Jenɨzɨzɨ 26
26
Kwaaka Pɨlɨzɨtɨya mwaaidɨ'nyɨ Gotɨyai Aazakɨmɨ tewaanna yaa'.
(26:1-16)
1-6Kwaaka Kainanɨ Aazakɨ mwaaidɨ'nyɨ mɨjɨka wiadaa'nyɨ Kwaaka Pɨlɨzɨtɨya wawaka Geraa angebanna yɨ'mavaawɨna ya'. Sagaa' “Avimɨlekɨ kwaaka da' maremwaaidelyɨ,” wɨdesalyɨ. Gotɨyai Aazakɨmɨ wɨda' “Dava dɨmwaai! Yɨzɨpɨna munnera! Nɨmɨre yagaala gɨmaamaangei Evɨraamɨmɨ wɨdei tewaanna yakerɨne yagaala sa' gɨmɨjɨ kaimɨraayarari gɨmɨnyɨnajɨ tewaanna yɨhyɨdeinyɨra.”
7-11Aazakɨ mwaalaka Avimɨlekɨmɨ wɨda' “Revekaa' nya'mwesɨra.” Dɨvidaasɨ Avimɨlekɨ dara wanganake' “O, Revekaa' gannya balaange' daaka!” daka Avimɨlekɨ wɨda' “Revekaayaba be'na nedahɨna! Kwaasɨ yagaalya' ‘Nya'mwesɨreva,’ nedahɨ.” Mi'na sara kuda' “A'mweraavɨna lɨka yena yɨhɨthe.” Mi'na kuda' Avimɨlekɨ gannya maremwaaideraavɨ yagaala naanga wɨda' “Aazakɨmɨjɨ Revekaavɨjɨ sawaarɨ mipɨnera!”
12-16Aazakɨ Pɨlɨzɨtɨya mwaalaka witɨzɨla burɨnna kya' savɨdaasɨ sɨla naanga kyɨ'na' maara'. Nabaai gamɨre jɨlɨkyaawarya kwala naanga yɨma'nyɨna ye'. Pɨlɨzɨtɨya mwaalyara dara wanganesa' “Ai, Aazakɨmɨre gɨlyɨvɨta naangengɨra.” Deva aalɨbunyavɨ kwaake' maryabɨsɨ'na ye'. Maryabɨsɨ'na kye' Avimɨlekɨ Aazakɨmɨ wɨda' “Gɨmɨ dɨragɨnyaigɨnyɨra. Dava dɨhalya'maka!”
Aazakɨ aalɨbunya lɨkyaa'.
(26:17-33)
17-25Avimɨlekɨ ‘Dɨhalya'ma'!” kuda' Aazakɨ kaanna wawaka Geraa taawalyawɨ mwaala'. Saba Evɨraamɨ mwaalakegaa' gamɨre wɨdaayadɨvɨsara aalɨbunya lɨke'. Sɨnnawɨ Evɨraamɨ kabala' Pɨlɨzɨtɨyara kwaaka maryabɨsɨ'na ye'. Aazakɨ ayawɨ dɨvidaa'nyɨ jɨrɨpwasɨ'na'. Aazakɨmɨre wɨdaayadɨvɨsara aalɨbunya lɨkeva dara wanganesa' “Aalya' dalyuvanɨka!” desagaa' Geraa mwaalyaraavɨ sɨnna tɨka naanga wɨdava'. Kudava' Geraa mwaalyara wɨde' “Aalya da' nemɨresɨra.” Sara kude' Aazakɨmɨre wɨdaayadɨvɨsara aalɨbunya pɨrɨ' lɨke'. Kalɨke' Geraa mwaalyara ayaba “Nemɨresɨra,” kude' Aazakɨ wawaka aalɨbunya pɨrɨ' lɨka'. Mi'na kalɨka' sagaa' a'mwera kave mwaalɨna ye'. Kave mwaalɨna kye' Aazakɨ da' “Gotɨyai tewaanya nemwaaihakebanyɨra.” Dɨvidaasɨ Aazakɨ kwaaka Bɨyazivana wawaka kamwaala' Gotɨyai gamɨnyɨne tewaanna ya'. Aazakɨ tewaanya mwaalaka simɨnye' laabaka dɨke' yɨravaka jɨlɨkyaawaryarɨ wakaka Gotɨyarɨna yɨleyagaala da'.
26-33Dɨvidaasɨ pɨgaa' Avimɨlekɨjɨ gannya a'mwe naangelyɨ saraai wawagɨla wɨdahi “Gotɨyai gɨmɨjɨ yuyagaa' mwaimwaai. Nemɨ nya'mwana dɨnaadera,” wɨdahi. Mi'na kudahi Aazakɨ tɨka munne naanga yavɨgala'. Mwanyavɨ sagaa' nya'mwana dɨne'. Kadɨne' Avimɨlekɨjɨ a'mwe naangelyɨ saraai kaanna kwawagi Aazakɨmɨre wawɨnya wɨdaayadɨvɨsara Aazakɨmɨ wɨde' “Aalɨbunya pɨrɨ' kalɨkɨwo aalya yɨrɨ'na yɨvanɨ'.” Aazakɨ wɨ'naka “Nɨmɨjɨ Avimɨlekɨjɨ yagaala tewaanya dɨmwaai,” daka “Aalɨbunya sa' Siva dɨdeinyɨra,” wɨda'.
Yɨzoi a'mwe Etɨyawaarɨ maryaa'.
(26:34-35)
34-35Yɨzoi Etɨyaraavɨrebanna wawaka Bɨyarɨyare garaavaanga' Juthitɨ maarɨna. Nabaai Elonɨmɨre garaavaanga' Baazɨmatɨ maarɨna. A'mwewaai maavewaarɨ kamaara' Aazakɨmɨjɨ Revekaavɨjɨ sawaarɨ kale wia'.
موجودہ انتخاب:
Jenɨzɨzɨ 26: byr
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Wycliffe Bible Translators, Inc. All rights reserved.