Yuunusa 2
2
Olompa wa Yuunusa
1Ari mmatthupo wa swi, Yuunusa khwaaza olompa anvekelaka Nnyizinku, Nluku awe:
2“Na khuri: Nhuzuni mwaka kankhuweliye Nnyizinku,
na aakijipwiye.
Mithili za ahera kaakhuwiye
na waasiiliye huula yaka.
3Waakitupweeziye mpahari wa wiichamo,
nkatthi wa khilintti,
nziko wa maati khukizukulela,
na mawipi awo khukikhutela.
4Miiyo khulupa yoori: Keekareliwa peetiwene
khwa omaasho wawo weeyo Nnyizinku.
Kinta kirutele woona theenya
nyuupa yawo yoottakatthifu?
5Maati khukifiya vakhulo,
khilintti khukizukulela
na mirawa khukizokonzela eeshwa yaka.
6Khuzama mpakha vanchina la nyaako,
tuniya ya vathi, puuro eninfukelaaye ntthu khwa siikhu zooshi.
Ila weeyo Nnyizinku, oo Nluku aka kuusuru nafusi yaka
nkhapuri mphule.
7Wakathi kaari osaleelaavo ofwa,
koofikhiriye weeyo Nnyizinku,
khuuperekheza lompa yaka,
yoori efiye nnyupa mwawo ttakatthiifu.
8Apale anaaputwaaye sanamu ziiyiyeeyo vitthu zoohiina fwayita,
antarawu tthakaraka ya Nnyizinku.
9Ila miiyo kinteela wuushukhurwela weeyo
na maliipo a siifwa na owinkha twaha,
na kinteela oretta eti kaahitiyeeyo,
maana nusura enlankha khwa Nnyizinku.”
10Aphano, Nnyizinku khuruma swi etile yoori, yanchuwe Yuunusa nshini wa nttima.
Àwon tá yàn lọ́wọ́lọ́wọ́ báyìí:
Yuunusa 2: eko
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Wycliffe Bible Translators, Inc. All rights reserved.