Sa’a: Tataroha Diana I Sulie Aalaha Ikie A Jisas Kraes New Testament

Tataroha Diana I Sulie Aalaha Ikie A Jisas Kraes

Oto loꞌu i purine leune, maholo ko karaꞌinie oto Houlaa Ni Liumwaanie, a Jisas na mo pwaarongoisuli ingeie kire aatoholo poꞌo wau aana Aasi I Kalili nge kire ko sasaie noꞌone aana Aasi a Taebirias Inemauri. A Jisas e hanetaa taꞌi lengine uuwo i leune, oto ko iiꞌo i aano huni haꞌa-uusulie mo pwaarongoisuli ingeie. Na mwala oto hunge kire lae mai noꞌone i sulie, aena aana kire leesie mo huꞌi-huꞌite e asuiꞌi aana e haꞌa-uurie mwala ko mweri.
Oto a Jisas e lio wau na ko leesie mwala hunge ko lae mai saana, ko si teꞌuri hunie a Pilip, “?﻿Kolu kei holi ngeulaa kaꞌu adona mwala ngeena i tei?” A Jisas e saie taane nga taa kei esuie, taꞌe e dolosi aana a Pilip urine mola uri huni oohongie hiiwalaimolinge ingeie.
A Pilip e aalamie na ko teꞌuri, “!﻿Haꞌike eena! Holitana nga mwane hunie walu waro-waro na e kaꞌa adona ike lokotaa paine ngeena kire kei oa mei ngeulaa nga iini.”
Oto ngaeta iini aana mo pwaarongoisuli, a Andru, aasine a Saemon Pita, e si teꞌuri hunie a Jisas, “Kele mwaꞌu i leune, e lime kele ho bred peꞌie nga ro kele ho iiꞌe ikire aana. ?﻿Taꞌe mo kele ngaulaa urine kei adona mwala hunge urine uri taa?”
Oto a Jisas ko teꞌuri hunie mo pwaarongoisuli, “Omu ke unue mwala ke iiꞌo i aano.” Leu ngeena hahalisi haliꞌite e aaluhie, na ahutana mwala ko meni iiꞌo oto i aano. Na ola mala e lime sinolai mwane ikire i leune. Oto a Jisas e hele aana mo ho bred ngeena, e paalahea God mango haahiꞌi, ko si nii-niiꞌi hunie mwala e iiꞌo i aano i leune. E heꞌi teꞌurine loꞌu aana mo ho iiꞌe, na kire mani ngeu ni pote i sulie saeda.
Maholo kire mani ngeu pote mango, a Jisas ko si teꞌuri hunie mo pwaarongoisuli ingeie, “Omu ke soꞌokonie mo ooretai ngeulaa mwaanie nga leu eeni e waetaꞌi.” Oto kire si soꞌokoni na kire ko haꞌahonue aawalai luꞌe mwana rue aana mo ooretai ngeulaa uure mwaanie e lime kele ho bred ngeena.
Oto maholo mwala kire leesie huꞌi-huꞌite a Jisas e asuie ngeena, kire ko si teꞌuri, “Saꞌa mola propet paine nge mo Uusu-uusu Maaꞌi e unue uri kei lae mai laona walumalau ni oto ienini.” A Jisas e lio saie mone uri mwala ngeena ko sare dau suꞌuie mola uri hunie ke neꞌi inemauri nada, oto e oopa mwaanire, na e hanetaa loꞌu mola taꞌau i lengine uuwo maraana.


Oto i seulehi aana hai dingena, mo pwaarongoisuli a Jisas kire siho loꞌu hao i oone i reune Aasi I Kalili. Kire hule i oone na ko rodo oto, taꞌe a Jisas e kaꞌa hule ike ue i saada. Oto kire si taꞌelie iiola, na kire ko aatoholo oto poꞌo mai aana Aasi I Kalili takoie i Kapaneam. Kire lae-lae ngeena kire ko suehie ooru peine na aasi ko mawa oto. Maholo kire hote haꞌatau oto mala e lime wa e oono kilomita mwaanie i oone, oto kire ko si leesie a Jisas ko taalau i kolune aasi na ko lae oto mai takoie iiola. Mo pwaarongoisuli kire leesie urine, kire ko si tohungei meꞌu oto hiitoꞌo. Taꞌe a Jisas e teꞌuri hunire, “Ineu taane mola ni ie. Mwaanie omu meꞌu-meꞌu.” Kire rongo urine, oto kire si mwaꞌe-mwaꞌe hunie ke taꞌe i laona iiola, na kire ko tolana aarapuu oto aana leu kire ko lae hunie.

