Matɨyui 12
12
Juyaraavɨre Kwazaakegaa'ne kɨmaakɨya'nesɨ.
(Maakɨ 2:23-28; Lukɨ 6:1-5)
1Sagaa' Kwazaaka pɨrɨkɨ witɨwawɨnyavɨ tɨnnyabanne tusavɨ Jizaazai kaanna wɨna. Kaanna wɨna yadaa'nyɨ gamɨrera mɨdɨdɨvɨsara mɨjɨka wiadaa'nyɨ witɨzɨlya maarɨna yeva tɨka nyɨna. 2Tɨka nyɨna yadaapɨjɨ Perɨzɨyara dazavɨ tɨnna wanganna, sarɨ wɨdɨna “Yɨthaa! Gɨmɨdɨdɨvɨsara wawɨnya yɨvanɨgasa'na nemɨre kwazaakevɨ kɨwɨnya' galazekɨvaimanɨgasarera gɨmɨrera!” 3Sara wɨdɨna kye' wɨdɨna “Kayaa'na myɨwaava. Ne Devitɨ yaake dɨnɨka dazavɨ madanganyadɨvɨtaihi daa! Nɨmɨ dɨwe dazagaa' sahwalyɨ yeva gamɨrerajɨ mɨjɨka mwaalesagaakɨ. 4Yɨ sagaa' sahwara Gotɨyare angevɨ wɨlɨna yɨna yeva gɨrɨkula Gotɨyarɨne warɨke tɨka nyɨna ye'. Gɨrɨkula tewaanya sa Devitɨjɨ gamɨrerajɨ tɨka nya'ne mɨ'. Aawa. Gotɨyarɨna mubɨthɨka yɨra'dɨvɨta gavera tɨka nya'nengɨra. Tɨka nyɨna yesa'na kɨwɨnya sa' galazekɨvaina yeta kɨrɨ' Gotɨyai yagaala mujakelyɨ. 5Nabaai Kɨwɨnyavɨ dɨnɨka pɨrɨvɨ madanganyadɨvɨsaihi daaka! Sare' dara dɨnɨkesɨ. Kwazaakegaa' Gotɨyare Angevɨ Gotɨyarɨna yɨra'dɨvɨsara wawɨnya yɨpɨnerera. Yagaala mwarika! Kwazaakegaa'ne kɨwɨnya dɨnɨkengɨ pari'ma'dɨvɨsarera. Kɨrɨ' yɨwetawakya maayare.” 6Gamɨnyɨna ke'ba'na wɨdɨna “Datha' yɨhɨthɨvanɨge. Kwaaka davakɨ pwai Gotɨyare Ange' wavɨlavɨkelyɨ. 7Yɨ Gotɨyare bukuyavɨ dara dɨnɨ'
‘Sipɨzipɨyaraavɨ yaasɨwa'na manyɨjaavɨpɨneihɨlyɨ. Aala!
Pwaraavɨna kale gaimwange'na nyɨvu'nɨvanɨ'.’
Sara dɨnɨke' nayaa yawɨrangabɨzɨ kwajɨ a'mwe kayaa'nanya maayaraavɨna ‘Sahwara Kɨwɨnya' galazekɨvaimwaa',’ majɨ kyɨpɨdɨka! 8Sare' dare'nesɨ. A'mweraavɨne Kaimɨraayai Kwazaakegaa'ne' maremwaalɨkelyɨra. Sarevɨdaa'nyɨ nɨmɨre yagaala dazavɨ dɨmɨdɨnyɨla!”
(Maakɨ 3:1-6; Lukɨ 6:6-11)
9Sabadaa'nyɨ Jizaazai kaanna wɨna yaka kumɨre lotuangevɨ wɨlɨna. 10Yɨthaanyi, saba a'mwe pwai gamɨre asa' yaalɨka mena yɨnɨkei mwaalɨna. Sahwarɨna yawɨ'dɨvɨ' dɨnyɨna “Kwazaakebwi kayaaka kyojɨ Jizaazarɨ kotɨya jaana!” dɨneva sarɨ yɨdaanganna “Kwazaakegaa' nalaavɨnakeraavɨ nawɨ'nya yavada'galaadevwi dɨngaka? Kɨwɨnya' galazekɨvalaadevwi dɨngaka?” 11Sara kude' sai wɨdɨna “Sarɨmɨjɨya pwai kwazaakegaa' kavi'nɨnna pɨrɨvɨ gamɨre sipɨzipɨya pwai walaraawɨna yajarɨ malɨmwagyada mamwagi'namakilyɨ yadei gawalaka! 12Sarɨmɨjɨyai yarai mwagi'namakidaavadelyɨ. Kwazaakegaa'na maanga aawana! Sipɨzipɨyai maalɨkelyɨra. A'mwei naangaangelyɨra. Sarevɨdaa'nyɨ Kwazaakegaa' a'mweraavɨne wɨgaimwange' Kɨwɨnyavɨna tewaanyasɨ.” 13Sara wɨdaka asa' yaalɨka mena yɨnɨkerɨ wɨdɨna “Gɨnnya asa' dɨvyaasɨbwa'nana!” Sagaa' gamɨre ata yɨwɨbwa'nyɨna yada asi ayabaaibɨ' ata pwibɨ' maamɨdaryi yɨma'nyɨna ya'. 14Kɨrɨ' Perɨzɨyara bwalyuna yɨna yeva “Jizaazarɨ tamakaana!” deva yagaalya' jamungajɨna ye'.
