Matewuzhu 14
14
Ofwa wa Yaahaya Namoosa
1Wakathi aya opule Herooti, reekule wa Kalileya, khusiila olupiwa monkoni wa Yinsa. 2Ye khuwooza akarumeya awe yoori: “Oto ti Yaahaya Namoosa; eetta osisimuwa muufwa! Tiito ariinaaye owahi wa oretta minjuza.”
3Maana ye Herooti antthiiye Yaahaya nkalapooso, mwaasa wa Herodiya, muukha wa Filiipe, ttwiiye, 4mwaasa Yaahaya omuuza yoori: “Khahi halaali weeyo onrala ye.” 5Herooti aari otakha omuula, ila khusala awoova atthu, maana yo aari ontthantta Yaahaya nkhama napiyu.
6Va njampo la oretta mwaakha Herooti, mwaana wa Herodiya khwiina vakatthi wa atthu ooshi, khuntuvelisa Herooti aya, 7ye khumwaahiti khwa olapha omwinkha wakhula etile aari weettelaaye onvekela. 8Khwa shawuri za winkhiwa ti mamaawe, ye khulupa yoori: “Mwikitiisele mparathu eeshwa ya Yaahaya Namoosa.” 9Mfwalume khwiiya wooshukulikha, ila mwaasa wa olapha na mwaasa wa anamalaleyiwa, ye khuruma yoori enkhiwe etile mwaana otule avekiyeeyo. 10Khuruma olawa oshijiwa eeshwa ya Yaahaya Namoosa nkalapooso. 11Eeshwa yawe khuthuuliwa mparathu khulawa khwinkhiwa mwaana otule, ye khuthuula khulawa khumwinkha mamaawe. 12Anakhiyoni a Yaahaya khuta, khuthuula mwiili awe khulawa khuzikha. Nawiisha khulawa onthatelela Yinsa.
Waattisiwa wa phaawu na swi
13Noosiila vitthu zaarettikhaniyeezo, Yinsa khupakhira mmwaatiya khulaawo okhule waya, khweetta n'yaara otthwe. Ila atthu noojuwa, khulankha nsitati mphule khusala anlotta mwentto. 14Yinsa noopakhuwa mmwaatiya khuwoona atthu awaatta, khuwoonela huruma, khuwaavonisa alwele aariivo. 15Njuwa looveva, anakhiyoni awe khunsusela khumuuza yoori: “Mphu n'yaara na ontta oripa. Owaamwaze atthu apa eette mmiti mpho oozanye etthu yoojiwa.” 16Yinsa khuwaajipu araka: “Khinihithajiya yo olawa. Mweeyo ena mwiwenkhe etthu yoojiwa.” 17Yo khulupa yoori: “Fweeyo etthu niriinaaye apha phaawu thaanu na swi piiri.” 18Aphano ye khulupa yoori: “Mwikitiisele apha.” 19Khuruma yoori atthu apale eekhale va nyaani, khuthuula phaawu epile thaanu na swi epile piiri, khweekesa otulu, khuparikhiya. Khumeya phaawu epile. Elottelanaka khuwenkha anakhiyoni awe, yo khusala awenkha atthu. 20Ooshi khuja khurupala, anakhiyoni khulokotthela khelenke khumi na piiri nyeenye zaasaliyeezo. 21Atthu aajiyeeyo aari alume alufu thaanu, ohiwaatthiimo aakha na asimaana.
Yinsa oneettetta vatulu wa maati
22Elottelanaka, Yinsa khuwaaruma anakhiyoni awe yoori apakhire mmwaatiya alokoze eette kaapu kiina, wakathi ye aari oleezananaavo atthu. 23Paata ya owaaleeza atthu, khuwela vamwaako yoori alompe. Khuripa ye ari attaaphale otthwe, 24ila wakathi aya opule mwaatiya waari peetiwene na vathi, weettaka opiiwa ti mawipi venkivene maana pheevo eetta wiinyula. 25Lifwajiri, Yinsa khusala eetta attaaphale aarivo anakhiyoni awe eettettaka vatulu wa maati. 26Noomoona eettaka weettetta vatulu wa maati yo khwiiya oosuthuwa khulupa yoori: “Opu nshitapehe!” Yo khusala anyakula na woova. 27Ila Yinsa khuwooza yoori: “Mwiminyale! Ti miiyo. Mwihoove!”
28Khujipu Pheeturu yoori: “Nkhama ti weeyo khweele Mbwana, okirume kite attaapho oriivo, keettettaka vatulu wa maati.” 29Yinsa khunjipu, araka: “Ote.” Aphano Pheeturu khulaamo mmwaatiya, khusala eettetta vatulu wa maati eettaka phantte etile aariiwo Yinsa. 30Paata ya woona khiima pheevo etile yaari ovumaazo, khoova khusala azama vattiitthivattiitthi, eettaka onyakula araka: “Mbwana, okuusuru!” 31Nasaapiru Yinsa khookola nkhono awe khunkholelela. Khumuuza yoori: “Ntthu woopushuwa amini, ohaaminaka mwaasa aya niini?” 32Paata ya owela mmwaatiya, pheevo etile khwiisha. 33Apale aari mmwaatiya khumwaaputu alupaka yoori: “Khweele weeyo o Mwaana wa Nluku.”
Yinsa oniwaavonisa atthu nti wa Jenezare
34Paata ya olokha pahari, khufiya Jenezare. 35Wakathi atthu a mmuti mphule anjuwiyeevo yoori ti Yinsa, khumwazela hapari mmuti mphule wooshimo, atthu akina khusala awaatana alwele aya. 36Anvekelaka yoori nenkawu asape nshaka la ajapi yawe; ooshi asapiyeeyo khuvona.
Àwon tá yàn lọ́wọ́lọ́wọ́ báyìí:
Matewuzhu 14: eko
Ìsàmì-sí
Pín
Ṣe Àfiwé
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Wycliffe Bible Translators, Inc. All rights reserved.
