प्रस्थान 39
39
पूजाहारीहरूको पोशाक
1पूजाहारीहरूले पवित्रस्थानमा सेवा गर्दा लाउने सुन्दर र उत्तम वस्त्रहरू तिनीहरूले नीलो, बैजनी र रातो रङ्गका ऊनले बनाए। परमप्रभुले मोशालाई आज्ञा गर्नुभएअनुसार तिनीहरूले हारूनको लागि पूजाहारीका पोशाकहरू बनाए।
2मिहिन सुती कपडा, नीलो, बैजनी र रातो रङका ऊन र सुनको धागोले तिनीहरूले एपोद बनाए। 3तिनीहरूले सुन पिटेर बनाए र काटेर पातला स-साना तारहरू बनाए र मिहिन सुती कपडामा र नीलो, बैजनी र रातो ऊनमा जडी लगाए। 4तिनीहरूले एपोदको निम्ति दुईवटा काँधेपेटी बनाए र एपोद बाँध्नलाई त्यसका छेउमा लाइदिए। 5परमप्रभुले मोशालाई आज्ञा गर्नुभएअनुसार ती सामग्रीले नै राम्ररी बुनेको एउटा पटुका एपोदसित एउटै टुक्रा गरी लगाए। 6तिनीहरूले आनिक्स पत्थर लिए र सुनको घरमा जडिदिए। ती पत्थरहरूमा इस्राएलका बाह्र छोराहरूका नाम सिपालु तरिकाले खोपे। 7परमप्रभुले मोशालाई आज्ञा गर्नुभएअनुसार नै ती पत्थरहरू तिनीहरूले एपोदका काँधेपेटीमा इस्राएलका बाह्र कुल बुझाउन लाइदिए।
छाती-पाता बन्दछ
(प्रस्थान २८:१५-३०)
8एपोदकै जस्तो र त्यसरी नै फूलबुट्टा भरेका सामग्रीले तिनीहरूले छातीपाता बनाए। 9त्यो बराबर लम्बाइ र चौडाइ भएको चारकुने बीचमा पट्ट्याइएको अनि २२ सेन्टिमिटर लामो र उति नै चौडा भएको थियो। 10त्यसमा तिनीहरूले चार लहर दामी पत्थरहरू लगाए। पहिलो लहरमा मानिक, पुष्पराज र बेरूज लाए। 11दोस्रो लहरमा फिरोजा, नीर र पन्ना, 12तेस्रो लहरमा लालमणि, हाकिक र कटेला 13र चौथो लहरमा पीतमणि, आनिक्स र बिल्लौर मणि लाए। यी सबै मणिहरू सुनका घरमा जडिएका थिए। 14ती बाह्र पत्थरहरूमा इस्राएलका कुल बुझाउन एक-एक वटा गरी याकूबका बाह्र छोराहरूका नाम खोपिएका थिए। 15छाती-पाताको लागि तिनीहरूले डोरीजस्ता बाटेका निखुर सुनका सिक्रीहरू बनाए। 16तिनीहरूले सुनका दुईवटा घर र दुई मुन्द्रीहरू बनाए र मुन्द्रीहरू छाती-पाताका माथिल्ला दुई कुनामा जोडे। 17सुनका दुईवटा डोरीहरू दुई मुन्द्रीमा जोडे। 18अनि डोरीका दुई छेउ दुई घरसँग जोडे र यस प्रकारले एपोदको काँधे-पेटीको अगाडिपट्टि तिनलाई जोडे। 19त्यसपछि तिनीहरूले दुईवटा सुनका कुण्डल बनाए र छाती-पाताका भित्री किनारमा मुनिका दुई कुनासित एपोदको छेउमा जोडे। 20अरू दुईवटा सुनका मुन्द्रीहरू बनाएर तिनीहरूले एपोदको दुईवटा राम्ररी बुनेको पटुका मास्तिर सिउनीका छेउमा काँधेपेटीको सामुन्नेपट्टि मुनिको भागसित जोडे। 21परमप्रभुले मोशालाई भन्नुभएअनुसार नै नीलो धागोले छाती-पाताका मुन्द्रीलाई एपोदको मुन्द्रीसित बाँधे र त्यसरी छाती-पाता पटुका मास्तिर खुकुलो नहुने भयो।
