Kaala 15
15
Mosis yel
1Belaa Mosis ne Israel tena la ɡo yel kpɛɛ Korowii ŋɔ,#Yel 106:12
“Mɛɛ ɡo yelee kpɛɛ Korowii,
dɛkalkɛ o lɛ sɔn kohona.
O kpɔ jaɡre ne nɛra
baa soɡe a ta bwa
ka do mpo bini.
2Korowiirii n bokpeɡa,
o sɔn ber mɛ yel mɛɛ ɡo,
onee n Lɛɛ, onee
mɛɛ tomɛ dɛɛ kpɛɛro,
Korowii n naa wa
aa tomɔ laanee on,
o sɔnee mɛɛ ba yera
dɛɛ tomɔ.
3Korowiirii yoa dɛɛ tɛ yaa,
Korowiirii o sɔn.
4Ijipt kooro kwaa baa vɔwa
pɛl jaɡre ne o laa tena,
o taɡɛ a bwa do mpo bini,
Kooro nomonome tenten
bwa sirimi mpo la bini.
5Vil tentenee bɔle ba nɛ,
ba chɔ vil la mun ta
kɛŋɔ bwe ken.
6N Naa Korowii, he nɔn diɡ
dɔ jirima kpeɡri do o ta,
he kpɔ chɔɡ ya dɔma.#Yel 118:15-16
7He kpeɡri ne he jirimaa
he kpɔ taɡɛ he dɔma ta.
He ɡelɔ he bandia kohona
ba fuuh ba kɛŋɔ kpɔɡa ken.
8He nyoa peu ɡbo ɡelɔ
mpo bini pere,
dɛ che diɡ ne ɡal
kɛŋɔ danjwɛ,
o holɔ vile aa lɔ
o baah ta chɔ pɛɛ.
9Ya dɔma tamanɔ dɛ ŋɔ,
‘Mɛɛ ti baa dɛ́ ka pɔ ba nɛ.
Ba kondɔɔh bwaa
mɛɛ ba pae ɡɛ maa dɛ nyin.
Mɛɛ tɛr n kere ba nɛɛ
dɛ́ chɔɡ ba bwa.’
10Kɛ haa hweera
kerabeŋkpoŋ ɡbo la,
a ɡelɔ mpo nee bɔle banɛ.
Ba sirimo kɛŋɔ kpana
aa sirimi vil bini la ken.
11N Naa Korowii, voɡ bisoo
do kɛ hen ɔ?
He do ɡoroŋ ɡa,
he jirima do kan kohona.
Umee won nyokpowaa ɛɛ
kɛ he nɔ?#2We 2:5
12He tɛr he nɔndiɡ,
asɛ harɛ kpɔ ya dɔma lile.
13He nyina aa wola
jaɡa dɔe nomanta,
hɛɛ tɔ he nɛra
haa lɛɛ ba la siee.
Hɛɛ kpɔ he kpeɡrii
dɛɛ nyiŋi ba nɛ,
dɛ́ kpɔ ba kaa harɛ
waa do ɡoroŋ ta.
14Harɛre ta nɛra ɛɛ no he waa
ásɛ ɔmee laɡ ba,
bambichɔɡ ɛɛ ɡeloo
Filisti tena bwara yɔr
kɛŋɔ loltea yon lɔ haah la.
15Ɔmee ɛɛ lawɛ
Edom koranaree kohona,
Moab nomonome bwara
yɔr baa chel,
Keenan tena ɡe
bwa ɛɛ heo kwara.
16Ɔmee kohona ɛɛ chole ba nɛɛ,
á che he kpeɡri ta bá ka
che bobeŋkpoŋ kɛŋɔ
bwe ken,
dɛ́ ka tel kɛŋɔ he nɛra
aa teŋe ba kaa mɔɔ.
N Naa Korowii, nemenɛ he nɛra
haa lɛɛ ba le Ijipt harɛ ta la
teŋe ba kaa mɔɔ.
17He kpɔ ba ka so he be
bwe doa,
bwe la doa waa ɛ
he soŋnibɔr la,
he ɡbaɡba Dea
waa do ɡoroŋ
he che he kpeɡri ta
cheɡo la.
18N Naa Korowii, hɛɛ di kora
saŋ bɛlbwaa dɛɛ la.”
19Gɛɛ a do Ijipt kooro kwaa aa do kɛŋɔ torɔɡo ba vɔwɛ dɛɛ pɛl jaɡre, ne baala baa soɡe jaɡre ta bwa jo mpo la bini, asɛ Korowii ɡel nee la ba bɔle ba nɛ. O ɡelɔ Israel tena la te valɛ harɛpɛɛ waa hola ta mpo la bini dɛ le.
20Belaa Arɔn nimambie Miriam waa ɛ Korowii keame kpɔ loŋ, asɛ haahna la bwa ɡe ja dɛ kpoŋe ane ba yiiɡa dɛ sa teŋɛ dɔŋa nɛ.#1Sa 18:6 21Asɛ Miriam ɡo yel dɛ ŋɔ,
“Hé ɡo yela kpɛɛ Korowii.
O lɛ sɔn kohona ɡa.
O kpɔ jaɡre ne nɛra
baa soɡe a ta bwa
ka ta mpo bini.”
Neerare ane aa lɔ Mara ne Elim wa
22Ate, Mosis tɔ Israel tena la sie le Mposwɛm la nyoa, dɛ kpɔ ba kaa pua hɛŋle ɡbo harɛ ta bobɛl baa dɛ yerɔ Suur. Ba ɡaaɡe harɛ la ta tɔpera atoro dɛ ba ta nee nae. 23Ba baa tel bobɛl baa yerɔ Mara dɛ na nee bɛl. Ba ta wone nyɔɔ, dɛkalkɛ dɛ o kpeli. Gɛɛ a do baa yerɛ bela Mara. O munii kpeli. 24Anomanta, nɛra la naɡre wa dɛ pɛɛ Mosis ŋɔ, “Leperaa ya dɔ nee dɛ́ nyɔɔ?” 25Ate, Mosis wi no Korowii asɛ o baɡlo daa bɛl. O kpɔ ta nee la ta nee la do som ba bwa nyɔ. Bela la, Korowii do Mmarare tɛɛ ba asɛ dɛ kpɔ daah ba na. 26Korowii bol ba be ŋɔ, “Dɛ hɛɛ cheɡ deŋnee dɛɛ no men Korowii haa dɛ tom mɛ nɔ dɛɛ ɛ anɔ la aa toɡra n be, dɛ́ swɛɛ siwi dɛɛ teŋɛ me Mmarare bwa ta ɡɛ naa, ate maa weela maa kpɔa ba ta Ijipt tena nɛɛ la bɛlbwaa kpɔ ba he nɛ. Menee Korowii maa dɛ chah heya weela.”
27Ba berɔ ba tel Elim. Buli fi dɛ anɛ dɛ bambie daa fifraanuanɛ lɔ bela, asɛ ba baŋre ba tɛnte deene nee la jwɛɛh bela.
Àwon tá yàn lọ́wọ́lọ́wọ́ báyìí:
Kaala 15: mzw
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.