Àwọn Ẹsẹ Bíbélì Tí Ọ̀pọ̀ Èèyàn Mọ ရှာန်လုကာ 3

Pín

ယောဟန်ကား ထောင်အအက်ကျီ ဟိန်ပါ့ဒီဘင်း သမီဆာကလောင်းတုံန်းတေ ဝဲငွတ်ပင်းမာန်းဂလာတေအွန်အီရီမှာ။ ကိုယ်တော်ယေရှုရီးဒါး ယောဟန်ဘေ ဝဲငွတ်ပင်းမာန်းဂလာအွန်ဘန်း ဆုစိန်နင်းမှါခ့်ခါ ဟမုခ်တုံန်းကား ပွါမ်းသလာန်ဘဲမှာ။ စီးမှါခ့်ခါ ဉာဏ်အလင်းတော်ကား အဟူးတူအသွာန်ယောက် ကိုယ်တော်စောက်ပေ ပီးအက်နီဘန်း ရွှေမြို့တော်ဘင်း ဘုရားရှာန်ကား “နာန်ကား ငါအကြီးကျယ်မစ်ထှာဘင်း ငါဆာထှာမှာ။ ငါကား နာန်တေအကြီးကျယ်မစ်မှာ” ညယ် ဆကလားပူရီမှာ။

အမှာတွာတ် ယောဟန်ကား အန်တာတ်တေ “ငါကား သမီဆတာတ်တေ ဝဲယောက်၌ဆာ ဝဲငွတ်ပင်းမာန်းဂလာဒေ အွန်အီလား။ အန်နိမ်စါန်းငှေါဒီ ငါထာတ်ကြီးမြတ်သဘင်း ဆိတ်ဟော်ဝါ ဒီနင်းဘန်းထှာမှာ။ အန်နိမ်စါန်းငှေါဒီ ငါကား ဟိန်ဟက်တဉ်းဆိုင်းတေ ဟပ်အီဒင်စဲ အထိုက်တန်သဝါး။ ဟိန်ကား ဟနိမ်တေ ဉာဏ်အလင်းတော်ယောက်ပါ ဝါမ်ယောက်ပါ ဝဲငွတ်ပင်းမာန်းဂလာဒေအီကူ။

ဟနိမ်ကား အမဲဘင်းအပြစ်တေဒေ တက်ပါမ်ငှေါဘင်းသက်သေဒေ ကာဒင် စာနူစားနာအွန်ကြီး။ ဟနိမ်ကောက်ဟနိမ်ကာ အာဗြဟံဘင်းမျိုးဆက်တေထှာမှာညယ် အငှေါနင်းကြီးဆာ။ ဟမာန်တွာတ်ငှေါဘန်းတာတ်ငှေါ ဟနိမ်တေ ငါငှေါကူ ဘုရားရှာန်ကား အဘင်းလုံးကရှီတေဒေ အာဗြဟံဘင်း မျိုးဆာတ်ထှာကွန်း ဖန်ဆင်းသရန်နာ။

အရာတ် ကလွုန်တေဒေ တကလပ်ဟက် ဟစ်ပေါ်ကူညယ် ရထူးဟော်ဝါကား အဆာန်တာန့်ထှာနင်းဘန်း။ အမှာတွာတ် ရှရှီမလဲအရှီဟာဘင်း ကလွုန်တေဒေ ဟစ်ပေါ်ဘန်း ဝါမ်စူလားခံသထှာကူ” ညယ် ငှေါမှာ။

ပရောဖက်ဟေရှာယကျမ်းဘေ ရေးသပဲဘင်းနာကား “သမီဆာထုတ်လားစစ်ပင်းအရပ်ပေ သမီဆာဟော်ဝါ ဟာတ်ပန်းနင်းဘင်းကား ‘အရှာန်ကြွဒီကူဘင်းလမ်းတေ ပြာန်ဆာန်သကြီး။ အရှာန်ဘင်းလမ်းတေ ရာန်းကွန်းအွန်ကြီး။ ကယာချိုင့်ခွာပ်တေဒေ ကာဖို့သဘန်း ကယာတုံန်း ကယာရှာတေဒေ ညှိသကြီး။ လမ်းကြိပ်ပင်းနာတေဒေ ရာန်းစိန်းယုတ်ပန်း၊ အမဲဘင်းလမ်းတေဒေ မဲကွန်းအွန်ဘန်းပဲကြီး။ စီးမှါခ့်ခါ သမီဆာကလောင်းတုံန်းတာတ်ကား ဘုရားရှာန်ဟက် ကယ်တာန်သဘင်းတေ ကတုံန်ကြီးကူ’” ညယ် ထှာမှာ။