Àwọn Ẹsẹ Bíbélì Tí Ọ̀pọ̀ Èèyàn Mọ 1 Петра 4

Pín

Сьӧлӧмсянь радейтӧ ӧтамӧднытӧ. Радейтӧмыс эд медколана, сія уна умӧль керӧм вевттьӧ.

Отсалӧ ӧтамӧднытлӧ сія верман-кужан козинӧн, мый быдӧннытлӧ вӧлі сетӧм. Кыдз керкуын бур веськӧтліссез Енлісь быдпӧлӧс бурсетӧммесӧ видзӧ кужӧмӧн.

Кин баитӧ, ась баитӧ Енлӧн сетӧм кыввезӧн. Кин мый керӧ, ась керӧ Енсянь сетӧм вынӧн. Кристос Исус пыр быдӧсісь ась петӧ ошкӧмыс Енлӧ. Сылӧн эд югьялӧмыс да юралӧмыс пырся-пыр. Аминь.

Ковсяс кӧ тіянлӧ пессьыны-мырсьыны кыдз Кристос отирлӧ, то эдӧ гӧрдӧтӧ, а ошкӧ Енсӧ.

Чожа эстӧн быдӧс чулалас-ӧшас. Сідзкӧ, олӧ бур мывкыдӧн да садь юрӧн, медбы пыр вермит кеймыны.

Донаэзӧ, тійӧ сьӧкыта пессят-мырсят, кыдз би пырйӧт мунат. Сысянь ась диво тіянӧс оз кут. Сія сьӧкыта пессьӧм-мырсьӧмыс локтӧ тіянӧс тӧдмавны-видзӧтны. Тіян вылӧ усьӧ Кристосыслӧн пессьӧм-мырсьӧмыс, сысянь гажмӧ. Тійӧ эд ёна пондат гажӧтчыны, кӧр мыччисяс Сылӧн югьялӧмыс.

Ӧтамӧднытӧ кокнит сьӧлӧмӧн норасьтӧг рочалӧ горттэзаныт.

Енлӧ колӧм сьӧрті кӧ мортыс пессьӧ-мырсьӧ, сія ась сетӧ асьсӧ Сы киэзӧ да одзлань керӧ бурсӧ. Аркмӧтісьыс эд оз веж Ассис кывсӧ.

Кристосыс миян понда Аслас вывтырӧн уна пессис-мырсис. Сідзкӧ, и тійӧ лоӧ лӧсьӧтчӧмӧсь пессьыны-мырсьыны. Вывтырнас пессись-мырсись мортыс дугдӧ керны умӧльсӧ. Кольччӧм оланнытӧ овтӧн эдӧ ни керӧ вывтырныт ӧзйӧтчӧм сьӧрті. Олӧ сідз, кыдз Енлӧ колӧ.

Кристос ним понда тіянӧс видӧны кӧ, тійӧ шудаӧсь. Еныслӧн югьялан Лолыс эд тіянкӧт. Отирыс Сійӧ видӧны, а тійӧ Сійӧ ошкат.