योहन 11

लाजर को मरनो

1एक मानूस को नाव लाजर होतो, उ आपरो बहिन मरियम अना मारथा को संग बैतनिय्याह नगर मा रव्हत होतो, उ बिमार भई गयो। 2या वाच मरियम से, जेना पिरभू पर इतर डाकके ओको पाय ला चुन्दी लक मलन लगीन। वोको भाऊ लाजर बीमार होतो। 3एको लाई ओकी बहिन गीनना ओको जवर खबर धाड़िन, “ओ पिरभू, अता चोव, जेनको लक तु माया राखसेस, उ बीमार पड़यो से।”

4यो आयक के यीसु ना कहीस, “यो बीमारी मरन लाय नहाय, पर परमेस्वर की महिमा लाय भईसे, जेनालक परमेस्वर को टूरा की महिमा होय।”

5यीसु मारथा, ओकी बहिन अना लाजर सब लक माया राखत होतो। 6जबा ओना आयकीस की लाजर बीमार से, तबा उ जहान होतो उतच दुई दिवस अखीन रूकयो। 7तबा उ चेला गीन लक कहीस, “आव आमी यहुदिया ला चलबीन।” 8चेला गीनना कहिन, “गुरू, अबा तो यहूदी तोला गोटा मारत होतीन, अना अबा तु उता जावासेस?”

9यीसु ना जवाब देइस, “का दिवस मा 12 तास नही होवासे? अदी कोनी दिवस-दिवस मा चलासे ता खोद्दा नही खावासे, काहेकि यो जगत को उजाड़ो चोवासे। 10पर अदी कोनी राति मा चलासे ता खोद्दा खावासे, काहेकि उ इंधारो मा चलासे।” 11यो गोस्टी सांगनो पर यीसु ना कहीस, “हमरो संगी लाजर जप मा से, मि ओला जगान जावासु।”

12तबा चेला ना ओला कहिन हे पिरभू अदी उ जप मा से, तो उ साजरो भई जाहे।

13यीसु ना तो वोको मौत को बारे मा सांगी होतीस, पर वय समजीन की जप को बारे मा सांगसेस। 14तबा यीसु ना उन लक सप्पा-सप्पा कह देइस “लाजर मर गई से, 15अखीन मि खुस सेव का आमी उता नही होता, का तुमी भरोसा करहो। पर आव, आमी ओको कठा जाबिन।”

16तबा थोमा, “जोन दिदमुस#11:16जुड़या कहलावसे, आपरो संगी चेला गीन ला कव्हसे, आव, हमि भी ओको सँगा मरन ला चलबिन।”

यीसु खुद पुनरुत्थान अना जीवन आय

17उता पहुचनो पर यीसु ला मालुम भयो, की लाजर ला मरयो अना मरघट्टी मा राखो चार दिवस भई, 18जोन बैतनिय्याह यरुसलेम को जवर कोनी तीन किलोमीटर #11:18दोन मील की दुरी पर होतो। 19लगत यहूदिगीन मारथा अना मरियम को जवर ओको भाऊ की मौत पर सान्ती देवन लाई आई होतीन।

20जबा मारथा ना यीसु को आवन को खबर आयकीस, ता ओला मिलन को लाई गई, पर मरियम घर मा बसी रहयी। 21मारथा ना यीसु लक कहीस, “हे पिरभू! अदी तु यहान होतो, ता मोरो भाऊ कभ्भूच नही मरतो 22अखीन अबा भी मि जानासेऊ की जोन कही तु परमेस्वर लक माँगजो ता परमेस्वर तोला देहे।” 23यीसु ना ओको लक कहीस, “तोरो भाऊ जिँदो भई जाहे।”

24मारथा ना ओला कहीस, “मि जानासेऊ की आखीर दिवस मा सबको जित्तो होवनो #11:24मर हुओ मे से जी उठना को बेरा उ जी उठेत। ”

25यीसु ना ओला कहीस,“ जित्तो होवनो, अना जिंदगी मि सेउ, जोन कोनी मोरो पर भरोसा करेत, उ अदी मर भी जाहेत ता भी जीहेत। 26अना जोन कोनी जित्तो से अना मोरो पर भरोसा करासे, उ अमर काल तकन नही मरेह। का तु भरोसा करसेस? ”

27ओना ओला कहीस, “हव पिरभू, मि भरोसा करुसेउ, की तुच परमेस्वर को टूरा मसीह आस, जोन जगत मा आवनवालो होतो।”

यीसु को रड़नो

28यो कहके मारथा चली गई, अना आपरी बहिन मरियम ला बुलाके चुप्पी लक कहीस, “गुरू यहान से अना तोला बुलावसेत।” 29यो आयक के उ एकदम उठके ओको जवर आई। 30यीसु अबा गाँव मा नही पहुचियो होतो, पर ओना जघा मा होतो, जिता मारथा ना ओला मिली होती। 31तबा जोन यहूदी ओको सँग घर मा होतीन अना ओला सान्ती देय रही होतीन, यो चोयके मरियम एकदम उठके बाहेर गई, ता वय यो समझीन की उ मरघट्टी पर रोवन ला जावासे ता ओको मंघा भय गईन।

