Matewuzhu 20
20
Nlikaniso wa anakhaazi a nshapa la wuuva
1“Maana Ofwalume wa pinkuuni ori nkhama mweenyewe nshapa alankhiyeeyo supuyeene olawa oweekesa atthu yoori akhole khaazi mmashapa mwawe. 2Ye khusiilanana yoori awaariphe nzurukhu mmote wa feeta wakhula siikhu, khuwaaruma olawa omashapa wawe.
3“Wakathi opule wa saa ttaatthu, ye khulankha khusala alawa khuwoona atthu akina ari ohiina khaazi eekhaliye vaparasa. 4Aphano khuwooza yoori: ‘Na mweeyo mwilawe mwakhole khaazi mmashapa mwaka la wuuva, miiyo kintta wuuriphani etile enttelaaye wiiya ya shariya.’ 5Apale khulawa, khulankha theenya wakathi opule wa saasiitha na wakathi opule wa saakhentta, khuretta nanna nkhama etthiipile. 6Etthiipo wakathi wa saa khumi na monsi, ye khurutelawo khuwaasikana theenya akina ahaariina khaazi na khuwoozela yoori: ‘Mwaasa aya niini mweeyo mwiikhalaka apha mwihikholaka khaazi siikhu yooshi?’ 7Yo khunjipu yoori: ‘Maana khina mmote aninkhiyeeyo khaazi.’ Aphano khuwooza apale aya yoori: ‘Ettani na mweeyo mwakhole khaazi mmashapa mwaka.’
8“Weettelaka oripa, mweenyewe nshapa khumuuza waziri awe yoori: ‘Owaakhuwele anakhaazi na owaariphe phakari yaya, owaaze apale awiishela mpakha apale a mwanzo.’ 9Khuta anakhaazi apale aattakhulaniweeyo wakathi wa saa khumi na monsi na wakhula ntthu khupwekhera nzurukhu mmote wa feeta. 10Wakathi atiiyeevo apale aattakhulaniweeyo mwanzo, aari weekesela opwekhera wa waatta, ila wakhula mmote aari opwekhera nzurukhu moote wa feeta. 11Noopwekhera khwaaza ojiliza khwa mweenyewe nshapa, 12amuuzaka yoori: ‘Mamwinyi apa wawaattakhulana yoori akhole khaazi ya wakathi mmote, weeyo Mbwana onnilikanisana fweeyo nivileliyeeyo olemela wa khaazi na haari ya nthana wooshi.’ 13Ila ye khujipu yoori: ‘Swaahipu, akintta owiimana shariya. Weeyo khawaakhupaleliye okhola khaazi ya opwekhera nzurukhu moote wa feeta? 14Opwekhere etile yiiyiye yawo olawe. Miiyo kintakha omwinkha otule kaattakhulaniyeeyo wawiishela nkhama etthiipo kiwinkhiyeeyo. 15Akina ruhusa ya orettela etile kintakhaaye nzurukhu aka? Ama weeyo ona nrima mwaasa wa miiyo wiiya nkemaani?’ ”
16Aphano Yinsa khumarisa araka: “Apale amwanzo anttela wiishela na apale awiishela anttela wiiya amwanzo.”
Yinsa onrutela olupa theenya ofwa na osisimuwa wawe
17Awelelaka Yeruzaleemu, Yinsa khuwaakhuwelela othetekele anakhiyoni awe apale khumi na awiri, khuwooza yoori: 18“Moone! Ninwelela Yeruzaleemu, Mwaana wa Pinaatamu onttela winkheleliwa mmakhono wa mahaakhimu a tiini na anamanozela a kano, yo anhukhumwele wuuliiwa, 19enkheleliwe mmakhono wa amalapo anveyise, anjaphe na akhomeliwe. Ila siikhu ya ttaatthu asisimuwe.”
Oveka wa mamaawe Tiyaaku na Yaahaya
20Aphano maama wa aana a Zepeteewu khumwaattama Yinsa na khukokhora khunvekela. 21Yinsa khumuuzela yoori: “Weeyo ontakhani?” Maama otule khujipu yoori: “Kintakha yoori muufwalume mwawo aanaaka apa awiri mmote eekhale nkhono nlume nkina nkhono nkha.” 22Yinsa khunjipu yoori: “Mweeyo khamwinjuwa etthu mwinvekaaye. Mwinwahi onywela jiikira ethiiti kinttelaaye onywela?” Yo khujipu: “Ninwahi.” 23Aphano Yinsa khuri: “Weekhweele mweeyo mwinteela onywela jiikira yaka, ila wiikhala nkhono nlume aka ama nkhono nkha khahiyo miiyo kinlupaaye. Maana puuro eto ti yawe otule atthenkezeliweeyo ti Paapa.”
24Noosiila vitthu epile, apale khumi khwiiya ookasirikha khwa attwi apale awiri. 25Aphano Yinsa khuwaakhuwela na khuwooza yoori: “Mweeyo mwinjuwa yoori anamalokozela a khapila anshintta, na attunkhulu aya anthoonyeza ofwalume khwa yo. 26Ila vakatthi venu mweeyo mwihiiye toowo. Otule antakhaaye wiiya nttunkhulu vakatthi venu mweeyo ona ya wiiya karumeya, 27na otule antakhaaye wiiya wa mwanzo vakatthi venu eeye mwiitthwaana. 28Nkhama etthiipo, Mwaana wa Pinaatamu khateleeni orumeyeliwa, ila orumeya na winkha ohaayi awe khwa owaakaphula atthu awaatta.”
Ovonisiwa wa ananhooni awiri a Yeriko
29Alankhaka Yeriko, atthu awaatta khusala anlottelela Yinsa. 30Atthu awiri oohooni eekhaliye nshini wa tarikhi, wakathi asiiliyeevo yoori Yinsa ontta ovira, khwaaza onyakula araka: “Mbwana, Mwaana wa Daawuuda, onoonele huruma!”
31Atthu apale awaatta khusala awaakhattaza, awaatakhelaka yoori anyamale, ila khusala atepa onyakula araka: “Mbwana, Mwaana wa Daawuuda, noonele huruma!”
32Yinsa khweemela khuwaakhuwela khuwoozela yoori: “Mweeyo mwintakha yoori miiyo kuuretteleni niini?”
33Yo khujipu yoori: “Mbwana, nintakha onifunule maasho eetthu.”
34Yinsa khuwoonela huruma khuwaasapa maasho aya, nasaapiru khurutela woona khusala anlotta.
Àwon tá yàn lọ́wọ́lọ́wọ́ báyìí:
Matewuzhu 20: eko
Ìsàmì-sí
Pín
Ṣe Àfiwé
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Wycliffe Bible Translators, Inc. All rights reserved.
