റോമറ് 3
3
തെയ്‌വത്തീലൊള്ള നമ്പ്
1ആണയിന്റെ നാന് എകൂതൻ ആഞ്ഞത്കൊണ്ട് എക്ക് എന്തൻ ഓകാരം? പരിച്ചേതനയേറ്റത് കൊണ്ട് എക്ക് എന്തൻ നേട്ടം? 2ഏത് കാരിയത്തീല് പാത്താലും എകൂതന്ക്ക് ഒരിന്നതൊണ്ട്; ഏത് കാരിയത്തിക്കായും തെയ്‌വത്ത്ന്റ നേമങ്ങള് അവങ്ങളയാണും മുന്തിയേ ഏപ്പിച്ച് വെച്ചിരക്കന്റത്. 3ഇന്റെ അവങ്ങളീല് ചെലാള്കള് നമ്പ്‌വാനിക്കി പെറ്റാത്താള്കളാഞ്ഞെ എന്തൻകേട്? അത്കൊണ്ട് തെയ്‌വം പേശിയ വാക്ക് വെറ്തെയാക്‌മാ? 4ഒരകാലത്തം ഇല്ല.
“നീ പേശിയ വാക്ക് കൊണ്ട് നിന്ന നായംവിതിക്കും; അപ്പിനിക്കി നിയ്യ് തോക്ക്ത്ത്‌ല”
ഇന്റ് എയ്‌തിയിരക്കന്റത് പേല ഒക്ക മന്ശൻമാരും കള്ളം പേശിയാലും തെയ്‌വം അവന്റ വാക്കീനെന്റ് മാറ്ത്ത്‌ല.
5ഇത് കേട്ട് ഏവനീങ്കിലും ഈണ കേപ്പ്റ്, “മന്ശൻമാര് ഒക്കളം നീതിയില്ലാത്താള്കളാഞ്ഞത് കൊണ്ട് തെയ്‌വം മാട്ട്ക്കും നീതിയൊള്ളവനാണും ഇന്റ് തെളിവാക്‌ന്റ്. ആണയിന്റെ നമ്മ ചെയ്ഞ്ഞ തെറ്റ്ക്ക് ശിച്ച തെന്റ തെയ്‌വം നീതിയൊള്ളവനാ?” 6ആണ കേക്കന്റതീല് ഒര അർത്തമം ഇല്ല; തെയ്‌വം നീതിയൊള്ളവൻ ഇല്ലയിന്റെ തെയ്‌വത്ത്ക്ക് ഈ ഒലകത്ത്ന ഏണ നായംവിതിപ്പാനിക്കി പെറ്റും? 7“നാന് നൊണ പേശന്റത്കൊണ്ട് തെയ്‌വം ശത്തിയമൊള്ളവനിന്റൊള്ള പേര് കിട്ടും; അവന്ക്കൊള്ള മകത്തം പെര്കിവെരത്തം ചെയ്യും; ആണയിന്റെ പിന്ന എന്ന എന്തനക്കാണും തെറ്റ്കുറ്റം ഒള്ളവനാഞ്ഞ് വിതിക്കിന്റത്?” ഇന്റ് വേറൊരത്തൻ കേട്ട് പാക്കും. 8“നാന് തെറ്റ് ചെയ്‌വിനിക്കി തെയ്‌വം മാട്ട്ക്കും നെല്ലവൻ ഇന്റൊള്ള പേര് അവന്ക്ക് കിട്ട്ന്റ്; ആണയിന്റെ നാന് കൊള്ള തെറ്റ് ചെയ്ഞ്ഞെ അവൻ കൊള്ള നെല്ലവൻ ഇന്റൊള്ള പേര് അവന്ക്ക് കിട്ട്ത്ത്‌ലിയാ” ഇന്റ് എങ്ങ പടിപ്പിക്കിന്റം ഇന്റ് ചെലാള്കള് കെട്ടവാക്ക്കള് പേശന്റാര്. അവ്ങ്ങ്ക്ക് കട്ടായമാഞ്ഞും ശിച്ച കിട്ടും.
