मत्ती 23
23
पन्डे मेस्ये फरिसीयूने धिक्कार
मर्कूस १२:३८-४०; लूका ११:३९-५२; २०:४५-४७
1होर्दे येशूदे मीहुल मेस्ये रङ्से स्यूस्स्यायूने यरे यदे: 2“पन्डेयू मेस्ये फरिसीयूदे मोशाजे नियम लोम्मेब हक प्रेख्यङ्। 3येरेक्यूत्देबे थमयूदे यब पो साप्ताने ची मेस्ये मन्दी, तर थमयूदे चेप्रब अन्चील्लाची, चेनेयलो थमयूदे लोम्मेब लोम्मीय, तर हम्ब लोम्मे प्र काम अन्ची। 4थमयूदे सोरो प्लेने अन्ख्वब मेस्ये लेब क्वी ख्यादेबे मीयूजे पेङैने पूत्देबे प्लेस्ये पीन्क्य। तर थमयू रङ्सेब हम्ब त्वो लङने ला टदेत्याये अन्छूइ।
5 #
मत्ती 6:1; व्यवस्था 6:8;
गन्ती 15:38
“तर थमयूदे रङ्सेजे साप्ता काम मीयूने तनने चीक्क्य। चेनेयलो धर्मशास्त्रजे पदयूने जन्तर केन् चीत्देबे रङ्सेजे त्वाने मेस्ये नरीने ख्याय, होरप्रने रङ्से कोलाजे झूम्कयू रेङ-रेङ चीत्देबे होक्क्य, 6भत्यार्यूने प्रब थमयू गेसेन् प्रेब नेने मेस्ये सभा-कीम्यूने प्रब मूख्यायू टूङब नेने टूङ् मैय। 7बजारयूने प्रब मीयूदे सोरो गेसेन् चीत्देबे नमस्कार चीस्स्य मेस्ये गुरु यदेबे कोस्य मन ख्यङ्।
8“तर नमयूने सूदेये ‘गुरुज्यू’ अन्-यस्य, चेनेयलो नमयूजे गुरु तीत्यात्या ख्यङ्, मेस्ये नमयूब क्वाने अत-च्योन्यू ख्यङ्। 9नमयूदे पृथ्वीने ख्यङ्ब सूमीनेये रङ्से प अन्-यलाची, चेनेयलो स्वर्गने ख्यब परमेश्वर त्यामे नमयूजे प ख्यङ्। 10नमयूने सूदेये ‘गुरु’ अन्-यस्य, चेनेयलो ख्रीष्ट त्यामे नमयूजे गुरु ख्यङ्। 11#मत्ती 20:26,27; मर्कूस 9:35; 10:43,44; लूका 22:26नमयूनङ्ने सू पात्ता मी केन् ख्यङ्, हम्ब नमयूजे सेवा चेब क्यूक्क्य। 12#लूका 14:11; 18:14सूदे रङ्सेने मी केन् यीय, ङू चीद क्यूस्ये पीन्क्य, मेस्ये सूदे रङ्सेने चीद चीक्क्य, ङूने पात्ता केन् मी चीम्मीय।
13“धिक्कार पन्डे मेस्ये फरिसीयू, नमयू, कप्टी ख्यङ्! चेनेयलो नमयूदे मी क्योबने यदेबे स्वर्ग राज्यजे ख्यो थाय। नमयू रङ्सेये अन्क्योब, क्योब मैब मीयूनेये क्योबस्ये अम्पीन्।
14[“धिक्कार पन्डे मेस्ये फरिसीयू, नमयू, कप्टी ख्यङ्! चेनेयलो नमयूदे प्ल्यङ् सीयेब मदीयूजे कीम् लेङ्गे ख्यङ्, मेस्ये मीयूने तनने रेङ-रेङ प्रार्थना चेख्यङ्। येरेक्यूत्देबे सूजो मीयूदे यली नमयूदे कूम सजाइ प्रेक्क्य।]#२३:१४ मीयूङ्जे कोइ कोइ ग्रीक पाण्डूलिपीयूने अम्ब पद अन्लीख्दीये ख्यङ्।
15“धिक्कार पन्डे मेस्ये फरिसीयू, नमयू, कप्टी ख्यङ्! चेनेयलो नमयूदे सूजो मीयूने रङ्से धर्मने रेने संसारभरी ट्वाय मेस्ये कोइने रङ्से धर्मने रेत्देयलो ङूने रङ्सेयली दोब्बर नरकने प्रब लायकजे बन्दीय।
16“धिक्कार म्या अन्तङब नम अगुवायू, कोइदे यीय, मन्दिरजे मीन्ने कसम चदेयलो चैत्याये अन्क्यूर्, तर मन्दिरने ख्यब मर्जे कसम चदेयलो हम्ब कसमदे ख्यागीय।’ 17मूर्ख मेस्ये म्या अन्तङबयू, कम्ब केन् ख्यङ्? मर् यी मर्ने चोखो चेब मन्दिर? 18‘कोइदे चाक्याजे कसम चलीने चैत्याये अन्क्यूर्, तर हम्ब फ्याने हीतेब भेटीजे कसम चदेयलो कसमदे ख्यागीय।’ 19ओ म्या अन्तङबयू, कम्ब केन् ख्यङ्? भेटी यी भेटीने पवित्र चेब चाक्या? 20येरेक्यूत्देबे चाक्या छूत्देबे कसम चबदे चाक्या मेस्ये हम्ब फ्याने चर्दीयेब साप्ताजेने कसम चीय।
21मन्दिरजे कसम चब मीदे मन्दिर मेस्ये हम्ब नङ्ने बास टूङ्बजेये कसम चीय। 22#यशैया 66:1; मत्ती 5:34स्वर्गजे कसम चब मीदे परमेश्वरजे सिंहासनजे मेस्ये हम्बफ्याने पात्ता केन् क्यूत्देबे टूङब परमेश्वरजेये कसम चीय।
