Jenɨzɨzɨ 42
42
Jozepɨyarɨ gya'mwera Yɨzɨpɨna wɨna yeva wapaaya mubyaa'.
(42:1-25)
1-5Kainanɨ kwaaka wapaaya mwaryadɨsɨ “Kwaaka Yɨzɨpɨ wapaaya warɨ',” dɨdaapi Jaikopɨ wɨ'nyɨna. Sara wɨ'nyɨna yaka gawaalɨvaangeraavɨ wɨda' “Kwaaka Yɨzɨpɨ sabanna wopɨjɨ wapaaya dɨmubyideihɨlyɨra.” Mi'na wɨdaka “Bejaminɨ wɨryaakei nyɨbwaalɨ' nabaladɨka! Dava mwaaladelyɨra,” daka Jozepɨyarɨ gya'mwe ata yuyɨraai darera gavera wɨdasaawɨna kya' kaanna wɨna yeva Yɨzɨpɨna yɨ'mavaawɨna ye'.
6-7Gya'mwera Yɨzɨpɨna yɨ'mavaawɨna yeva Jozepɨyaryabanna wɨna yeva “A'mwe naangeigɨ,” deva gɨ'du'na ye'. Gɨ'du'na kye' Jozepɨyai dara wanganake' “Ai, sara nya'mwera dava damwaaiha'.” Mi'na dɨna kya' “Jozepɨyalyɨra,” majara “Yɨzɨpɨyalyɨra,” dɨne' kumɨzara. Jozepɨyai “Nɨmɨ kwaasɨ yagaala wɨdɨma!” daka maange'bɨ' wɨdɨna “Gawɨdaasaihɨla'!” wɨdɨna ya'. Gya'mwera “ ‘Wapaaya mubaana!’ dona Kwaakabanne yaya' Kainanɨdaasainera,” wɨdɨna ye'.
8-17Jozepɨyai gannya waja'ne gya'mweraavɨna yawɨraka wɨda' “ ‘Nemɨ kwaaka kuka maraana!’ deva dava sarɨmɨ bwangamwaava.” “Arɨkawɨnyɨra. A'mwe naangeigɨ, ‘Wapaaya mubya yaana!’ dona bonanyɨra. Kainanɨ mwaalyare gawaalɨvaanga atɨraai sɨvɨla purɨdaasɨ pwaraalyɨyainera. Wɨryaakei ganɨmaangelyɨ mwaaihi. Neya'mwe pwai bala'.” Sara kude' Jozepɨyai wɨdɨna “Sarɨmɨnyɨna yaamɨjɨ yɨhyɨdeinyɨ. Davanna sarɨmɨre wɨryaakei mabi kyojɨ davadaasɨ mwɨyɨ jideihɨlyɨ. Gave pwai kaanna wɨna yojɨ wɨryaakerɨ wɨjɨma'naawɨna yadelyɨra. Sarɨmɨ pwaihi kalavuzavɨ dɨmwaalyide. ‘Sarɨmɨre yagaala kwaasɨ nyɨde',’ da'mujɨ sɨmunya' sarɨmɨnyɨna ‘Damakaanyara bɨvanɨgava,’ yawɨrɨdeinyɨra.” Mi'na wɨdaka kalavuzavɨ yuyara wɨmwaaihɨna ya'.
18-25Sawɨta pɨryaaina kajɨnna' Jozepɨyai wɨdɨna “Nɨmɨre dɨwɨja'na jide. Gave pwai kalavuzavɨ mwaalanne'ne'na pwara wapaaya sarɨmɨre kɨnɨdakaavɨne makuna yɨpɨ'dengɨra. Wɨryaakerɨ kanyɨmakabapɨjɨ sarɨmɨre yagaalya' yawɨrɨdeinyɨra. Sara kyawɨra'mujɨ mabalyɨ jideihɨlyɨra.” Jozepɨyai Yɨzɨpɨ yagaala wɨdadaa'nyɨ pwai maridɨna kya' Jozepɨyarɨ gya'mwera kunnya yagaala dɨne' “Negwaalaanga Jozepɨyarɨna kayaa'na yo. Gamɨ kɨnna dadaasɨ wanganona nemɨ dɨragɨnna mwaalo'na dahaa' Gotɨyai nemɨnyɨne' kayaa'na neyɨvanɨ'.” A'mwe Ruvanɨ gya'mweraavɨ wɨda' “Nɨmɨ yɨhɨthe ‘Mɨgɨnyarɨne kayaa'nanyabwi mipɨnera!’ Kyɨhɨthe' mwɨ'nyɨje'.” Ruvanɨ sara kuda' Jozepɨyai mwasawɨnna kaanna bwalyuna yaka kɨnna dɨna. Kɨnna dɨna yaka Sɨmɨyanɨmɨ maaraka wɨla pwɨyɨna. Wɨla pwɨyɨna yaka wɨdaayaderɨ kave wɨdɨna “Wapaaya kumɨre gɨlya dɨmaramihya! A'mwe gei gere nɨgwia gannya gɨlyavɨ dɨmihya! Nabaai wapaaya tusavɨne dumaari!” Sara wɨdɨna kya' sara ya'.
Jozepɨyarɨ gya'mwera Kainanɨ ayahi wɨna yaa'.
(42:26-38)
26-28Jozepɨyarɨ gya'mwera wapegɨlya maareva jɨlɨkyaawarya dogiyaraavɨre bulevɨ a'ba yɨlamarakɨna yeva angebanna kaanna makuna ye'. Kaanna makuna kye' pɨba wa'mwaresaba a'mwe pwai “Nɨmɨre jɨlɨkyaawaryarɨne wapaaya wɨmaarima!” daka gannya wapegɨlya' maarɨna yaka wɨlya' maryaa'na. Maryaa'na yaka dara wanganake' “Ai, wapaaya a'ba nɨmɨre nɨgwia darɨka! Ai, nɨgwia da aai mihɨwaka!” Sara daka gya'mweraavɨ wɨda' “Nɨmɨre nɨgwia gɨlyavɨ minnarɨ'.” Tɨvi'na kuda' yuyara lɨka yɨna yeva dɨne' “Gotɨyai baarɨ' neyɨwaka?”
29-38Kwaaka Kainanɨna bɨna yeva kuvɨnɨmaanga Jaikopɨmɨ sara yesa' sara wɨdɨna. Mi'na wɨdɨna kye' Jaikopɨ wɨda' “Jozepɨyai mamwaalyɨ'. Sɨmɨyanɨ mamwaalyɨ'. Dahaa' sarɨmɨ ‘Bejaminɨmɨ makuna yaana!’ dapɨjɨ makuna jide' daaka! Savɨ kale nyɨwaka. Bejaminɨ mwaalana!” Sara kuda' Ruvanɨ ganɨmaangerɨ wɨjaa' “Bejaminɨmɨ nyɨjaama! Maremwaalɨdeinyɨ. Aya gɨmɨnyawɨnna mulaabi kya'mujɨ nyɨbwaalɨvaangeraarɨ dɨramakya!” Wi'na kuda' Jaikopɨ “Nyɨbwaalɨvaangelyɨ mwikanera!” wɨda'.
موجودہ انتخاب:
Jenɨzɨzɨ 42: byr
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Wycliffe Bible Translators, Inc. All rights reserved.