SAN MATEO 7

Agüɨye pemboeko voi ïru vae

(Lc 6.37-38,41-42)

1Agüɨye pemboeko voi ïru vae, agüɨye vaerä peyemboekouka. 2Echa pemboeko rami etei, peyemboekoukata vi. Jaeramiño vi kërai ïru vae pe peyapo rami, oyapota vi peve.#Mc 4.24. 3Agüɨye emae ɨtɨ michi vae nerëtara jesa pe oï vae re, mbaetɨ reve remae ɨvɨra nderesa pe renoi vae re. 4Ngaraa ndepuere rere nerëtara pe: ‘Tëtara, taekɨ nderesa güi jókuae ɨtɨ michi vae.’ Echa nde renoi ɨvɨra nderesa pe. 5¡Jova mókoi vae! Eekɨ räri ɨvɨra nderesa güi. Jayave reecha kavita ndepuere vaerä reekɨ ɨtɨ michi vae nerëtara jesa güi.

6Agüɨye pemee oñeñono tee Tumpa peguarä vae yaɨmba reta pe. Jaeramiño vi agüɨye peñono ita ipöra vae reta kuchi reta ñogüɨnoia rupi. Echa opɨ̈rota ko jese reta jare güɨramoi oyerovata pesuu vaerä.

Yerure regua

(Lc 11.9-13; 6.31)

7Peiporu mbae Tumpa pe, jare jae omeeta peve. Peeka, jare peväeta. Pembopu öke, jare öke oyepeata peve. 8Echa opaete oiporu vae pe, oñemee. Jare oeka vae, oväe.#Dt 4.29; 2 Cr 15.2-15; Jer 29.13. Jare ombopu öke vae pe, oyepea.

9¿Oime pa pegüi reta taɨ oyerure chupe mbɨyape re vae, omee chupe metei ita mbɨyape jekovia pe? 10¿Ani oyerure chupe pira re yave, omee chupe metei mboi pira jekovia pe? 11Yepe tëi pe reta ipɨapochɨ vae reta, ërei pemee mbae ikavi vae pemichia reta pe. Vɨtei pa peRu ara pe oï vae, omeeta ko mbaembae ikavi vae oyerure chupe jese vae reta pe.#Jn 14.13-14; 15.7,16; 16.23-24; 1 Jn 3.21-22; 5.14-15.

12Jáeramo peipota yave ïru vae reta oyapo peve ikavi vae, peyapo ïru vae reta pe ikavi vae.#Lc 6.31. Echa kuae jae ko mborookuai jei vae jare ñeemombeúa reta jei vae.

Öke ipɨmii vae

(Lc 13.24)

13Peike öke ipɨmii vae rupi. Echa ipɨguasu ko öke jare tape kañɨtei kotɨ ojo vae. Jare jeta vae oike jókuae öke rupi. 14Echa ipɨmii ko öke jare tape ojo tekove opambae kotɨ. Jare mbovɨ yae ko oväe jókuae öke vae.#Sal 1.6; Pr 4.18-19.

Ia re yaikuaa vae

(Lc 6.43-44)

15Peyeandu ñeemombeúa jaanga reta güi. Oyemonde yogüeru pekotɨ vecha reta rami vae, ërei iyɨvɨte ko aguarayaɨmba pochɨ yae vae rami. 16Peikuaata jae reta oyapo vae rupi. Echa, ¿yaipoota pa uva guayapa güi, ani ɨva oipotagüe ɨvɨra güi? 17Echa temitɨ ikavi vae, ia ikavi. Ërei metei temitɨ ikavimbae vae, ia mbaetɨ vi ikavi. 18Metei temitɨ ikavi vae, ia ikavi. Ani metei temitɨ ikavimbae vae, ngaraa ia ikavi. 19Opaete temitɨ ia ikavimbae, iya oyasɨa jare oapɨ.#Mt 3.10; Lc 3.9. 20Jáeramo, peikuaata ko jae reta oyapo vae rupi.#Mt 12.33.

Mbaetɨi pokuaa

(Lc 13.25-27)

21Ngaraa opaete: ‘CheYa, cheYa’ jei cheve vae oike araɨgua mborookuaía pe. Jaeño oiketa cheRu ara pe oï vae jemimbota oyapo vae. 22Jeta vae jeita cheve jókuae ara: ‘¡CheYa! ¡CheYa! Ore romoërakua Tumpa iñee nderee re. Nderee re vi rombosɨrɨ aña reta oya jese vae reta güi. Jaeramiño vi nderee re royapo jeta mɨakañɨ reta.’ 23Ërei che jaeta chupe reta: ‘Pokuaaä etei. ¡Pesɨrɨ chegüi, mbaeyoa iyapoa reta!’#Sal 6.8.

Mókoi o iguapɨka reta

(Lc 6.46-49)

24Jáeramo, oime kia oyeapɨsaka cheré jare oyapo che jae chupe oyapo vaerä vae yave, tambojaanga metei kuimbae iyarakuaa vae jorä omopüa ita guasu re vae re. 25Jayave tuicha okɨ, jare täta vi ɨvɨtu, jare ɨ jeta ou oyererokua jókuae o re, Ërei mbaetɨ oitɨ. Echa oñemopüa oï metei itape re. 26Ërei oime kia oyeapɨsaka cheré vae mbaetɨ oyapo che jae chupe oyapo vaerä vae yave, tambojaanga metei kuimbae iyarakuaambae vae omopüa jorä ɨvɨkuitï re vae re. 27Jayave tuicha okɨ, jare täta vi ɨvɨtu, jare ɨ jeta ou oyererokua jókuae o re, jare opa oitɨ; opaetei oyemboai.”

28Jare Jesús opa imiari kuaekuae yave, opaete jókuae oyeapɨsaka jese vae reta ipɨakañɨ iporomboe re. 29Echa omboe reta mbaepuere reve. Mbaetɨ oporomboe mborookuai re oporomboe vae reta rami.#Mc 1.22; Lc 4.32.

موجودہ انتخاب:

SAN MATEO 7: GUABD

سرخی

کاپی

موازنہ

شئیر