IMIZEKELISO 15:1-33
IMIZEKELISO 15:1-33 IZIBHALO EZINGCWELE (XHO75)
Impendulo ethambileyo ibuyisa ubushushu; Ilizwi elidubulayo linyusa umsindo. Ulwimi lwezilumko lulungisa ukwazi; Umlomo wezinyabi umpompoza ukumatha. Asezindaweni zonke amehlo kaYehova, Ebonisela abanobubi nabalungileyo. Ukuphola kolwimi ngumthi wobomi; Ke ukuphenula kwalo kwaphula umoya. Isimathane sigiba uqeqesho lukayise; Osigcinileyo isohlwayo uba nobuqili. Indlu yelungisa nguvimba omkhulu; Ke ngongeniselo longendawo kukho ukuhlisa ishwangusha. Umlomo wezilumko uhlwayela ukwazi: Ke yona intliziyo yezinyabi ayindawo. Umbingelelo wabangendawo lisikizi kuYehova; Umthandazo wabathe tye ngowona akholwa nguwo. Ilisikizi kuYehova indlela yongendawo; Ke ophuthuma ubulungisa uyathandwa nguye. Uqeqesho olubi lolowushiyayo umendo; Othiya isohlwayo uya kufa. Elabafileyo nenzonzobila ziphambi koYehova; Zibeké phi na ke iintliziyo zoonyana babantu! Umgxeki akakuthandi ukohlwaywa kwakhe, Akayi kwizilumko. Intliziyo evuyileyo iyabuchwayithisa ubuso; Ekubulalekeni kwentliziyo umoya uthi dakumba. Intliziyo enengqondo ifuna ukwazi; Umlomo wesinyabi usukelana nokumatha. Yonke imihla yosizana mibi; Intliziyo echwayithileyo inesidlo ngamaxesha onke. Ilungile intwana encinane kunye nokoyika uYehova, Ngaphezu kwendyebo eninzi kunye nokuxhalaba. Ulungile umxhesho womfuno kunye nothando, Ngaphezu kwenkomo etyetyisiweyo kunye nentiyo. Indoda enobushushu ixhaya ingxabano; Ezeka kade umsindo idambisa imbambano. Indlela yevila ngathi ibiyelwe ngemitholo; Ke umendo wabathe tye ubekelelwe. Unyana olumkileyo uyamvuyisa uyise; Umntu osisinyabi udela unina. Ukumatha luvuyo koswele intliziyo; Ke indoda enengqondo ithi tye ukuhamba. Iingcinga ziyatshitsha ngokungabikho kokucweya; Ke zona zima ngamaphakathi amaninzi. Indoda inovuyo ngempendulo yomlomo wayo; Ilizwi elithethwe ngexa elililo, azi lihle! Koqiqayo umendo wobomi usinga phezulu, Ukuze emke kwelabafileyo elingaphantsi. UYehova uyayincothula indlu yabanekratshi, Amise umlimandlela womhlolokazi. Zingamasikizi kuYehova iingcinga ezimbi; Ke ahlambulukile amazwi amnandi. Uyihlisela ishwangusha indlu yakhe obawela inzuzo embi; Ke yena othiya isicengo, uya kuphila. Intliziyo yelungisa iya kucamanga ukuphendula; Ke wona umlomo wabangendawo umpompoza ububi. UYehova ukude nabangendawo; Ke wona umthandazo wamalungisa uyawuva. Ukukhanya kwamehlo kuvuyisa intliziyo; Iindaba ezimnandi zityebisa amathambo. Indlebe esivayo isohlwayo sobomi Ihlala phakathi kwezilumko. Ophulukene noqeqesho ucekisa umphefumlo wakhe; Osivayo isohlwayo urhweba ukuqonda. Ukoyika uYehova luqeqesho lobulumko; Ngaphambi kozuko lululamo.
