2 Пачаби 1
1
Шаул чӀван вугин хабар бачӀуна Давудихъе
1Шаул хун хадуб заманалде, амалекиязда тӀад бергьенлъиги босун, Давуд Циклагалде тӀадвуссана, ва гьениве щун гьес кӀиго къо бан букӀана. 2Лъабабилеб къоялъ Шаулил аскаралъул къайи чӀвараб рахъалдасан цояв вачӀана бихъун ретӀелгун ва ботӀроде хӀатӀги щван. Давудида аскӀове щведал, гьев гьесда цеве гӀодоб бетӀер чӀван къулана.
3«Мун киса вачӀунев чи?» – ян цӀехана Давудица.
«Дун гӀизраилазул аскариязул цояв вуго, лъутун хвасарлъарав», – ин жаваб кьуна гьес.
4«Щиб ккараб? Бице дида!» – ян абуна Давудица.
«Рагъулъ аскариял щущахъ рана. ГӀемераб халкъ гъурана гьениб. Гьединго Шаулги гьесул вас Ионатанги чӀвана», – ян бицана гьев чияс.
5Давудица гьеб хабар босун вачӀарав чиясда цӀехана: «Шаулги гьесул вас Ионатанги хун рукӀин кин дуда лъараб?» – ин.
6«Дун Гилбоа магӀарде тӀаде щведал, гьенив Шаул вихьана дида жиндирго хечалда тӀаде ккун. Чолгьакалги чотӀахъабиги досда тӀаде гӀагарлъулел рукӀана. 7Нахъехун валагьун дун вихьидал, дос диде ахӀана. „Щиб бокьун бугеб?“ – ин цӀехана дица. 8Дос мун щив кколевин цӀехедал, амалекияв вугин жаваб кьуна дица. 9Гьебмехалъ дос дида абуна: „АскӀовеги вачӀун дун чӀвай! Дун хвалил гӀазабалда вуго, амма рухӀ бахъизе кӀолеб гьечӀо“, – ян. 10Цинги аскӀовеги ун дица чӀвана дов, щайгурелъул додин квешго лъукъарав чи кингоги чӀаго хутӀуларевлъи лъалеб букӀиндал дида. Досул ботӀрода букӀараб тажги рукьалда букӀараб рахасги гьале дица духъе, дир бетӀерчӀахъадихъе, босана».
11Гьебмехалъ Давудица ва гьесда цадахъ рукӀаралщиназ тӀад букӀараб ретӀел бихъана. 12Шаулида, гьесул вас Ионатанида, БЕТӀЕРГЬАНАСУЛ аскаралда ва ГӀизраилалъул халкъалда хадуб, кӀалги ккун, къасилъизегӀан магӀу бахъана гьез – гӀемерал чагӀи чӀван рукӀиндал гьеб рагъулъ. 13Цинги гьеб хабар босун вачӀарав чиясда Давудица цӀехана: «Мун киса кколев?» – ин.
«КъватӀиракьалдаса амалекиясул вас вуго дун», – ин жаваб кьуна гьес.
14«Кинха мун хӀинкъичӀев БЕТӀЕРГЬАНАС тӀаса вищарав пачаясде квер борхизе?» – ян абуна Давудица.
15Жиндирго рагъухъабазул цоявги ахӀун, Давудица абуна: «ЧӀван рехе гьав чи!» – ян.
Рагъухъанас гьев чӀвана. 16Гьев амалекиясухъги валагьун, Давудица абуна: «Дуца гӀодобе тӀураб бидул хӀакъ дурго ботӀроде ккана. БЕТӀЕРГЬАНАС тӀаса вищарав пача чӀваялъе нугӀлъун мунго дудаго данде чӀана».
Шаулидаги Ионатанидаги хадуб Давудица магӀу бахъи
17Шаулида ва Ионатанида хадуб магӀу бахъун гӀемерав гӀодана Давуд. 18Ягьудиялъул жамагӀаталдаго малъе гьаб магӀуйин лъазабуна Давудица («Муъминчиясул ТӀехьалда» хъван буго гьеб):
19«Вай, ГӀизраил! Дур мугӀрузул тӀогьиб паналъана дур чӀухӀи!
Огь, къанщанагури багьадурзаби!
20Бицунге Гаталда,
Лъазабуге Ашкелоналъул къватӀахъ;
Пилистимазул ясал разилъуге абе,
Суннат гьабичӀезул#1:20 Бал. Байб. 17:10-11. Суннат гьаби – Аллагьас жиндиргун КъотӀи гьабураб халкъалъул чи жив вукӀиналъул гӀаламатлъун кколаан гьеб. руччаби релъанхъуге абе!
21Гилбоаялъул мугӀрул,
ТӀокӀалъ я щуб, я цӀад бихьугеги нужеда,
Щибго бижугеги нужер хурзабахъ;
БахӀарзазул хъалхъан гӀодоб бортарал,
ТӀокӀаб нах бахине гьечӀеб Шаулил хъалхъан.
22Къуватал тушбабазул би гьекъечӀого, лебалазул гьан кваначӀого Ионатанил хеч тӀадбуссунароан;
Шаулицаги хвалчен гӀадада хьвагӀулароан.
23Шаулги Ионатанги!
Киназего хириял, жидер гӀумру берцинал,
Хвалилъги ратӀалъичӀел!
ХъергъугӀанги тириял,
ГъалбацӀгӀанги къуватал!
24ГӀизраилалъул ясал,
Шаулида хадуб магӀу гьабе гьанже гӀодор ккезегӀан,
Дарай-гӀатӀласалъул чӀухӀараб ретӀел чӀезабун,
Месед тӀад бекьарал берцинал гурдал ретӀун нуж къачӀарав!
25Огь, къанщана рагъулъ чанги бахӀарчи!
Дур мугӀрузул тӀогьив къанщана Ионатанги.
26Вай дир вац Ионатан, къварилъиялъ къвалги бан хутӀана гьанже дун!
Мун дие цӀакъ хирияв вукӀана.
Дур гьудуллъи дие букӀараб гьуинаб, –
Йокьулелъул балагьиялдасаги гьуинаб.
27Огь, къанщанагури багьадурзаби!
Бесдаллъана гьанже гьезул ярагъги!»
Àwon tá yàn lọ́wọ́lọ́wọ́ báyìí:
2 Пачаби 1: АварАК
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Институт перевода Библии, 2005-2023