Matewuzhu 3
3
Yaahaya Namoosa Ontthenkeza Tarikhi
1Siikhu zaya epile khupuwa Yaahaya Namoosa, alaleyaka n'yaara ya Yudeya, 2araka: “Mwithupwiye, maana Ofwalume wa pinkuuni ori kharipu.” 3Maana otu ti otule alupiweeyo ti napiyu Ezaaya yoori:
“Huula enkhuwa n'yaara eraka:
‘Mwitthenkeze tarikhi ya Mbwana
na mookolele miphiitelo zawe.’ ”
4Kuwo za Yaahaya zaattalaniwe ovuzi wa nkamiiya, na aari owalaka nzako wa shapala n'yuunu. Etthu yoojiwa yawe aari mapalaka na asali ya ntthuttu. 5Atthu a nti wa Yeruzaleemu na a Yudeya na miti zooshi za nkerekhere ya Yorotaani aari onteela ye. 6Yo aari otukhuru twampi zaya, nawoosiwa ti Yaahaya mmuttho Yorotaani.
7Wakathi ye awooniyeeyo mafwarizeewu na masatukhi enkeene ateliye woosiwa ti ye, khuwooza yoori: “Khapila ya evili! Ti paani awuuziyeenini otthira katapu entaaye? 8Mwithoonyeze khwa khaazi zenu yoori weekhweele mwathupwiya twampi zenu! 9Khahiyo olupa yoori: ‘Eburahiima ti papeetthu,’ ila miiyo kiniwuuzani yoori, khwa liwe ntthi Nluku onwahi owaattala aana a Eburahiima. 10Nshokha latthiiwa nshini wa mitathaari za miitthi. Wakhula muutthi ohiniimaaye mishumo zooshapweya ontta oshijiwa weeseleliwe va moottho.
11“Miiyo kiniwoosani na maati yoori mwithoonyeze othupwiya. Paata ya miiyo, onta nkina ariina owahi zayita miiyo, wala akina makhaamu oothuula jampali zawe. Ye onttela owoosani na Rooho ttakatthiifu na moottho. 12Ye ontana fosholo mmakhono mwawe onteela ophakula tiriku na maveya. Tiriku atthe va sakafu vawe, maveya akhoze va moottho ohinzimaaye.”
Woosiwa wa Yinsa
13Wakathi otthuupule Yinsa khulankha Kalileya khuta o Muuttho Yorotaani oteela woosiwa ti Yaahaya. 14Yaahaya khusala atakha okatthala araka: “Miiyo ti kinhithajiya woosiwa ti weeyo, onikiteela toovi miiyo?” 15Ila Yinsa khunjipu yoori: “Olikhe etthiipo, yoori erettikhane shariya yooshi.” Yaahaya khukhupalela. 16Yinsa nawoosiwa, khuvuuwa, nasaapiru pinku khufukuwa, khoona Rooho Ttakatthiifu yiishukhaka nkhama jiwa khummorela. 17Huula ya olankha pinkuuni khuri: “Otu mwanaka wompheta, na wookituvela channu!”
Àwon tá yàn lọ́wọ́lọ́wọ́ báyìí:
Matewuzhu 3: eko
Ìsàmì-sí
Pín
Ṣe Àfiwé
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Wycliffe Bible Translators, Inc. All rights reserved.
