If you have would like a copy of this version please contact info@davarpartners.org

Text: Churahi New Testament, CC-BY-SA-4.0, The Love Fellowship. Audio: Churahi New Testament Audio Bible, CC-BY-SA-4.0, Davar Partners International, The Love Fellowship, 2022

Churahi New Testament

Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.

ऐ यीशु मसीहरै पूर्वजा केरै नाँईयां केरी लिष्ट आ, यीशु दाऊदेरा जां अब्राहमेरा वंश आ। अब्राहमेरा पुत्र इसहाक थ्या, इसहाकैरा पुत्र याकूब थ्या, फिरी याकूबेरा पुत्र यहूदा जां तेसेरै ग्याराह भाई पेईदा भुवै, फिरिस जां जेरह यहूदेरै पुत्र थ्यै (तेन्हैरी मायिरू नाँ तामार थियु) फिरिस हिस्रोनेरा बब थ्या, जा हिस्रोन एरामेरा बब थ्या। एराम अम्मीनादाबेरा बब थ्या, अम्मीनादाब किना नहशोन जां नहशोन किना सलमोन पेईदा भुआ। सलमोन किना बोअज पेईदा भुआ (बोअजेरी मायिरू नाँ राहाब थियु) फिरी बोअज जां रूत किना ओबेद पेईदा भुआ जां ओबेद यिशैरा बब थ्या, जां यिशै किना राजा दाऊद पेईदा भुआ, जां (सुलेमान दाऊदेरा पुत्र थ्या) सुलेमान तैस जानानि किना पेईदा भुआ जै पेहिलै उरिय्याहेंरी लाड़ी थी।
सुलेमान रहबामैरा बब थ्या जां रहबाम अबिय्याहेरा बब थ्या, अबिय्याह किना आसा पेईदा भुआ, जां आसा यहोशापातेरा बब बंणा, फिरी यहोशपात किना योराम जां योरामा किना उज्जियाह पेईदा भुआ। उज्जियाह योतामैरा बब थ्या जां योताम आहाजैरा बब थ्या, फिरी आहाज किना हिजकिय्याह पेईदा भुआ, जां हिजकिय्याह किना मनश्शे पेईदा भुआ, मनश्शे आमोनेरा बब बंणा, जां आमोन योशिय्याहैरा बब बंणा। योशिय्याह, यकुन्याह जां तेसेरै भाईया केरा दादा थ्या, जै इस्राएलिया मैहणुवां बेबीलोन देशा मझ बन्दी बंणा करि लैई गांहणा किना पेहिलै पेईदा भोरै थ्यै। इस्राएलेरै बेबीलोन देशा मझ लै गांहणा किना बाद यकुन्याह शालतियेलैरा बब बंणा, जां शालतिएल किना जरुब्बाबेल।
जरुब्बाबेल किना अबीहूद पेईदा भुआ, जां अबीहूद इल्याकीमेंरा, जां इल्याकीम अजोरेंरा बब बंणा, अजोर सदोकैरा बब थ्या, सदोक किना अखीम, जां अखीम किना इलीहूद पेईदा भुआ। इलीहूद इलियाजारेंरा बब थ्या, जां इलियाजार मतानेंरा, मतान याकूबेरा बब बंणा। याकूब किना यूसुफ पेईदा भुआ जै मरियमैरा लाड़ा थ्या जैस किना यीशु जैसनि मसीह बोलतै, सै पेईदा भुआ, ऐहिंयो अब्राहमा किना दाऊदा तेईनी सारी चोउधा पीढ़ी भुई, जां राजै दाऊदेरै टैंमा किना लैकरी तैस टैंमा तेईनी जेख्णी इस्राएलेरै मैहणु बंदी बंणा करि बेबीलोन लै नियें, तेख्णी किना लैकरी मसीहरै जन्मा तेईनी चोउधा पीढ़ी होरी भुई।


यीशु मसीहरै पेईदा भूंणा किना पेहिलै ऐहीं चारै भूं, कि जेख्णी तेसैरी मयि मरियमेरी मगणी यूसुफा सिंउ भोरी थी, पण तेन्हैरा ब्याह भूंणा किना पेहिलै जेख्णी सै कुंवारी थी ता पवित्र आत्मायरी शक्ति ला सै दुपरांणी भुई। पण तेसैरा मंगेतर यूसुफ धर्मी मैहणु थ्या, जां ऐस गलै मैहणुवां केरै बिच मझ बोलि करि तैस बदनाम न कांना चांहथा थ्या, ऐठणीरै तेईनी तेनी चुप-चाप तैस सेईतै मगवाली त्रोड़नेरा फैसला ल्या (केईनी कि सै ब्याहा किना पेहिलै दुपरांणी भोरी थी जै व्यवस्थाईरै खिलाफ थियु)। पण जेख्णी यूसुफ ऐन्हां गला केरै बारै मझ सोचताऐ थ्या, ता परमेश्वरैरा अक स्वर्गदूत सुपनै मझ तेसेरै सांमणै या जां तैस सेईतै बोलणा लगा, “हे यूसुफ! तु जै राजै दाऊदेरै वंशा किना आ, मरियमै अपड़ि लाड़ी बंणाणा किना मेईं डारियै केईनी कि जै बच्चा तेसेरै पैटा मझ आ, सै पवित्र आत्मायरी शक्ति ला आ। तैस पुत्र जमणां जां तु तेसैरू नाँ यीशु रखै केईनी कि तैस अपड़ै मैहणुवंनी तेन्हैरै पापा किना उद्धार दिवांणा।”
ऐ सारू किछ ऐठणीरै तेईनी भूं कि जै गल परमेश्वरै यशायाह भविष्यवक्तेरै जरियै यीशु मसीहरै जन्मेरै बारै मझ बोलोरी थी, सै पूरी भौ गहिया, “तका, अक कुंवारी छोकरी दुपरांणी भूंणी, जां अक पुत्र जमणां जां तेसैरू नाँ इम्मानुएल रखियूंणु जेसैरा मतलब आ, परमेश्वर असु सेईतै आ।” फिरी यूसुफ जेख्णी निदरै किना बियुझा ता तेनी परमेश्वरेरै स्वर्गदूतेरी आज्ञाईरै अनुसार मरियमा सेईतै ब्याह करि ल्या जां तैस अपड़ै घरेनी लै या, जां ज्यो तेईनी तेसै पुत्र ना जम्मा त्यो तेईनी यूसुफै तैस सेईतै कोई बि शारीरिक सम्बंध ना बंणा जां यूसुफै तैस बच्चेरू नाँ यीशु रखु।

Phulaphula i मत्ती 1