पूजाहारीका अन्य वस्त्रहरू
(प्रस्थान २८:३१-४३)
22एपोदमा लाउने लबेदा सम्पूर्ण नीलो ऊनी कपडाको बनाए। 23त्यसमा टाउको छिराउने प्वालको मुख बलियो गराउन रिङ्गै बुनेको घेरा लाए। 24-26त्यसको तल्लो फेरोमा परमप्रभुले मोशालाई भन्नुभएअनुसार रिङ्गै नीलो, बैजनी र रातो ऊनले अनार बनाएर फूल-बुट्टा भरे र बीच-बीचमा निखुर सुनका घण्टीहरू झुन्ड्याए।
27तिनीहरूले हारून र तिनका छोराहरूको निम्ति मिहिन सुती कपडाका अलखा, 28फेटा, टोपीहरू, सुतीका भित्री लुगा र 29पटुकाचाहिँ सुती कपडा र नीलो, बैजनी र रातो ऊनको बुट्टादार बनाए, ती सबै परमप्रभुले मोशालाई दिनुभएको आज्ञाअनुसार बनाए। 30अर्पणको पवित्र चिन्हको लागि गहना निखुर सुनको बनाए र त्यसमा ‘परमप्रभुलाई अर्पण गरिएको’ भनी खोपे। 31परमप्रभुले मोशालाई आज्ञा गर्नुभएअनुसार त्यसलाई फेटाको अघिल्तिर नीलो डोरीले बाँधे।
पवित्र पालको समाप्ति
(प्रस्थान ३५:१०-१९)
32अन्तमा, परमप्रभुको पवित्र पाल बनाउने काम पूरा भयो। परमप्रभुले मोशालाई आज्ञा गर्नुभएअनुसार नै इस्राएलीहरूले सबै थोक बनाए। 33तिनीहरूले मोशाकहाँ पवित्र पाल र त्यसका सारा सर-सामान, त्यसका अङ्कुसेहरू, फल्याक र तेर्सा बारहरू, खम्बा र तिनका आसनहरू, 34रातो रङगले रङ्गाएका भेडाका छालाको अनि असल छालाका छोप्ने पर्दाहरू, ती छेल्ने पर्दा, 35ढुङ्गाका पाटीहरू राखिएका करारको सन्दुक, त्यसका बोक्ने डन्डाहरू र प्रायश्चितको ढकना, 36टेबिल र त्यसका सर-सामान र परमेश्वरलाई भेटी चढाएको रोटी, 37निखुर सुनको सामदान, त्यसका पानस र सर-सामानहरू, पानसका लागि तेल, 38सुनको वेदी, अभिषेक गर्ने तेल, मीठो बास्ना भएको धूप, पवित्र पालको ढोकाको पर्दा, 39काँसाको वेदी र जाली, त्यसका बोक्ने डन्डाहरू र सारा सर-सामान, हात धुने बाटा र त्यसको आसन, 40बाहिरी घेराका पर्दा, खम्बा र आसनहरू फल्याकका ढोकाका पर्दा र डोरीहरू, पवित्र पालको किला र त्यहाँ चलाइने सारा सर-सामान 41र पवित्रस्थानमा पूजाहारीहरूले लाउने सुन्दर र उत्तम वस्त्रहरू, पूजाहारी हारून र तिनका छोराहरूले लाउने पवित्र पोशाकहरू ल्याए। 42परमप्रभुले मोशालाई आज्ञा गर्नुभएअनुसार इस्राएलीहरूले सारा काम गरेका थिए। 43मोशाले सबै थोकको जाँच गरे र सबै परमप्रभुको आज्ञाअनुसार बनाइएका देखे। यसकारण मोशाले तिनीहरूलाई आशीर्वाद दिए।
Àwon tá yàn lọ́wọ́lọ́wọ́ báyìí:
प्रस्थान 39: सरल नेपाली
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Simple Nepali Holy Bible © Nepal Bible Society, 2008.