Jenɨzɨzɨ 41
41
Jozepɨyai Peroyare waja wɨjɨwaakɨna yaa'.
(41:1-36)
1-8Kwarame pɨrɨwaai kwavɨlava' sawɨta pɨrɨkɨ Pero waja pɨrɨwaai ya'na'. Ya'nyɨna yaka mwanyavɨ kave yɨdaakuna kya' a'mwe kwai a'mwe kɨrɨ' waja sawaarɨna kunnakai mamwaalya'.
9-13Kunnakei mamwaalyɨ kya' Peroyare wapaaya wɨmaaryadei Peroyarɨ wɨdɨna “Dahaasagaa' Jozepɨyarɨna yawɨ'mwa. Nɨmɨjɨ gɨmɨre gɨrɨkula yɨdɨka yadelyɨ sainaarɨna sɨnna tɨka kagɨthava' kalavuzavɨ maranehɨmwaaihagɨ. Sawɨta pɨgaa' waja ya'nɨgolyainaalyɨra. Jozepɨyai Yɨvɨruyarajɨyai saba mwaalaka naarɨmɨre waja nehɨzɨwaaka'. Nehɨtha' ‘Pero “Gɨmɨre wawɨnya sɨnnawɨnya' jɨ!” gɨthathera,’ sara nyɨda'. Gɨrɨkula yɨdɨka yaderɨ ‘Pero wɨla maragɨrɨdavadera,’ wɨda'. Gamɨre yagaala nebulyasɨra. Sara nehɨthake' sara yagɨ,” wɨdɨna ya'.
14-24A'mwe naangei Pero Jozepɨyarɨna wɨdasaabɨna ya'. Wɨdasaabɨna kya' Jozepɨyai maryaata wɨrɨ'nyɨna yaka kwaabɨhannya tewaanya baazɨ'ma'nya tewaanya marira'nyɨna yaka buladaa'na ya'. Buladaa'na yadɨsɨ Pero wɨda' “Nɨmɨ waja ya'nyawaaihe' a'mwe yuyara a'mwe yuya manyɨjɨwaa'. Gɨmɨnyɨna ‘Waja ya'nadɨvɨtanna wɨdadelyɨra a'mwe sai,’ nyɨdɨwa' pwai.” Sara kuda' “Nɨmɨre Gotɨyai gɨmɨre waja'na nayaa gɨzɨwaakadera,” wɨda'. Pero Jozepɨyarɨ wɨdɨna “Waja dasa' Aalya Naayɨlɨ aalɨmaangevɨ daa'deri bulɨmakaawoya wapemɨnnaka daraai daraai daraai dalyara aalyavɨdaasɨ bilaawɨna yawaaiha'. Bilaawɨna yeva bulɨmakaawoyara kurɨya mudɨ'mɨlanyɨna yadaapi bulɨmakaawoya maalɨka daraai daraai daraai dalyara aalyavɨdaasɨ bilaawɨna yeva bulɨmakaawoya naangeraavɨ maalɨkera tɨka bilanyɨna yawaaiha'. Nyɨna kyawaaiha' nɨmɨ dɨkaa'na yena nabaai se wa'mwarena ya'ne waja pɨrɨ' ya'nyawaaihe. Witɨyagɨnya' gave pɨrɨ'nanyavɨ sɨla naanga dawaai dawaai dawaai dasa yɨ'nɨwakengɨ banganakeinyɨ. Sɨla tewaanya pɨnɨ dɨvidaasɨ yɨ'nyɨna. Yɨ'nyɨna yaka kuzɨ'nya warɨke witɨzɨla sɨnnawɨnya tewaanya yɨ'nɨwakengɨ maranyɨna yadaapi banganakeinyɨ. Wajawaai sara ya'nɨwa,” wɨdɨna ya'.
25-36Pero mi'na kuda' Jozepɨyai wɨda' “Wajawaai pɨrɨwaai sara yɨwaanya kɨrɨ' avaala gɨzɨwaakɨma! Bulɨmakaawoyaraavɨna ya'nɨwaa'najɨ witɨzɨla'na ya'nɨwaa'najɨ avaaiyagaala gɨthɨdera. Gotɨyai dɨvi sara yade'na sara gɨzɨwaainɨvanɨka giwɨriwa'. Kwarame dawaai dawaai dawaai da' wavɨla'daawojɨ Yɨzɨpɨ dava wapaaya naanga waradevanyɨra. Kwarame dawaai dawaai dawaai da' kwavɨlavojɨ kwarame dawaai dawaai dawaai da' sagaa' mɨjɨka dɨvalyidevanyɨra wapaaya mwaryadozɨ. Nɨmɨre yagaala dɨwe'na ‘Dahaa' a'mwe sɨdu'nakei a'mweraavɨ kwarame tewaanyagaa' wɨdasaawɨna “Mɨjɨkegaa'nana wapaaya naanga kanyɨjaavapɨjɨ angengɨ marikwakɨna yɨdera,” dada yaderɨ dumwaaihya! Sara kya'gɨzɨ mɨjɨkegaa' wapaaya tɨka nya'ne waradegaakɨra sagaaka.’ ”
Peroyai Jozepɨyarɨ Yɨzɨpɨ maremwaaiderɨ wɨmwaaihɨna yaa'.
(41:37-57)
37-45Peroyai Jozepɨyarɨ wɨda' “Gotɨyai gamɨre sɨmunya gɨzaava'. Nɨmɨre wawɨnyasɨ Yɨzɨpɨ kwaakesɨ dɨmaremwaaidera.” Sara wɨdaka gannya ataka magalabwapaina yaka “Nɨmɨre wawɨnya yadelyɨra,” daka Jozepɨyare asarɨ ataka yɨhɨna ya'. Nabaai baazɨ'ma'nya tewaanya marawɨbaazɨ'makuna yaka nɨgwia golɨya mararɨnna ya' Peroyai. Mararɨnna yaka Yɨzɨpɨ mwaalya' a'mwe nawɨ'nya' Jozepɨyarɨ balaange' wɨmaarina ya'. A'mwevɨne yaya' Aazanaatɨ wo'nɨkesɨ.
46-57Jozepɨyai kwarame 30 kwavɨlava' sagaa' Peroyare wawɨnya ya'nei yɨma'na'. Kwarame tewaanya dawaai dawaai dawaai da' sagaa' wavɨla'daa'nyɨ anga yuyaba wapaaya naanga marikwakɨna. Marikwakɨna kya' kwarame dawaai dawaai dawaai da' sagaa' mɨjɨka naanga yɨma'na'. Mɨjɨka naanga kyɨma'na' sabanyara Peroyarɨ wapaayanna jaka wɨdɨna. Jaka wɨdɨna kye' Pero wɨda' “Jozepɨyaryawɨnna dɨwila! Gamɨ sara yɨhɨthathe' sara jɨla!” Jozepɨyai a'mweraavɨ wɨ'naka anga tɨka wapaaya wakadɨvɨsavɨ basamakwina yaka wapaaya mubɨna ya' a'mwe Yɨzɨpɨ mwaalyaraavɨne. Nabaai kwaaka yuyabanna mɨjɨka naanga wa'dɨsɨ pɨbanyara “Nemɨ Yɨzɨpɨ saba wapaaya mubaana!” dɨneva bɨna yeva wapaaya mubɨna ye' Jozepɨyarɨ.
موجودہ انتخاب:
Jenɨzɨzɨ 41: byr
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Wycliffe Bible Translators, Inc. All rights reserved.