Matɨyui 19
19
A'mwengɨ wɨdaasa'nebwinesɨ.
(Maakɨ 10:1-12; Lukɨ 16:18)
1Jizaazai yagaala daza jɨ'mwannyɨna yakegaa' anga Galɨli yagalya'ma'na yɨna yaka Aalya Jothanɨ pimagɨnna anga naanga Juthɨyanna wɨna. 2Wɨna kya' kwala bwa'naanya naanga sahwarɨ mɨdɨnyɨna kye' dazɨmagɨ kumɨre nalaaya tewaanya yavada'gaina wia'.
3Nabaai gamɨnyawɨnna Perɨzɨya pwara bɨna yeva “Kayaa'na ja'nanedazɨwaka?” yawɨ'na yadɨvɨ' yaamɨjɨ yɨjɨwaaina ya'nera wɨdɨna “Nemɨre kɨwɨnya dɨnɨkeburɨ gazannazanna a'mwei gannya a'mwevɨ yɨnahu wɨdaasa' tewaanya' dɨngaka?” 4Sara wɨdɨna kye' sai ja'nawɨdɨna “Gotɨyare bukuyavɨ dɨnɨka datha' madanganyadɨvɨsaihi daaka! Sɨnnawɨ kɨgaakuna Gotɨyai yuya wakyaakegaa' kwalyalyɨ balyasɨ sawaarɨ yavɨkarina yaakeyolyɨ. 5Sara yaka sai dɨna ‘Sarevɨdaa'nyɨ a'mwei ganɨmaangelyɨ ganaangesɨ sawaarɨ yagalya'mavojɨ gannya a'mwesɨ yɨraku'na yɨkadeyolyɨ. Nabaai sayoi kɨlaaka gave pɨjɨ'nanyayoi yɨma'nyɨkadeyolyɨ.’ Yagaala dazavɨ myawɨryadɨvɨsaihi daaka! 6Sarevɨdaa'nyɨ sayoi kɨlaaka pɨjɨkaaina ayawɨ yɨkadewaai mɨ'. Aawa. Sayoi yune kɨlaaka gave pɨjɨ'nanyɨ. Sarevɨdaa'nyɨ sasare sabwi Gotɨyai mena ye'mwannemwaaihɨnɨkelyɨ. A'mwera nadahaaibwapɨdɨka!” 7Wɨdɨna kya' sahwara wɨdɨna “Nedɨwaanya'na Ne Mozɨzai kɨwɨnya' dara be'na dɨnɨkavaka? ‘A'mwei gamɨre balaangevɨ wɨdaasa'nei pɨkarɨyɨkwiavɨ yɨda'na yojɨ a'mwevɨ wɨjaavojɨ yunakaanna wɨdaasadelyɨra.’ Be'na dɨnɨkevɨnaka!” 8Wɨdɨna kye' sai wɨdɨna “Sarɨmɨre sɨmunyangɨ galarɨlavɨmwaaihɨnyɨna kiwaakɨra. Sarevɨdaa'nyɨ Mozɨzai sarɨmɨre a'mwengɨ wɨdaasa'na baihana'na yɨhyaakelyɨ. Kɨrɨ' sɨnnawɨ kɨgaakuna sasare dazabwi waryaakebwi mɨ'. 9Nabaai dara yɨhɨthɨvanɨge. Pwai kwai gamɨre a'mwe' mudɨkerɨ maridaayɨ yaja' sahɨrɨvɨ yaasɨwa'na wɨdaasadevɨdaa'nyɨ a'mwe pɨrɨvɨ nayaa yɨdaanganojɨ kwala maarajai yɨ sahwarɨna Gotɨyai dɨna ‘A'mwe sai ata lɨmwangebwi kayaa'na yɨwakelyɨ.’”
10Sagaa' gamɨre mɨdɨdɨvɨsara wɨdɨna “A'mwei gannya a'mwevɨ sara mudaasɨ yaja'na nemɨ kwala namaraadɨka! Nemɨ a'mwe maayaina mwalaadevwi nawɨ'nyasɨ.” 11Wɨdɨna kye' sai wɨdɨna “Yagaala daza' yɨnɨga wi'na yawɨramaarya'nera yuyaraavɨna mɨ'. Aawa. Gotɨyai kwala mamaarya sasareburɨne dɨragɨnya' wɨjaavojɨya pwaraavɨnanyɨ. 12Sare' dare'nesɨ. Yɨ kwala yɨnɨga mamaarya'nera a'mwe dala pwarana pwarananyavɨnyɨ. Pwara kuvɨnaange maarɨna yesagaa' kwala maarya'nera mamwaalyɨ yɨpɨnerera. Pwaraavɨ a'mwera munya da'nɨkera kwala yɨnɨga maapɨ'dera mɨ'. Pwara Sɨgunyavɨya maremwaaidevɨne wawɨnya' yawɨ'dɨvɨ' kumɨ sara kɨmaakɨya dakadɨvɨ' kwala mamaaryadɨvɨsare. A'mwei yagaala daza' yɨnɨga wi'na yawɨramaarannei sai yawɨramaa'na yana!”