Gotɨyare wɨdaayaderɨ dahɨlakakerɨnesɨ.
15Jizaazai kumɨre tamakya'ne savɨna mena yawɨ'na yaka saba yagalya'ma'na, kaanna wɨna. Nabaai a'mwe kwalaalyara mɨdɨnna ye'. Sara kye' a'mwe nalaavɨnaka yuyaraavɨ tewaanya yavada'gaina yɨna ya'. 16Yavada'gaina yɨna yaka dɨragɨnna wɨdɨna “Gɨmɨnyɨne'na yɨwe' pwaraavɨ mujɨwaakɨnna!” 17Gotɨyarɨ wɨ'nawɨjɨwakyaakei Aazaayai dɨnɨke' “Yunebanna yɨ'mwannana!” Gotɨyai kada' sara yɨna ya'. Sahwai kave yabwina dare' dɨnɨkesɨ. Gotɨyai sahwarɨna dara jaa'
18“Yɨthaanyi! Wɨdahɨlakɨwei nyɨdaayade tewaanyalyɨ.
Sahwarɨna nɨmɨnyɨ tewaanya nyɨvu'nadelyɨ.
Nɨmɨre sɨmunya yɨlaaya yadelyɨ.
Nɨmɨre Kuryarɨ sahwarɨna yɨlawɨmwaaihɨdelyɨ.
Ajɨmya yuyangɨyaraavɨ yawɨbwasa'nebwina wɨjɨwaakadelyɨ.
19Maiyagaala majada jaka dathei mɨ'.
Tuta naangengɨ kadɨka wɨ'nɨpɨ'dei mɨ'.
Gamɨre maanguraaya' jaka damaryadei mɨ'. 20Suyarɨ' walagɨ'dura'nɨkerɨ' mwagalɨvɨpaidɨvɨtabaaibɨ'
Dɨragɨmaayaraavɨ kayaaka yɨgaladei mɨ'.
Laamɨvananyavɨre wikɨya' maalɨ'na nade' yɨgaa'mwadɨvɨtabaaibɨ'
Sɨmunyavɨ nɨmɨnyɨna maalɨ'na yawɨ'nɨkeraavɨ yɨgaa'mwagathei mɨ'.
Kuna yadaawori yɨda'maraangebwi yunebanna waradehaa'nanyɨ.
21Ajɨmya yuyangɨyara sahwarɨ lɨmwabɨ'delyɨ.
Padaihasamaarya'nerɨ sahwara yemwaaibɨ'delyɨ.”
Pɨropetɨya Aazaayai sara dɨnɨkesɨ.
“Yɨmaka Naangei Jizaazarɨ wɨgaimwamanɨke'nanyɨ,” desa'nesɨ.