Oto hai dinge loꞌu mola i sulie, pulitaa paine nge a Jisas e lae mwaanire aana aapa poꞌo hao aana Aasi I Kalili, kire ko hai-heitalea loꞌu a Jisas. Kire saie uri taꞌa-taꞌa iiola ni mola e oꞌoꞌo kaꞌu hai leune, na kire saie noꞌone uri mo pwaarongoisuli kire lae mola maraada aana iiola ngeena na a Jisas e kaꞌa lae ike peꞌire. Kire ko lio-lio ue hunie, na mo iiola uure aana huilume i Taebirias kire ko lae mai i oone karaꞌinie leu nge mwala e ngau bred aana i purine a Jisas e ere ni paalahenga. Oto maholo mwala hunge ngeena kire leesie uri a Jisas na mo pwaarongoisuli ingeie kire mani eiꞌaa mwaanie leune, kire si taꞌelie mo iiola nge kire si hule ngeena, kire ko lai heitalea a Jisas loꞌu hao i Kapaneam.
Oto maholo mwala ngeena e lai lio oodoie a Jisas hai Kapaneam, oto kire ko dolosi aana uuri, “?﻿Haꞌa-uusuli, o lae kaꞌu mei i leu maholo uri taa?”
Oto a Jisas ko aalamire uuri, “No ko unue oto huniꞌomu uri omu ko heitaleau mola aena aana omu ngeu ni pote aana mo ho bred, taꞌe kaꞌa ike aana uri omu lio saie neꞌisaenga aana mo tolimaa nou esuiꞌi. Omu ke suꞌuri esu mola talana mo ngeulaa nge kire sai eiꞌaa mola lau-leu, taꞌe omu ke asu aꞌailaꞌa talana mei ngeulaa nge e sai iiꞌo huu na kei niie maurihe huu huniꞌomu. Na mei ngeulaa ngeena, ineu a Kale Ni Iinoni mola nou sai niie huniꞌomu, aena aana a God Mamaꞌa e uusungeꞌinieu mei huni esuie urine peꞌie nanamanga paine ingeie.”
Oto mwalana ko si dolosi aana a Jisas uuri, “?﻿Nga mei taa kaꞌu melu kei esuie hunie uri melu ke si hele i sulie saena God?”
Oto a Jisas ko aalamire uuri, “Nga taa a God e saetoꞌo aana oto uri omu ke hiiwalaimoli mola aaku, aana e uusungeꞌinieu mei.”
Oto kire ko heꞌi dolosi loꞌu aana uuri, “?﻿Nga tolimaa uri taa ni o sai esuie hunie uri melu ke leesie na melu ke hiiwalaimoli eemu? Mo weuwaka oto i naꞌo maholo kire iiꞌo i laona hanuesala peꞌie a Mosis, kire ngau aana ngaulaa nge kire haaraꞌinie aana mana nge e teke mola uure i Lengi, oto mala uusulana e lae uuri, E nii ngeulaa ada uure i Lengi. ?﻿Oto iꞌoe, nga mei huꞌi-huꞌite uri taa ni o kei esuie?”
Oto a Jisas ko si teꞌuri hunire, “No ko unue oto toꞌohuu huniꞌomu uri a Mosis haꞌike ni e niie mei ngeulaa uure i Lengi amiu, taꞌe Aamaku ni e niie amiu. Na oto ie ingeie ni ko niie tohungei ngeulaa uure i Lengi huniꞌomu. Aana mei tohungei ngeulaa nge a God ko niie, ingeie oto iini e siho mai uure taꞌau i Lengi na ko niie maurihe hunie walumalau.”
Oto mwalana ko si teꞌuri hunie, “Poro paine, o ke niie mei ngeulaa ngeena ameelu tarau.”
