Jenɨzɨzɨ 27
27
Aazakɨ Jaikopɨmɨ yagaala tewaanya' wɨjaa'.
(27:1-29)
1-4Aazakɨ a'mwe nei tɨnna mwanganyɨna, Yɨzorɨ jaka wɨdɨna kya' Yɨzoi wɨlaabɨna kya' wɨda' “Nɨmɨ a'mwe neinyɨ maalɨkegaa' balɨdeinyɨ dɨngaka? Naangegaa' balɨdeinyɨ dɨngaka? Mwata mwaryagɨnya dɨmaa'! Yɨ'daryawɨnna wawa'gɨzɨ yɨkurɨyaawia nyɨbalayaawa! Yɨkurɨyaawia maara'gɨzɨ nɨmɨnyɨne waburya'na mɨwɨta tewaanya dɨvɨraaya! Nɨmɨ mi'na na'mujɨ gɨmɨnyɨne yagaala tewaanya' gɨthɨdera.”
5-17Yɨzoi yɨkurɨyaawɨhaya'nei kaanna kwawa' Revekaa' Jaikopɨmɨ Aazakɨ wɨdake' aya wɨda'. Mi'na wɨdaka wɨda' “Nɨmɨre dɨwɨja'na ja! Jɨlɨkyaawarya maalɨkewaarɨ memeyawaarɨ dɨmaa'de'na nɨmɨ mɨwɨta tewaanya gɨmaamaangerɨne pɨraayɨdera. Kavɨraaya'mujɨ gɨmɨ maara'gɨzɨ duzaade. Gamɨ nojɨ yagaala tewaanya' gɨthathelyɨ.” Sara kuda' Jaikopɨ wɨda' “Nyɨdaakaangei Yɨzoi kwazaaki'nakelyɨ. Nɨmaamaangei awaarimaayainyɨ nyɨmwanganojɨ ‘Jaikopɨ kwaasɨ yɨvanɨka,’ dozɨ yagaala tewaanya' manyɨjɨ nanyadɨka! Yagaala kayaa'nanaange' nanyɨdathɨka!” Sara kuda' Revekaa' wɨda' “Yagaala kayaa'nanaange' gɨthozɨ nɨmɨnyɨ nyɨdathesɨ. Nɨmɨresɨra. Sa' dɨwɨja'na ja!” Sara kuda' Jaikopɨ sara kya' mɨwɨta pɨraayɨna ya'. Pɨraayɨna yaka Yɨzore kannyɨla tewaanya maaraka Jaikopɨmɨ marirakuna ya'. Marirakuna yaka memeyavɨ kɨlaake' asawaarɨ tɨlɨnnyavɨ marabaazɨ'makwɨna ya'. Mi'na yaka Jaikopɨmɨ Aazakɨmɨne wapaaya wɨmaarya'.
18-29Wapaaya kumaarya' Jaikopɨ Aazakɨmyawɨnna wawaka wɨda' “Nɨmwai!” Mi'na kuda' Aazakɨ wɨda' “Nyɨbwaalɨ' aaihwaigɨna'?” “Yɨzoinyɨ gɨmɨre sɨraangeinyɨ gɨmɨ sara nyɨdɨwaanya' sara yɨwa. Dahaa' nɨmɨre yɨkurɨyaawia dɨnana! Mi'na na'gɨzɨ yagaala tewaanya' nyɨdatheinyɨ.” Mi'na kuda' sa' Aazakɨ wɨda' “Yɨkurɨyaawia yaraina yaraina gara tamwaana?” Jaikopɨ wɨda' “Gotɨyai kanyɨjaawa' tamwengɨ.” Aazakɨ wɨda' “Davanna dɨvama! Gɨmwanganɨma!” Sara kuda' Jaikopɨ bɨna kya' Aazakɨ ata mwanganna yaka wɨda' “Jaikopɨmɨre maanguraaya' gu'nena gɨmwangamwa. Gɨmɨre asa' Yɨzore'bɨ'nanyasɨra. Yɨzoigɨ daaka?” Sara kuda' Jaikopɨ wɨda' “Sahwainyɨra.” Aazakɨ wɨda' “Nyɨdɨwaanya' yɨkurɨyaawia nyɨjaama! Nɨmɨ nɨma! Mena na'mujɨ yagaala