Matius 8
8
At Yesus en e, ap mesik ou hwena’go ’gela’ge
onogorlok a’ge oruakma obaptegei wene
(Markus 1:40-45; Lukas 5:12-16)
1At Yesus dom pam en ’bu agama re, aphwami esan a’bigat e’berlik legesa. 2Lagaimu re, ap mesik yebil hwena’go ’gela’ge onogorlok a’ge ebam welaga a’ge e’bek wagarik e, odogorlu pam hweriogo welat, disogo mo’gulesi,
“Yesus nue. Hat en obapnebagun epegen holuk e, elirat obapnoboat o,” oluk mo’gulesi. 3Asogo mo’gulesimu re, at Yesus en ap ano e’gik tenak pesirik e,
“An en obaphebaigoluk taga legi o. Holuk e, hebam op emen o,” oluk mo’gulosokhwe erianoat yebil hwena’go ’gela’ge onogorlok a’ge ano modok erlak agarik e, ebe obat aga. 4#Ima. 14:1-32Op agama re, at Yesus en, disogo mo’gulesi,
“Hat en e, Yesus en disogo obapnebegei, oluk, aphwami pema modok mo’gulentagun o. We, ap Allah eiye a’ge en il hiouwagoluk e’bek laguntik disogo tin o. At Musa en eselat e,
Aphwami enebe op otluk, Allah paget disogo po yo, oluk egei ano hegitsogoat pasumu pobi hobuagoluk, mesik pei lak o,” oluk mo’gulesi.
Yesus en ap tentara Roma a’ge onue eragam a’ge mesik ou obaptegei wene
ou obaptegei wene
(Lukas 7:1-10)
5Asogo mo’gulotluk e, o Kapernaum ’gwisoma re, ap tentara Roma a’ge onue ’gain mesik Yesus e’bek wagarik e, disogo mo’gulesi,
6“Nue! An neragam a’ge mesik e’gik oyuk soborak a’ge olema ’bourak welat e, nonouk a’bik tiso yo,” oluk mo’gulesimu, 7at Yesus en e,
“An en obaptu weik o,” oluk mo’gulesimu re, at ap tentara a’ge onue ’gain ano en e,
8“Eige! Nue. An nebe malik wei a’geatma, hat an nowi pam ’gwi lo mia o. Holuk e, hebe ya en hiak nak hwelak pagunmu re, an neragam a’ge ai op ema o. 9An ogo re, nuelak ’gaindek eneragam welat eniak hweliselat, ye, an nosi tentara a’ge neragam welat niak holugulat, tugumu re, an en at ap mesik,
Lak o, oluk mo’guloso holuk e, lasuat o. Ye, ap mesik,
Hat suk o, oluk mo’guloso holuk e, wagoat o. Ap an neragam a’ge mesik,
Yu a’ge tin, mo’guloso holuk e, tisoat o,” oluk mo’gulesimu 10at Yesus esa’go hwelegeirik e, aphwami at e’berlik legesa a’ge ebano disogo mo’gulentesi,
“Eige! Ap yu ede demat nebam he’beregei ai ’gela’ge, is aphwami Israel a’ge mesik enede asogo he’berik pogwiam entasu legi erlak ai nogorlok o, oluk demat mo’gulhentegis o.
11 #
Luk. 13:29
Ye, mesik e, yu mo’gulhentaik. Aphwami enebe a’bik orogobu akhit en, erabu akhit en, Allah eragam ’goluk e, Abraham emin, Ishak emin, Yakub emin, enemin seni nouwogoluk odoktuma o. 12#Mat. 22:13; 25:30; Luk. 13:28A’ge re, is aphwami Israel a’ge ai re, o eba isat eiye om a’geat de, o’borloma o hiktakma eba peragonoboma re, eniak ’gerlit marogulat nge togwi modok welema o,” oluk mo’gulentesi. 13Asogo mo’gulentesirik e, ap tentara a’ge onue ’gain ano disogo mo’gulesi,
“Hebe lak o. Hat hede nebam he’berik poluk, hogola en e,
Disogo obapnobua oluk epegen ai hegitsogoat emak o,” oluk mo’gulosokhwe erianoat, at eragam a’ge ano ebam op aga laga.
Hwe Petrus iemalhwe emin, aphwami pema emin,
Yesus en ou obabenebegei wene
(Markus 1:29-34; Lukas 4:38-41)
14Asogo tegeirik e, at Yesus ano Petrus owi pam lagarik il ’gwelakhesi ’gal, hwe Petrus iemalhwe ebam aganhan a’bik en e, ’bourak oruakma il hesi. 15Hesirik e, at Yesus en, hwe ano e’gik tenak pesi ’gal e, ebam aganhan a’bik welaga a’ge ano erlak aga. Erlak agama, hwe ano inagarik e, at enat so’boru wogesi laga.
16Asogo tisokhwe, o arat hopmu agama re, aphwami mu’gat enebabut wiak a’ge onogola ’gwigisarik welegesa a’ge wogonoboluk Yesus e’bek wegesema re, at iak mesik erligeat osokhwe eriano mu’gat wiak a’ge onogola ’gwigisarik oruakma henokho lebikpasulat, ou wiak a’ge ’berlek obabenebiselat, tegei. 17#Yes. 53:4Asogo tegei ai re, at Yesaya Allah iak mo’gulentasu laga a’ge ano en pelal wasulat e,
“Nis di ou yu ou wogu lege a’ge ai at en wokho erlagap pasulat,
nenanni erlik-erlak agalat mia aga lege a’ge ai obabenebiselat, tegei o,”
oluk egei ai hegitsogoat tegei ai o.