(Maakɨ 3:20-30; Lukɨ 11:14-23; 12:10)
22Dazagaa' gamɨnyawɨnna a'mwe pwarɨ makabɨna yɨna ye'. A'mwe dazarɨ yɨmakei wɨlamwaalɨkei. Yɨmakei wɨlamwaaidɨsɨya'na sahwai tɨbɨnyai yɨma'nyɨna, maanga bɨpainɨkei yɨma'nyɨna yakelyɨ. Sahwarɨ Jizaazai nawɨ'nya yavada'gaina yakevɨdaa'nyɨ maanga bɨpainɨkei yagaala dɨna yaka tɨnna wanganna. 23Yɨ a'mwe kwala bwa'naanya yuya lɨka yɨwainɨgulɨna yɨna yeva dɨnyɨna “Dazai Ne Devitɨmɨre Kaimɨraayarɨ yemwaaimanɨgo sahwai dɨngaka!” 24Kɨrɨ' Perɨzɨyara sa' kadɨka wɨ'nyɨna yeva dɨna “A'mwe dazai yɨmakeraavɨ maremwaaidei Biyelɨzɨvulɨmɨre dɨragɨnya' maaraka yɨmakeraavɨ wɨdaasɨvanɨkelyɨ.” 25Sara dɨna yadaapi kumɨre sɨmunyangɨ mena yawɨranganna yaka wɨdɨna “Maremwaaide gave pɨbadaa'nyara pɨvakaai mararangɨvainadɨvɨ' mala bwa'nɨpɨja' maremwaaide daza' kayaaka yɨma'nadesɨra. Nabaai a'mwe anga pɨbanyara anga kɨrɨvɨyara tɨnnyaba mararangɨvainadɨvɨ' mala bwa'nɨpɨjaraavɨreba warade' mɨ'. 26Sabaaibɨ' Saataanɨmɨrera jaapainyɨna yadɨvɨ' pwara Saataanɨmɨre pwaraavɨ wɨdaasɨpɨjavɨdaa'nyɨ Saataanɨmɨre maremwaaide' gara daavadevaka! Aawa. Kayaaka yɨnadevaakɨra. Kɨrɨ' Saataanɨ manyɨgaimwagyada yɨmakeraavɨ wɨdaasɨvanɨge. 27Nabaai nyɨdɨwaasa'na Saataanɨmɨre dɨragɨnyavɨ yɨmakeraavɨ wɨdaasɨwɨjɨ kwajɨ sarɨmɨre mɨdɨdɨvɨsara yɨmakeraavɨ wɨdaasadɨvɨsara dɨragɨnyavɨ aaihwarevɨ wɨdaasɨvanɨga'! Sare'na mɨ'. Sarevɨ sarɨmɨrera sarɨmɨnyɨ yawɨbwa'na ‘A'mwera Saataanɨmɨre dɨragɨnyavɨ yɨmakeraavɨ mudaasɨvanɨgava! Sabwi aawaawa!’ Sara yawɨbwapɨ'derera sarɨmɨrera. 28Kɨrɨ' Gotɨyare Kuryai nyɨgaimwadaawojɨ yɨmakeraavɨ wɨdaasɨwɨja' yɨ sarɨmɨ jawɨranganyide ‘Nemɨnyawɨnna Gotɨyai maremwaaide' mena bɨwaka! Sare'na yɨmakeraavɨ sahwai wɨdaasɨvanɨkelyɨ.’ Sara jawɨranganyide.” 29Gamɨnyɨne'na ke'ba'na wɨdɨna “Pwai kwai yawɨrajai ‘Dɨragɨnyare gɨlyɨvɨsangɨ gara maarɨdeinyaka?’ Dɨragɨnyare angevɨ wɨlɨna yaka Dɨragɨnyarɨ wɨla yune'na yɨrapwekaka yɨ sagaa' gɨlyɨvɨsa maragɨ'mwagamaa'na yɨwakelyɨ. 30Pwai manyɨgaimwagyɨvanɨkei sahwai nɨmɨre yɨkamaangelyɨ. Sai nɨmɨreraavɨ mye'mwannayɨ'bwaramwaaihyɨvanɨgolyai pɨwɨ pɨwɨ nɨmɨreraavɨ tamaasɨvanɨkelyɨ. 31Sarevɨ yɨhɨthɨvanɨge. Kayaa'nanya yuyajɨ bɨrala saza dadɨvɨsajɨ Gotɨyai marasɨ'nadelyɨ. Kɨrɨ' Kurya Tewaanyarɨna yagaaibɨraizɨka dazare wagɨlya' marasɨ'nadei mɨ'. 32Gazaizai A'mweraavɨne Kaimɨraayarɨna yagaala kayaa'nanya' bɨrala dazai yɨ gamɨre wagɨlya' Gotɨyai wɨmarasɨ'nadelyɨ. Kɨrɨ' gazaizai Kurya Tewaanyarɨna yagaala kayaa'nanya' dazai yɨ gamɨre wagɨla daza' marasɨ'nadei mɨ'. Aawa. Dahaa' kɨgaasɨ dɨvi yɨma'nade kɨgaasɨ waragwothesɨ. Kurya Tewaanyai yadengɨna pwai bɨralya' dazai ‘Saataanɨmɨre dɨragɨnyasɨreva,’ wagɨla daza' Gotɨyai marasɨ'nadei mɨ'.
