Àwọn Ẹsẹ Bíbélì Tí Ọ̀pọ̀ Èèyàn Mọ Rom 8

Pín

Ma dahat nunure bia God i la paapalim ta ira linge bakut wara hatahuatne nora bilai wara gaie diet ing diet sip God, diet at ing i te tatau leh diet haruat ma no uno lilik i te puo tar.

Ma i tale bia ni tange huo kanong iau nunure tun at bia taie tiga linge pa na tale bia na harbasiane dahat sukun no uno harmarsai. Iakan ra nilon ma no minaat mah dir pa na tale. Huo mah ta ira angelo bia ira dadas na sakana tanuo, ma ta ira linge kaiken ma ing mah namur ma ta ira mes na dadas na lualua mah. Taie tikai aram naliu bia kenas napu ma bia ta mangana linge sa mekaia tano hakhakisi bakut pa na tale bia na harbasiane dahat sukun no harmarsai gar ta God nong i tabar dahat mei tano udahat kinkinis narako ta Jisas Krais no udahat Watong.

Huo mah, no Halhaliana Tanuo i harahut dahat uta iakano linge nong dahat pai petlaar wara utana. Hokaiken, dahat pai nunure bia asa ing dahat na sasaring utana iesen no Tanuo i sasaring wara gaie dahat. Ing i sasaring i kilingane ra but na tinirih ma i hapuasne huo ing pai tale bia da hapupuo ma ra nianga.

Io, dahat na tange um hohe uta kaike? Ing bia God i tur wara gaie dahat, io, sige um i tale bia na tur wara hanghagahe dahat?

Io kaik um, God pa na kure hagahe diet ing diet narako ta Jisas Krais.

Ing bia no sakana palpal i lue no lilik gar ta tikai, na halamlam tar ie tano minaat. Iesen bia no Halhaliana Tanuo i lue no lilik gar ta tiga nong, na halamlam ie taar tano nilon ma nora malum.

Iesen pa na ngan huo. Ing kaike ra linge sa bia dahat kilingane, dahat manga lua sakit balik kanong dahat kis taar ta iakanong nong ga tar no uno harmarsai taar ta dahat.

Hokaiken, iau nes kilam bia ira udahat harangungut utano pakana bung kaiken i manga hansik sakit ing bia da hapupuo ie ma no minamar ing na hanuat puasa ta dahat.

Ma sige um i tale bia na harbasiane dahat sukun no harmarsai gar ta Krais? I tale bia nora purpuruan na gil huo, bia a harangunngutaan bia a hinelar bia a tamat na sam taburungan? Ing bia pata sigasigam bia ira hiniruo i hutaten dahat bia da kut bing dahat, i tale bia kaiken ra linge na harbasiane dahat huo?

Ma God nong i la siisilih ta ira linge narako ta ira kati dahat i nunure tar no lilik tano Tanuo kanong no Tanuo i la saasaring haruat ma no sinisip at ta God wara gaie dahat ira matanaiabar tus ta God.

Kanong warah, ing bia muat lon haruat ma no numuat sakana palpal, a tutun sakit, muat na maat. Iesen bia ing muat la gilgil bing ira gingilaan ta ira sakana palatamai muat ma no harharahut tano Halhaliana Tanuo, io, muat na lon kanong diet ing no Tanuo ta God i lue diet, a nati God diet.

Hokaiken, diet ing diet gil haruatne ira sinisip tano udahat sakana palpal, no sakana palpal i lue ira udiet lilik. Iesen diet ing diet gil haruatne ira sinisip tano Halhaliana Tanuo, no Tanuo i lue ira udiet lilik.

Nes! Pa ga hok tar no Natine tus. Taie. Ga tar sei bia na maat wara gaie dahat bakut. Aie nong i tar no Natine taar ta dahat huo, hohe, pa na tabar bia dahat ma ira linge bakut mah? A tutun sakit bia na gil huo!

Ma no Halhaliana Tanuo at i hinawas tutun taar ta ira tanua dahat bia dahat ira nati God. Ma bia dahat ira natine, io tutun mah bia dahat ira mahal na tunotuno ing na rumahal namur. Dahat ira mahal na tunotuno gar ta God ma dahat na rumahal tika ma Krais kanong dahat la kapkap tika mei ira uno harharangungut waing dahat naga laka tika mah mei tano minamarine.

Ma i ngan huo kanong warah, no tunotuno nong i sakena, no uno mangana lilik i manga malentakuane God. Tiga mangana tunotuno huo pai hanapui ta ira harkurai ta God. A tutun, pa na petlaar at bia na gil huo.

Ma iakan i palai kanong no hakhakisi bakut i kis kawase ma ra tamat na masmasingan utano pakana bung bia God na hapuasne ira natine.

Io, ma dahat nunure um bia no hakhakisi bakut i te kilkilingane ra but na tinirih tuk taar katin hoing tiga hatatnaan a bulu i papaas ie.