IMIZEKELISO 15:1-33 IBHAYIBHILE (XHO96)
Impendulo ethambileyo iyawuthibaza umsindo, kanti ke wona amazwi akrwempayo ahlobisa igazi. Izilumko ziphokoza ulwazi xa zithethayo; kanti ke zona izityhakala zithulula ubudenge. UNdikhoyo uyazibona zonke izinto ezenzekayo; ubakhangele abenza okubi nokulungileyo. Amazwi axolelanisayo angumthi wobomi; ke wona awenkohlakalo ayawaphula umoya. Umntu ongaqiqiyo akayikhathalele imfundiso kayise; kambe ke yena ozamkelayo iziluleko unengqondo. Ubutyebi buyagcinakala emzini womntu olungileyo; kanti ke yona ingeniso yesikhohlakali isiphathela inkathazo. Umlomo wesilumko usasaza ulwazi; phofu ke akunjalo kwintliziyo yesityhakala. Amadini omntu okhohlakeleyo alisikizi kuNdikhoyo, kambe ke uyayamkela imithandazo yabantu abathe ngqo. UNdikhoyo uyazicaphukela iindlela zabantu abakhohlakeleyo, kodwa uyabathanda abo bathene mbende nezinto ezifanelekileyo. Umntu ophambukayo endleleni wohlwaywa qatha; ke yena okuthiyileyo ukululekwa uya kufa. Ingcwaba nelabafileyo azifihlakalanga kuNdikhoyo; zibeka phi ke ukungafihlakali iingcamango zomntu kuye? Abagxeki abafuni kucetyiswa, bengafuni nokuya nakwizilumko. Umntu oxolileyo ukhangeleka enemihlali, kanti ke yena oneenzingo uyanxuba. Umntu onengqondo usoloko elangazelela ukufunda; kanti ke sona isidovela saneliswa kukumatha. Yonke imihla yomntu olusizana ngamabona-ndenzile, kambe ke kumntu ochwayithileyo ubomi busoloko bufana netheko. Kubhetele ukuba lihlwempu elihlonela uNdikhoyo kunokuba sisinhanha esiphethwe ngamaxhala. Xa ukho umoya wobudlelwana akunani nokuba utya imifuno, ndaweni yokutya inyama yenkomo etyetyisiweyo ikhatshwa yintiyo. Umntu onephuku uphembelela uqhushululu; kanti ke yena onomonde uyayiphelisa ingxabano. Indlela yevila soloko ibekelwe ameva; phofu ke yona eyabathe ngqo iphangalele. Unyana olumkileyo uyamvuyisa uyise; ke yena umntu osisiyatha uyamdela unina. Umntu ongabhadlanga engqondweni uvuyiswa bubi, ke yena onengqondo ihambo yakhe ithe ngqo. Apho kungekho kucebisana izicwangciso ziyabhanga, kanti ke apho kukho abacebisi abaninzi ziyaphumelela. Hayi ukuvuya komntu oyaziyo impendulo echanekileyo! Ewe, ilizwi elithethwe ngexesha elililo lihle kunene. Indlela yomntu onengqondo isinga phezulu ebomini; yena uyayiphepha indlela ehlayo eya kwelabafileyo. UNdikhoyo uyayidiliza imizi yabantu abanekratshi; kanti ke uyawukhusela umhlaba womhlolokazi. UNdikhoyo uyazicaphukela iingcinga zabantu abagwenxa; kanti ezabanyulu zamkelekile kuye. Umntu onyolukileyo uyihlisela inkathazo indlu yakhe; ke yena okuthiyileyo ukunyotywa uya kudla ubomi. Umntu olilungisa uyacinga phambi kokuba aphendule; ke wona umlomo womntu okhohlakeleyo uphuphuma ububi. UNdikhoyo ukude kubantu abakhohlakeleyo; phofu ke uyayiphulaphula imithandazo yamalungisa. Imbonakalo echwayitileyo izisa ulonwabo entliziyweni; ibe ke zona iindaba ezimnandi ziyahlaziya emathanjeni. Umntu ophulaphula ukucetyiswa uya kudla ubomi, azive esekhaya phakathi kwezilumko. Umntu ongayifuniyo ingqeqesho uyazilimaza yena ngokwakhe: kanti ke yena ovayo akululekwa uzuza ukuqonda. Ukuhlonela uNdikhoyo kufundisa ubulumko; indlela eya ewongeni yintobeko.