32जबा मरियम उता पहुची जिता यीसु होतो, ता ओला चोवके ओको पाय पर पड़ गई अना कहीस, “हे पिरभू! अदी तुमी इता होतत, ता मोरो भाऊ नही मरतो।”

33जबा यीसु ना ओला अना उन यहूदिगीन ला जोन ओको सँग आई होतीन रड़ता चोवयो, ता आतमा मा लगत उदास अना बैचेन भयो।

34अना कहीस, “तुमी ना ओला किता रखिसेव?” उनना ओला कहीन“ हे पिरभू चलके चोव लेव।”

35यीसु रड़यो। 36तबा यहूदी कव्हन लागीन, “चोवो उ ओको लक केतरो माया राखासे?” 37पर उनमा लक काही ना कहीन, “का यो जोन अँधरा की डोरा खोलिस, यो भी नही कर सकिस, की यो मानूस न मरतो।”

लाजर को जित्तो कियो जानो

38यीसु मन मा मंग लगत उदास भयो मरघट्टी पर आयो। उता एक गुफा होती, अना एक गोटा ओको पर राखियो होतो। 39यीसु ना कहीस,“ गोटा ला हटाय देव?”

उ मरयो हुयो की बहिन मारथा ओला कव्हन लगीस, “हे पिरभू! ओमा लक अता ता बदबु आवासे, काहेका ओला मरयो हुयो चार दिवस भई गई सेत।” 40यीसु ना वोला कहीस, “का मीना तोला नही कव्हयो होतो? की अदी तु भरोसा करजोस ता परमेस्वर की महिमा ला चोवजोस।” 41तबा उनना वो गोटा ला हटाईन, यीसु ना डोरा उठायके कहीस, “हे बाबूजी! मि तोरो धनवाद करू सेऊ, की तु ना मोरी आयक लेई सेस। 42मि जानसु तु हमेसा मोरी आयकिसेस, पर जोन भीड़ इता-उता उभी से, उन ला भी भरोसा भय जाहे की तु ना मोला धाडिसेस, यो काजी मि ना असो कहीसेउ।”

43यो कहके ओने मोठी आवाज लक हाकलीस, “हे लाजर हिट आव।”

44जोन मर गयो होतो उ कफन लक हात पाय बंधयो हिट आयो। अना ओको टोन्ड अंगोछा लक लिपटो होतो। यीसु ना कहीस, “ओला उघाड़ देव अना जान देव।”

यीसु को विरोध मा साजिस

(मत्ती 26:1-5; मरकुस 14:1,2; लूका 22:1,2)

45तबा जोन यहूदी मरियम को जवर आयो होतिन, अना ओको यो काम चोईन, उनमा लक लगत गीनना भरोसा करीन। 46पर उनमा लक काही ना मोसे को नियम को गुरू को जवर यीसु को काम को खबर #11:46समाचार देईन। 47एतरो पर मुखिया याजक अना मोसे को नियम को गुरू ना मोठी सभा बुलाईन अना कहिन, “हमि का करबीन, यो मानूस तो लगत निसान चोवायोसे? 48अदी हमि ओला असोच सोड़ देबीन, तो सबच ओको पर भरोसा कर लेहेत, अना रोमी आयके आमरी जघा अना लोक दुही पर हक जमा लेहेत।”

49तबा उनमा लक काइफा नाव को एक मोठो मुखिया याजक होतो। ओना कहीस, “तुम काही भी नही जानो, 50अखीन नही समजासो, का तुमरो लाई यो भलो से, की हमरो काजी एक मानूस मरेत, अना सप्पा लोक को नास नोको होय।” 51यो गोस्टी ओने आपरो कन लक नही कहीस, पर आवन वारो गोस्टी ला जानके, मोठो मुखिया याजक होवनो को कारन लक सांगीस, का यीसु ओना लोकगीन लाई मार दियो जाहेत। 52अना ना केवल उन लोक को लाय पर एकोलाय की परमेस्वर की गुमयो हुयो सँतान एकठ्ठो भयी जाहे।

53अखीन ओनो दिवस लक वय ओला मार डाकन की सलाह करन लगीन। 54एको लाई यीसु ओनो बेरा लक यहूदिगीन मा खुलो रित लक नही घुमयो, पर उता लक जंगल को जवर छेतर मा इफराईम नाव को एक नगर मा चली गयो, अना चेला गीन संगा उतच रव्हन लगयो।

55यहूदिगीन को फसह को तिहार जवर होतो। अना लगत सा लोक बलिदान को पुढा देहात लक यरुसलेम मा गईन, की आपरो आप ला पवीतर करयेत। 56एको लाई वय यीसु ला ढुढन लगीन, अना मंदिर मा उभा होयके आपस मा कव्हन लागिन, “तुमी का सोचासो? का उ तिहार मा नही आहे।” 57मोठो मुखिया याजक अना मोसे को नियम को गुरू ना यो हुकूम देईन, का “अदी कोनी यो जाने की यीसु किता से ता सांगे, ताकि ओला धर#11:57 पकड़ लेबो।”

Àwon tá yàn lọ́wọ́lọ́wọ́ báyìí:

योहन 11: PSP25

Ìsàmì-sí

Pín

Daako