23 #
लेवी 27:30
“धिक्कार पन्डे मेस्ये फरिसीयू, नमयू, कप्टी ख्यङ्! चेनेयलो नमयू पतेन, सूँप मेस्ये जीरजे उब्जनी क्यूरब सेजे भा च्यूने भा त्या चर्दीय, तर मोशाजे नियमजे मूख्या आज्ञायू, या न्याय, दया प्रे विश्वासने ह्यल चे ख्यङ्। नमयूदे हम्ब भा च्यूजे भा त्या पीन पर्दे ख्य, मोशाजे नियमजे मूख्या आज्ञायूनेये ह्यल चे अन्क्यूर ख्य। 24नमयू म्या अन्तङब अगुवायू ख्यङ्, चेनेयलो नमयूदे भुसुनब सेल्क्य, तर ऊँटने यलो योप्पीय।
25“धिक्कार पन्डे मेस्ये फरिसीयू नम कप्टी ख्यङ्! नमयूदे पील मेस्ये थल्जे फीदे यप्क्य, तर नङ्नेयलो स्वार्थ मेस्ये लोभ चीत्दे लूर्दीरेब थोकयूदे फ्याला चे ख्यङ्। 26म्या अन्तङब फरिसीयू, खूम् पील मेस्ये थल्जे नङ्दे यप्, मेस्ये हम्बजे फीदेये खम्सङ् क्यूस्स्य।
27 #
मूल स्यूस्स्यायूजे कामजे किताब 23:3
“धिक्कार, पन्डे मेस्ये फरिसीयू, नमयू, कप्टी ख्यङ्! नमयूब स कर् छेलेब तूर्सयूप्र ख्यङ्, हम्ब तूर्स फीदे लेप्प ज्य तङ्क्य, तर नङ्दे यलो मूर्दा रम्केब नोङ्र्यायू प्रे अशुद्ध सेदे फ्यान ख्यङ्। 28होर्प्रने फीदे लेप्पयलो नमयू मीजे खूम्ने धर्मी चेब मीप्र तन्क्य, तर नङ्नेयलो अन्ज्य पाप काम चीन्न ख्यङ्।
29“धिक्कार, पन्डे मेस्ये फरिसीयू, नमयू, कप्टी ख्यङ्! नमयूदे अगमवक्तायूजे तूर्सयू बन्दीय, मेस्ये धर्मीयूजे तूर्सयूये सोरो ज्य बन्दीय, 30होर्दे नमयू यीय, ‘मीयूङ् ङीनजे मेमेयूदे अगमवक्तायू सेत्दे। तर ङीनये थमयूप्रे ख्ययलो ङीनदे होर काम चेने अन्तोङ ख्यङ्दे।’ 31येर्बे नमयू अगमवक्तायूने सेब मीयूजे छगूम्-पूर्गूम् ख्यङ् यब गवाही नमयू रङ्सेदेने पीन ख्यङ्। 32जेम्से नमयूजे मेमेयूदे सुरु चेब काम पूरा ची।
33 #
मत्ती 3:7; 12:34; लूका 3:7 “र्वेयू मेस्य बीस ख्यब र्वेजे च-चीमीयू! नमयू नरकजे मी-ओम्ददे केर्बे प्लीम्ब प्रेक्क्य? 34येरेक्यूत्देबे ङ नमयू ट्याने अगमवक्तायू, बुद्धिमानी मीयू मेस्ये पन्डेयू कूल्बीय। थमयू नङ्ने कोइ मीयूने नमयूदे सेक्कीय मेस्ये क्रूसने खील् ठोक्दीदे पील्क्य, मेस्ये कोइ मीयूने रङ्सेजे सभा-कीम्यूने कोर्रा लैदीय, मेस्ये सहर त्यादे सूजो सहरने ताल्पीय। 35#उत्पत्ति 4:8; 2 इतिहास 24:20,21येरेक्यूत्देबे धर्मी मीयूजे का पृथ्वीने बग्दीदे- दोष त्वब हाबिलजे कादेमेस्ये, बेरेक्याहजे च जकरियाजे का सेमे, नमयूदे पवित्र ने मेस्ये चाक्याजे अन्द्रने सेत्दे, हम्बजे दोषये नमयूजे टनेने पर्दीय। 36तम्दम्ने ङ नमयूने यीय, अम्ब टक्कजे दोष अम्ब पुस्ताजे टने पर्दीय।
37“यरूशलेम, ओ यरूशलेम, नदे अगमवक्तायूने सेक्य मेस्ये परमेश्वरदे कूल्बेब मीयूने लूङ्दे ठरीय! केर्बे कमदे रङ्से काच्यूयूने येन्नङ्ने रूप् पूक्य, होरप्रने ङैदे कूम खेप् नैजे बल्खयूने रूप् प्वेब सेम् चीत्दे, तर नदे अन्ङ्यीन्। 38#यर्मिया 22:5ले, नैजे कीम् क्यापीय, मेस्ये खङ्गर् क्यूप्पीय। 39#भजनसंग्रह 118:26चेनेयलो ङ नमयूने यीय, ‘पात्ता केन् परमेश्वरजे मीन्ने रब मीयू असी प्रेब क्यूक्क्य’ अन्-यदासेमे नमयूदे ङैने तङ्स्ये त्वो।”
Àwon tá yàn lọ́wọ́lọ́wọ́ báyìí:
मत्ती 23: सर् कबुल
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ghale New Testament © Nepal Bible Society, 2011.
