मत्ती 28
28
सीयेब येशू सोम्बो क्यूत्दे
मर्कूस १६:१-११; लूका २४:१-१२; यूहन्ना २०:१-१८
1अराम टूङब दिनजे नेदेरे, नप्दे म्या सेरेरे तङ्रब मरियम मग्दलिनी मेस्ये सूजो मरियम तूर्स लेने रदे।
2सूङ्गू केन् गीली, मेस्ये परमप्रभुजे दूत त्या स्वर्गदे मो तल्रदे, मेस्ये रदेबे लूङ् केन् ल्वापीदेबे हम्ब फ्याने टूङ्दे। 3ङूजे त्वा बिजुलीप्र ओथ्याङ् तङ्दे, मेस्ये ङूजे कोला ल्याङ्प्र कर् ख्य। 4हम्बप्रे बेस्से सीन्त्रीयू स्य लूतूतू फ्रीक्दे, मेस्ये सीयेप्र क्यूत्दे।
5तर स्वर्ग दूतदे हम्ब मदीयूने यदे, “नमयू अम्फलाची, चेनेयलो नमयू क्रूसने खील् ठोक्दीदेबे पील्दे सेक्कब येशूने मैल्न ख्यङ् यदेबे ङैने था ख्यङ्। 6येशू येने त्वो, ङूदे यप्रने ङू सोम्बो क्यूत्देबे लङ्ग ख्यङ्। ख ङूने हीदेब ने ले। 7होरदे छीट्टो प्रदेबे ङूजे स्यूस्स्यायूने पो स्योप्प प्रभु सीइदेबे सोम्बो क्यूर ख्यङ्, मेस्ये ङू नमयूयली खूम् गालीलने प्रेन ख्यङ्, होने नमयूदे ङूने तङ्क्य। ले, ङैदे नमयूने येक ख्यङ्।”
8होर्दे थमयू फलीने सूगे-सूगे तूर्स गङ्दे छाट्टे ङूजे स्यूस्स्यायूने खबर स्य्वेने छ्योङ्गीदे।
9अचानक येशूदे थमयूने तूदेबे यदे, “शान्ति।” थमयू येशूट्याने गीलीदेबे ङूजे तोप् चुङ्देबे स्यूव पीन्दे। 10होर्दे येशूदे थमयूने यदे, “अम्फलाची, प्रदेबे ङैजे च्योन्यूने गालीलने प्र येमी, मेस्ये हैयाने थमयूदे ङैने तङ्क्य।”
सीन्त्रीयूजे खबर
11हम्ब मदीयू लम्ने प्रेनूब, कोइ-कोइ सीन्त्रीयू सहरने गीलीदेबे पूस्र्या केन्यूने होने क्यूरब घटनयूजे बारेने खबर चीत्दे। 12कन्छ्वाब पूस्र्या केन्यू धर्म गुरुयूप्रे रूप् क्यूत्दे, थमयूदे मोतो चीत्दे, मेस्ये सीन्त्री टूङ्ब सिपाईयूने येरे यदेबे कूम नोर् पीन्दे, 13“नमयूदे य, ‘ङी मून्दे ङ्यूम्म्य गीले बीलने येशूजे स्यूस्स्यायू रदेबे ङूजे ङ्व खूको।’ 14कादेये अम्ब खबर हाकिमजे नने फ्योबदेयलो, ङीदे हाकिमप्रे पो मील्लीदेबे नमयूने जूक्तीमीय।” 15होर्दे थमयूदे हम्ब नोर् तादे, मेस्ये केरे लोम्मे ख्य होरेने चीत्दे, मेस्ये यहूदीयूजे अन्द्रने दीनीसेमेने अम्ब पो ड्वाङ्गे क्यून्न ख्यङ्।
आखिरीजे आज्ञा
16 #
मत्ती 26:32; मर्कूस 14:28 हम्ब एघार जना स्यूस्स्यायू गालीलजे हम्ब गङ्ने गीलीदे, हैयाने येशूदे थमयूने प्र यदेबे आज्ञा चीते ख्य। 17थमयूदे येशूने तङ्देबे स्यूव पीन्दे, तर कोइदे शङ्का चीत्दे। 18होर्दे येशू थमयू ट्याने रदेबे यदे, “स्वर्ग प्रे पृथ्वीजे साप्ता हक ङैने पीने ख्यङ्। 19#मूल स्यूस्स्यायूजे कामजे किताब 1:8येरेक्यूत्देबे प्र, मेस्ये देश देशजे मीयूने स्यूस्स्या बन्दी, परमेश्वर, च मेस्ये पवित्र आत्माजे मीन्ने थमयूने बप्तिस्मा पीन्, 20ङैदे नमयूने आज्ञा चीतेब पोयू टक्कने थमयूने मन्देने लोम्मी। होर्दे ले, ङ येतार्ने, संसारजे आखिरीसेमेने नमयूप्रे क्यूक्क्य।”
Àwon tá yàn lọ́wọ́lọ́wọ́ báyìí:
मत्ती 28: सर् कबुल
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ghale New Testament © Nepal Bible Society, 2011.
