Àwọn Ẹsẹ Bíbélì Tí Ọ̀pọ̀ Èèyàn Mọ Loos 1

Pín

Kuv yeej tsis txajmuag rau Txoj Moo Zoo, rauqhov Txoj Moo Zoo yog Vajtswv lub hwjchim uas cawm tau txhua tus uas ntseeg; cov Yudais yog cov uantej, tomqab ntawd yog Lwm Haivneeg.

Txoj Moo Zoo yog qhia txog qhov uas Vajtswv ua rau neeg muaj kev ncajncees: uas yog los ntawm txoj kev ntseeg thaum pib mus txog thaum xaus. Rawsli Vajtswv Txojlus tau hais tseg hais tias, “Tus neeg uas ncajncees los ntawm txoj kev ntseeg, tus ntawd yuav tau txojsia.”

Txij thaum Vajtswv tsim ntuj tsim teb los, txawm yog neeg qhovmuag tsis pom Vajtswv tus uas muaj hwjchim nyob mus ibtxhis thiab qhov uas Nws yog Vajtswv los yog lawv saib ibpuas tsavyam uas Nws tsim, lawv yeej paub tias muaj Vajtswv tiag. Yogli ntawd, lawv yuav hais tias lawv tsis paub Vajtswv yeej hais tsis tau li!

Lawv yeej paub Vajtswv, tiamsis lawv tsis kam hwm Nws hais tias Nws yog Vajtswv, lossis tsis kam ua Nws tsaug. Lawv tej kev xav ciali tsis muaj qabhau, thiab lawv lub hlwb uas khoob los ntawd ciali puvnpo kev tsausntuj lawm.

Lawv muab qhov tseeb uas hais txog Vajtswv pauv ua qhov cuav. Lawv pehawm thiab teev tej uas Vajtswv tsim, tiamsis ho tsis pehawm tus Vajtswv uas tsim txhua yam ntawd. Vajtswv thiaj yog tus tsimnyog sawvdaws qhuas mus tag ibtxhis! Amees.

Vajtswv ua Nws txoj kev npautaws tshwm saum ntuj los tawmtsam txhua yam kev txhaum thiab kev phem uas neeg ua, rauqhov lawv tej kev phem ntawd ua rau neeg tsis paub qhov tseeb lawm.

Twb yog vimli ntawd, Vajtswv thiaj cia lawv mus ua ntau yam rawsli lawv lub siab ntshaw uas raug kev txajmuag. Txawm yog tej pojniam los ib leeg ciali deev ib leeg, uas ibtxwm yeej tsis muaj li ntawd. Tej txivneej los ua ib yam nkaus li ntawd; rawsli ibtxwm pojniam thiab txivneej thiaj ua niamtxiv xwb, tiamsis tej txivneej ciali tso qhov ntawd tseg, thiab ib leeg ciali deev ib leeg uas yog ua tej yam txajmuag kawg li. Thaum kawg lawv thiaj tau txais Vajtswv txoj kev teemtxim uas tsimnyog li tej kev phem qias uas lawv tau ua ntawd. Twb yog vim lawv tsis kam lees paub qhov tseeb txog Vajtswv, Vajtswv thiaj tso lawv tseg, ua rau lawv lub hlwb thiaj xav txog tej kev phem kev qias xwb, yogli ntawd lawv thiaj mus ua tej uas tsis tsimnyog ua.

Lawv khav hais tias lawv yog neeg ntse, tiamsis lawv ruam kawg li; twb tsimnyog lawv pehawm Vajtswv tus uas muaj sia nyob mus ibtxhis, tiamsis lawv ho mus pe tej mlom uas neeg txua zooli tej neeg uas txawj tuag, zooli noog, zooli tsiaj, lossis zooli nab.