tewaanya' gɨthɨdero.” Aazakɨ kuda' Jaikopɨna kujaava' Aazakɨ mɨwɨtajɨ aalya waainɨyasɨ naka wɨda' “Dava dɨvama! Yɨlaaya marinaka!” Mi'na kuda' kɨnɨdaai yɨlaaya marinagi. Aazakɨ gamɨre baazɨ'ma'nya kannyɨla tɨrɨnya winnaka yagaala tewaanya'na wɨdɨna “Gɨmɨre baazɨ'ma'nya kannyɨla Gotɨyai wapaaya tewaanya yɨrɨvadɨwakebadaasɨ wawɨdɨrɨnyavɨ winnɨwa. Gotɨyai gɨmɨnyɨne burɨke' wɨjaavɨna, sɨlɨja wɨjaavɨna, kwaaka tewaanya wɨjaavɨna gyadeigɨnyɨ. Gɨmɨre wawɨnyavɨ tɨka munne naanga gɨryadengɨ. A'mwe pwara gɨmɨnyɨ gɨthaayɨpɨ'dera yɨma'napɨjɨ ‘A'mwe naangeigɨ,’ gɨthɨpɨ'deigɨnyɨ. Gɨmɨ naangeigɨ jɨma'nadeigɨnyɨ gɨmɨjɨyara maalɨka yɨma'nɨpɨ'dere. Nabaai gɨmɨjɨyara ‘A'mwe naangeigɨ,’ gɨthɨpɨ'deigɨnyɨra. A'mwe pwai yagaala kayaa'nanaange' kagɨthozɨ gannyasɨra. A'mwe pwai yagaala tewaanya' kagɨthozɨ gannyasɨra,” wɨda' Aazakɨ.
Yɨzoi dara wɨ'nyaake' “Aazakɨ Jaikopɨmɨ yagaala tewaanya' duthɨvanɨka!”
(27:30-40)
30-40Aazakɨ kuda' Jaikopɨ wɨna kya' avaalyagaa' Yɨzoi wapaaya maarɨna yaka bɨna yaka ganɨmaangerɨ wɨda' “Yaawia gɨmɨnyɨne maa'mwe dɨnana! Mi'na na'gɨzɨ yagaala tewaanya' nyɨdathera.” Sara kuda' ganɨmaangei wɨda' “Aaihwaigɨnaka?” “Yɨzoinyɨra. Gɨmɨre sɨraangeinyɨra.” Sara kuda' Aazakɨ bɨ'bɨta wida wɨda' “Wapaaya aai nyɨjaawaka? Nena wɨdɨwa yagaala tewaanyawo. Sɨnnawɨ yagaala tewaanya mi'na wɨdena dɨvidaa'nyɨ mudɨka wɨja sa' aawano.” Mena kuda' Yɨzoi kɨnna daka wɨda' “Nabaai yagaala tewaanya pɨnɨ nyɨdana!” Sa' Aazakɨ wɨda' “Jɨhwaalaangei kwaasɨ kanyɨdɨwa' wɨdɨwa ‘Gɨmɨ a'mwe naangeigɨnyɨ. Ja'mwei wabelyɨ. Gɨmɨre kaimɨraayara gamɨreraavɨ maremwaaibɨ'dere,’ wɨdɨwa. ‘Nabaai gamɨre wawɨnya tewaanna yadengɨ,’ wɨdɨwa.” Sara kuda' Yɨzoi kɨnna maredɨna yaka wɨda' “Nɨmɨnyɨne yagaala tewaanya pɨrɨ'na nyɨdana!” Aazakɨ wɨda' “Kwaaka kayaa'nanaangeba burɨka maalɨka yadeva saba dɨmwaaideigɨnyɨ. Gɨmɨnne wapaayanna mala dɨradeigɨnyɨ. Gɨmɨ jɨhwaalaangerɨne duthaayɨdeigɨnyɨ. Sa' dɨvidaasɨ yagalya'makuna jɨtheigɨnyɨ.”
41-46(-)
موجودہ انتخاب:
Jenɨzɨzɨ 27: byr
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Wycliffe Bible Translators, Inc. All rights reserved.