Yela 109
109
Nɛn waa lɔ wenaale ta wobol
Kooro Devid yel
1N Naa Korowii
maa dɛ kpɛɛre,
ir nyu ne, bɛ nyoa tɔ,
2dɛkalkɛ nyubinikpeɡ tena
ne nyosonteŋna dɛ yoo mɛ,
ba teŋe nyosone bol
waa dɛɛ yaɡ mɛ.
3Haeh wobol ɡboo
ba bol dɛɛ yaɡ mɛ,
dɛɛ yoo mɛ pɛɛpɛɛ.
4Ba kpɔ haeh chiɡ darame
naa ta,
kɛ n te, hen Korowiirii
n soŋe dɛɛ tɛɛ ba.
5Ba kpɔ wechɔɡa dɛɛ bɔ mɛ
wedɛɛɡa kem,
dɛ kpɔ haeh bɔ mɛ
nyina kem.
6N Naa Korowii, le
nɛnchɔɡe waa bol n dɔm
waa dɛ́ pao bole,
ɡel o dɔm ɡbaɡba che o nɛ.
7Gel ba bol o waa ó di
bolchɔɡe,
ɡel o wesoŋa kwaraa
berɛ wechɔɡa tɛo.
8Gel o tɔpera waa di do boraa
ken,
ásɛ nɛnfale di nomonome
waa dɛ di la.
9Gel o bii berɛ bilalbii,
ásɛ o haah ɛ luhaah.
10Gel o bii ɡaaɡe dɛɛ soŋe kwa,
ɡel ba doŋ ba le dimɡbeeni
baa lɔ a ta la ta.
11Gel nɛra waa di ba kema
pa o kondɔɔh bwa kaa,
dɛ́ ɡel hɔɔhra pa komɛlbwa
waa koah dɛ dɔ.
12Bɛ ɡel nomɛlbwa ɛɛ sune
o nɛ, dɛ́ ɛo wedɛɛɡa
kɛɛ dɛ́ na o bilalbii la sum.
13Gel o naanar bwa serewe,
dɛ́ ɡel o sɔn nyoɡre
naanar baa ka ba bwa bini.
14N Naa Korowii, lii o naawa
wechɔɡa o sie.
Bɛ o nya wechɔɡa
kpɔ kɛo bwa.
15N Naa Korowiirii dɛ́ lii ba
wechɔɡa saŋ bɛlbwa,
dɛ́ ɡel nomɛlbwa bɛ
ba waa lii harɛ nɔ ta kpa.
16Dɛkalkɛ dɛ waa wedɛɛɡa lii,
dɛ o dɛ kpoo dɛɛ do nyaara
ne nɛŋɡwɛɡra, dɛ banɔ la
ba bambile aa chɔɡa
hɔhɔrɔwa.
17N dɔm la dɛ nyin nɛra
taahna,
ɡel o taahna ɡure o nyu ta.
O hah sweera dɛ tɛ o dɔŋ,
bɛ ɡel nomɛlbwa swee tɛ
o ɡe.
18O kpɔ nɛra taahna berɛ
batakaare dɛɛ do.
Gel o nɛra taahna sɔɔ
kɛŋɔ ne,
dɛ́ jooɡe o hoɡa bini
kɛŋɔ no.
19Gel a do kɛŋɔ baa kpɔ
batakaare fɔrɔwo,
kɛŋɔ baa kpɔ kiriso vɔwɔ
saŋ bɛlbwa ken!
20N Naa Korowii,
tɛr n dɔm deŋne n wa,
tɛr nɛra baa dɛ bol n bwara
wechɔɡa la deŋne.
21Kɛ hen, Nemenɛ Korowii,
che he sɔn ta dɛ́ cha mɛ.
Lɛɛ mɛ he wer ne he nyina
haa dɔa la wa,
22dɛkalkɛ n ɛ nyaa
dɛ ɛ nɛŋɡwɛɡre,
asɛ n bambile bwa
ɛɛ wee mɛ.
23N dɛ ba nyoɡra kɛŋɔ
bɔr aa joa dɛɛ bir ken.
N do kɛŋɔ hɔɔhre peu
aa kpɔ mɛ ka ta.
24Nyoa vɔwa ɡelɔ
n natuune ɛɛ sa,
n ɡwaŋɛ ka hoɡa.
25Ba na mɛ naa,
ba dɛ muɡli n baah,
dɛɛ viiɡi ba nyuune.
26N Naa Korowii maa
dɛ tomɛ, cha mɛ,
koh he nyina aa wola
jaɡa dɔe bwa la waa
dɛ́ lɛɛ mɛ.
27N Naa Korowii,
ɡel n dɔma jemɛ
kɛŋɔ henee lɛɛ mɛ.
28Baa taah mɛɛ,
kɛ hɛɛ swee mɛ andɛɛɡaa.
Ba dɛ yoo mɛ naa,
hɛɛ ɡeloo sihiih kpo ba,
ásɛ men maa ɛ
he bonɔɔ nɔ sie lɛ.
29Gel sihiih kpo n dɔma
kohona,
dɛ́ bɔle ba nɛɛ kɛŋɔ
batakaarejaŋ ken.
30Mɛɛ jam Korowii kohonaa,
dɛ́ kpɛɛro nɛnlaa bini,
31dɛkalkɛ o dɛ che nyaara
habɔɔ, dɛ lɛɛ ba
dɛɛ le nɛra
baa kpoo ba nɔn ta.
Àwon tá yàn lọ́wọ́lọ́wọ́ báyìí:
Yela 109: mzw
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.