Yela 140
140
Nɔn kpɔe dɛ́ tɔ nɛn nɛɛ wesoŋa
Kooro Devid yel
1N Naa Korowii,
lɛɛ mɛ le nɛnchɔɡa nɔn ta,
lɛɛ mɛ le naɡrenyine be.
2Saŋ bɛlbwaa baa
vɔrɔwe wechɔɡa vɔrɔwa,
dɛɛ ba waa aa dɛ ir
nɛra bambile baa yo
tɔpere bɛlbwa ne.
3Ba nyoa wobol dɛ kpo
kɛ tɛɡchɔɡa ken,
dɛ do kɛŋɔ domkpuli
aa choɡe nɛn.#Rom 3:13
4N Naa Korowii,
kpɔ nɔn tɔ n nɛɛ
nyubinikpeɡ tena nɔn ta.
Lɛɛ mɛ le naɡrenyine baa
dɛ vɔrɔwe n chɔɡa vɔrɔwa
be.
5Mbarafo tena sɔɔh
dɛ haɡre mɛ bela,
ba kpɔa bil ŋwɛnɛ maa
dɛ kpɔ o ta la ta,
ásɛ dɛ dɔɔ mɛ lawɛ.
6N ŋɔ n Naa Korowii be ŋɔ,
“Henee Korowii
maa dɛ tomɛ.”
No n wii dɛ́ cha mɛ!
7Nemenɛ Korowii,
he kpeɡri dɛɛ che n habɔɔ,
henee tɔ mɛ ɡbemɡbe laa
ta,
8bɛ ɡel nɛnchɔɡa dɔ ba
tetoowa,
bɛ ɡel ba vɔrɔwa baa dɛ
vɔrɔwe maɡre, asɛ baa
ɛ mbarafo a wa.
9Bɛ ɡel n dɔma won pɔ n nɛ,
ɡel ba aahra baa dɛ aah mɛ
ɡure ba nyu ta.
10Chure ninhɔla ta ba nɛ,
ɡel ba taɡ ba do bɔluŋ bini
baa wola won le kpa.
11Bɛ ɡel nɛra baa teŋe
nyosone dɛɛ dawɛ
nɛra nɛɛ waa
maɡre tɛɛ ba.
Gel waa pu naɡrenyine,
dɛ́ chɔɡ ba.
12N jemɔ kɛŋɔ Korowii
bol nyaara waa dɛɛ tɛɛ ba,
dɛɛ lɛ ba nyoa.
13Kasinteŋ, nɛra ba wa
aa toɡra la ɛɛ kpɛɛree,
baa do he siee.
Àwon tá yàn lọ́wọ́lọ́wọ́ báyìí:
Yela 140: mzw
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.