(Lukɨ 6:43-45)
33Nabaai sarɨmɨ yawɨrangabɨneihɨlyɨ ‘Yɨsɨ' tewaanyɨkɨ,’ dɨpɨja' ‘Yɨ gamɨre yɨsɨla kɨnɨjɨ tewaanyangɨra,’ dɨpɨneihɨlyɨ. Nabaai ‘Yɨsɨ' kayaa'nanyɨkɨ,’ dɨpɨja' ‘Yɨ gamɨre yɨsɨla kɨnɨjɨ kayaa'nanyangɨ,’ dɨpɨneihɨlyɨ. Sare' dare'nesɨ. Yɨsɨlanna a'mwera wangadɨvɨ' yɨsɨlyangɨne yɨsɨkana yawɨ'dɨvɨkɨ. (Nabaai “Jizaazai tewaanyanna yadevɨdaa'nyɨ sahwai tewaanyalyɨreva.”) 34Naawɨnaanyarɨdaa'nyaihi, a'mwe kayaa'nanyaihi mwaaihasa'na yagaala nawɨ'nya gatha'dara dɨpɨneihɨlaka! Sare' dare'nesɨ. A'mwere sɨmunya yunevɨ yawɨ'de daza maangevɨdaa'nyɨ dadelyɨ. 35A'mwe nawɨ'nyai gamɨre sɨmunyavɨ yawɨta tewaanya wɨlawa'delyɨ. Sarevɨdaa'nyɨ yagaala yuna tewaanyabwina dadelyɨ. A'mwe kayaa'nanyai gamɨre sɨmunyavɨ yawɨta kayaa'nanya wɨla'delyɨ. Sarevɨdaa'nyɨ yagaala kayaa'nanyabwina dadelyɨ. 36Kɨrɨ' sarevɨdaa'nyɨ yɨhɨthɨvanɨge. Kotɨya marya'ne yɨrɨkerɨkɨ Gotɨyai yagaala gazaza yaasɨwa'na damaryadɨvɨsanna maryawɨbwaradengɨra. 37Sare' dare'nesɨ. Yune gɨmɨre yagaala dadɨnya dazahɨrɨvɨna Gotɨyai ‘A'mwe yɨda'maraangeigɨnyɨra,’ gɨthathelyɨ. Nabaai gɨmɨre yune yagaala dadɨnya sahɨrɨvɨna ‘A'mwe kayaa'nanyaigɨnyɨra,’ gɨthathelyɨ.”
“Dɨragɨnya' wɨjɨwaainya' ja!” wɨdesa'nesɨ.
(Maakɨ 8:12; Lukɨ 11:29-32)
38Dazagaa' Kɨwɨja pwarajɨ Perɨzɨya pwarajɨ sara ma'maa'na “Wɨjɨwaakyaigɨ, nevu'nɨvanɨke'na tɨnna wanganya'nevɨna atɨka maru'nasa' wɨjɨwaainya' ja! (Wanganawaajɨ ‘Jizaazai nebulya' nedɨvanɨkelyɨ,’ yawɨraadera.)” 39Wɨdɨna kye' sai ja'nawɨdɨna “Dahaasaihi kayaa'nanyaihɨlyɨ. A'mwei mwaaidɨ'nyɨ a'mwe' pwaraavɨ tidavamaryadevaaibɨ' Gotɨyarɨ nayaa mi yadɨvɨ' gevwi yadɨvɨsaihɨlyɨ. Sareihi nyɨdɨwaa' ‘Wɨjɨwaainya' wanganawaajɨ gyawɨranganaadeinera.’ Kɨrɨ' wɨjɨwaainya pɨnɨ myɨhibwarɨdaakwɨwɨna! Aawa. Wɨjɨwaainya pɨropetɨya Jonaamɨre'na yune sahɨrɨ'na yɨhibwarɨdaakwɨdeinyɨ. 40Sare' dare'nesɨ. Kɨgaa' Jonaa jawɨnya naangevɨre munyɨkɨ wɨla'dɨ'nyɨ yɨrɨka daryaai darɨ' wavɨlavakabaai A'mweraavɨne Kaimɨraayai kwaakevɨ kusawɨ wɨla'dozɨ yɨrɨka daryaai darɨ' wavɨlavadelyɨ. 41Kotɨya marya'nevɨ Menya Ne sɨnnawɨnya Ninɨva mwaalyarajɨ dahaasa daihɨlyɨ daavapɨjɨ sahwara sarɨmɨre kayaa'nanyabwina yɨhɨzɨdapɨ'derera. Sahwara Jonaa yagaala wɨjaakevɨ kadɨka nayaa wɨ'neva sɨmunya mudɨkebwina yawɨramaryaasa'nanyɨ. Yɨthaanyi, dahaa' dava pwai mwaalɨ' Jonaamɨ wavɨlavɨkei. Sahwarɨ sarɨmɨ kadɨka wɨ'neva malɨmwagaryɨgasa'na sahwara yɨhɨzɨdapɨ'deihɨlyɨ. 42Kotɨya marya'nevɨ a'mwe naange' kwinɨya' kwaaka aayawɨdaa'nyavɨjɨ dahaasa daihɨrɨjɨ kihithɨkaavojɨ kwinɨya daza' sarɨmɨre kayaa'nanyabwina jalɨkurakadesɨ. Tuta saamɨnaanga kɨrɨvɨ Solomonɨmɨre kunya nawɨ'nyaange' wɨ'nya'ne' byaake'nanyɨ. Yɨthaanyi, dahaa' dava pwai mwaalɨ' Solomonɨmɨ wavɨlavɨkei. Sahwarɨ sarɨmɨ kadɨka wɨ'neva mamɨdɨnyɨvanɨgasa'na kwinɨya daza' yɨhɨzɨdavadeihɨlyɨ.”