നീതിയൊള്ളവൻ ഒരത്തന്‌മില്ല
9പിന്ന എന്തൻ പേശ്‌വാനിക്കി? നാന് മുന്തി പേശീത്പേല എകൂതൻമാരും എകൂതൻമാരില്ലാത്താള്കള്മാഞ്ഞ ഒക്കളം ഒരേ ശീരിയില് തെറ്റ്കുറ്റത്ത്ക്ക് അടിമകളാണം. 10അത്കൊണ്ടാണും,
“നീതിയൊള്ളവൻ ഒരത്തന്‌മില്ല ഒരത്തൻ പോല്‌മില്ല. 11തെയ്‌വത്ത്ന തേടി അവന തിക്കൊള്ളവൻ ഒരത്തന്‌മില്ല, ഒരാള്പോല്‌മില്ല. 12ഒക്കളം തെയ്‌വത്തീനെന്റ് അകന്ന് പീത് കൊണ്ട് നെമ്മ ചെയ്യ്‌വാനിക്കി ഒരത്തന്ക്കും പെറ്റ്‌ല, ഒരാള്ക്ക് പോലും പെറ്റ്‌ല. 13അവങ്ങള ചങ്ക് പൂര തുട്ടത കൊണ്ട് നെറഞ്ഞിര്ക്ക്ന്റത് കൊണ്ട് പാമ്പ്ന്റ വായില വെശം പേല അവങ്ങള വായ്‌കൊണ്ട് തുട്ടത പേശന്റാര്. 14അവങ്ങള ചങ്കീലൊള്ള വെറ്പ്പ് ശാപ്പ്ത്തി വാക്ക്കളാഞ്ഞ് പൊറത്ത് വെന്റ്. 15വേറാള്കള കൊല്ല്‌വാനിക്കി അവങ്ങ എപ്പനം പാക്കന്റാര്. 16അവങ്ങള വെയ്യീല് ആപത്തും നാശമം പെത്ങ്ങിയിര്ക്ക്ന്റ്. 17വേറാള്കളോട ഏണ നിമ്മ്തിയോട പൊളയ്‌ക്കണമിന്റ് അവ്ങ്ങ്ക്ക് തിക്ക്‌ല. 18എന്തനിന്റെ അവ്ങ്ങ്ക്ക് തെയ്‌വപേടിയില്ല”
ഇന്റാണും തെയ്‌വവയനത്തീല് പേശിയിരക്ക്ന്റത്.
19തെയ്‌വം നേമം കൊടത്ത്ത് മന്ശൻമാരൊക്ക തെറ്റ്കുറ്റം ചെയ്യന്റാള്കളാണുമിന്റ് കാട്ടിക്കൊടക്കന്റത്ക്കും നാന് തിക്ക്‌ലാണ്ടി തെറ്റ്കുറ്റം ചെയ്ഞ്ഞൻ ഇന്റ് ഒരത്തനം പേശാണ്ടിയിരക്ക്ന്റത്ക്കും വേണ്ടിയാണും. തെയ്‌വം ആ നേമത്ത്ന്റ അടിത്താനത്തീല് ഓരോരത്തനയം നായംവിതിക്കും. 20നമ്മ ഏണ തെറ്റ്കുറ്റം ചെയ്യന്റാള്കള് ആഞ്ഞിരക്കന്റം ഇന്റ് പേശിത്തെര്‌വാനിക്കി മാട്ട്ക്ക്മേ നേമത്ത്ക്ക് പറ്റ്ത്തൊള്ള്; ഇന്റെ നമ്മള നീതിയൊള്ളവനാക്ക്‌വാനിക്കി അത്ക്ക് പെറ്റ്ത്ത്‌ല.