Aphwami Yesus e’berlik lagai wene
(Lukas 9:57-62)
18Aphwami a’bigat Yesus ilem wegesema il yerentesirik e, at osi iak wogu legesa a’ge ebano disogo mo’gulentesi,
“Nis ik so wusogo etle akhit libomok o,” oluk mo’gulentesi. 19Asogo mo’gulentesirik oruakma, is ap Allah iak pelal wogo eiye a’ge mesik Yesus e’bek wagarik e, disogo mo’gulesi,
“Nue. An e, hat ’gebane lagun holuk e, he’berlik modok denaga leik ani o,” oluk mo’gulesi. 20Asogo mo’gulesimu, at Yesus en e,
“Orlomene ai re, owi wusogo ogolayat welago yo. Ye, sue darak denago a’ge ai ogo, owi wusogoat welago yo. A’geat de, an abat daklau wegi ai nak e, nogosoma nowi werik e, modok erlak o,” oluk mo’gulesi. 21Asogo mo’gulesimu re, ap at iak wogu legesa a’ge ebano mesik en e, disogo mo’gulesi,
“Yesus nue o. An naduk naik werak a’ge ’gwiangma sali laigoluk, hat en,
I o. Lak o, oluk mo’gulnorogun en mo’gulhegis o,” oluk mo’gulesi. 22Asogo mo’gulesimu re, at Yesus en e, o’go disogo mo’gulesi,
“Ukpoluk e, an ne’berlik suk o. Werak a’ge holuk e, is aphwami enebe werak a’ge ’gela’ge oruak a’ge eba enat salonobogu lemak o,” oluk mo’gulesi.
Yesus en ik hererimtak wago a’ge
ha’bugaptegei wene
(Markus 4:35-41; Lukas 8:22-25)
23Asogo oluk e, at Yesus ebe ik so pam ’gwegeimu re, at osi iak wogu legesa a’ge ebano eneminat ’gwigisa. 24’Gwigisarik ik so pam lagaimu re, yasobu annisogo punhau wagama ik o’borlogouk en so weriselat ogola ye’gelisokhwe, at Yesus e, nogo ese laga. 25Nogosokhwe, osi eragam wegesarik elaluk emagoluk erlelhogulat e, disogo mo’gulegisa,
“Yesus. Nis ik lul yema re, delnonobogunmu re,” oluk mo’gulegisa. 26Asogo mo’gulegisema, at Yesus en e,
“Nopaget honogorlok hogu legep? Henede an nebam he’berik welegep erlak yema re!” oluk iak il-il inagarik e, yasobu ano emin, ik o’borlogouk a’bik a’ge ano emin,
“Ho’borlogouk,” oluk wene yagesimu re, ik o’borlogouk ano modok ha’buk egei. 27Asogo tegeimu re, is osi iak wogu legesa a’ge ebano en erliktugulat e, disogo egesa,
“Eige! Ap yu sa epegep. Yasobu emin, ik hererimtak wago a’ge emin, at iak hologo erlak aga yu nonogorlok o!” oluk erliktigisa.
Ap enebe ’biren mu’gat enebabut wiak a’ge onogola ’gwigisarik oruakma Yesus en
henokho lebikpesi wene
’gwigisarik oruakma Yesus en henokho lebikpesi wene
(Markus 5:1-20; Lukas 8:26-39)
28Pobuk, ik etle akhit aphwami o Gadara a’ge onowi pam lebegesa ’gal e, is ap enebe ’biren a’ge mu’gat enebabut wiak a’ge onogola ’gwigisema welegesa a’ge, owik aphwami werak a’ge onobugumu eba en Yesus e’bek wegesa. Is ap ai enebabut modok wiak en, aphwami is onogorlok en ebela’gwe ai modok laga legesa erlak a’geat de, Yesus wagama re, e’bek liplau wegesarik e, 29eniak loksogoat disogo mo’gulegisa,
“Allah omlogo yu. Hat en e, nis no’gosogo taknenebaigoluk wegen. Nis watnonobu hegit owan oruakhweat de, hat naduk watnenebigoluk wegen yema re!” oluk mo’gulegisa. 30Ai erlige o eba eragam horogat wam esan a’bik mugwa wogu legesa. 31Wogwi oruakma, mu’gat enebabut wiak a’ge is ap enebe ’biren erianoat onogola welat e, disogo mo’gulegisa,
“Yesus. Hat e, nenebe lebiknenebaigoluk holuk e, wam esan a’bik mugwa wogumu etleba onogola yagatla ’gwi lul en e, peraknenebemen o,” oluk eniak lo’buksogoat mo’gulegisa. 32Asogo mo’gulegisema, at Yesus en,
“Holuk e, lit o,” oluk mo’gulentesi. Mo’gulentesimu, is mu’gat enebabut wiak a’ge ebano ap eriano onogola en henokho liplau wegesarik e, wam esan a’bik mugwa wogu legesa a’ge ebano onogola yagatla ’gwi legesema, wam ebano modok perlengsogo ik iak yatma en ’bule lulasogo ik olomu ’gwigisarik ik modok legesa. 33Asogo legesema re, is aphwami wam tenak welegesa a’ge ebano onogorlok agarik,
“Disogo aga o,” oluk yo’go pungtak o kota ma ebano legesarik e, is ap enebe ’biren eriano en e, onobok eminat ’beli’gogo mo’gulentigisa. 34Asogo mo’gulentai legesema re, is aphwami o eba welegesa a’ge Yesus hau wegesarik e,
“Hat hebe o yema wolorogun erlak ani o. Lagunat ai o,” oluk eniak lo’buksogo mo’gulegisa.
Àwon tá yàn lọ́wọ́lọ́wọ́ báyìí:
Matius 8: Wul
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