IMIZEKELISO 15:1-33 Contemporary Xhosa Bible 2024 (CXB24)
Impendulo ethambileyo ibuyisa ubushushu; Ilizwi elidubulayo linyusa umsindo. Ulwimi lwezilumko lulungisa ukwazi; Ke yona imilebe yesinyabi impompoza ukumatha. Amehlo kaYehova akuyo yonke indawo, yaye abona ababi nabalungileyo. Ukuphola kolwimi ngumthi wobomi; Isimathane sigiba uqeqesho lukayise; Osigcinileyo isohlwayo sisilumko. Indlu yelungisa nguvimba omkhulu; ke wona umvuzo wongendawo ngamashwa. Umlomo wesilumko usasaza ukwazi: Ke yona intliziyo yesinyabi ayinanto. Umbingelelo wabangendawo lisikizi kuYehova; Ke wona umthandazo wamalungisa luvuyo lwakhe. Ilisikizi kuYehova indlela yongendawo; ke ophuthuma ubulungisa uyamthanda. Isohlwayo siqatha kojika endleleni; othiya isohlwayo uya kufa. Yintlekele nentshabalalo phambi koYehova; kukangakanani ke kunentliziyo yoonyana babantu? Umgxeki akakuthandi ukohlwaywa, Akayi kwizilumko. Intliziyo evuyileyo iyabuchwayithisa ubuso; Ubuhlungu bubuhlungu bentliziyo. Intliziyo enengqondo ifuna ukwazi; Umlomo wesinyabi usukelana nokumatha. Yonke imihla yesisweli mibi; Ke yena ontliziyo ichwayithileyo uhlala evuya. Intwana yokoyika uYehova ilungile, Ngaphezu kobutyebi obuninzi neembandezelo. Ukutya imifuno kuphela apho kukho uthando kulunge ngaphezu kokutyiwa yinkukhu enentiyo. Umntu onomsindo uxhaya ingxabano; Indlela yesimathane injengothango lweminga; Ke yona indlela yamalungisa iqaqambile. Umntwana osisilumko uyamvuyisa uyise; Umntu osisinyabi udela unina. Ukumatha lunoyolo oswele ubulumko; Ke indoda enengqondo ithi tye ukuhamba. Iingcinga ziyadana ngokungabikho kokucweya; Ke zona zima ngamaphakathi amaninzi. Unoyolo umntu ngempendulo yomlomo wakhe; Indlela yobomi iphakamile kunobulumko, Ukuba alishiye elabafileyo. uYehova uyayincothula indlu yabanekratshi, Amise umlimandlela womhlolokazi. Zingamasikizi kuYehova iingcinga zongendawo; Ke amazwi ahlambulukileyo ayathandeka. Olungileyo uyihlisela ububi indlu yakhe; Ke yena othiya izibabalo uya kudla ubomi. Intliziyo yelungisa iya kuphendula; Ke yona imilebe yongendawo impompoza ububi. uYehova ukude nabangendawo, kodwa uyawuva umthandazo wamalungisa. Ukukhanya kwamehlo kuvuyisa intliziyo; Iindaba ezimnandi zityebisa amathambo. Indlebe esivayo isohlwayo sobomi, Ihlala phakathi kwezilumko. Ophulukene noqeqesho ucekisa umphefumlo wakhe; Osivayo isohlwayo uba nokuqonda. Ukoyika uYehova luqeqesho lobulumko; kwaye ukuthobeka kukhokela isidima.