നമ്പീലാണും ഒരത്തൻ നീതിയൊള്ളവനാകന്റത്
21അത്കൊണ്ടാണും തെയ്‌വത്ത്ന്റ നേമമം വ്‌ലാത്തിമാരും നമ്മ്ക്ക് ഏണ നീതിയൊള്ള ആള്കള് ആവേള് ഇന്റ് പടിപ്പിക്കിന്റത്. 22അത് എന്തനിന്റെ എകൂതനാഞ്ഞാലും എകൂതൻ ഇല്ലാത്തവനാഞ്ഞാലും ഏശുകിര്ശ്തു അവന്ക്ക് വേണ്ടി ചെയ്ഞ്ഞത് നമ്പന്റവൻ തെയ്‌വമൊകത്ത് നീതിയൊള്ളവനാകും. 23എന്തനിന്റെ നമ്മ ഒക്കളം തെറ്റ്കുറ്റം ചെയ്ഞ്ഞ് തെയ്‌വത്ത്ന്റ മകിമയില് നെന്റ് വീന്ന് പിയ്യം. 24നമ്മ്ക്ക് ഇല്ലാണ്ടിപിയ്യ നീതിയൊള്ളവൻ ഇന്റൊള്ള താനം കിര്ശ്തുഏശുവീലൊള്ള നമ്മള നമ്പ്കാറണം വെറ്തെ നമ്മ്ക്ക് തില്‌പ്പി കിട്ടും. 25അത് ഏണയിന്റെ ഏശു എക്ക്‌വേണ്ടി എന്തൻ ചെയ്ഞ്ഞാര് ഇന്റ് നമ്പന്റ ഒരത്തൻ ഇത്‌വെരയം ചെയ്ഞ്ഞ തെറ്റ്കുറ്റത്ത്ക്ക് ഒള്ള ശിച്ച ഏശു അവന്റ ചാവീല് ഏറ്റാര്; അത് അവന്ക്ക് തെയ്‌വം നീതിയാഞ്ഞ് കണക്കിട്ടാര്. 26നാന് ചെയ്ഞ്ഞ തെറ്റ്കുറ്റത്ത്ക്കൊള്ള ശിച്ച ഏശു ഏറ്റ്ടത്താര് ഇന്റ് നമ്പന്റവന തെയ്‌വം നീതിയൊള്ളവനാഞ്ഞ് കണക്കിട്ടാര്. 27അത്കൊണ്ട് ഒരത്തന്റ നീതീനപ്പെറ്റി ഒരത്തന്ക്കും പെര്മപ്പെട്‌വാനിക്കി നോക്കണ്ട. 28എന്തനിന്റെ തെയ്‌വത്ത്ന്റ നേമം പാക്കന്റതീലില്ല ഏശുവിലൊള്ള നമ്പ്കാറണം ആണും നമ്മ്ക്ക് ഇത് കിട്ടീത്. 29അത്കൊണ്ട് എകൂതനിന്റോ എകൂതനില്ലാത്തവനിന്റോ ഇന്റൊള്ള തരംതിരിവില്ലാണ്ടി ഏശുകിര്ശ്തുവീല് നമ്പന്റ ഒക്കളയം അവൻ നീതിയൊള്ളവനാഞ്ഞ് കണക്കാക്കന്റാര്. 30തെയ്‌വം ഒര്‌ത്തനേ ഒള്ള്; അത്കൊണ്ട് അവൻ അവ്ങ്ങ്ക്ക് വേണ്ടി എന്തൻ ചെയ്ഞ്ഞാൻ ഇന്റ് എകൂതൻമാര് നമ്പിയേ അവങ്ങ നീതിയൊള്ള ആള്കള് ആവ്റ്; അത്പേലതിന്ന എകൂതൻമാര് ഇല്ലാത്താള്കളും ഏശു അവ്ങ്ങ്ക്ക് വേണ്ടി എന്തനാണും ചെയ്ഞ്ഞതിന്റ് നമ്പിയേ അവങ്ങയം നീതിയൊള്ള ആള്കള് ആവ്റ്. 31ഇത്കാറണം തെയ്‌വത്ത്ന്റ നേമം കൊണ്ട് ഒര ഓകാരമം ഇല്ല ഇന്റ് എങ്ങ പേശ്‌ല; അത്ക്ക് പകരം തെയ്‌വത്ത്ന്റ നേമം തന്തത് എന്തന്ക്കാണോ അത് നെറവേറ്റത്താണും ചെയ്യന്റത്.
Àwon tá yàn lọ́wọ́lọ́wọ́ báyìí:
റോമറ് 3: മുതുവാൻ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© New Life Literature