Hechos 1
1
Tachi Akꞌõrepa jarada ichi Jaure pëiitꞌee
1Teófilo, naapɨara kꞌartꞌa pꞌãdade pɨmaa mɨa pꞌãji Jesupa ne–inaa ooda mãikꞌaapa jarateeda ɨtꞌaa wãrumaa. 2Wãi naaweda, Akꞌõre Jaure kꞌapꞌɨa pari jaraji ichia jɨrɨtꞌeradaarãmaa kꞌãata oopataadaitꞌee. 3Piuda tꞌẽepai chi kꞌõpꞌãyoorãmaa cheji mãikꞌaapa unupiji wãara ichi chokꞌai bɨ. Kꞌãima cuarenta wãyaaru misa, ichi kꞌapꞌɨa unupipachi mãikꞌaapa jarateepachi Tachi Akꞌõrepa oopi kꞌinia bɨ ichide ijãapataarãmaa.
4Ewari aba chi kꞌõpꞌãyoorã ome bakꞌãri, mãgaji:
—Wãnaadapáde aji, Jerusalendeepa awara ãyaa. Nɨdapáde aji, mɨ Akꞌõrepa jarada oorumaa, mɨa parãmaa jaradakꞌa ooitꞌee perã. 5Juan Bautistapa#1.5 Griego pedeede Bautista jara kꞌinia bɨ: chi eperãarã poro choopari. poro choopachi paniapa. Mamĩda taarã–e Tachi Akꞌõrepa ichi Jaure ba chepiitꞌee parã kꞌapꞌɨade.
Jesús ɨtꞌaa wãda
6Ma tꞌẽepai Olivo Eede pꞌanadakꞌãri, Jesús kꞌõpꞌãyoorãpa iidijida:
—Tachi Waibɨa, ¿ɨ̃raweda Israel pidaarã pꞌuuru waibɨa papiitꞌeekꞌã ajida, aɨ naawedapemakꞌa, chĩara jua ekꞌari pꞌanada–ee?
7Irua pꞌanauji:
—Parãpa kꞌawadaikꞌaraa bɨda aji, sãapai Tachi Akꞌõrepa ne–inaa ooitꞌee, parã–itꞌee–e perã. Irua aupaita mãgee netꞌaa kꞌawa bɨ. 8Mamĩda Tachi Akꞌõre Jaure parã ome ba chekꞌãri, ichia kꞌaripaitꞌee nejõmaata oodamerã Akꞌõrepa oopi kꞌinia bɨkꞌa. Kꞌawapiitꞌeeda aji, jõmaweda mɨa ooda eperãarã kꞌaripaitꞌee, parãpa jarateenadamerã Jerusalén pꞌuurude, Judea eujãde, Samaria eujãde, awaraa eujã tꞌɨmɨ́ beede paara.
9Mãga jarapꞌeda, Tachi Akꞌõrepa iru ɨtꞌaa ateeji. Ãchia akꞌɨ jõnɨde jɨ̃ararade tꞌĩudachi mãikꞌaapa waa unuda–e paji.
10Mãgá ɨtꞌaa akꞌɨ jõnɨ misa, angeleerã omé ãchi ikꞌaawa bainɨ̃ pꞌana chejida. Pꞌaru tꞌo–tꞌoo jɨ̃ pꞌanajida. 11Mãɨrãpa mãgajida:
—Galilea pidaarã, ¿sãapꞌeda ɨtꞌaa akꞌɨ jõnɨma? ajida. Jãgɨ́ Jesús parã ome bada mãikꞌaapa ɨtꞌaa wãda waya cheitꞌeeda ajida, parãpa iru ɨtꞌaa wãru unudapꞌedaakꞌa.