IMIZEKELISO 15:1-33 Incwadi Yeziba̔lo Ezingcwele 1864, 1902 (Xhosa Appleyard) (XHO1902A)
IMPENDULO etambileyo iyanqanda umsindo; kodwa ilizwi elidubulayo liyavusa uqumbo. Ulwimi lwamalumko luyalungisa ukwazi; kodwa umlomo wamahilihili uyabodla ubudenge. Amehlo KAYEHOVA akuzo zonke indawo, ekangela abakohlakeleyo nabalungileyo. Ukululama kwolwimi kungumti wobomi; kodwa inkani ngalo iyenza ukwapuka emoyeni. Ihilihili liyadela imfundiso kayise; kodwa ogqalayo ukwohlwaywa uyenza ngokutelekelela. Endlwini yolungileyo kuko ubutyebi obuninzi; kodwa enzuzweni yokohlakeleyo kuko inkatazo. Umlomo wamalumko uyapangalalisa ukwazi; kodwa intliziyo yezidenge ayinjalo. Idini labakohlakeleyo liyintshontsho KUYEHOVA; kodwa umtandazo wabalungileyo uyimvuyiso kuye. Yintshontsho KUYEHOVA indlela yokohlakeleyo; kodwa uyamtanda lowo uputumayo ubulungisa. Ululeko olubi lwoba kuye oshiyayo indlela; lowo utiyayo ukwohlwayiwa uya kufa. Ihadesi nentshabalalelo zipambi kwake UYEHOVA; kangakananina ngakumbi ke intliziyo zosapo lwabantu? Umgxeki akayi kumtanda lowo umohlwayayo; akayi kuya kwabalumkileyo. Intliziyo evuyayo iyacwayitisa ubuso; kodwa ngobuhlungu bentliziyo umoya ukedamile. Intliziyo eqondayo iyafuna ukwazi: kodwa umlomo wamahilihili uyakoliswa bubudenge. Yonke imihla yobandezelweyo mibi; kodwa intliziyo ecwayitileyo ingumtendeleko ofuti. Intwana encinane, kunye nokwoyika UYEHOVA, ilungile pezu kwendyebo ezininzi, nempitimpiti kunye nazo. Isidlo samahlamvu, apo utando lukoyo, silungile pezu kwenkabi etyetyisiweyo, nxa utiyo lukona. Umntu onomsindo uyavusa ipike: kodwa lowo uqumba kade uyadambisa impikiswano. Indlela yevila injengotango lweminga: kodwa umendo wabalungileyo yindlela epakanyisiweyo. Unyana olumkileyo uyavuyisa uyise; kodwa umntu osidenge uyadela unina. Ubugeza buluvuyo kulowo oswele ingqiqo; kodwa umntu onokuqonda uyalungisa ukuhamba. Amaqinga ayatshabalala nxa ingeko ingcebisano; kodwa ngobuninzi babacebisi aya kuma. Kuko uvuyo emntwini ngempendulo yomlomo wake: nelizwi elitetwa ngexesha lalo, linjanina ukuba mnandi! Indlela yobomi kuye olumkileyo isinga pezulu, ukuze apambuke kuso isihogo esipantsi. Indlu yabar̔atshileyo UYEHOVA woyicita; kodwa umlimandlela womhlolokazi wowuqinisa. Ayintshontsho KUYEHOVA amaqinga okohlakeleyo; kodwa amazwi abacocekileyo ngamazwi amnandi. Obawela inzuzo ekohlakeleyo uyakataza indlu yake; kodwa otiyayo amabaso uya kupila. Intliziyo yolungileyo iyacingela ukupendula; kodwa umlomo wabakohlakeleyo uyabodla izinto ezimbi. UYEHOVA ukude kubo abakohlakeleyo; kodwa umtandazo wabalungileyo uyawuva. Ukukanya kwamehlo kuyavuyisa intliziyo; indaba ezilungileyo ziyatyebisa amatambo. Indlebe evayo ukwohlwayelwa ubomi, yohlala pakati kwabalumkileyo. Owalayo imfundiso, uyadela owake umpefumlo; kodwa ovayo ukwohlwayiwa, uyazuza ingqondo. Ukwoyika UYEHOVA kuyimfundiso yobulumko; kanjalo ululamo luyandulela udumo.
