Àwọn Ẹsẹ Bíbélì Tí Ọ̀pọ̀ Èèyàn Mọ Римын оліссезлӧ 1

Pín

Меным абу рожа кулян висьтасьны Кристосыс йылісь Бур Юӧрсӧ. Бур Юӧрыс эд Енлӧн вын, мездӧ быд веритісь мортсӧ: медодз иудейесӧ, сэсся ─ быд кыв вылын баитісь отирсӧ.

Бур Юӧрыс мыччалӧ, кыдз Еныс керӧ мортсӧ веськыта олісьӧн веритӧмыс понда да веритӧмыс пыр. Вежа Гижӧтас тай шуӧм: «Веськыта олісьыс веритӧмнас пондас овны».

Отирыслӧ Еныслӧн бырсьывлытӧм выныс мыччалӧм мусӧ керӧмсянь ни. Сія тыдалӧ быдӧс аркмӧтӧмын. Отирыслӧ оссьӧ тыдавтӧмыс: Аркмӧтісьыс и эм былись Еныс. Сідзкӧ, отирыс асьнысӧ озӧ вермӧ дорйыны Еныс одзын.

Нія Енсӧ тӧдікӧ эзӧ ошкӧ Сійӧ кыдз Енӧс, эзӧ буркывтӧ Сійӧ, асланыс юрӧ пыртісӧ, кӧдӧ оз ков. Сійӧн дзугсис-ӧшис нылӧн вежӧрныс.

Еныслісь быльсӧ нія вежисӧ бӧбӧтчӧм вылӧ. Нія копрасисӧ да уджалісӧ аркмӧтӧмыслӧ. Эзӧ копрасьӧ Аркмӧтісьыслӧ, Кӧдӧ колӧ ошкыны пырся-пыр! Аминь.

Отирыс бӧбӧтчӧмнаныс Еныслісь быльсӧ пӧдтӧны. Сійӧн Еныслӧн лӧгыс енӧжсянь оссьӧ быд умӧль керӧмлӧ да бӧбӧтчӧмлӧ.

Сійӧн Еныс колис нійӧ сьӧлӧмныс ӧзйӧтчӧм сьӧрті рожа кулянсӧ керны. Нылӧн инькаэзныс гозъя коласын лӧсьӧтӧм олансӧ вежисӧ. Керӧны ковтӧмсӧ ─ ӧтамӧдкӧт узьлӧны. Сідз и ай отир озӧ олӧ колана моз инькаэзныскӧт. Нія ӧтамӧдныс вылӧ асьнысӧ ӧзйӧтӧны. Ай морт ай морткӧт узьлӧ. Ылалӧмныс кузя сэрпсӧ керӧны. Сійӧн сэрпсӧ керӧмныс понда ассяняныс умӧльсӧ босьтӧны. Нія эзӧ тӧждісьӧ видзны Енсӧ юраныс. Сійӧн Еныс колис нійӧ керны ковтӧмсӧ тшыксьӧм вежӧрнаныс.

Ас йывсиныс нія шуисӧ, мийӧ пӧ мывкыдаӧсь. Асьныс тай вежӧрнысӧ ӧштісӧ. Пырся Енсӧ коліс ошкыны. Нія Сы туйӧ асьныс аслыныс керисӧ еннэсӧ: кулан морт да кай коддезӧ, нёль кокаэз да виклясись коддезӧ. Нылӧ пондісӧ копрасьны.