Matías jɨrɨtꞌeradapꞌedaa Judas Iscariote pari
12Maapꞌeda Olivo Eedeepa Jesús ome nipapatapꞌedaarã waya chejida Jerusalendee. Ɨ̃ipata ewate paji mãikꞌaapa ãchi ũraade jara bɨ ma ewate tꞌɨmɨ́ wãdaikꞌaraa bɨ. Mamĩda tꞌɨmɨa–e bada perã, chejida. 13Pꞌuurude panadakꞌãri, wãjida ãchi pꞌanapatapꞌedaamaa ɨtꞌɨpema pisode. Ma chedapꞌedaarã paji Pedro, Juan, Santiago, Andrés, Felipe, Tomás, Bartolomé, Mateo, Alfeo warra Santiago, Simón Celote apatapꞌedaa mãikꞌaapa Santiago warra Judas. 14Mama ãchi ɨtꞌaa tꞌɨ̃pachida Jesús ɨ̃pemaarã ome mãikꞌaapa Jesús nawe María ome, ichiaba awaraa wẽraarã ome.
15Ewari aba Jesucristode ijãapataarã ciento veinte see nɨ̃bɨde Pedro bainɨ̃ beeji mãikꞌaapa mãgaji:
16—Ɨ̃pemaarã Cristo kꞌaurepa, chonaarãweda Akꞌõre Jaurepa jarajida aji, Rey David itꞌaideepa eperã abaapa Jesús peepiitꞌee. Mãga jara bɨ Tachi Akꞌõre Ũraa pꞌãdade. Ɨ̃rá Davidpa jaradakꞌa uchiaji Judas ome. 17Judas tachi kꞌõpꞌãyo paji mãikꞌaapa tachi ome aukꞌa mimiapachi. 18Mamĩda kꞌachia ooda pari pꞌaratꞌa pꞌaadapꞌedaapa irua eujã neto ataji. Mama iru baaidachi mãikꞌaapa chi jɨ̃si chedachi. 19Jerusalende pꞌanapatapꞌedaarãpa iru piuda kꞌawaadakꞌãri, ma eujã tꞌɨ̃ bɨjida Hacéldama, ãchi pedeede jara kꞌinia bɨ “Waa Eujã”. 20Mãga pꞌasada perã Judas ome, awaraa jɨrɨdaipia bɨ iru mimia oomerã. Mãga oodaipia bɨ Tachi Akꞌõre Ũraa pꞌãdadepema Salmode jara bairã:
‘Pɨ tede apida pꞌanada–e. Mapa ichita te tuma baitꞌee.’ (Salmos 69.25)
mãikꞌaapa awara ãi ichiaba jara bairã:
‘Awaraapa pɨ mimia ataitꞌee.’ (Salmos 109.8)
21ʼNama pꞌanɨda aji, eperãarã tachi ome nipapatapꞌedaarã, Jesús tachi ome niparu weda. 22Juan Bautistapa iru poro choodakꞌãriipa ɨtꞌaa wãrumaa mãgá nipapachida. Judas pari ãchidepema jɨrɨdaipia bɨ aba tachi ome aukꞌa Jesús unuda chokꞌai pꞌirabaipꞌeda.
23Mãpai madepema omé jɨrɨjida aba jɨrɨtꞌeradaitꞌee. Aba paji José. Mãgɨ́ ichiaba tꞌɨ̃jarapachida Barsabás, maa–e pɨrã Justo. Chi apema tꞌɨ̃jarapachida Matías. 24Ma omé jɨrɨdapꞌeda, ɨtꞌaa tꞌɨ̃jida:
—Tachi Waibɨa, pɨa jõmaarã tꞌãri kꞌawa bɨda ajida. Maperã kꞌawapíji na omeedepema kꞌaita pɨa kꞌinia bɨ. 25Mãgɨpa pɨ ũraa jarateenaitꞌeeda aji, Judas pari, irua kꞌachia ooda kꞌaurepa ichi wãitꞌee padamaa wãda perã.
26Mãga ɨtꞌaa tꞌɨ̃dapꞌeda, suerte jemenejida jɨrɨtꞌeradaitꞌee. Mãpai Matiata uchiaji. Ma ewate weda apemaarã once Cristopa jɨrɨtꞌeradaarã ome mimiamaa beeji.
Àwon tá yàn lọ́wọ́lọ́wọ́ báyìí:
Hechos 1: sjaB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©2005, 2010, 2015 Wycliffe Bible Translators, Inc. All rights reserved.