(Lukɨ 11:24-26)
43Ke'ba'na wɨdɨna “Nabaai yɨmakei a'mwe pware munyɨkɨdaa'nyɨ bwalaawɨna yaka anga a'gaaye pɨbanna bɨrya'nei yaalɨkɨryabanna kaanya yɨwɨnama'na. Kaanya yɨwɨnama'na yada kɨrɨ' mwaalya'ne saba mabɨramaari yajai 44dɨna ‘Nɨnnya angevɨdaa'nyɨ bwalaawɨna yɨwebanna ayɨna wɨdeinyɨ.’ Sai wɨna, anga savɨ tɨnna wanganna ‘Mena tɨrɨmaaya bwakɨreva aaraare yɨdakɨwaata kune' daaka! Yune kunesɨ. Wikɨra.’ 45Sara dazai kaanna wɨna, yɨmaka ata purɨdaa'nyɨ pwaraalyaraavɨ wɨjɨma'naawɨna. Yɨmaka gazaizare kayaa'nanyabwi yɨmaka sɨnnawɨnyare kayaa'nanyaburɨ wavɨlavɨkerera. Sareraavɨ wɨjɨma'naawɨna yaka a'mwere munyɨkɨ yuyara bulamwaaina. Sɨnnawɨ yɨmaka pwarɨna a'mwe sai kayaa'na mwaalɨna, dɨvidaa'nyɨ yɨmaka kayaa'nanaangeraavɨna sai kayaa'na naanna mwaalɨna. Nabaai yune sasare sahɨbwina dahaasa a'mwe kayaa'nanyaihɨrɨne' yɨma'nadesɨ.”
Jizaazarɨ ganaangesɨ gahwaalaangerajɨ sanakaavɨnesɨ.
(Maakɨ 3:31-35; Lukɨ 8:19-21)
46Kwala bwa'naanyavɨ yagaalya' kuna wɨdadaa'nyɨ, yɨthaanyi, mwasawɨ gamɨre ganaangesɨ gya'mwerajɨ bathaa'na. “Gamɨjɨ yagaala ye'mwannadaana!” deva bathaa'na yɨna ye'. 47Bathaa'na yɨna yadapɨjɨ pwai tɨnna wanganna yaka Jizaazarɨ wɨdɨna “Yɨthaanyi, gwaangesɨ ja'mwerajɨ ‘Yagaala ye'mwannadaana!’ deva mwasaba bathaakava!” 48Sara kuda' kɨrɨ' sahwarɨ ma'maa'na “Nɨmɨnyɨ nɨwaa' aaihɨrɨvaka? Nɨmɨnyɨ nya'mwera aaihwaravaavaka?” 49Wɨdɨna yaka gamɨnyɨ mɨdɨdɨvɨsaraavɨ ata yɨda'na yaka wɨdɨna “Yɨthaanyi, dazahwara kumɨre kuryaraavɨna nɨmɨnyɨ nɨwaasɨ nya'mwerajɨ sanaka mwaaiha'. 50Sare' dare'nesɨ. Sɨgunyavɨ Nɨmaamaangei mwaalɨkere sɨmunyabwi mɨdɨnajai sahwai nya'mwelyɨ. Sahwai nya'mwesɨ. Sahwai nɨwaasɨ.”
موجودہ انتخاب:
Matɨyui 12: byr
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Wycliffe Bible Translators, Inc. All rights reserved.