Jizaazai kaimɨraaya maalɨkeraavɨ yɨlaaya wɨmaryake'nesɨ.
(Maakɨ 10:13-16; Lukɨ 18:15-17)
13Sagaa' gamɨnyawɨnna kaimɨraaya maalɨka pwaraavɨ makabɨna. “Kumɨre mɨnyagɨnyangɨ gamɨre asa' wɨdathɨwada Gotɨyarɨ sahwaraavɨna wɨdana!” deva makabɨna. Mi'na makabɨna kye' kɨrɨ' gamɨre mɨdɨdɨvɨsara kumɨnyɨ maanga wɨdɨna. 14Maanga wɨdɨna kye' Jizaazai wɨdɨna “Nɨmɨnyawɨnna kaimɨraayaraavɨ dɨmaryasaabila! Sarɨmɨ darihɨralɨmwagata mipɨnera! Sare' dare'nesɨ. Sɨgunyavɨya maremwaaidevɨnera maalɨka sasareraavɨna Gotɨyai yanga wɨjaavade'nanyɨ.” 15Sara wɨdɨna kya' gamɨnyawɨnna bɨna kye' asa' mɨnyagɨnyangɨ dathɨwanna wia'. Sara wiaka dɨvidaa'nyɨ dazɨmagɨ yagalya'ma'na yaka kaanna wɨna ya'.
Mɨgɨnyai gɨlyɨvɨta kwalaalya kɨnɨnnakerɨnesɨ.
(Maakɨ 10:17-31; Lukɨ 18:18-30)
16Yɨthaanyi, a'mwe pwai gamɨnyawɨnna bi'ma'na yaka wɨdɨna “Wɨjɨwaakyaigɨ, ‘Yuyagaa' yuyagaa'ne gaalyabwi maarɨma!’ da'mujɨ tewaanya gare'na yɨdeinyaka?” 17Wɨdɨna kya' ja'nawɨdɨna “Tewaanya'na nɨmɨnyɨna be'na nyɨdaangamanɨgɨna? Tewaanyai yune gave sahwainanyalyɨra. Kɨrɨ' gɨmɨ ‘Gaala nebulyaburɨ mwaalya'neinyɨ,’ yawɨ'dɨza' kɨwɨnya dɨnɨkengɨ nayaa dɨmɨdɨna!” 18Sai wɨdɨna “Kɨwɨnya garengaka?” Jizaazai wɨdɨna “Datha'darenna ‘A'mwe maramakɨnnera! Pware a'mwevɨ ata malɨmwadɨnnera! Kuka minnera! A'mwe pwaraavɨna kwaasɨ yagaala majalɨkurakɨnnera! 19Gɨmɨre gɨmaamaangelyɨ gwaangesɨ sawaare yaya munyaba makidɨ duhaimwana! Gɨmɨnyɨna gɨvu'nadevaaibɨ' pwaraavɨna avaaina nawɨ'nya gɨvu'nana!’” 20Sara wɨdɨna kya' mɨgɨnya sai wɨdɨna “Kɨwɨnya yuya daza mena mɨdɨdɨnyangɨra. Nɨmɨnyɨ kuna gare' nyɨgainɨvanɨkevaka?” 21Wɨdɨna kya' Jizaazai wɨdɨna “Gɨmɨ ‘Yune nebulya'nanyainyɨ yɨma'nɨma!’ dɨzaigɨ gɨmɨre gɨlyɨvɨta yuya yasaawa'gɨzɨ a'mwe gɨlyɨvɨ'maayaraavɨ nɨgwia duzaama! Sarevɨdaa'nyɨ Sɨgunyavɨ gɨmɨ gɨlyɨvɨta kwalaalya kɨnɨnnakeigɨ jɨma'nadeigɨnyɨ. Nabaai nɨmɨnyɨ dɨnyɨmɨdɨnaama!” 22Wɨdɨna kya' mɨgɨnyai yagaala daza' kadɨka sara wɨ'nyɨna yaka kale wiadaa'nyɨ kaanna wɨna. Sare' dare'nesɨ. Sai gɨlyɨvɨta kwalaalya kɨnɨnnakelyɨ.