A Jisas ko si unue hunire uuri, “Ineu oto ngaulaa ni meurihe. Iini ko lae mai neꞌi pwaarongoisuli ineu, e saꞌa heꞌi hiolo loꞌu, na iini ko hiiwalaimoli eeku, e saꞌa heꞌi maarou loꞌu. Taꞌe oto mala nou unue kaꞌu huniꞌomu oto i naꞌo, omu leesieu taane oto, taꞌe omu kaꞌa sare hiiwalaimoli ike. Taꞌena nga iini nge Aamaku e niie nakue kei lae oto mai seeku. Na taꞌena nga iini ko lae mai seeku, nou saꞌa roroꞌa toliꞌaasie ike loꞌu hunie ke lae mwaanieu. Aena aana nou siho mai uure i Lengi, kaꞌa ike hunie ne ke asuie mo ola i sulie saeku maraaku, taꞌe i sulie saena iini e uusungeꞌinieu mei. Na saena iini e uusungeꞌinieu mei uri ne ke suꞌuri deu tekelaꞌinie nga iini aana mo iini e niire nakue, taꞌe uri ne ke taꞌe aalihoꞌi aada hunie maurihe huu aana dinge ooreta. Aana nga taa Aamaku e saetoꞌo aana uri ahutana mo iini ko leesieu a Kale na kire ko hiiwalaimoli eeku, kire ke hele aana maurihe huu, aana ineu ne ke si taꞌe aalihoꞌi aada aana dinge ooreta.”
Oto mo naꞌohai mwane mo Jiu ko aehota papanguru-nguru oto hoorana Jisas aana e unue uuri, “Ineu oto ngaulaa e siho mai uure i Lengi.” Oto kire ko unue uuri, “A mwane ngeena, kalena Josep mola ni ngeena. Kolu saie kaꞌu mola aamana na nikana. ?﻿Oto aana e ue kaꞌu ko si unue uri e siho mai uure taꞌau i Lengi?”
A Jisas e aalamire oto ko teꞌuri, “Omu ke suꞌuri upwesieu urine haahie nga taa nou si unue ngeena. Nga taꞌa-taꞌa iini e saꞌa roroꞌa ni lae ike mai seeku na oto a Mamaꞌa nge e uusungeꞌinieu mei e kaꞌa waꞌinie hunie ke lae mai seeku. Taꞌe mo iini kire lae oto mai seeku, ineu ne ke si taꞌera loꞌu hunie maurihe huu aana dinge ooreta. Ngaeta propet e uusue i laona mo Uusu-uusu Maaꞌi uuri, A God kei haꞌa-uusulie taane ahutana iinoni. Oto ahutana mo iini ko rongo hunie walana Mamaꞌa na ko lulu i sulie, kire ke si lae mai seeku. Nga taꞌa-taꞌa iini e kaꞌa leesie ue a Mamaꞌa, taꞌe ineu haꞌalaa nou leesie a God aana nou uure oto mai aana a Mamaꞌa. No ko unue oto toꞌohuu huniꞌomu uri iini ko hiiwalaimoli eeku, nge e hele aana oto maurihe huu. Ineu oto ngaulaa nge ko niie maurihe. Mo aamamiu kire ngau-ngeu taane aana ngaulaa nge kire haaraꞌie aana mana, taꞌe kire saronai mae mola i laona hanuesala. Taꞌe mei ngeulaa nge e siho oto uure mai Lengi nge no ko ere-ere i sulie ienini e tohungei aaopa. Aana iini ko ngaue, e saꞌa heꞌi mae loꞌu. Ineu oto mei ngaulaa mauri nge e siho mai uure i Lengi. Na iini ko ngeu aana mei ngeulaa ienini kei meuri huu. Aana mei ngeulaa ne kei niie hunie, nge hasiꞌoku otona, aana no ko niie i tehulaꞌana walumalau hunie ke toꞌo aana maurihe.”
Oto mo Jiu kire ko tohungei saewasulie oto, na kire ko ere hailiu i matolada oto aani dolosinge uuri, “?﻿A mwane ie kei niie hasiꞌona akaelu uri taa eena?”
