbmai nu n a ɓə znu ho əknyi.”
Yunana əznù
38Nsayi Afarisiyi ho n owa anyawuyii ɓa gna wo, “Nyawuyi, yi ye ha wu yi əznù.”
39Wa dnaɓəgbe, “Cala akpí nya n anagbáizhni nyai nyá əznù ɓo lo! Ama a taa ga kwo dəho m, akpəge əznù sheɓəgwognayi Yunana nya. 40Ngye shi Yunana ɓə dna anyipyei ngwnu-ata jesnu asukwo ngwnu-ata n əbmya yaakwo nubwo nyi, ntulonu n Əza Nugwnu ɓə ɓwa anyipyei ngwnu-ata jesnu asukwo ngwnu-ata dna n əknyi nubwo. 41Aninivayi ɓə kwukazhi n owadawyii n cala yei, jesnu ɓai znu kwo knyi; ntuge ɓa ɓə kwu yeabwi ntu Yunana waazi ɓo, jesnu nsaiye ənya n kwo du Yunana kwo gnyilo n ya. 42Əsu nyikwozada Snutakwo nya, ɓə laka gnyi n owadawyii n cala yei, woi znu kwo knyi; ntuge wo ɓə gbmi n anyiceshiba wa ɓe wa wo Sulemanu wyemwa; ama nsaiye ənya n kwo du Sulemanu gnyilo n ya.
43“She zafnu nukwoi gbmiya n əza, kwo zna laɓa ń zhabwikawu nu, kwoi zna ashnita aba shní, ama n kwo to ɓwa m; 44nlonu kwa gna, ‘Mi ɓa jezelo pwuwa ń mi ɓə gbmi nyi.’ She kwo ɓə si, kwa gye pwuwa to n əzai dna lo m, n fnyifnyiiya shi ń anyai wnakna. 45Nlonu kwa lo kwa kwu azafnu anukwoi aje ɓe ncei ngwnu-tnaaba n ɓa du əkwohni lo n əkpí, ɓa lofyi ɓa kwu fyi n ɓo. Əza yi anyìgyi kwaa gna kpmisnui wnuya. Nlai nu n cala əkpizhniyi ɓə la wu.”
Yeisu əya n əwo amajei
46Yeisu woi ye gnyi woi daɓo n deejii, əwo əya n əwo amajei ɓa kwu zhi n əbmyi, ɓai pmi wo ɓa daɓo n woi. 47Əzaho wa gna wo, “Əho əya n əho amajei zhi lo ń əbmyi, ɓa ncei pmalo ɓa daɓo n hoi.”
48Wa dna wo ɓəgbe, “Nyika nu zhni əmi əya, jesnu anyika nu zhni əmi azaje a?”
49Wa wu əwo amwutuyi əɓwa, wa gna, “Əmi əya n əmi azajei nu zhi nyi. 50Ntuge zahozahoyi ń wo zhni əmi Dada ɓəmwi ń wo dna n əshemi nyi, əwo nu zhni əmido n əmi mapwii jesnu əmi əyai.”
Àwon tá yàn lọ́wọ́lọ́wọ́ báyìí:
:
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.