23Sagaa' Jizaazai gamɨre mɨdɨdɨvɨsaraavɨ wɨdɨna “Nebulya'na yɨhɨthɨvanɨge. Sɨgunyavɨya maremwaaidevɨ a'mwe nɨgwɨhɨravɨnakei yagɨyagɨ wɨladelyɨ. Yaasɨwa'na mɨ'. 24Ayahi yɨhɨthɨvanɨge. Kaamelɨyai ‘Langa kwaabɨhannya gipwaidɨvɨta sarɨkɨre daibu'nyavɨ wɨlɨma!’ dozɨ sa' yagɨyagɨ wawɨnya maayasɨ. Nɨgwɨhɨravɨnakei ‘Gotɨyai maremwaaidevɨ wɨlɨma!’ dozɨ sa' yagɨyagɨ wawɨnyasɨ.” 25Wɨdɨna kya' mɨdɨdɨvɨsara kadɨka sara wɨ'nyɨna yeva lɨka yɨwainɨgulaawɨna yɨna yeva wɨdɨna “ ‘Nɨgwɨhɨravɨnakei aawa!’ daakajɨ aaihwarɨ padaihasamaarannelaka?” 26Wɨdɨna kye' Jizaazai tɨnna baihana'na wiaka wɨdɨna “A'mwera wi'na mɨka! Kumɨ sara Gotɨyaryawɨnna mabi yɨpɨnerera. Kɨrɨ' Gotɨyai yuyabwi yɨnɨga wi'na yannelyɨ.” 27Wɨdɨna kya' sagaa' Pitai ja'nawɨdɨna “Yɨthaa, nemɨ yuyangɨ yagalya'mavona gɨmɨdɨmwona. Sarevɨdaa'nyɨ nemɨ tɨvɨkɨrya'ne benɨ maraadengaka?” 28Wɨdɨna kya' Jizaazai kumɨnyɨ dara wɨdɨna “Nebulya'na dara yɨhɨthɨvanɨge. Yuya mudɨka yɨma'nadehaa' A'mweraavɨne Kaimɨraayai dɨragɨnyasɨ byaannyasɨ kɨnɨnnakei kingɨyarɨ namwaalyɨta nawɨ'nyavɨ mwaalade dazahɨgaa' sarɨmɨ nyɨmɨdɨdɨvɨsaihi kwaihɨlyɨ namwaalyɨta nawɨ'nya sɨvɨlɨrɨdaa'nyɨ pwaraala sangɨ dɨmwaalyideihɨlyɨ. Sara yadɨvɨ' yawɨbwarya'neihi Yɨzɨrelɨyaraavɨre yɨsavakaavɨ sɨvɨlɨrɨdaa'nyɨ pwaraala savakaavɨ dɨmaremwaalyideihɨlyɨ. 29Nabaai gazaizai nɨmɨnne yayavɨna yawɨ'da nɨmɨre wawɨnya yada yɨ sahwai gamɨre angevɨ yagalya'ma'na. Yɨ gya'mwe pwaraavɨ gya'mwe kɨnɨngɨ yagalya'ma'na. Yɨ ganɨmaanga pwarɨ ganaanga kɨrɨvɨ yagalya'ma'na. Yɨ gamɨre kaimɨraayangɨ yagalya'ma'na. Yɨ aawawɨnyangɨ yagalya'ma'na. Yɨ sarevɨdaa'nyɨ sahwai tewaanya kwalaalya naanga maaradelyɨ. Nabaai sara yojɨ Ganɨmaangere yuyagaa' yuyagaa'ne gaalyabwi maaradelyɨ. 30Kɨrɨ' dahaa' a'mwe kwalaalyara kumɨre yaya munyaba warɨkera dɨvi nɨmɨnyɨne'na kumɨre yaya kwaakeba waraderera. Nabaai dahaa' a'mwe kwalaalyara kumɨre yaya kwaakeba warɨkera dɨvi nɨmɨnyɨne'na kumɨre yaya munyaba waraderera.
موجودہ انتخاب:
Matɨyui 19: byr
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Wycliffe Bible Translators, Inc. All rights reserved.