Yela 94
94
Korowii waa bol nɛra bwa waa dɛɛ pa bole
1N Naa Korowii,
henee dɛɛ tɛr nɛra deŋne,
ɡel ba na he bandia.#Nee 1:2-3
2Henee bol nɛra bwa
waa dɛɛ pa bole,
ir dɛ́ bɔ mbarafo tena
kem ɡɛ aa chɛa.
3N Naa Korowii,
saŋ besoo hɛɛ ba soɡa
nyiŋi,
dɛ́ ɡel nyubinikpeɡ tena
lɛ ba sie ka tel ɔ?
4Ba dɛ bol mbarafo wobol,
mbarafo ɡboo su
wechɔɡ-ɛɛra bwa.
5N Naa Korowii, ba dɛ
chɔɡ he nɛra, dɛɛ fiiɡi
he ɡbabir nɛra haa
lee ba tɛ he te.
6Ba dɛ kpoo
luhaahna ne bilalbii,
dɛɛ kpoo nɛŋhɔɔhra
baa soɡe ya harɛ ta.
7Ba yon dɛɛ bol ŋɔ,
“Korowii aa yaa na,
Korowii Israel tena aa
dɛ tomɔ la sie toole ya be.”
8N nɛra, ɛrɛɛ hɛɛ ɡɛn ɡɛ nɔɔ?
Saŋ besoo hɛɛ ba waa
hwela ɔ?
9Korowii laa tɛ yaa
deŋna ne sibie aa?
Waa waa no aa?
Waa na naa?
10Korowii waa dɛ kah nɛra la
aa won tɛr ba deŋne aa?
Nɛn waa dɛ baɡle nɛra
waa la,
o nya liire kɛɛ?
11Korowii jemɛ nɛwɛnyini liire
kɛŋɔ a ɛ wepuu.#1Kɔ 3:20
12N Naa Korowii,
nɛra haa dɛ baɡ ba wa,
ne banɔ la haa dɛ baɡ ba
he Mmarare la, ba na som.
13Wenaale ane dɛ ba ba nɛ aa,
he ɡelɔ baa dɔ bosɔɔhna,
ka tel kɛŋɔ baa forɛ bɔɔ,
dɛ́ harɛ nyubinikpeɡ tena
bel.
14Korowii aa o nɛraa vɛh,
waa nɛra waa lee ba cheɡ
tɛ o te laanee ɡel bwa.
15Waa bola dɛ́ pa bole
aŋwɛnɛ ta ɛɛ berɔ do le,
ásɛ nɛra ba wa aa toɡra
ɛɛ teŋɛ a ta.
16Umee dɛ́ che n habɔɔ,
dɛ́ lɛɛ mɛ le
nyubinikpeɡ tena nɔn ta
nɔ?
Umee dɛ́ che tɛ mɛ dɛ́ lɛɛ
mɛ le wechɔɡ-ɛɛra nɔ be
nɔ?
17Dɛ Korowii laa cha mɛ naa,
n fe sewɔ warane kaa
lalabwɛ.
18Asɛ n ŋɔ,
“N keero dɛɛ ba chola,”
kɛ Korowii nyina aa wola
jaɡa dɔe la laɡ mɛ kpoŋe.
19N liire baa chɔɡ kohona aa,
he dɛ larawe n bwara
dɛɛ tɛ mɛ silɛɛ.
20He ne nɛnchɔɡa baa wola
waa bol aŋwɛnɛ ta,
ne nɛra baa kpɔ nyosone
berɛ kasinteŋ la
toole wobɛlbwa bini.
21Ba pɛ nyoa dɛɛ vɔrɔwe
nɛndɛɛɡa vɔrɔwa,
dɛ ɡel ba pa nɛra baa di
boldɛɛɡe la bolchɔɡe ŋɔ,
bá ka kpo ba.
22Kɛ Korowii do kɛ
danjwɛkpeɡ, dɛ che n habɔɔ,
onee do kɛ Bwetal
n chwa kaa marɔ.
23Wɛɛ bɔ ba kem ba
wechɔɡa waa, dɛ́ chɔɡ ba
ba nyubinikpeɡ wa.
Korowii yaa dɛ tomɔ la
ɛɛ chɔɡ baa.#Ɛst 7:10
Àwon tá yàn lọ́wọ́lọ́wọ́ báyìí:
Yela 94: mzw
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.