1 Коринфын оліссезлӧ 3
3
1Воннэзӧ, ме эг вермы тіянкӧт баитны Ен Лов сьӧрті оліссезкӧт моз. Ме баиті вывтыр кыскӧм сьӧрті оліссезкӧт моз, кыдз челядькӧт. Тійӧ эд Кристослӧ веритӧмас сё кыдз челядёккез. 2Ме эг верд тіянӧс чорыт сёянӧн, верді йӧлӧн. Тійӧ эд сэк эдӧ вермӧ сёйны чорытсӧ да и ӧнӧдз одӧ вермӧ. 3Тійӧ кытчӧдз эшӧ олатӧ вывтырныт кыскӧм сьӧрті. Тійӧ ӧтамӧднытлӧ завидуйтат кӧ, ас коласаныт етшасят да одӧ вермӧ ӧтмоза вежӧртны, сэк тійӧ олатӧ вывтырныт кыскӧм сьӧрті, кератӧ Ентӧг олісь отир моз. 4Ӧтік кӧ шуӧ: «Ме ─ Павеллӧн», а мӧдік: «Ме ─ Аполлослӧн», одӧ разь сэк тійӧ олӧ вывтырныт сьӧрті? 5Кин Павелыс, кин Аполлосыс? Нія дзир кысъяліссез#3:5 кысъялісь ─ служитель, слуга, кӧдна пыр тійӧ пондіт веритны. Быдыс керис Дӧсвидзисьлісь сетӧм удж. 6Ме кӧдзи, Аполлосыс киськаліс, а быдтіс эд Еныс. 7Сідзкӧ, кӧдзисьыс да киськалісьыс абутӧм туйӧ. Быдӧсын быдтісь Еныс. 8Кӧдзисьыс киськалісьыскӧт керӧны ӧтік удж, но быдыс босьтас вештӧмсӧ аслас керӧм удж понда. 9Мийӧ Енкӧт ӧтвыв уджаліссез. Тійӧ ─ Еныслӧн ыбыс, Еныслӧн лэбтӧм керкуыс.
10Енлӧн бурсетӧмсянь ме, кыдз мывкыда керку лэбтісь, пукті увтсӧ#3:10 увт ─ фундамент. Сы вылын мӧдік тэчӧ. Но быдыс ась видзӧтӧ, кыдз лэбтӧ. 11Некин оз вермы пуктыны мӧдік увт. Сія эд пуктӧм ни. Увтыс ─ Кристос Исус. 12Эта увт вылын лэбтӧмсӧ кинкӧ тэчӧ зарниись, эзысись, дона иззэзісь. Мукӧдыс ─ пуись, турунісь, идзасісь. 13Быдӧнныслӧн уджыс пондас тыдавны сэсся. Мыччалас биӧн локтан Луныс. Биыс быдӧнныслісь уджсӧ тӧдмалас-видзӧтас да осьтас, кыдз сія вӧлі керӧм. 14Кинлӧн керӧм уджыс оз сотчы, сія босьтас уджыс понда вештӧмсӧ. 15Кинлӧн уджыс сотчас, сія уна ӧштас. Ачыс эд мезмас биись петӧм моз.
16Тійӧ одӧ разь тӧдӧ: тійӧ ─ Енлӧн оланін? Тіян пытшкын олӧ Еныслӧн Лолыс. 17Кин изводалас#3:17 изводавны ─ уничтожить Енлісь оланінсӧ, сійӧ Еныс изводалас. Енлӧн оланіныс вежа, а Сылӧн оланіныс ─ тійӧ.
18Асьнытӧ некин эд бӧбӧтӧ. Кин юрас пыртіс кӧ, эта му вылісь отир сьӧрті ме пӧ мывкыда, сэтшӧмыс коль ассит мывкыдтӧ. Сэк босьтан бур мывкыдсӧ. 19Еныс одзын эта му вылісь отирлӧн мывкыдныс ─ вежӧр ӧштӧм. Гижӧтыс тай висьталӧ:
─ Мывкыдаэсӧ Еныс кутӧ
асланыс ылӧтлӧмӧ.
20Мӧдіклаын гижӧм:
─ Дӧсвидзисьыс тӧдӧ
мывкыдаэслісь юраныс видзӧмсӧ.
Сія весись юрӧ пыртӧм.
21Сідзкӧ, некытшӧм мортӧн эд ошшасьӧ, быдӧс эд тіян: 22Павел, Аполлос, Кифа я, эта муыс я, олан я, кулӧм я, ӧннясяыс, одзланьсяыс я, сія быдӧс тіян. 23Тійӧ Кристослӧн, а Кристосыс Енлӧн.
Апостоллэзлӧн удж
Àwon tá yàn lọ́wọ́lọ́wọ́ báyìí:
1 Коринфын оліссезлӧ 3: БЮ19
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