Oto a Jisas ko teꞌuri hunire, “No ko unue oto huniꞌomu uri mala omu kaꞌa ngaue hasiꞌona a Kale Ni Iinoni, na omu ke inuhie apune, omu saꞌa roroꞌa ni toꞌo aana ike maurihe i lalo aamiu. Na taꞌena nga iini nge ko ngeue hasiꞌoku na ko inuhie apuku, nge e toꞌo aana oto maurihe huu na ne kei taꞌea loꞌu aana dinge ooreta. Aana hasiꞌoku oto hahuꞌana mei ola ni ngaa, na apuku oto hahuꞌei mei ola ni inu. Iini ko ngeue hasiꞌoku na ko inuhie apuku, nge ko iiꞌo susu oto i lalo aaku na ineu ne kei iiꞌo susu oto i lalo aana. A Mamaꞌa, ingeie oto aahuꞌine maurihe, na ingeie oto e uusungeꞌinieu mei. Nou toꞌo aana maurihe aena aana Mamaꞌa, na urine loꞌu mo iini ko ngeue hasiꞌoku kire kei hele aana maurihe aena aana ineu no ko niie hunire. Aana tohungei ngeulaa e siho mai uure i Lengi ni oto ngeena. E kaꞌa urihana ike ngaulaa nge mo aamamiu kire ngau-ngeue kaꞌu, taꞌe kire saro mae mola. Iini ko ngeue mei tohungei ngeulaa no ko ere-ere i sulie ngeena, kei meuri huu.”
A Jisas e unu-unue ahutana mo wala ni haꞌa-uusulinge ienini wau i laona nume ni palo-palo mo Jiu i Kapaneam.

Mo iini hunge aana mo pwaarongoisuli ingeie kire rongoa mo haꞌa-uusulinge ngeena, oto kire ko teꞌuri, “Haꞌa-uusulinge ienini e tohungei rongo aasaꞌa. ?﻿A tei nge kei rongo hunie?”
Nga iini kaꞌa haꞌarongoa ike a Jisas, taꞌe ingeie e manataꞌinie mola maraana uri mo pwaarongoisuli ko ere-ere mumuni i sulie mei haꞌa-uusulinge ngeena. Oto ko teꞌuri hunire, “?﻿Uri mei olana ni oto ko da omu kaꞌa sare lulu i sulieu? ?﻿Taꞌe nga taa nge omu kei loꞌongaꞌinie aana maholo omu kei leesieu a Kale Ni Iinoni kei tahelaꞌi taꞌau i Lengi takoie leu nge nou uure aana? Liꞌoa Maaꞌi mone ko niie maurihe, nge mei ola mo iinoni saꞌa roroꞌa ni hele aana ike aana nanamanga ikire maraada. Oto omu ke rongo diana mola hunie walaku, aana kire toꞌo aana nanamanga a Liꞌoa Maaꞌi hunie maurihe. Taꞌe saehuu oto aana nga mo iini eemiu kaꞌa hiiwalaimoli ike ue.” A Jisas e ere urine aena aana e manataꞌinie oto uure mai aehotalana, kira tei nge kire saꞌa hiiwalaimoli ike aana, na iini uri taa nge kei pweloa. Na a Jisas ko heꞌi teꞌuri loꞌu, “Aena mei olana nge nou unue huniꞌomu uri nga iini saꞌa lae ike mai seeku na a Mamaꞌa e kaꞌa toolea mai seeku.”
Aena urine, mo iini hunge aana mo pwaarongoisuli a Jisas kire duꞌe aalihoꞌi, na kire kaꞌa sare lae loꞌu peꞌie. Oto a Jisas ko dolosi aana aawalai pwaarongoisuli mwana rue uuri, “?﻿Oto iꞌomu, uri omu ko sare lae oto noꞌone mwaanieu?”
A Saemon Pita e aalamie oto ko teꞌuri, “?﻿Melu ke si lae loꞌu i tei, Poro paine? Iꞌoe oto o toꞌo aana mo wala nge ko niie maurihe huu hunie iinoni. Melu hiiwalaimoli oto aamu, na melu saie uri iꞌoe oto Iini Maaꞌi e uure mai mwaanie a God.”
Oto a Jisas ko si teꞌuri hunire, “Iꞌomu oto aawalai mwane mwana rue nge nou lio hilisiꞌomu hunie omu ke lulu i sulieu, taꞌe ngaeta iini eemiu nga liꞌoa aaela nge mola aana.” A Jisas e ere urine mola hoorana a Jiudas, kalena Saemon Iskariot. A Jiudas e talei neꞌie taane ngaeta iini aana aawalai pwaarongoisuli mwana rue, taꞌe kei saronai pweloa mola ue a Jisas.

Feti si Jon 6