SAN MATEO 16

Mɨakañɨ oipota oecha vae reta regua

(Mc 8.11-13; Lc 12.54-56)

1Fariseo reta jare saduceo reta yogüeru Jesús oïa pe, jare oiporu reta chupe oechauka vaerä chupe reta mɨakañɨ ara güi#Mt 12.38; Lc 11.16. oyavɨuka vaerä chupe. 2Ërei Jesús jei chupe reta: “Kaaruasɨ yave pemae ara re jare pere: Ara kavita pɨareve. Echa pɨ̈ta ara reta oï. 3Jökoraiño vi ndeimbove yave pere: ‘Ara pochɨta kuae ara. Echa pɨ̈ta ko ara reta jare oyasoi oï.’ Jova mókoi vae reta, peikuaa ara kërai ko oï vae re, ërei mbaetɨ etei peikuaa mbae oyeapo oï añave vae. 4Ikavimbae iyapoa reta oiporu mɨakañɨ.#Mt 12.39; Lc 11.29. Ërei mbaetɨta oyeapo chupe reta, jaeño ñeemombeúa Jonás ndive oasa vae.”

Jayave Jesús ojo ye chugüi reta.

Fariseo reta iporomboe regua

(Mc 8.14-21)

5Jesús jare jemimboe reta oasa ɨguasu jovaicho kotɨ, ërei jemimboe reta yepe iñakañɨ güɨraja mbɨyape. 6Jare Jesús jei chupe reta:

—Mase, peyeandu fariseo reta#Lc 12.1. jare saduceo reta imbɨyape imbovúa güi.

7Jayave jemimboe reta jei oyoupi ae:

—Kuae jei, yaruä mbɨyape ramo.

8Jesús oikuaa chugüi mbae jei reta vae, jare jei chupe reta:

—Michi yae iporogüɨrovia vae reta ¿Maera pa peyemongeta mbɨyape peruä vae re? 9¿Ndeiño pa peikuaa kavi? ¿Mbaetɨ pa pemaenduaä jókuae pandepo mbɨyape cinco mil vae reta#Mt 14.17-21. jou vae re. Jare jembɨregüe mbovɨ kanata pemotɨnɨe vae re? 10¿Jare chiu mbɨyape cuatro mil vae reta#Mt 15.34-38. jou vae re, jare jembɨregüe mbovɨ kanata pemotɨnɨe vae re? 11¿Maera pa mbaetɨ peikuaa che mbɨyape reä ko jae peve vae? Jae peve peyeandu vaerä fariseo reta jare saduceo reta imbɨyape imbovúa güi yave.

12Jayave ramo jemimboe reta oikuaa Jesús mbaetɨ ko jei chupe reta mbɨyape imbovúa re vae. Jaeño ko oyeandu vaerä fariseo reta jare saduceo reta iporomboe güi.

Pedro omombeu Jesús ko jae Cristo vae

(Mc 8.27-30; Lc 9.18-21)

13Jesús ojo oväe tëta guasu Cesarea Filipo iɨvɨ kotɨ yave, oparandu jemimboe reta pe:

—¿Kia pa che Kuimbaerä ayeapo vae ïru vae reta pe?

14Jayave jae reta jei chupe:

—Amogüe jei nde ko jae Juan oporombobautisa vae, jare ïru vae reta jei nde ko jae Elías, jare ïru vae reta jei nde ko jae Jeremías ani amogüe ñeemombeúa.#Mt 14.1-2; Mc 6.14-15; Lc 9.7-8.

15Jayave Jesús oparandu chupe reta:

—Ërei peve reta ¿kia pa che?

16Jayave Simón Pedro jei chupe:

—Nde ko jae Cristo, Tumpa oikove vae Taɨ.#Jn 6.68-69.

17Jayave Jesús jei Pedro pe:

—Reyekou ko Simón, Jonás taɨ. Echa cheRu ara pe oï vae ko oikuaauka ndeve kuae. Mbaetɨ ko kia oikuaauka ndeve. 18Jare che vi jae ndeve, nde jae ko Pedro. Jare che etei amopüata cherembiparavo reta kuae ita guasu re, jare mano ngaraa mbaepuere güɨnoi jese reta. 19Ameeta ndeve mbaepuere reipea vaerä araɨgua mborookuaía opaete reñapɨti ɨvɨ pe vae, oñeapɨtita vi ara pe. Jare opaete reyora ɨvɨ pe vae, oyeyorata vi ara pe.#Mt 18.18; Jn 20.23.

20Jayave Jesús oyókuai jemimboe reta agüɨye vaerä omombeu kia pe ave, jae ko Cristo vae.

Jesús omoërakua omanota ko vae re

(Mc 8.31—9.1; Lc 9.22-27)

21Jókuae ara güive Jesús omombeu jemimboe reta pe kërai jae ojota ko Jerusalén pe, jare oiporarauka yaeta chupe tenondegua reta, sacerdote reta itenondegua reta, jare mborookuai re oporomboe vae reta vae; jare oyuka retata ërei mboapɨ araa pe oikove yeta vae.

22Jayave Pedro güɨraja ïkotɨa Jesús ïru reta ipɨte güi, jare omboɨpɨ omboeta chupe, jei:

—CheYa, Tumpa agüɨye toipota, agüɨye jökorai toasa nde ndive.

23Ërei Jesús oyerova jei Pedro pe:

—Esɨrɨ chegüi, Satanás. Echa reipota chemboavai. Reyemongeta ɨvɨ pegua reta oyemongeta rami, mbaetɨ Tumpa oyemongeta rami.

24Jayave Jesús jei jemimboe reta pe:

—Kia nunga vae ikɨ̈reɨ ojo cherupíe vae, tiñakañɨ iyeugüi, tovoɨ ikurusu, jare tou cherupíe.#Mt 10.38; Lc 14.27; Jn 12.24. 25Echa opaete oipota oepɨ jekove vae, okañɨteita ko. Ërei opaete omee jekove chereko pegua vae, oikoveta ko.#Mt 10.39; Lc 17.33; Jn 12.25. 26¿Mbaerä pa osiriveta kuimbae pe omongana yave opaete ɨvɨ, ërei jekove okañɨtei?, ani ¿Mbovɨ ra omboepɨta ogua vaerä jekove? 27Echa che Kuimbaerä ayeapo vae ayu yeta cheRu iyemboetea reve jare iaraɨgua reta ndive.#Mt 25.31. Jayave amboekoviata metei ñavo vae pe jembiapo oï rupi.#Sal 62.11-12; Pr 24.12; Jer 17.10; Ez 18.30; 33.20; Ro 2.6. 28Añete che jae peve, ndei amogüe kuae pe ñogüɨnoi vae omano mbove, chereechata che Kuimbaerä ayeapo vae ayu araɨgua mborookuaía ndive.

موجودہ انتخاب:

SAN MATEO 16: GUABD

سرخی

کاپی

موازنہ

شئیر